“Iftaħ għajnejk u Ara”

X’JARAW uliedek? Gwerer? Kriminalità? Tniġġis? Faqar? Mard? Veru, dawn huma realtajiet li dejjem huma preżenti. Imma għallimthom int biex iħarsu lil hinn minn dawn l-​affarijiet lejn il-​futur meraviljuż li huwa mwiegħed fil-​Bibbja? Il-​ġenituri taʼ Joel Pierson li għandu disaʼ snin għamluh dan. B’liema riżultat?

Ikkunsidra dak li kiteb Joel fuq is-​suġġett “Iftaħ Għajnejk u Ara.” Dan is-​suġġett kien ngħata bħala inkarigu taʼ kitba għal żgħażagħ f’distrett skolastiku ġewwa Virġinja, l-​Istati Uniti. Innota kif il-​komponiment taʼ Joel, ippubblikat fil-​gazzetta The Central Virginian, fit-​22 t’Awissu, 1996, jirrivela li t-​tama tiegħu hija bbażata fuq dak li tgħallem mill-​Kelma t’Alla. Hu kiteb:

“Iftaħ għajnejk u ara, il-​ġmiel kollu li suppost kellu jkun hawn.

“Ma jkunx meraviljuż li tqum fil-​għodu u tismaʼ li m’hemmx iżjed tniġġis? Minflok aħbarijiet taʼ qtil u kriminalità, il-​paċi u l-​kuntentizza huma dawk li jkun hemm fil-​ħajjiet tan-​nies.

“Il-​ġirien qegħdin jaħdmu flimkien biex jgħinu ħabib jibni daru. Fil-​viċin, naraw oħrajn iħawlu ġnien. Mhux dan biss, imma l-​motivi tagħhom huma puri. Kulħadd qiegħed jingħaqad flimkien biex jgħinu lil xulxin. Mhux se jkun hemm iżjed nies foqra, u se jkun hemm ħafna ikel għal kulħadd. Se jkun hemm l-​unità u l-​paċi madwar id-​dinja. Ħadd m’hu se jerġaʼ jkun bil-​ġuħ jew marid. Hemm ambjent sabiħ biex jarah kulħadd u ara, hemm tifel għaddej riekeb fuq tigra! Mhux it-​tigra biss imma l-​annimali kollha huma fil-​paċi mal-​bnedmin.

“Jien nixtieq ngħix f’post bħal dan. Tixtieq int tgħix hemmhekk miegħi?”

Huwa veru li Alla jwiegħed barkiet bħal dawk li jiddeskrivi dan iż-​żagħżugħ Joel hawnhekk? Tabilħaqq li hekk jagħmel! Jekk jogħġbok iftaħ il-​Bibbja tiegħek u aqra dwar wegħdi bħal dawk misjubin f’Salm 46:​9, 10 [46:​8, 9, NW]; 67:7 [67:​6, NW]; 72:16; Isaija 2:3, 4; 11:6-9; 33:24; 65:17-25; Mattew 6:9, 10; 2 Pietru 3:13; Apokalissi 21:3, 4.