Aqra l-​Kelma t’Alla u Aqdih fil-​Verità

“Urini, Mulej, triqatek, biex nimxi fis-​sewwa tiegħek.”—SALM 86:11.

1. Essenzjalment, l-​ewwel ħarġa taʼ din ir-​rivista x’qalet dwar il-​verità?

Jehovah jixħet dawl u verità. (Salm 43:3) Jagħtina wkoll il-​kapaċità li naqraw il-​Kelma tiegħu, il-​Bibbja, u nitgħallmu l-​verità. L-​ewwel ħarġa taʼ din ir-​rivista​—Lulju 1879—​qalet: “Il-​verità, bħal fjura żgħira modesta fix-​xagħri tal-​ħajja, hija mdawra u kważi maħnuqa bil-​kobor abbundanti tal-​ħaxix ħażin taʼ qerq. Jekk trid issibha trid dejjem toqgħod attent. Jekk trid tara s-​sbuħija tagħha trid tnaqqi l-​ħaxix ħażin taʼ qerq u l-​għollieq tal-​bigottiżmu. Jekk trid tippossediha trid titbaxxa biex iġġibha. Tkunx kuntent bi fjura waħda taʼ verità. Kieku waħda kienet biżżejjed ma kienx ikun hemm iżjed. Ibqaʼ iġbor, fittex għal iżjed.” Li naqraw u nistudjaw il-​Kelma t’Alla jgħinna nakkwistaw għarfien eżatt u nimxu fil-​verità tiegħu.—Salm 86:11.

2. X’irriżulta meta Esdra u oħrajn qraw il-​Liġi t’Alla lil-​Lhud f’Ġerusalemm tal-​qedem?

² Wara li l-​ħitan taʼ Ġerusalemm inbnew mill-​ġdid fis-​sena 455 Q.E.K., il-​qassis Esdra u oħrajn qraw il-​Liġi t’Alla lil-​Lhud. Dan kien segwit minn Festa ferrieħa taʼ l-​Għerejjex, stqarrija taʼ dnubiet, u għeluq taʼ ‘ftehim taʼ min joqgħod fuqu.’ (Neħemija 8:1–10:1 [Neħemija 8:1–9:38, NW]) Naqraw: “Dawn qraw mill-​Ktieb tal-​Liġi b’mod li jiftiehem, fissruh, u spjegaw il-​qari.” (Neħemija 8:8) Xi wħud jissuġġerixxu li l-​Lhud ma kinux jifhmu l-​Ebrajk sewwa u għamlu dak il-​parafrażi bl-​Aramajk. Imma t-​test ma jindikax biss kjarifikazzjoni taʼ termini lingwistiċi. Esdra u l-​oħrajn spjegaw il-​Liġi sabiex in-​nies ikunu jistgħu jifhmu sewwa l-​prinċipji tagħha u japplikawhom. Pubblikazzjonijiet u laqgħat Kristjani wkoll iservu biex ‘ifissru’ l-​Kelma t’Alla. Hekk ukoll jagħmlu anzjani maħturin, li ‘jinqalgħu biex jgħallmu.’—1 Timotju 3:1, 2; 2 Timotju 2:24.

Benefiċċji Dejjiema

3. Liema huma xi benefiċċji miġburin mill-​qari tal-​Bibbja?

³ Meta familji Kristjani jaqraw il-​Bibbja flimkien, x’aktarx li jesperjenzaw benefiċċji dejjiema. Huma jsiru midħla tal-​liġijiet t’Alla u jitgħallmu l-​verità dwar duttrini, affarijiet profetiċi, u suġġetti oħrajn. Wara li jinqara porzjon mill-​Bibbja, il-​kap tal-​familja jistaʼ jistaqsi: Kif għandu jeffettwana dan? B’liema mod għandu x’jaqsam dan maʼ tagħlim ieħor Bibliku? Kif nistgħu nużaw dawn il-​punti fl-​ippridkar taʼ l-​aħbar tajba? Meta familja taqra l-​Bibbja tiggwadanja dehen akbar jekk huma jagħmlu riċerka billi jużaw il-​Watch Tower Publications Index jew indiċi oħrajn. Iż-​żewġ volumi taʼ Insight on the Scriptures jistgħu jiġu kkonsultati b’benefiċċji.

4. Ġożwè kif kellu japplika l-​istruzzjoni mniżżla f’Ġożwè 1:8?

⁴ Prinċipji meħudin mill-​Iskrittura jistgħu jiggwidawna fil-​ħajja. Iktar minn hekk, li naqraw u nistudjaw ‘il-​Kotba Mqaddsa jistaʼ jagħmilna għorrief għas-​salvazzjoni.’ (2 Timotju 3:15) Jekk inħallu l-​Kelma t’Alla tiggwidana, aħna se nibqgħu mexjin fil-​verità tiegħu u x-​xewqat taʼ tjieba tagħna jiġu rrealizzati. (Salm 26:3; 119:130) Madankollu, għandna bżonn infittxu l-​fehma, bħalma għamel Ġożwè, is-​suċċessur taʼ Mosè. Il-​‘ktieb tal-​liġi’ ma kellux jitbiegħed minn fommu, u kellu jaqra minnu lejl u nhar. (Ġożwè 1:8) Li ma jħallix il-​‘ktieb tal-​liġi’ jitbiegħed minn fommu kien ifisser li Ġożwè ma kellux jieqaf milli jgħid lil oħrajn l-​affarijiet taʼ tidwil li fih. Li jaqra l-​Liġi lejl u nhar kien ifisser li Ġożwè kellu jimmedita fuqha, kellu jistudjaha. L-​appostlu Pawlu bl-​istess mod ħeġġeġ lil Timotju biex ‘jitfaʼ ħsiebu’​—jimmedita fuq—​il-kondotta, il-​ministeru, u t-​tagħlim tiegħu. Bħala anzjan Kristjan, Timotju kellu jkun speċjalment attent li ħajtu kienet eżemplari u li kien jgħallem verità Skritturali.—1 Timotju 4:15.

5. X’inhu meħtieġ jekk irridu nsibu l-​verità t’Alla?

⁵ Il-​verità t’Alla hija teżor imprezzabbli. Biex issibha jirrikjedi tħaffir, tiftix persistenti fl-​Iskrittura. Huwa biss bħala studenti żgħar taʼ l-​Għalliem il-​Kbir li se niksbu għerf u naslu biex nifhmu l-​biżaʼ reverenzjali taʼ Jehovah. (Proverbji 1:7; Isaija 30:20, 21) M’għandniex xi ngħidu, għandna niksbu prova Skritturali taʼ l-​affarijiet. (1 Pietru 2:1, 2) Lhud fil-​Berea “kienu nies taʼ qalb kbira aktar minn dawk taʼ Tessalonika; huma laqgħu l-​kelma bil-​ħeġġa kollha, u kuljum bdew iqallbu l-​Iskrittura biex jaraw jekk dak li semgħu [mingħand Pawlu] kienx minnu.” Il-​Bereani kienu mfaħħrin mhux imċanfrin talli għamlu dan.—Atti 17:10, 11.

6. Ġesù għala setaʼ jindika li ma kien taʼ ebda ġid għal ċerti Lhud li jfittxu fl-​Iskrittura?

⁶ Ġesù qal lil xi Lhud: “Intom tistudjaw l-​Iskrittura, għax tgħidu li fiha hemm il-​ħajja taʼ dejjem; hemmhekk issibu x-​xhieda fuqi, u madankollu ma tridux tiġu għandi biex ikollkom il-​ħajja.” (Ġwann 5:39, 40) Huma fittxew fl-​Iskrittura bl-​oġġettiv xieraq​—biex din tistaʼ tiggwidahom għall-​ħajja. Tabilħaqq, l-​Iskrittura kien fiha profeziji Messjaniċi li ppontaw lejn Ġesù bħala l-​mezz tal-​ħajja. Imma l-​Lhud warrbuh. Li jfittxu fl-​Iskrittura, għalhekk, m’għamlilhom l-​ebda ġid.

7. X’inhu meħtieġ biex nikbru fil-​fehma tal-​Bibbja, u għala?

⁷ Biex nikbru fil-​fehma tagħna tal-​Bibbja, neħtieġu l-​gwida taʼ l-​ispirtu, jew forza attiva, t’Alla. “L-​Ispirtu jgħarbel kollox, sa fil-​qiegħ taʼ Alla” sabiex joħroġ it-​tifsir taʼ l-​affarijiet kollha. (1 Korintin 2:10) Kristjani f’Tessalonika kellhom ‘ikunu ċerti mill-​affarijiet kollha’ fi kwalunkwe profezija li semgħu. (1 Tessalonikin 5:20, 21) Meta Pawlu kiteb lit-​Tessalonkin (madwar is-​sena 50 E.K.), l-​unika parti taʼ l-​Iskrittura Griega miktuba sa dak iż-​żmien kien il-​Vanġelu taʼ Mattew. Għalhekk it-​Tessalonkin u l-​Bereani setgħu jkunu ċerti mill-​affarijiet kollha, x’aktarx billi jiċċekkjaw il-​verżjoni tas-​Settwaġinta Griega taʼ l-​Iskrittura Ebrajka. Kellhom bżonn jaqraw u jistudjaw l-​Iskrittura, u hekk ukoll għandna nagħmlu aħna.

Vitali Għal Kulħadd

8. Anzjani maħturin għala jridu jkunu minn taʼ quddiem fl-​għarfien Bibliku?

⁸ Anzjani maħturin għandhom ikunu minn taʼ quddiem fl-​għarfien Bibliku. Iridu jkunu ‘jinqalgħu biex jgħallmu’ u jridu ‘jżommu sħiħ mal-​kelma taʼ min jemminha.’ L-​indokratur Timotju kellu ‘jxandar bir-​reqqa l-​kelma tal-​verità.’ (1 Timotju 3:2; Titu 1:9; 2 Timotju 2:15) Ommu, Ewnike, u nanntu Lojs kienu għallmuh il-​kitbiet sagri mill-​infanzja, billi nisslu fih ‘fidi mhux ipokrita,’ għalkemm missieru ma kienx kredent. (2 Timotju 1:5; 3:15) Missirijiet li huma kredenti għandhom itellgħu lil uliedhom “fid-​dixxiplina u t-​twiddib tal-​Mulej,” u speċjalment anzjani li huma missirijiet iridu jkollhom ‘lil uliedhom li jemmnu, bla ma ħadd jistaʼ jixlihom b’imġiba żienja jew bla rażan.’ (Efesin 6:4; Titu 1:6) Minkejja ċ-​ċirkostanzi tagħna, allura, għandna nieħdu b’serjetà kbira l-​bżonn li naqraw, nistudjaw, u napplikaw il-​Kelma t’Alla.

9. Għala għandna nistudjaw il-​Bibbja flimkien maʼ Kristjani sħabna?

⁹ Għandna wkoll nistudjaw il-​Bibbja flimkien maʼ kredenti sħabna. Pawlu ried li l-​Kristjani Tessalonkin jiddiskutu flimkien il-​parir tiegħu. (1 Tessalonikin 4:18) Biex intejbu l-​fehma tagħna tal-​verità, m’hemm xejn aħjar milli ningħaqdu maʼ studenti devoti oħrajn f’li neżaminaw l-​Iskrittura. Minnu l-​proverbju: “Kif il-​ħadid isinn il-​ħadid, hekk jitgħallem wieħed mill-​ieħor.” (Proverbji 27:17) Biċċa għodda tal-​ħadid tistaʼ ssaddad jekk ma tibqax tintuża u misnuna. Bl-​istess mod, għandna bżonn niltaqgħu regolarment u nsinnu lil xulxin billi naqsmu għarfien li ksibna minn qari, studju, u mmeditar fuq il-Kelma t’Alla taʼ verità. (Lhud 10:24, 25) Iktar minn hekk, dan huwa mod wieħed biex inkunu ċerti li nibbenefikaw minn leħħiet taʼ dawl spiritwali.—Salm 97:11; Proverbji 4:18.

10. X’ifisser li nimxu fil-​verità?

¹⁰ Fl-​istudju tagħna taʼ l-​Iskrittura, nistgħu b’mod xieraq nitolbu ’l Alla bħalma għamel is-​salmista: “Ibgħat id-​dawl tiegħek u s-​sewwa tiegħek: huma jmexxuni.” (Salm 43:3) Jekk nixtiequ li jkollna l-​approvazzjoni t’Alla, għandna nimxu fil-​verità tiegħu. (3 Ġwann 3, 4) Dan jinkludi li nimxu mal-​ħtiġijiet tiegħu u naqduh bil-​fedeltà u s-​sinċerità. (Salm 25:4, 5; Ġwann 4:23, 24) Irridu naqdu lil Jehovah fil-​verità, bħalma huwa rrivelat fil-​Kelma tiegħu u magħmul ċar fil-​pubblikazzjonijiet taʼ “l-​irsir leali u diskret.” (Mattew 24:45-47, NW) Dan jitlob għal għarfien eżatt taʼ l-​Iskrittura. Kif, allura, għandna naqraw u nistudjaw il-​Kelma t’Alla? Għandna nibdew naqrawha minn Ġenesi kapitlu 1, vers 1, u nibqgħu sejrin tul is-​66 ktieb? Iva, kull Kristjan li għandu l-​Bibbja kompleta bil-​lingwa tiegħu għandu jaqraha minn Ġenesi s’Apokalissi. U l-​oġġettiv tagħna f’li naqraw il-​Bibbja u l-​pubblikazzjonijiet Kristjani għandu jkun li nżidu l-​fehma tagħna tal-​ġemgħa kbira taʼ verità Skritturali li Alla għamel disponibbli permezz taʼ “l-​irsir leali.”

Aqra L-​Kelma T’Alla B’Leħen Għoli

11, 12. Għala huwa taʼ benefiċċju li jkollok il-​Bibbja moqrija b’leħen għoli fil-​laqgħat?

¹¹ Aħna nistgħu naqraw f’qalbna meta nkunu waħedna. Fi żminijiet tal-​qedem, madankollu, qari privat kien isir b’leħen għoli. Waqt li l-​ewnuku Etjopjan kien għaddej riekeb fil-​karru tiegħu, l-​evanġelizzatur Filippu għalhekk semgħu jaqra mill-​profezija taʼ Isaija. (Atti 8:27-30) Il-​kelma Ebrajka tradotta “jaqra” primarjament tfisser “isejjaħ.” Mela dawk li inizjalment ma jistgħux jaqraw f’qalbhom u jieħdu s-​sens tal-​qari m’għandhomx ikunu skuraġġiti milli jippronunzjaw kull kelma b’leħen għoli. Il-​ħaġa prinċipali hi li titgħallem il-​verità billi taqra l-​Kelma miktuba t’Alla.

¹² Huwa taʼ benefiċċju li jkollok il-​Bibbja moqrija b’leħen għoli f’laqgħat Kristjani. L-​appostlu Pawlu ħeġġeġ lill-​ħaddiem sieħbu Timotju: “Ħu ħsieb il-​qari [pubbliku] tal-​Kotba Mqaddsa, it-​twissijiet u t-​tagħlim.” (Korsiv tagħna.) (1 Timotju 4:13) Pawlu qal lill-​Kolossin: “Meta tkunu qrajtu din l-​ittra, ħudu ħsieb li jaqrawha wkoll fil-​Knisja taʼ Laödiċija, u intom taqraw l-​ittra taʼ Laödiċija.” (Kolossin 4:16) U Apokalissi 1:3 jgħid: “Hieni dak li jaqra [b’leħen għoli] u dawk li jisimgħu l-​kliem taʼ din il-​profezija u jħarsu dak li hemm miktub, għax iż-​żmien qorob!” Għalhekk, kelliemi pubbliku għandu jaqra testi mill-​Bibbja biex jappoġġja dak li qiegħed jgħid lil xi kongregazzjoni.

Metodu Topiku Taʼ Studju

13. Liema huwa l-​iktar metodu progressiv biex titgħallem veritajiet Bibliċi, u x’jistaʼ jgħinna nsibu skritturi?

¹³ Studju topiku huwa l-​iktar metodu progressiv biex titgħallem veritajiet Skritturali. Konkordanzi, li jagħtu kliem Bibliċi b’mod alfabetiku fil-​kuntest tagħhom skond il-​ktieb, il-​kapitlu, u l-​vers, jagħmluha eħfef biex issib testi relatati maʼ ċertu suġġett. U skritturi bħal dawn jistgħu jinġiebu f’armonija waħda maʼ l-​oħra għaliex l-​Awtur tal-​Bibbja ma jikkontradixxix lilu nnifsu. Bl-​ispirtu qaddis, hu ispira madwar 40 raġel biex jiktbu l-​Bibbja matul perijodu taʼ 16-il seklu, u li tistudjaha b’mod topiku huwa mod ippruvat biż-​żmien taʼ kif wieħed jitgħallem il-​verità.

14. Għala għandna nistudjaw l-​Iskrittura Ebrajka u dik Kristjana Griega flimkien?

¹⁴ L-​apprezzament tagħna għall-​verità tal-​Bibbja għandu jqanqalna biex naqraw u nistudjaw l-​Iskrittura Kristjana Griega flimkien maʼ l-​Iskrittura Ebrajka. Dan se juri kif l-​Iskrittura Griega hija marbuta maʼ l-​iskop t’Alla u se jixħet dawl fuq profeziji taʼ l-​Iskrittura Ebrajka. (Rumani 16:25-27; Efesin 3:4-6; Kolossin 1:26) T’għajnuna kbira f’dan ir-​rigward hemm in-​New World Translation of the Holy Scriptures. Din ġiet ippreparata minn qaddejja ddedikati t’Alla li ħadu vantaġġ taʼ l-​għarfien miżjud disponibbli rigward it-​test oriġinali tal-​Bibbja kif ukoll l-​isfond u l-​espressjonijiet idjomatiċi tagħha. Vitali, ukoll, huma l-​għajnuniet taʼ studju tal-​Bibbja li Jehovah ipprovda permezz taʼ “l-​irsir leali u diskret.”

15. Kif tagħti prova li hu xieraq li tikkwota minn hawn u minn hemm fil-​Bibbja?

¹⁵ Xi wħud jistgħu jgħidu, ‘Il-​pubblikazzjonijiet tagħkom jagħmlu eluf taʼ kwotazzjonijiet mill-​Bibbja, iżda għaliex teħduhom minn hawn u minn hemm?’ Billi jikkwotaw minn hawn u minn hemm fis-​66 ktieb tal-​Bibbja, il-​pubblikazzjonijiet jisiltu minn ħafna xhieda ispirati biex jagħtu prova tal-​verità taʼ xi tagħlim. Ġesù nnifsu uża dan il-​metodu taʼ istruzzjoni. Meta ta l-​Priedka tiegħu taʼ fuq il-​Muntanja, hu għamel 21 kwotazzjoni mill-​Iskrittura Ebrajka. Dik it-​taħdita fiha tliet kwotazzjonijiet minn Eżodu, tnejn minn Levitiku, waħda minn Numri, sitta minn Dewteronomju, waħda mit-​Tieni Slaten, erbgħa minn Salmi, tlieta minn Isaija, u waħda minn Ġeremija. Billi għamel hekk, kien Ġesù ‘qiegħed jagħti prova taʼ xi ħaġa tkun xi tkun’? Le, għaliex ‘hu għallem bħal wieħed li għandu s-​setgħa, u mhux bħall-​kittieba.’ Dan kien hekk għaliex Ġesù dejjem appoġġja t-​tagħlim tiegħu bl-​awtorità tal-​Kelma miktuba t’Alla. (Mattew 7:29) Hekk ukoll għamel l-​appostlu Pawlu.

16. Pawlu liema kwotazzjonijiet Skritturali għamel f’Rumani 15:7-13?

¹⁶ Fil-​passaġġ taʼ l-​iskrittura li nsibu f’Rumani 15:7-13, Pawlu kkwota minn tliet sezzjonijiet taʼ l-​Iskrittura Ebrajka​—il-​Liġi, il-Profeti, u s-​Salmi. Hu wera li Lhud u Ġentili kellhom jigglorifikaw ’l Alla, u l-​Kristjani għandhom b’hekk jilqgħu nies mill-​ġnus kollha. Pawlu qal: “Ilqgħu lil xulxin bħalma Kristu wkoll laqaʼ lilkom, għall-​glorja taʼ Alla. Jiena ngħidilkom li Kristu sar qaddej tal-​Lhud ċirkonċiżi minħabba l-​fedeltà taʼ Alla, biex iseħħu l-​wegħdiet li għamel lill-​Patrijarki, u biex il-​pagani wkoll ifaħħru lil Alla minħabba l-​ħniena tiegħu bħalma huwa miktub [f’Salm 18:50 (Salm 18:49, NW)]: ‘Għalhekk jiena nfaħħrek fost il-​ġnus u ngħanni tifħir ismek.’ U ttenni tgħid [f’Dewteronomju 32:43]: ‘Ifirħu, intom ġnus, flimkien mal-​poplu tiegħu’; u terġaʼ f’Salm 117:1: ‘Faħħru lill-​Mulej, intom ġnus kollha, ħa jfaħħruh il-​popli kollha.’ U jerġaʼ jgħid ukoll Isaija 11:1, 10: ‘u joħroġ għerq minn Ġessi; iqum biex jaħkem il-​ġnus; u fih il-​ġnus iqiegħdu t-​tama tagħhom.’ U Alla tat-​tama jimliekom ilkoll bil-​ferħ u s-​sliem permezz tal-​fidi tagħkom, sabiex it-​tama tagħkom toktor bil-​qawwa taʼ l-​Ispirtu s-​Santu.” B’dan il-​metodu topiku, Pawlu wera kif wieħed jikkwota skritturi biex jistabbilixxi veritajiet Bibliċi.

17. Il-​Kristjani f’armonija maʼ liema preċedent jikkwotaw minn hawn u minn hemm fil-​Bibbja kollha?

¹⁷ L-​ewwel ittra ispirata taʼ l-​appostlu Pietru fiha 34 kwotazzjoni minn għaxar kotba fil-​Liġi, fil-​Profeti, u fis-​Salmi. Fit-​tieni ittra tiegħu, Pietru jikkwota sitt darbiet minn tliet kotba. Il-​Vanġelu taʼ Mattew għandu 122 kwotazzjoni minn Ġenesi sa Malakija. Fis-​27 ktieb taʼ l-​Iskrittura Griega, hemm 320 kwotazzjoni diretta minn Ġenesi sa Malakija kif ukoll mijiet taʼ referenzi oħrajn għall-​Iskrittura Ebrajka. F’armonija mal-​preċedent stabbilit minn Ġesù u segwit mill-​appostli tiegħu, meta Kristjani taż-żmien modern jagħmlu studju topiku taʼ suġġett Skritturali, huma jikkwotaw minn hawn u minn hemm fil-​Bibbja kollha. Dan hu speċjalment xieraq f’dawn “l-​aħħar jiem,” meta l-​biċċa l-​kbira mill-​Iskrittura Ebrajka u dik Griega qiegħda titwettaq. (2 Timotju 3:1) “L-​irsir leali” jagħmel użu bħal dan mill-Bibbja fil-​pubblikazzjonijiet tiegħu, iżda qatt ma jżid mal-​Kelma t’Alla jew inaqqas minnha.—Proverbji 30:5, 6; Apokalissi 22:18, 19.

Imxi Dejjem Fil-​Verità

18. Għala għandna ‘nimxu fil-​verità’?

¹⁸ Qatt m’għandna nnaqqsu xi ħaġa mill-​Bibbja, għaliex it-​tagħlim Kristjan kollu fil-​Kelma t’Alla hu l-​“verità” jew “il-​verità taʼ l-​Evanġelju.” Żamma maʼ din il-​verità​—‘mixi’ fiha—​hija vitali għas-​salvazzjoni. (Galatin 2:5; 2 Ġwann 4; 1 Timotju 2:3, 4) Ladarba l-​Kristjanità hi “t-​triq tal-​verità,” billi ngħinu lil oħrajn f’li javanzaw l-​interessi tagħha, aħna nsiru ‘ħaddiema mseħbin fil-​verità.’—2 Pietru 2:2; 3 Ġwann 8.

19. Kif nistgħu nibqgħu ‘nimxu fil-​verità’?

¹⁹ Jekk aħna se nibqgħu “mexjin fil-​verità,” irridu naqraw il-​Bibbja u nieħdu vantaġġ mill-​għajnuna spiritwali li Alla jipprovdi permezz taʼ “l-​irsir leali.” (3 Ġwann 4) Jalla nagħmlu dan għall-​ġid tagħna stess biex b’hekk inkunu f’pożizzjoni li ngħallmu lil oħrajn dwar Alla Jehovah, Ġesù Kristu, u l-​iskop divin. U ejjew inkunu grati li l-​ispirtu taʼ Jehovah jgħinna nifhmu l-​Kelma tiegħu u nirnexxu f’li naqduh fil-​verità. (w96 5/15)

X’Inhuma T-​Tweġibiet Tiegħek?

◻ Liema huma xi benefiċċji dejjiema taʼ qari tal-​Bibbja?

◻ Għala għandna nistudjaw il-​Bibbja flimkien maʼ kredenti sħabna?

◻ Għala huwa xieraq li tikkwota minn diversi postijiet mill-​Bibbja kollha?

◻ X’ifisser li ‘timxi fil-​verità,’ u kif nistgħu nagħmlu hekk?

[Stampa f’paġna 14]

Ġenituri, għallmu l-​Iskrittura lil uliedkom

[Stampa f’paġna 16]

Fil-​Priedka tiegħu taʼ fuq il-​Muntanja, Ġesù kkwota minn diversi partijiet taʼ l-​Iskrittura Ebrajka