Kif Indokraturi li Jivvjaġġaw Jaqdu Bħala Prokuraturi Leali

“Kull wieħed minnkom igħix skond id-​don li irċieva u jinqeda bih għall-​ġid taʼ l-​oħrajn, hekk tkunu amministraturi tajbin [“prokuraturi mill-​aħjar,” NW] tal-​grazzja taʼ Alla, li hi taʼ ħafna xorta.”—1 PIETRU 4:10.

1, 2. (a) Int kieku kif tispjegaha l-​kelma “prokuratur”? (b) Min hu inkluż fost il-​prokuraturi wżati minn Alla?

JEHOVAH juża lill-​Kristjani leali kollha bħala prokuraturi. Prokuratur taʼ spiss ikun qaddej inkarigat biex jieħu ħsieb lil tad-​dar. Għandu mnejn ukoll jamministra n-​negozju tas-​sid tiegħu. (Luqa 16:1-3; Galatin 4:1, 2) Lill-​ġemgħa taʼ wħud leali u midlukin fuq l-​art Ġesù sejħilhom “il-​prokuratur leali.” Lil dan il-​prokuratur fdalu “dak kollu li jippossiedi,” inklużi l-​attivitajiet taʼ l-​ippridkar tas-​Saltna.—Luqa 12:42-44, NW; Mattew 24:14, 45, NW.

² L-​appostlu Pietru qal li l-​Kristjani kollha huma prokuraturi tal-​qalb tajba mhix mistħoqqa t’Alla espressa b’diversi modi. Kull Kristjan għandu postu f’li jwettaq xogħol leali taʼ prokuratur. (1 Pietru 4:10) Anzjani Kristjani maħturin huma prokuraturi, u fosthom hemm l-​indokraturi li jivvjaġġaw. (Titus 1:7, NW) Dawn l-​anzjani li jivvjaġġaw kif għandhom jiġu meqjusin? Liema kwalitajiet u objettivi għandu jkollhom? U kif jistgħu jwettqu l-​iktar ġid?

Grati Għas-​Servizz Tagħhom

3. L-​indokraturi li jivvjaġġaw għala jistgħu jissejħu “prokuraturi mill-​aħjar”?

³ Koppja Kristjana miżżewġa kitbu lil indokratur li jivvjaġġa u lil mara tiegħu u qalulhom: “Nixtiequ nesprimu l-​gratitudni tagħna għall-​ħin u l-​imħabba kollha li tajtuna. Bħala familja, ibbenefikajna ferm mill-​inkuraġġiment u l-​pariri kollha tagħkom. Nafu li rridu nkomplu nikbru spiritwalment, imma bil-​għajnuna taʼ Jehovah u b’aħwa rġiel u nisa bħalkom, it-​taħbit tat-​tkabbir jintgħamel iktar faċli.” Espressjonijiet bħal dawn huma spissi minħabba li l-​indokraturi li jivvjaġġaw juru interess persunali fi kredenti sħabhom, sewwa sew bħalma prokuratur tajjeb jieħu ħsieb sew tal-​ħtiġijiet tan-​nies taʼ dar. Xi wħud huma kelliema li jispikkaw. Ħafna jibbrillaw fix-​xogħol taʼ l-​ippridkar, waqt li oħrajn huma magħrufin għall-​kordjalità u l-​mogħdrija tagħhom. Billi jikkultivaw u jużaw għotjiet bħal dawn biex jimministraw għal oħrajn, l-​indokraturi li jivvjaġġaw jistgħu b’mod xieraq jissejħu “prokuraturi mill-​aħjar.”

4. Liema mistoqsija se tiġi kkunsidrata issa?

⁴ “Dak li huwa mfittex fi prokuraturi huwa li bniedem jinstab li hu leali,” kiteb l-​appostlu Pawlu. (1 Korintin 4:2, NW) L-​imministrar għal Kristjani sħabhom f’kongregazzjoni differenti għal ġimgħa wara l-​oħra huwa privileġġ uniku u taʼ ferħ. Minkejja dan, huwa wkoll responsabbiltà kbira. Indokraturi li jivvjaġġaw kif, allura, jistgħu jwettqu fedelment u b’suċċess ix-​xogħol tagħhom taʼ prokuratur?

Iwettqu B’Suċċess Ix-​Xogħol Tagħhom Taʼ Prokuratur

5, 6. Serħan fuq Jehovah bit-​talb għala huwa daqshekk importanti fil-​ħajja taʼ indokratur li jivvjaġġa?

⁵ Serħan fuq Jehovah bit-​talb huwa essenzjali jekk indokraturi li jivvjaġġaw se jkollhom suċċess bħala prokuraturi. Minħabba l-​iskeda u l-​ħafna responsabbiltajiet tagħhom, jistgħu xi kultant iħossuhom imtaqqlin. (Qabbel it-2 Korintin 5:4.) Għalhekk għandhom bżonn jaġixxu f’armonija maʼ l-​għanja tas-​Salmista David: “Qiegħed it-​tagħbija tiegħek fuq il-​Mulej, u hu jgħinek: hu qatt ma jħalli l-​ġust jitfixkel.” (Salm 55:22, KŻ) Taʼ faraġ, ukoll, huwa l-​kliem taʼ David: “Ikun imbierek Jehovah, li kuljum iġorr it-​tagħbija għalina.”—Salm 68:19, NW.

⁶ Pawlu minfejn ġab is-​saħħa biex jieħu ħsieb ir-​responsabbiltajiet spiritwali tiegħu? “Għal kollox niflaħ bis-​saħħa taʼ dak li jqawwini,” hu kiteb. (Filippin 4:13) Iva, Alla Jehovah kien is-​Sors tas-​saħħa taʼ Pawlu. B’mod simili, Pietru ta l-​parir: “Jekk xi ħadd jimministra, ħalli jimministra bħala dipendenti fuq is-​saħħa li Alla jforni; sabiex f’kollox Alla jiġi gglorifikat permezz taʼ Ġesù Kristu.” (1 Pietru 4:11, NW) Wieħed ħu li kien indokratur li jivvjaġġa għal ħafna snin enfasizza l-​ħtieġa taʼ li wieħed jistrieħ fuq Alla billi jistqarr: “Dejjem strieħ fuq Jehovah biex jgħinek tkampa mal-​problemi, u fittex l-​għajnuna taʼ l-​organizzazzjoni tiegħu.”

7. Il-​bilanċ kif għandu parti fix-​xogħol taʼ indokratur li jivvjaġġa?

⁷ Bilanċ huwa meħtieġ minn indokratur li jivvjaġġa li jirnexxi. Bħal Kristjani oħrajn, hu jistinka biex ‘jistaʼ jagħraf jagħżel l-​aħjar.’ (Filippin 1:10)a Meta l-​anzjani lokali jkollhom xi mistoqsijiet dwar ċerta kwistjoni, huwa għaqli għalihom li jikkonsultaw maʼ l-​indokratur tas-​circuit li jkun qiegħed iżurhom. (Proverbji 11:14; 15:22) X’aktarx li l-​osservazzjonijiet ibbilanċjati u l-​parir Skritturali tiegħu juru kemm huma verament t’għajnuna hekk kif l-​anzjani jkomplu jittrattaw il-​kwistjoni wara li hu jkun ħalla l-​kongregazzjoni. F’linji taʼ ħsieb simili, Pawlu qal lil Timotju: “Kull ma smajt mingħandi quddiem ħafna xiehda, għaddih lil nies taʼ fiduċja, li huma stess ikollhom il-​ħila jgħallmuh ukoll lil oħrajn.”—2 Timotju 2:2.

8. L-​istudju tal-​Bibbja, ir-​riċerka, u l-​meditazzjoni għala huma essenzjali?

⁸ Studju Skritturali, riċerka, u meditazzjoni huma rekwiżiti biex wieħed jagħti parir tajjeb. (Proverbji 15:28) Indokratur tad-​distrett qal: “Meta niltaqgħu maʼ l-​anzjani, m’għandniex nibżgħu nammettu li ma nafux it-​tweġiba għal xi mistoqsija partikulari.” Li nagħmlu l-​isforz biex niksbu “il-​ħsieb taʼ Kristu” fuq kwistjoni jagħmilha possibbli biex nagħtu parir ibbażat fuq il-​Bibbja li se jgħin lil oħrajn jikkonformaw mar-​rieda t’Alla. (1 Korintin 2:16) Xi kultant indokratur li jivvjaġġa jkollu bżonn jikteb lill-​Watch Tower Society għal direzzjoni. Ikun x’ikun il-​każ, fidi f’Jehovah u mħabba għall-​verità huma bil-​wisq iktar importanti minn kemm naqtgħu figura tajba, jew minn elokwenza. Minflok ma ġie “bi kliem kbir jew għaref,” Pawlu beda l-​ministeru tiegħu f’Korintu “dgħajjef, imbeżżaʼ u mriegħed.” Għamlu dan mhux effettiv? Għall-​kuntrarju, dan għen lill-​Korintin biex ikollhom fidi, “mhux fuq il-​għerf tal-​bniedem, imma fuq il-​qawwa taʼ Alla.”—1 Korintin 2:1-5.

Kwalitajiet Vitali Oħrajn

9. L-​empatija għala hija meħtieġa minn anzjani li jivvjaġġaw?

⁹ L-​empatija tgħin lill-​indokraturi li jivvjaġġaw jiksbu riżultati tajbin. Pietru ħeġġeġ lill-​Kristjani kollha biex ‘iħossu għal xulxin,’ jew biex juru “simpatija.” (1 Pietru 3:8) Wieħed indokratur tas-​circuit iħoss il-​bżonn li ‘jkun interessat f’kulħadd fil-​kongregazzjoni u jkun attent b’mod ġenwin.’ Bi spirtu simili Pawlu kiteb: “Ifirħu maʼ min jifraħ, ibku maʼ min jibki.” (Rumani 12:15) Attitudni bħal din tqanqal lill-​indokraturi tas-​circuit biex jagħmlu sforzi sinċieri ħalli jifhmu l-​problemi u ċ-​ċirkostanzi taʼ kredenti sħabhom. Imbagħad jistgħu jagħtu pariri Skritturali li jibnu u li jistgħu jwettqu ġid veru jekk jiġu applikati. Indokratur tas-​circuit li jibbrilla f’li juri l-​empatija rċieva din l-​ittra minn kongregazzjoni qrib Turin, l-​Italja: “Jekk trid tkun interessanti, uri interess; jekk trid tingħoġob, ogħġob; jekk trid tkun maħbub, ħobb; jekk trid tiġi mgħejjun, kun lest li tgħin. Dan huwa dak li tgħallimna mingħandek!”

10. Indokraturi tas-​circuit u distrettwali x’qalu dwar li wieħed ikun umli, u Ġesù liema eżempju stabbilixxa f’dan ir-​rigward?

¹⁰ Li jkunu umli u li tistaʼ tavviċinahom jgħin lill-​indokraturi li jivvjaġġaw jagħmlu ħafna ġid. Indokratur tas-​circuit osserva: “Huwa ferm importanti li żżomm attitudni umli.” Hu jwissi lil indokraturi ġodda li jivvjaġġaw: “Tħallux lilkom infuskom tiġu influwenzati żżejjed minn aħwa tat-​tajjeb minħabba dak li forsi jagħmlu magħkom, lanqas ma tillimitaw il-​ħbiberija tagħkom għal uħud bħal dawn, imma stinkaw dejjem biex tittrattaw m’oħrajn b’mod imparzjali.” (2 Kronaki 19:6, 7) U indokratur li jivvjaġġa li jkun verament umli m’huwiex se jkollu opinjoni esaġerata taʼ l-​importanza tiegħu stess bħala rappreżentant tas-​Soċjetà. Indokratur distrettwali b’mod xieraq ikkummenta: “Kun umli u lest li tismaʼ lill-​aħwa. Dejjem għamilha faċli li javviċinawk.” Bħala l-​aqwa bniedem li qatt għex, Ġesù Kristu lin-​nies setaʼ ġagħalhom iħossuhom skomdi, imma tant kien umli u li setaʼ jiġi avviċinat li saħansitra t-​tfal ħassewhom komdi fil-​preżenza tiegħu. (Mattew 18:5; Mark 10:13-16) Indokraturi li jivvjaġġaw iridu li tfal, żgħażagħ u u wħud avanzati​—tabilħaqq kwalunkwe wieħed u waħda fil-​kongregazzjoni—​iħossuhom komdi li javviċinawhom.

11. Meta jkun hemm bżonn t’apoloġija, x’jistaʼ jkun l-​effett tagħha?

¹¹ M’għandniex xi ngħidu, “aħna lkoll niżbaljaw, u taʼ sikwit,” u l-​ebda indokratur li jivvjaġġa m’hu meħlus milli jagħmel xi żbalji. (Ġakbu 3:2) Meta jiżbaljaw, apoloġija sinċiera tkun eżempju t’umiltà għal anzjani oħrajn. Skond Proverbji 22:4, “min jiċċekken u jibżaʼ [b’mod reverenzjali] mill-​Mulej, jieħu bi ħlasu għana, ġieħ u ħajja.” U mhux il-​qaddejja t’Alla kollha kemm huma jeħtieġu li ‘jkunu umli fl-​imġiba tagħhom maʼ Alla’? (Mikea 6:8) Meta ġie mistoqsi liema parir kien ikollu għal xi anzjan li jivvjaġġa ġdid, wieħed indokratur tas-​circuit ikkummenta: “Uri rispett u konsiderazzjoni profondi lejn l-​aħwa kollha, u ikkunsidrahom bħala li huma aħjar minnek. Int se titgħallem ferm mill-​aħwa. Ibqaʼ umli. Kun naturali. Tagħmilx l-​arja.”—Filippin 2:3.

12. Iż-​żelu għall-​ministeru Kristjan għala huwa tant sinjifikanti?

¹² Żelu għall-​ministeru Kristjan jagħti iktar tifsir lill-​kliem taʼ indokratur li jivvjaġġa. Fil-​fatt, meta hu u l-​mara tiegħu jagħtu l-​eżempju fix-​xogħol tax-​xandir, l-​anzjani, in-​nisa tagħhom, u l-​bqija tal-​kongregazzjoni jiġu inkuraġġiti biex juru żelu fil-​ministeru tagħhom. “Kunu żelużi għas-​servizz,” ħeġġeġ indokratur tas-​circuit. Hu żied: “Jien sibt li, ġeneralment, iktar ma kongregazzjoni tkun żeluża fil-​ministeru, inqas se jkollha problemi.” Indokratur tas-​circuit ieħor irrimarka: “Nemmen li jekk l-​anzjani jaħdmu fl-​għalqa maʼ l-​aħwa rġiel u nisa u jgħinuhom jieħdu gost fil-​ministeru, dan se jirriżulta f’paċi tal-​moħħ u fl-​aqwa sodisfazzjon taʼ li wieħed jaqdi lil Jehovah.” L-​appostlu Pawlu ‘għamel il-​qalb, u fost ħafna taħbit xandar l-​evanġelju taʼ Alla lit-​Tessalonikin.’ Mhux taʼ b’xejn li kellhom memorji sbieħ taż-​żjara u l-​attività taʼ l-​ippridkar tiegħu u kienu ħerqanin biex jerġgħu jarawh!—1 Tessalonikin 2:1, 2; 3:6.

13. Indokratur li jivvjaġġa x’jieħu inkonsiderazzjoni meta jkun qiegħed jaħdem maʼ Kristjani sħabu fis-​servizz taʼ l-​għalqa?

¹³ Meta jaħdem flimkien maʼ Kristjani sħabu fil-​ministeru taʼ l-​għalqa, indokratur li jivvjaġġa jqis iċ-​ċirkostanzi u l-​limitazzjonijiet tagħhom. Għalkemm is-​suġġerimenti tiegħu jistgħu jkunu t’għajnuna, jaf li xi wħud se jħossuhom mifxulin meta jaħdmu m’anzjan taʼ l-​esperjenza. F’ċerti każi, għalhekk, inkuraġġiment jistaʼ jkun iktar utli minn parir. Meta jakkumpanja pubblikaturi u pijunieri fuq studju tal-​Bibbja, huma għandhom mnejn jippreferu li jikkonduċih hu. Dan x’aktarx li se jagħmilhom familjari maʼ xi modi biex itejbu l-​metodi tagħhom taʼ tagħlim.

14. Għala jistaʼ jingħad li indokraturi li jivvjaġġaw żelużi jistimulaw iż-​żelu f’oħrajn?

¹⁴ Indokraturi li jivvjaġġaw żelużi jistimulaw żelu f’oħrajn. Indokratur tas-​circuit fl-​Uganda mexa minn ġol-​foresta densa għal siegħa sħiħa sabiex jakkumpanja lil ħu fuq studju tal-​Bibbja li ma tantx kien qiegħed jagħmel progress. Matul il-​mixja tagħhom tant għamlet xita bil-​qliel li waslu mxarrbin għasra. Meta l-​familja taʼ sitta min-​nies saru jafu li l-​viżitatur tagħhom kien indokratur li jivvjaġġa huma baqgħu impressjonati ferm. Kienu jafu li l-​qassisin tagħhom qatt ma kienu se juru interess bħal dan fil-​merħla. Il-​Ħadd taʼ wara, attendew il-​laqgħa għall-​ewwel darba u esprimew ix-​xewqa li jsiru Xhieda taʼ Jehovah.

15. Liema esperjenza mill-​aħjar gawda indokratur żeluż tas-​circuit fil-​Messiku?

¹⁵ Fl-​Istat Messikan taʼ Oaxaca, indokratur tas-​circuit għamel sforz li tassew ma kienx mistenni minnu. Hu rranġa li joqgħod f’ċella tal-​ħabs għal erbat iljieli sabiex iżur grupp taʼ sebaʼ ħabsin li kienu saru pubblikaturi tas-​Saltna. Għal diversi jiem akkumpanja lil dawn il-​ħabsin hekk kif taw xiehda minn ċella għal ċella u kkonduċew studji tal-​Bibbja. Minħabba l-​interess li ntwera, xi wħud minn dawn l-​istudji komplew sa tard bil-​lejl. “Fi tmiem iż-​żjara, il-​ħabsin u jien imtlejna bil-​ferħ b’riżultat taʼ l-​inkuraġġiment reċiproku,” jikteb dan l-​indokratur żeluż tas-​circuit.

16. Għala huwa tant taʼ benefiċċju meta indokraturi li jivvjaġġaw u n-​nisa tagħhom jipprovdu inkuraġġiment?

¹⁶ L-​indokraturi li jivvjaġġaw jipprovaw ikunu inkuraġġanti. Meta Pawlu żar lill-​kongregazzjonijiet fil-​Maċedonja, hu ‘ħeġġiġhom b’ħafna kliem.’ (Atti 20:1, 2) Kliem taʼ inkuraġġiment jistaʼ jkun utli ferm f’li jidderieġi kemm liż-​żgħażagħ u kemm lix-​xjuħ lejn miri spiritwali. F’uffiċċju taʼ waħda mill-​fergħat kbar tal-​Watch Tower Society, stħarriġ informali rrivela li indokraturi tas-​circuit kienu inkuraġġew lil kważi 20 fil-​mija tal-​volontieri biex jibdew fis-​servizz full-time. Bl-​eżempju mill-​aħjar tagħha bħala proklamatriċi full-time tas-​Saltna, il-​mara taʼ l-​indokratur li jivvjaġġa turi wkoll kemm hi sors kbir taʼ inkuraġġiment.

17. Wieħed indokratur tas-​circuit imdaħħal fiż-​żmien kif iħossu dwar il-​privileġġ tiegħu li jagħti għajnuna lil oħrajn?

¹⁷ Uħud ixjeħ u erwieħ dipressi huma partikolarment fi bżonn taʼ inkuraġġiment. Wieħed indokratur tas-​circuit imdaħħal fiż-​żmien jikteb: “L-​aspett tax-​xogħol tiegħi li jiġġenera ferħ ġewwieni li ma jistax jitfisser huwa l-​privileġġ li nkun t’għajnuna għal uħud ixjeħ li huma inattivi u debboli fost il-​merħla t’Alla. Il-​kliem taʼ Rumani 1:11, 12 għandu tifsira speċjali għalija, peress li nikseb inkuraġġiment u saħħa immensi waqt li ‘naqsam magħhom id-​doni spiritwali biex inwettaqhom.’”

Premjijiet Tax-​Xogħol Ferrieħi Tagħhom

18. Indokraturi li jivvjaġġaw liema objettivi Skritturali għandhom?

¹⁸ Indokraturi li jivvjaġġaw għandhom għal qalbhom il-​ġid taʼ kredenti sħabhom. Huma jridu jsaħħu lill-​kongregazzjonijiet u jibnuhom spiritwalment. (Atti 15:41) Wieħed indokratur li jivvjaġġa jaħdem iebes “biex jagħti inkuraġġiment, jipprovdi rifreskar, u jippromwovi xewqa biex wieħed iwettaq il-​ministeru u jkompli jgħix il-​verità.” (3 Ġwann 3) Ieħor jipprova jissoda lil kredenti sħabu fil-​fidi. (Kolossin 2:6, 7) Ftakar li l-​indokratur li jivvjaġġa hu “sieħeb ġenwin fil-​madmad,” mhux sid fuq il-​fidi t’oħrajn. (Filippin 4:3, NW; 2 Korintin 1:24) Iż-​żjara tiegħu hija okkażjoni għal inkuraġġiment u attività miżjuda, kif ukoll opportunità għall-​ġemgħa taʼ l-​anzjani biex jirrevedu l-​progress li sar u jikkunsidraw miri futuri. Bil-​kliem u bl-​eżempju tiegħu, il-​pubblikaturi, il-​pijunieri, il-​qaddejja ministerjali, u l-​anzjani tal-​kongregazzjoni, jistgħu jistennew li jiġu mibnijin u stimulati għax-​xogħol li hemm quddiemhom. (Qabbel 1 Tessalonikin 5:11.) Mela, allura, appoġġja b’qalbek kollha ż-​żjajjar taʼ l-​indokratur tas-​circuit, u ħu vantaġġ sħiħ mis-​servizz mogħti mill-​indokratur distrettwali.

19, 20. Indokraturi li jivvjaġġaw u n-​nisa tagħhom kif ġew ippremjati għas-​servizz leali tagħhom?

¹⁹ Indokraturi li jivvjaġġaw u n-​nisa tagħhom jiġu ppremjati bil-​kbir għas-​servizz leali tagħhom, u jistgħu jkunu fiduċjużi li Jehovah se jberikhom għall-​ġid li jagħmlu. (Proverbji 19:17; Efesin 6:8) Georg u Magdalena huma koppja anzjana li qdew għal ħafna snin fix-​xogħol taʼ l-​ivvjaġġar. F’konvenzjoni fil-​Lussemburgu, Magdalena ġiet avviċinata minn persuna li hi kienet tatha xiehda iktar minn 20 sena qabel. L-​interess taʼ din il-​mara Lhudija ġie mqanqal mil-​letteratura Biblika li Magdalena kienet ħallietilha, u maż-​żmien hi tgħammdet. Georg ġie avviċinat minn oħt spiritwali li ftakret fiż-​żjara li għamlilha fid-​dar tagħha 40 sena ilu. Il-​preżentazzjoni entużjażmanti tiegħu taʼ l-​aħbar tajba finalment wasslet biex kemm hi u kemm żewġha jaċċettaw il-​verità. M’għandniex xi ngħidu, kemm Georg u kemm Magdalena kienu verament ferħanin.

²⁰ Il-​ministeru taʼ Pawlu li ħalla tant frott f’Efesu ġablu ferħ u setaʼ qanqlu biex jikkwota l-​kliem taʼ Ġesù: “Min jagħti hu aktar hieni minn min jieħu.” (Atti 20:35) Ladarba x-​xogħol taʼ l-​ivvjaġġar jinvolvi għoti kostanti, dawk li jieħdu sehem fih jesperjenzaw l-​hena, speċjalment meta jindunaw bir-​riżultati tajbin tax-​xogħol tagħhom. Indokratur tas-​circuit li għen lil anzjan li kien skuraġġit intqallu f’ittra: “Int kont ‘għajnuna li ssaħħaħ’ kbira fil-​ħajja spiritwali tiegħi​—lanqas taf kemm. . . .Qatt ma se tkun taf eżatt kemm kont t’għajnuna għal Asaf taʼ żmien modern, li ‘għal ftit ma żelaqx fil-​mixi tiegħu.’”—Kolossin 4:11; Salm 73:2.

21. Int għala tgħid li l-​1 Korintin 15:58 tapplika għall-​attivitajiet taʼ indokraturi li jivvjaġġaw?

²¹ Kristjan imdaħħal fiż-​żmien li kien fix-​xogħol tas-​circuit għal snin sħaħ jieħu gost jaħseb dwar l-​1 Korintin 15:58, fejn Pawlu ħeġġeġ: “Żommu sħiħ, titħarrkux; ħabirku dejjem fil-​ħidma tal-​Mulej. Kunu afu li l-​ħidma tagħkom fil-​Mulej m’hijiex għalxejn.” Indokraturi li jivvjaġġaw żgur li għandhom ferm x’jagħmlu fix-​xogħol tal-​Mulej. U kemm aħna grati li jaqdu b’tant ferħ bħala prokuraturi leali tal-​qalb tajba mhix mistħoqqa taʼ Jehovah! (w96 11/15)

[Nota taʼ taħt]

Int Kif Twieġeb?

◻ Indokraturi li jivvjaġġaw għala jistgħu jiġu meqjusin bħala “prokuraturi mill-​aħjar”?

◻ Liema huma xi fatturi li jgħinu lil indokraturi tas-​circuit u tad-​distrett biex iwettqu tant ġid?

◻ L-​umiltà u ż-​żelu għala huma tant importanti għal dawk involuti fix-​xogħol taʼ l-​ivvjaġġar?

◻ Indokraturi li jivvjaġġaw liema objettivi mill-​aħjar għandhom?

[Stampa f’paġna 14]

Indokraturi li jivvjaġġaw ifittxu li jinkuraġġixxu lil kredenti sħabhom

[Stampi f’paġna 15]

Kemm żgħażagħ u kemm xjuħ jistgħu jibbenefikaw minn sħubija maʼ indokraturi li jivvjaġġaw u man-​nisa tagħhom

[Stampa f’paġna 16]

Il-​ministeru żeluż taʼ l-​indokratur li jivvjaġġa jqanqal żelu f’oħrajn