Indokraturi li Jivvjaġġaw—Għotjiet fi Rġiel

“Meta telaʼ ’l fuq fl-​għoli hu ġarr lil hinn irsiera; hu ta għotjiet fi rġiel.”—EFESIN 4:8, New World Translation.

1. Liema xogħol ġdid ġie mħabbar f’dan il-​ġurnal fl-​1894?

IKTAR minn seklu ilu, il-​Watch Tower ħabbar xi ħaġa ġdida. Kienet deskritta bħala “Qasam Ieħor tax-​Xogħol.” Din l-​attività ġdida x’kienet tinvolvi? Kienet l-​inawgurazzjoni li saret fi żmienna tax-​xogħol taʼ indokraturi li jivvjaġġaw. Il-​ħarġa taʼ l-​1 taʼ Settembru, 1894, taʼ dan il-​ġurnal spjegat li minn dak in-​nhar ’l hawn aħwa rġiel ikkwalifikati kienu se jżuru lil gruppi taʼ Studenti tal-​Bibbja ‘bl-​iskop li jibnuhom fil-​verità.’

2. Indokraturi tas-​circuit u tad-​distrett għandhom liema dmirijiet?

² Fl-​ewwel seklu E.K., il-​kongregazzjonijiet Kristjani kien ikollhom żjajjar minn indokraturi bħal Pawlu u Barnabas. Dawn l-​irġiel leali kellhom l-​objettiv ‘li jibnu’ l-​kongregazzjonijiet. (2 Korintin 10:8) Illum, aħna mberkin b’eluf taʼ rġiel li qegħdin jagħmlu dan b’mod sistematiku. Il-​Ġemgħa li Tiggverna tax-​Xhieda taʼ Jehovah ħatrithom bħala indokraturi tas-​circuit u tad-​distrett. Indokratur tas-​circuit jaqdi f’madwar 20 kongregazzjoni għal ġimgħa kull waħda, madwar darbtejn fis-​sena, billi jeżamina d-​dokumenti tal-​kongregazzjoni, jagħti taħditiet, u jieħu sehem fil-​ministeru taʼ l-​għalqa maʼ pubblikaturi tas-​Saltna tal-​lokal. L-​indokratur tad-​distrett huwa chairman għal kull waħda mill-​assembleat tas-​circuit annwali għal numru taʼ circuits, jieħu sehem fil-​ministeru taʼ l-​għalqa mal-​kongregazzjonijiet li jkunu qegħdin jospitawh, u jipprovdi inkuraġġiment f’taħditiet ibbażati fuq il-​Bibbja.

L-​Ispirtu Tagħhom Taʼ Li Jissagrifikaw Lilhom Infushom

3. Indokraturi li jivvjaġġaw għala għandhom bżonn ikollhom spirtu taʼ li jissagrifikaw lilhom infushom?

³ Indokraturi li jivvjaġġaw qegħdin il-​ħin kollu jmorru minn post għall-​ieħor. Dan fih innifsu jirrikjedi spirtu taʼ li wieħed jissagrifika lilu nnifsu. Li wieħed jivvjaġġa minn kongregazzjoni għal oħra jistaʼ taʼ spiss ikun diffiċli, imma dawn l-​irġiel u n-​nisa tagħhom jagħmlu dan b’attitudni ferrieħa. Indokratur li jivvjaġġa qal: “Marti tappoġġjani ferm u ma tgergirx . . . Tant jixirqilha kredtu għall-​ispirtu tagħha taʼ li tissagrifika lilha nfisha.” Xi indokraturi tas-​circuit jivvjaġġaw iktar minn 600 mil minn kongregazzjoni għall-​oħra. Ħafna jmorru bil-​karozzi, imma oħrajn imorru minn post għall-​ieħor bit-​trasport pubbliku, bir-​rota, biż-​żiemel, jew bil-​mixi. Indokratur tas-​circuit mill-​Afrika saħansitra jkollu jaqsam ix-​xmara bil-​mara tiegħu fuq spallejh sabiex jasal sa waħda mill-​kongregazzjonijiet. Fil-​vjaġġi missjunarji tiegħu, l-​appostlu Pawlu kellu jkampa maʼ sħana u bard, ġuħ u għatx, iljieli bla rqad, diversi perikli, u persekuzzjoni vjolenti. Hu kellu wkoll “l-​anzjetà għall-​kongregazzjonijiet kollha”​—esperjenza li hija komuni għall-​indokraturi li jivvjaġġaw illum.—2 Korintin 11:23-29, NW.

4. Problemi taʼ saħħa liema effett jistaʼ jkollhom fuq il-​ħajjiet taʼ l-​indokraturi li jivvjaġġaw u n-​nisa tagħhom?

⁴ Bħal Timotju, is-​sieħeb taʼ Pawlu, indokraturi li jivvjaġġaw u n-​nisa tagħhom xi drabi jkollhom problemi taʼ saħħa. (1 Timotju 5:23) Dan ipoġġi stress żejjed fuqhom. Il-​mara taʼ wieħed mill-​indokraturi tas-​circuit tispjega: “Li dejjem tkun maʼ l-​aħwa huwa iebes meta ma tkunx tiflaħ. Mal-​bidu tal-​menopawsa, sibt li dan kien speċjalment diffiċli. Sempliċement li jkollna nippakkjaw ħwejjiġna kull ġimgħa u mmorru xi mkien ieħor huwa verament sfida. Taʼ spiss, ikolli nieqaf u nitlob lil Jehovah biex jagħtini s-​saħħa biex inkompli.”

5. Minkejja diversi provi, liema spirtu ġie muri minn indokraturi li jivvjaġġaw u n-​nisa tagħhom?

⁵ Minkejja problemi taʼ saħħa u provi oħrajn, l-​indokraturi li jivvjaġġaw u n-​nisa tagħhom isibu ferħ fis-​servizz tagħhom u juru mħabba li tissagrifika lilha nfisha. Xi wħud issograw ħajjithom biex jagħtu għajnuna spiritwali fi żminijiet taʼ persekuzzjoni jew gwerra. Meta żaru l-​kongregazzjonijiet, huma wrew spirtu simili għal dak taʼ Pawlu, li qal lill-​Kristjani Tessalonkin: “Ġibna ruħna magħkom bil-​ħlewwa, bħalma omm traddaʼ tħaddan lil uliedha: Aħna għożżejniekom hekk li ridna naqsmu magħkom mhux biss l-​Evanġelju imma ħajjitna stess, daqskemm ħabbejniekom.”—1 Tessalonikin 2:7, 8.

6, 7. Indokraturi li jivvjaġġaw ħabrieka liema influwenza pożittiva jipprovdu?

⁶ Bħall-​anzjani l-​oħrajn fil-​kongregazzjoni Kristjana, l-​indokraturi li jivvjaġġaw “jagħmlu x-​xogħol [“jaħdmu iebes,” NW] tax-​xandir tal-​kelma u tat-​tagħlim.” L-​anzjani kollha bħal dawn ikun “jistħoqqilhom ġieh għal darbtejn.” (1 Timotju 5:17) L-​eżempju tagħhom jistaʼ jkun taʼ benefiċċju jekk, wara li ‘nikkontemplaw dwar x’jiġri bil-​kondotta tagħhom nimitaw il-​fidi tagħhom.’—Lhud 13:7, NW.

⁷ Ċertu indokraturi li jivvjaġġaw liema effett kellhom fuq oħrajn? “X’influwenza taʼ l-​għaġeb kellu Ħuna P​—— fuq ħajti!” kiteb wieħed Xhud taʼ Jehovah. “Hu kien indokratur li jivvjaġġa fil-​Messiku mill-​1960 ’l hawn. Bħala tifel, kont nistenna ż-​żjajjar tiegħu b’antiċipazzjoni u ferħ. Meta kelli għaxar snin, qalli, ‘Int ukoll għad tkun indokratur tas-​circuit.’ Matul is-​snin diffiċli taʼ l-​adolexxenza, fittixtu spiss għaliex hu dejjem kellu kliem t’għerf x’joffri. Kien jgħix biex jirgħa l-​merħla! Issa li jien indokratur tas-​circuit, dejjem nipprova niddedika ħin għaż-​żgħażagħ u npoġġi miri teokratiċi quddiemhom bħalma għamel hu miegħi. Saħansitra fl-​aħħar snin taʼ ħajtu, minkejja problemi tal-​qalb, Ħuna P​—— dejjem għamel ħiltu biex joffri kelma taʼ inkuraġġiment. Ġurnata biss qabel ma miet fi Frar taʼ l-​1995, hu ġie miegħi għall-​jum t’assemblea speċjali u poġġa miri siewja quddiem ħu li huwa perit. Il-​ħu immedjatament tefaʼ applikazzjoni biex jaqdi f’Betel.”

Huma Jiġu Apprezzati

8. Min huma l-​“għotjiet fi rġiel” deskritti f’Efesin kapitlu 4, u dawn kif jibbenefikaw lill-​kongregazzjoni?

⁸ Indokraturi li jivvjaġġaw u anzjani oħrajn li jingħataw inkarigi taʼ servizz bil-​qalb tajba mhix mistħoqqa t’Alla jissejħu “għotjiet fi rġiel.” Bħala r-​rappreżentant taʼ Jehovah u Kap tal-​kongregazzjoni, Ġesù pprovda dawn l-​irġiel spiritwali sabiex inkunu nistgħu niġu mibnijin individwalment u naslu għall-​maturità. (Efesin 4:8-15) Kwalunkwe għotja jixirqilha espressjoni t’apprezzament. Speċjalment nistgħu ngħidu dan dwar għotja li ssaħħaħna biex nibqgħu naqdu lil Jehovah. Mela, allura, kif nistgħu nuru l-​apprezzament tagħna għax-​xogħol taʼ l-​indokraturi li jivvjaġġaw? B’liema modi nuru li aħna nkomplu ‘ngħożżuhom nies bħal dawn’?—Filippin 2:29.

9. B’liema modi nistgħu aħna nuru apprezzament lejn l-​indokraturi li jivvjaġġaw?

⁹ Meta tiġi mħabbra ż-​żjara taʼ l-​indokratur tas-​circuit, nistgħu nibdew nagħmlu pjanijiet biex ikollna sehem sħiħ fl-​attivitajiet tal-​kongregazzjoni għal dik il-​ġimgħa. Forsi nkunu nistgħu nwarrbu ħin iżjed biex nappoġġjaw l-​arranġamenti tas-​servizz taʼ l-​għalqa matul din iż-​żjara. Għandu mnejn inkunu nistgħu naqdu bħala pijunieri awżiljarji matul dak ix-​xahar. Żgur li se nkunu rridu npoġġu fil-​prattika s-​suġġerimenti taʼ l-​indokratur tas-​circuit sabiex intejbu l-​ministeru tagħna. Spirtu riċettiv bħal dan se jibbenefikana u se jiżgurah li ż-​żjara tiegħu hija waħda utli. Iva, l-​indokraturi li jivvjaġġaw iżuru l-​kongregazzjoni biex jibnuna, imma huma wkoll ikollhom bżonn jinbnew spiritwalment. Kien hemm waqtiet meta Pawlu kellu bżonn l-​inkuraġġiment, u taʼ spiss talab lil sħabu l-​Kristjani biex jitolbu għalih. (Atti 28:15; Rumani 15:30-32; 2 Korintin 1:11; Kolossin 4:2, 3; 1 Tessalonikin 5:25) Indokraturi li jivvjaġġaw tal-​lum għandhom bżonn bl-​istess mod it-​talb u l-​inkuraġġiment tagħna.

10. Kif nistgħu aħna ngħinu biex ix-​xogħol taʼ l-​indokratur li jivvjaġġa jkun taʼ ferħ?

¹⁰ Għednielhom aħna lill-​indokratur tas-​circuit u lill-​mara tiegħu kemm napprezzaw iż-​żjajjar tagħhom? Nirringrazzjawh tal-​parir siewi li jagħtina? Ngħidulu aħna meta s-​suġġerimenti li jagħtina dwar is-​servizz taʼ l-​għalqa jżidulna l-​ferħ fil-​ministeru? Jekk nagħmlu hekk, dan se jgħin biex ix-​xogħol tiegħu ikun wieħed taʼferħ. (Lhud 13:17) Indokratur tas-​circuit fi Spanja kkummenta b’mod partikulari dwar kemm hu u martu jgħożżu l-​kartolini taʼ ringrazzjament li kienu jirċievu wara li jżuru l-​kongregazzjonijiet. “Inżommu dawn il-​kartolini u naqrawhom meta nħossuna xi ftit skuraġġiti,” hu jgħid. “Dawn huma sors taʼ inkuraġġiment veru.”

11. Lin-​nisa taʼ l-​indokraturi tas-​circuit u tad-​distrett għala għandna nuruhom li huma maħbubin u apprezzati?

¹¹ Il-​mara taʼ l-​indokratur li jivvjaġġa ċertament li tibbenefika minn kliem taʼ tifħir. Hi għamlet sagrifiċċji kbar biex tgħin lil żewġha f’dan il-​qasam taʼ servizz. Dawn l-​aħwa nisa leali jirrinunzjaw ix-​xewqa naturali li jkollhom darhom u, f’ħafna każi, dik ukoll taʼ li jkollhom it-​tfal. Bint Ġefta kienet waħda mill-​qaddejja taʼ Jehovah li minn jeddha ċediet l-​opportunità tagħha li jkollha raġel u familja minħabba l-​wegħda li kien għamel missierha. (Imħallfin 11:30-39) Is-​sagrifiċċju tagħha kif ġie meqjus? Mħallfin 11:40, NW, jistqarr: “Minn sena għal sena l-​ulied bniet taʼ Israel kienu jmorru jagħtu l-​prosit lil bint Ġefta l-​Giljadit, erbat ijiem fis-​sena.” Kemm tkun ħaġa sabiħa jekk nagħmluha drawwa li nuru lin-​nisa taʼ l-​indokraturi tas-​circuit u tad-​distrett kemm huma maħbubin u apprezzati!

“Tinsewx L-​Ospitalità”

12, 13. (a) Liema bażi Skritturali hemm biex inkunu ospitabbli lejn l-​indokraturi li jivvjaġġaw u n-​nisa tagħhom? (b) Uri kif ospitalità bħal din tistaʼ tkun taʼ benefiċċju għaż-​żewġ naħat.

¹² Li nuru l-​ospitalità huwa mod ieħor kif nesprimu l-​imħabba u l-​apprezzament lejn dawk fix-​xogħol Kristjan taʼ l-​ivvjaġġar. (Ebrej 13:2) L-​appostlu Ġwanni faħħar lil Gajus talli estenda l-​ospitalità lejn dawk li kienu jżuru l-​kongregazzjoni bħala missjunarji li jivvjaġġaw. Ġwanni kiteb: “Maħbub, int tagħmel bil-​fidi kulma tagħmel għall-​aħwa u għall-​għorba; Li taw xhieda taʼ l-​imħabba tiegħek quddiem il-​knisja [“kongregazzjoni,” NW]: u li tagħmel tajjeb jekk tgħinhom, fil-​vjaġġ tagħhom, kif jixraq lil Alla. Għax minħabba ismu huma telqu bla ma ħadu xejn mill-​Ġentili. Aħna mela għandna nilqgħuhom nies bħal dawn, biex naħdmu magħhom għas-​sewwa.” (3 Ġwann 5-8, Karm Żammit) Illum, aħna nistgħu nżidu fl-​attività taʼ l-​ippridkar tas-​Saltna billi nestendu ospitalità simili lejn l-​indokraturi li jivvjaġġaw u n-​nisa tagħhom. M’għandniex xi ngħidu, l-​anzjani lokali għandhom jaċċertaw ruħhom li l-​akkomodazzjonijiet huma sodisfaċenti, imma wieħed indokratur tad-​distrett qal: “L-​involviment tagħna maʼ l-​aħwa ma jistax ikun ibbażat fuq min jistaʼ jirreċiproka. Lanqas b’xejn ma rridu li nagħtu dik l-​impressjoni. Irridu nkunu lesti li naċċettaw l-​ospitalità taʼ kwalunkwe wieħed jew waħda minn ħutna, sew jekk sinjuri u sew jekk fqar.”

¹³ L-​ospitalità tistaʼ tkun taʼ benefiċċju għaż-​żewġ naħat. “Fil-​familja tiegħi, kellna d-​drawwa li nistiednu lill-​indokraturi li jivvjaġġaw biex joqogħdu magħna,” jiftakar Jorge, wieħed li qabel kien indokratur tas-​circuit u li issa qiegħed jaqdi ġewwa Betel. “Jien inħoss li dawn iż-​żjajjar għenuni iktar milli kont nirrealizza f’dak iż-​żmien. Matul l-​adolexxenza tiegħi, kelli xi problemi spiritwali. Ommi kienet inkwetata dwar dan imma ma kinitx taf eżatt kif tgħinni u għalhekk talbet lill-​indokratur tas-​circuit biex ikellimni hu. Għall-​ewwel kont nevitah, peress li kont nibżaʼ li niġi kkritikat. Imma l-​manjiera dħulija tiegħu fl-​aħħar ġagħlitni nafdah. Darba nhar taʼ Tnejn, hu stedinni biex immur niekol miegħu, u jien ftaħt qalbi għaliex kont ċert li kien qiegħed jifhimni. Qagħad jismagħni b’attenzjoni. Is-​suġġerimenti prattiċi tiegħu tassew irnexxew, u bdejt nagħmel progress spiritwalment.”

14. Għala għandna nuru apprezzament minflok ma nikkritikaw lill-​anzjani li jivvjaġġaw?

¹⁴ Indokratur li jivvjaġġa jipprova jkun t’għajnuna spiritwali għaż-​żgħażagħ daqskemm ikun għax-​xjuħ. Żgur, mela, li għandna nuru l-​apprezzament tagħna għall-​isforzi tiegħu. Madankollu, xi ngħidu li kieku kellna nikkritikawh minħabba d-​dgħjufijiet tiegħu jew inqabbluh b’mod mhux favorevoli m’oħrajn li jkunu żaru l-​kongregazzjoni? X’aktarx li dan ikun skuraġġanti ferm. Ma kienx inkuraġġanti għal Pawlu li jismaʼ l-​kritiki dwar ix-​xogħol tiegħu. Milli jidher, xi Kristjani Korintin kienu qegħdin jgħaddu rimarki degradanti dwar l-​apparenza u l-​abbiltà tiegħu kif jitħaddet. Hu nnifsu kkwota lil dawn il-​kritiċi bħala li qalu: “L-​ittri [tiegħu] huma iebsa u qawwija; imma meta hu jkun hawn ikun qisu bla ħila u kliemu taʼ min jistmerru.” (2 Korintin 10:10) Ferħanin ngħidu, iżda, li l-​indokraturi li jivvjaġġaw ġeneralment jisimgħu kliem t’apprezzament bl-​imħabba.

15, 16. Indokraturi li jivvjaġġaw u n-​nisa tagħhom kif inhuma effettwati mill-​imħabba u ż-​żelu li jintwerew minn kredenti sħabhom?

¹⁵ Indokratur tas-​circuit fl-​Amerka Latina jimxi bi tbatija għal jum sħiħ minn mogħdijiet kollha tajn sabiex iżur lil ħutu spiritwali li jgħixu f’żona kkontrollata mill-​gwerilli. “Huwa kommoventi li tara l-​mod kif l-​aħwa juru l-​apprezzament tagħhom għaż-​żjara,” jikteb hu. “Avolja jkolli nagħmel sforz kbir biex nasal hemmhekk, billi niffaċċja ħafna perikli u tbatijiet, dan kollu jiġi ppremjat mill-​imħabba u ż-​żelu li juru l-​aħwa.”

¹⁶ Indokratur tas-​circuit fl-​Afrika jikteb: “Minħabba l-​imħabba li wrewna l-​aħwa, tant konna nħobbuh it-​territorju tat-​Tanzanija! L-​aħwa kienu lesti li jitgħallmu minna, u kienu henjin li jżommuna fi djarhom.” Kien hemm relazzjoni hienja u taʼ mħabba bejn l-​appostlu Pawlu u Akwila u Priska, koppja miżżewġa Kristjana fl-​ewwel seklu. Fil-​fatt, Pawlu qal dwarhom: “Selluli għal Priska u Akwila, li ħadmu miegħi fi Kristu Ġesù, għax huma wkoll issugraw ħajjithom għalija biex isalvawni; u mhux jien biss għandi għax nirringrazzjahom iżda wkoll il-​knejjes [“kongregazzjonijiet,” NW] tal-​ġnus.” (Rumani 16:3, 4) Indokraturi li jivvjaġġaw u n-​nisa tagħhom huma grati li għandhom bħala l-​ħbieb tagħhom uħud bħal Akwila u Priska taż-​żmien modern li joħorġu barra minn triqthom biex juru ospitalità u jipprovdu sħubija.

Isaħħu Lill-​Kongregazzjonijiet

17. Għala jistaʼ jingħad li hemm l-​għerf wara l-​arranġament għal indokraturi li jivvjaġġaw, u minn fejn iġibu l-​istruzzjoni tagħhom?

¹⁷ Ġesù qal: “L-​Għerf taʼ Alla tawh raġun l-​opri tiegħu stess.” (Mattew 11:19) L-​għerf li hemm wara l-​arranġament taʼ l-​indokratur li jivvjaġġa huwa evidenti mill-​fatt li dan jgħin biex isaħħaħ lill-​kongregazzjonijiet tan-​nies t’Alla. Matul it-​tieni vjaġġ missjunarju taʼ Pawlu, hu u Silas b’suċċess ‘daru s-​Sirja u ċ-​Ċiliċja kollha, iwettqu l-​knejjes [“kongregazzjonijiet,” NW].’ Il-​ktieb t’Atti jgħidilna: “Huma u għaddejjin mill-​ibliet, bdew igħarrfuhom bid-​digrieti taʼ l-​appostli u l-​presbiteri taʼ Ġerusalemm u jħeġġuhom biex iħarsuhom. Hekk il-​Knejjes [“kongregazzjonijiet,” NW] kienu jitwettqu fil-​fidi u jiżdiedu fil-​għadd kuljum.” (Atti 15:40, 41; 16:4, 5) Indokraturi li jivvjaġġaw tal-​lum jirċievu istruzzjoni spiritwali permezz taʼ l-​Iskrittura u l-​pubblikazzjonijiet taʼ l-​“irsir leali u diskret,” kif jagħmlu l-​Kristjani l-​oħrajn kollha.—Mattew 24:45, NW.

18. Indokraturi li jivvjaġġaw kif isaħħu lill-​kongregazzjonijiet?

¹⁸ Iva, l-​anzjani li jivvjaġġaw iridu jkomplu jieklu mill-​mejda spiritwali taʼ Jehovah. Iridu jkunu familjari sew mal-​metodi u l-​linji taʼ gwida segwiti mill-​organizzazzjoni t’Alla. Imbagħad irġiel bħal dawn jistgħu jkunu barka reali għal oħrajn. Permezz taʼ l-​eżempju mill-​aħjar tagħhom taʼ żelu fis-​servizz taʼ l-​għalqa, jistgħu jgħinu lil kredenti sħabhom biex jitjiebu fil-​ministeru Kristjan. It-​taħditiet ibbażati minn fuq il-​Bibbja mogħtijin minn dawn l-​anzjani li jżuruna jibnu lis-​semmiegħa spiritwalment. Billi jgħinu lil oħrajn biex japplikaw il-​parir tal-​Kelma t’Alla, huma jaqdu f’armonija man-​nies taʼ Jehovah mad-​dinja kollha, u jpoġġu fil-​prattika l-​provvedimenti spiritwali mogħtijin minn Alla permezz taʼ l-​“irsir leali,” l-​indokraturi li jivvjaġġaw isaħħu lill-​kongregazzjonijiet li huma jkollhom il-​privileġġ li jżuru.

19. Liema mistoqsijiet baqaʼ biex jiġu kkunsidrati?

¹⁹ Meta l-​organizzazzjoni taʼ Jehovah stabbiliet ix-​xogħol taʼ l-​anzjani li jivvjaġġaw fost l-​Istudenti tal-​Bibbja madwar mitt sena ilu, dan il-​ġurnal stqarr: “Aħna se noqogħdu għassa għar-​riżultati u għal iktar direzzjoni mill-​Mulej.” Id-​direzzjoni taʼ Jehovah għadha tiġi murija b’mod ċar. Minħabba l-​barka tiegħu u taħt is-​superviżjoni tal-​Ġemgħa li Tiggverna, dan ix-​xogħol ġie espandut u rfinut matul is-​snin. Bħala riżultat, il-​kongregazzjonijiet tax-​Xhieda taʼ Jehovah mifruxin maʼ l-​art kollha qegħdin jintgħamlu sodi fil-​fidi u qegħdin jiżdiedu fin-​numru minn jum għal jum. Evidentement, Jehovah qiegħed ibierek l-​ispirtu taʼ li jissagrifikaw lilhom infushom taʼ dawn l-​għotjiet fi rġiel. Imma l-​indokraturi li jivvjaġġaw kif jistgħu jwettqu x-​xogħol tagħhom b’suċċess? X’inhuma l-​objettivi tagħhom? Kif jistgħu jkunu l-​iktar taʼ ġid? (w96 11/15)

Kieku Kif Twieġeb?

◻ Liema huma xi dmirijiet taʼ l-​indokraturi tas-​circuit u tad-​distrett?

◻ Indokraturi li jivvjaġġaw għala jeħtieġ li jkollhom spirtu taʼ li jissagrifikaw lilhom infushom?

◻ Kif jistaʼ jintwera apprezzament lejn ix-​xogħol t’anzjani li jivvjaġġaw u n-​nisa tagħhom?

◻ L-​indokraturi li jivvjaġġaw x’jistgħu jagħmlu biex jagħmlu lill-​kongregazzjonijiet sodi fil-​fidi?

[Stampa f’paġna 8]

Li l-​ħin kollu jmorru minn post għall-​ieħor jirrikjedi spirtu taʼ li jissagrifikaw lilhom infushom

[Stampa f’paġna 11]

Urejt int ospitalità maʼ indokraturi li jivvjaġġaw u n-​nisa tagħhom?