Bidla fl-​Inkarigu fl-​Età taʼ 80 Sena

KIF IRRAKKONTAT MINN GWENDOLINE MATTHEWS

Meta għalaqt it-​80, jien u żewġi ddeċidejna li nippakkjaw dak kollu li nippossiedu ġo trakk li krejna u nħallu l-​Ingilterra u mmorru ngħixu Spanja. Ma konniex nafu nitkellmu bl-​Ispanjol, u konna sejrin lejn il-​Lbiċ taʼ Spanja, ’il bogħod mill-​postijiet fejn kienu jmorru t-​turisti li jitkellmu bl-​Ingliż. Il-​biċċa l-​kbira tal-​ħbieb tagħna ħasbu li qed nibliehu, imma biex ninkuraġġixxi lili nnifsi ftakart li Abraham kellu 75 sena meta telaq minn Ur.

KIF ĠEW l-​affarijiet, is-​snin li ilna ngħixu ġewwa Spanja, mindu morna hemm f’April taʼ l-​1992, huma ftit mill-​iktar snin premjanti taʼ ħajjitna. Imma qabel ma nispjega għala morna Spanja, ħalli ngħidilkom kif ħajjitna fis-​servizz taʼ Jehovah wasslitna biex nagħmlu deċiżjoni daqshekk kbira.

Il-​Verità tal-​Bibbja Tbiddlilna Ħajjitna

Jien ġejt imrobbija ġo familja reliġjuża fil-​Lbiċ taʼ Londra, fl-​Ingilterra. Ommi kienet tieħu lili u lil oħti f’postijiet differenti taʼ qima waqt li kompliet tfittex għal sodisfazzjon spiritwali. Missieri, li kellu l-​marda kronika tat-​tuberkulosi, ma kienx jiġi magħna. Imma kien iħobb ħafna jaqra l-​Bibbja, u kien jimmarka kull silta li kien isib li kienet tgħallmu xi ħaġa. Waħda mill-​iktar oġġetti prezzjużi li għandi hi dik il-​Bibbja qadima li tant kienet tfisser għalih.

Fl-1925, meta kelli 14-il sena, sibna fuljett taħt il-​bieb li kellu stedina għal diskors pubbliku ġewwa s-​sala taʼ bini pubbliku f’West Ham. Ommi u l-​ġâra ddeċidew li jattendu għal din it-​taħdita, u jien u oħti morna magħhom. Dik it-​taħdita, “Miljuni li Qegħdin Jgħixu Issa ma Se Jmutu Qatt,” żergħat iż-​żrieragħ tal-​verità tal-​Bibbja f’qalb ommi.

Ftit tax-​xhur wara, miet missieri fl-​età taʼ 38 sena. Il-​mewt tiegħu kienet diżgrazzja terribbli, minħabba li ħallietna b’qalbna maqsuma kif ukoll fil-​bżonn. Waqt il-​funeral, li sar fiċ-​Church of England lokali, ommi xxokkjat ruħha malli semgħet lill-​qassis jgħid li ruħ missieri kienet fis-​sema. Hi kienet taf mill-​Bibbja li l-​mejtin jinsabu reqdin fil-​qabar, u kienet temmen bis-​sħiħ li xi darba missieri kien se jirxoxta għall-​ħajja taʼ dejjem fuq l-​art. (Salm 37:9-11, 29; 146:3, 4; Koħèlet 9:5; Atti 24:15; Apokalissi 21:3, 4) Konvinta li kellha tassoċja maʼ nies li kienu jgħallmu l-​Kelma t’Alla, hi ddeċidiet li tixtieq tkompli tikkun-tattja lill-​Istudenti Internazzjonali tal-​Bibbja, kif kienu jissejħu x-​Xhieda taʼ Jehovah dak iż-​żmien.

Ladarba ma kellniex flus għat-​trasport, kull ġimgħa konna nimxu sagħtejn mid-​dar tagħna għal-​laqgħat tax-​Xhieda taʼ Jehovah. Wara, konna nqattgħu sagħtejn oħra nimxu bi tbatija lura lejn id-​dar. Imma tant konna napprezzawhom dawk il-​laqgħat, u qatt ma tlifna waħda, saħansitra lanqas meta ċ-​ċpar magħruf taʼ Londra kien jgħatti l-​belt. Ommi ma damitx ma ddeċidiet li tiddedika ħajjitha lil Jehovah u titgħammed, u fl-​1927, jien ukoll tgħammidt.

Minkejja d-​diffikultajiet ekonomiċi tagħna, ommi dejjem għallmitni l-​importanza tal-​prijoritajiet spiritwali. Mattew 6:33 kien wieħed mit-​testi favoriti tagħha, u hi tassew li kienet ‘tfittex l-​ewwel is-​Saltna.’ Meta mietet b’mod prematur bil-​kanċer fl-​1935, kienet qed tagħmel pjanijiet biex twieġeb għas-​sejħa għal ministri full-time li setgħu jmorru jaqdu ġewwa Franza.

Eżempji li Saħħewna

F’dawk is-​snin bikrin, xi wħud li kienu jattendu għal-​laqgħat ġewwa Londra riedu jipproklamaw l-​ideat tagħhom stess, u dawn in-​nies qajmu argumenti u kustjonijiet kbar. Madankollu, ommi dejjem kienet tgħidilna li jkun żleali jekk nabbandunaw l-​organizzazzjoni taʼ Jehovah wara dak kollu li konna tgħallimna minnha. Iż-​żjajjar taʼ Joseph F. Rutherford, li dak iż-​żmien kien il-​president tal-​Watch Tower Bible and Tract Society, qanqluna biex nibqgħu naqdu lealment.

Jien niftakar lil Ħuna Rutherford bħala raġel twajjeb, li kont tistaʼ tkellmu. Meta kont għadni żagħżugħa, il-​Kongregazzjoni taʼ Londra organizzaw ħarġa u hu kien preżenti. Hu rani​—żagħżugħa kemxejn mistħija—​b’kámera f’idi u staqsieni jekk nixtieqx niħodlu ritratt. Dak ir-​ritratt sar rikordju għażiż.

Iktar tard, kien hemm esperjenza li tant impressjonatni dwar il-​kuntrast bejn dawk li jieħdu t-​tmexxija fil-​kongregazzjoni Kristjana u n-​nies prominenti tad-​dinja. Kont naħdem bħala wejtress ġewwa dar kbira f’Londra fejn Franz von Papen, wieħed mill-​emissarji taʼ Hitler, kien ġie mistieden għal ikla. Hu rrifjuta li jneħħi x-​xabla li kellu mdendla maċ-​ċintorin waqt li kien qed jiekol, u jien tfixkilt fiha u waqqajt is-​soppa li kelli f’idejja. Hu b’rabja qalli li fil-​Ġermanja kienu jisparawli għal traskuraġni bħal din. Għall-​kumplament taʼ l-​ikla lanqas biss ersaqt lejh!

Kien hemm konvenzjoni taʼ importanza kbira fl-​Alexandra Palace fl-​1931, fejn smajt lil Ħuna Rutherford jitkellem. Hemmhekk adottajna b’entużjażmu kbir l-​isem ġdid tagħna, Xhieda taʼ Jehovah. (Isaija 43:10, 12) Sentejn wara, fl-​1933, bdejt naqdi bħala pijuniera, kif inhu msejjaħ il-​ministeru full-time. Barka oħra li niftakar minn dawk is-​snin kienet dik li stajt nassoċja maʼ rġiel żgħażagħ mill-​aħjar li iktar tard saru missjunarji f’partijiet ’il bogħod ħafna tad-​dinja. Dawn kienu jinkludu lil Claude Goodman, Harold King, John Cooke, u Edwin Skinner. Eżempji taʼ lealtà bħal dawn ġagħluni nkun irrid naqdi ġewwa art barranija.

Naqdi Bħala Pijuniera fil-​Lvant taʼ l-​Anglia

L-​inkarigu tiegħi bħala pijuniera kien fil-​Lvant taʼ l-​Anglia (l-Ingilterra tal-​Lvant), u l-​ippridkar hemmhekk kien jirrikjedi entużjażmu u żelu. Biex inkopru t-​territorju kbir tagħna, konna nivvjaġġaw bir-​rota minn belt għal belt u minn raħal għal raħal u konna noqogħdu ġo kmamar mikrijin. F’dawn l-​inħawi ma tantx kont issib kongregazzjonijiet, u għalhekk jien u dik li kienet pijuniera miegħi konna niddiskutu waħedna l-​partijiet kollha tal-​laqgħat regulari taʼ kull ġimgħa. Fil-​ministeru tagħna, qassamna mijiet taʼ kotba kbar u żgħar li kienu jispjegaw l-​iskopijiet t’Alla.

Żjara memorabbli li kellna kienet ġewwa dar fejn tkellimna mal-​vigarju lokali taċ-​Church of England. F’ħafna mill-​inħawi, iż-​żjara tagħna lill-​vigarju Anglikan konna nħalluha għall-​aħħar minħabba li taʼ spiss kien jagħmilhielna diffiċli meta kien isir jaf li konna qed nippridkaw l-​aħbar tajba f’dawk l-​inħawi. Imma f’dan ir-​raħal kulħadd kien ifaħħru lill-​vigarju. Hu kien iżur lill-​morda, kien isellef il-​kotba lil dawk li kienu jħobbu jaqraw, u saħansitra kien iżur id-​djar tal-​parruċċani tiegħu biex jispjegalhom il-​Bibbja.

U hekk kien, għax meta morna nżuruh, kien verament qalbu tajba, u aċċetta numru taʼ kotba. Hu assigurana wkoll li jekk xi ħadd fir-​raħal ried xi kotba minn tagħna imma ma setax jaffordjahom, kien lest li jħallashom hu. Sirna nafu li minħabba l-​esperjenzi terribbli li għadda minnhom fl-​Ewwel Gwerra Dinjija kien iddeterminat li jippromwovi l-​paċi u r-​rieda tajba fil-​parroċċa tiegħu. Qabel ma tlaqna tana l-​barka tiegħu u inkuraġġiena biex inkomplu x-​xogħol tajjeb tagħna. L-​aħħar kliem tiegħu għalina kien dak taʼ Numri 6:24: ‘Iberikkom il-​Mulej u jħariskom!’

Ommi mietet sentejn wara li bdejt naqdi bħala pijuniera, u rritornajt lejn Londra mingħajr ebda flus u ebda familja. Waħda xhud Skoċċiża mill-​aħjar ħaditni noqgħod għandha, għenitni nkampa mal-​mewt t’ommi, u inkuraġġietni biex inkompli fil-​ministeru full-time. Għalhekk, irritornajt lejn il-​Lvant taʼ l-​Anglia maʼ Julia Fairfax, oħt pijuniera oħra. Irranġajna karavana antika biex isservina bħala dar li stajna nġorruha; u konna nużaw xi trakter jew trakk biex niħduha minn post għall-​ieħor. Komplejna nippridkaw flimkien maʼ koppja akbar, Albert u Ethel Abbott, li wkoll kellhom karavana żgħira. Albert u Ethel saru għalija qishom il-​ġenituri tiegħi.

Waqt li kont pijuniera f’Cambridgeshire, iltqajt maʼ John Matthews, ħu Kristjan mill-​aħjar li kien diġà ta prova taʼ l-​integrità tiegħu lejn Jehovah taħt ċirkostanzi diffiċli. Iżżewwiġna fl-​1940, ftit wara l-​bidu tat-​tieni gwerra dinjija.

Żmien il-​Gwerra u Familja

Meta konna għadna miżżewġin friski, id-​dar tagħna kienet karavana ċkejkna d-​daqs taʼ kċina żgħira, u fil-​ministeru tagħna konna mmorru fuq mutur li qatt ma tana inkwiet. Sena wara li żżewwiġna, John ġie ssentenzjat biex jaħdem ġo razzett meta, minħabba l-​konvinzjonijiet tiegħu bbażati fuq il-​Bibbja, hu rrifjuta li jagħmel is-​servizz militari. (Isaija 2:4) Għalkemm dan kien ifisser li kellna nieqfu milli nkunu pijunieri, is-​sentenza taʼ John kienet providenzjali ladarba jien kont qed nistenna tarbija u hu kien se jkun jistaʼ jmantnina.

Matul is-​snin tal-​gwerra, konna nieħdu gost bil-​laqgħat speċjali li kien ikollna minkejja t-​tbatijiet. Fl-​1941, il-​mutur tagħna kellu jġorr lil John u lili, tqila bl-​ewwel tarbija tagħna, lejn Manchester, li kienet 300 kilometru ’l bogħod. Fit-​triq, għaddejna minn bliet kollhom bini mwaqqaʼ mill-​bombi, u tħassibna jekk il-​laqgħa setgħetx issir f’ċirkostanzi bħal dawn. Imma saret. Il-​Free Trade Hall, fiċ-​ċentru taʼ Manchester, kienet ippakkjata bix-​Xhieda li ġew minn ħafna partijiet taʼ l-​Ingilterra, u ġie ppreżentat il-​programm kollu.

Fil-konklużjoni tat-​taħdita tiegħu, l-​aħħar kelliemi tal-​konvenzjoni qal lill-​udjenza biex jitilqu immedjatament mill-​post fejn kienu, minħabba li kien mistenni attakk mill-​ajru. It-​twissija kienet f’waqtha. Ma konniex ’il bogħod mis-​sala meta smajna s-​sireni u l-​kanuni jisparaw għall-​ajruplani. Meta ħarisna lura stajna naraw partita ajruplani jitfgħu l-​bombi fuq iċ-​ċentru tal-​belt. Mill-​bogħod, f’nofs in-​nirien u d-​duħħan, stajna naraw is-​sala fejn konna bil-​qiegħda ftit qabel; kienet meqruda kompletament! Għall-​grazzja t’Alla, ħadd mill-​aħwa Kristjani ma miet.

Sakemm rabbejna lil uliedna, ma stajniex inkunu pijunieri, imma ftaħna d-​dar tagħna għall-​indokraturi li jivvjaġġaw u għall-​pijunieri li ma kellhom ebda akkomodazzjoni. Darba minnhom, sitt pijunieri f’daqqa qagħdu fid-​dar tagħna għal ftit xhur. Bla dubju, is-​sħubija maʼ wħud bħal dawn kienet raġuni waħda għala t-​tifla tagħna Eunice għażlet li tibda taqdi bħala pijuniera fl-​1961 meta kellha biss 15-il sena. B’dispjaċir ngħidu li, it-​tifel tagħna, David, ma baqax jaqdi lil Jehovah meta kiber, u t-​tifla l-​oħra tagħna, Linda, mietet minħabba ċirkostanzi traġiċi matul il-​gwerra.

Id-​Deċiżjoni Tagħna li Mmorru Noqogħdu Spanja

L-​eżempju u l-​inkuraġġiment t’ommi kienu qanqlu ġewwa fija x-​xewqa li nkun missjunarja, u dik il-​mira qatt ma nsejtha kompletament. B’hekk, ħadna gost ħafna meta, fl-​1973, Eunice ħalliet l-​Ingilterra biex tmur Spanja fejn kien hemm il-​bżonn taʼ proklamaturi tas-​Saltna. M’għandniex xi ngħidu, iddispjaċiena li narawha sejra, imma konna wkoll kburin li riedet taqdi f’pajjiż barrani.

Matul is-​snin konna nżuru lil Eunice, u lil Spanja sirna nafuha sew. Fil-​fatt, jien u John morna nżuruha f’erbgħa mill-​inkarigi differenti tagħha. Imbagħad, hekk kif gerbbu s-​snin, saħħitna bdiet tmajna. John waqaʼ waqgħa li effettwatlu serjament saħħtu, u jien kelli problemi tal-​qalb u tat-​tirojde. Barra minn dan, it-​tnejn li aħna kellna l-​artrite. Għalkemm kellna tassew bżonn l-​għajnuna taʼ Eunice, ma ridnihiex titlaq l-​inkarigu tagħha minħabba fina.

Iddiskutejna l-​għażliet li kellna maʼ Eunice, u tlabna għal gwida. Hi kienet lesta li tiġi d-​dar biex tieħu ħsiebna, imma ddeċidejna li l-​aħjar soluzzjoni kienet li jien u John immorru ngħixu magħha ġo Spanja. La jien ma stajtx inkun missjunarja, almenu stajt nappoġġja lil binti u liż-​żewġ pijunieri sħabha fis-​servizz full-time. Sa dak iż-​żmien, jien u John ikkunsidrajna lil Nuria u lil Ana, iż-​żewġ pijunieri li ħadmu maʼ Eunice għal madwar 15-il sena, bħala t-​tfal tagħna stess. U huma kienu ferħanin bina meta konna mmorru ngħixu magħhom kull fejn kienu jiġu assenjati li jaqdu.

Għaddew iktar minn sitt snin minn mindu għamilna dik id-​deċiżjoni. Saħħitna ma baqgħetx sejra għall-​agħar, u ħajjitna saret ċertament iktar interessanti. Xorta waħda għadni ma tantx naf nitkellem bl-​Ispanjol, imma dan ma jwaqqafnix milli nippriedka. Jien u John inħossuna komdi fil-​kongregazzjoni żgħira tagħna f’Extremadura, fil-​Lbiċ taʼ Spanja.

Il-ħajja fi Spanja għallmitni ħafna dwar in-​natura internazzjonali tax-​xogħol taʼ l-​ippridkar tagħna tas-​Saltna, u issa nistaʼ nifhem iktar sew kif, bħalma qal Ġesù, “l-​għalqa hija d-​dinja.”—Mattew 13:38.

[Stampi f’paġna 28]

Naqdi bħala pijuniera fis-​snin tletin