Mistoqsijiet mill-Qarrejja
Skond Mattew 17:20, l-appostli ma kinux kapaċi jfejqu tifel itturmentat ‘minħabba l-fidi żgħira tagħhom.’ Madankollu, f’Mark 9:29, in-nuqqas t’abbiltà tagħhom huwa marbut mal-bżonn għat-talb. Għala jingħataw raġunijiet differenti fir-rakkonti differenti taʼ l-Evanġelju?
Attwalment, iż-żewġ rakkonti jissupplimentaw lil xulxin, u mhux jikkontradixxu lil xulxin. L-ewwelnett, ara x’jgħid Mattew 17:14-20. Wieħed raġel irrapporta li ibnu kien marid bl-epilessija u li d-dixxipli taʼ Ġesù ma setgħux ifejqu liż-żagħżugħ. Imbagħad Ġesù fejjaq lit-tifel billi keċċa demonju li kien qed jitturmentah. Id-dixxipli staqsew għala huma ma setgħux ikeċċuh lil dan id-demonju. Skond ir-rakkont taʼ Mattew, Ġesù wieġeb: “Minħabba l-fidi żgħira tagħkom! Għax tassew ngħidilkom, li kieku għandkom fidi mqar daqs żerriegħa tal-mustarda, kontu tgħidu lil din il-muntanja, ‘Warrab minn hawn u mur hemm’, u hi kienet twarrab; u ma jkun hemm xejn għalikom li ma jistax isir.”—Korsiv tagħna.
Issa sib Mark 9:14-29, fejn insibu iktar dettalji. Per eżempju, Mark 9:17 fih id-dettall li f’dan il-każ l-attakki taʼ l-epilessija kienu kkaġunati minn spirtu ħażin. Taʼ min jinnota li l-Bibbja xi mkien ieħor tgħid li Ġesù fejjaq nies li jbatu bl-epilessija u nies indemonjati. (Mattew 4:24) F’din is-sitwazzjoni partikulari, l-attakki kienu kkaġunati minn “spirtu mbikkem u trux,” jiġifieri, spirtu mill-agħar, fatt li jikkonfermah it-tabib Luqa. (Luqa 9:39; Kolossin 4:14) Innota l-frażi f’Mark 9:18, “Kull fejn [id-demonju] jaħkmu.” Mela t-tifel ma kienx maħkum mid-demonju l-ħin kollu, imma xi kultant biss. Xorta waħda, id-dixxipli ma setgħux ikeċċu lid-demonju u b’hekk ifejqu liż-żagħżugħ. Meta staqsew għala, Ġesù wieġeb: “Spirtu bħal dak . . . ma jistaʼ jitkeċċa b’xejn ħlief bit-talb.”
Iżda, jekk wieħed jaqra r-rakkont taʼ Mark bir-reqqa, dan juri li m’hemm ebda konflitt maʼ dak li ddokumenta Mattew. F’Mark 9:19, naqraw li Ġesù lmenta dwar in-nuqqas taʼ fidi taʼ dik il-ġenerazzjoni. U fil-vers 23, huwa ddokumentat li qal lil missier it-tifel: “Kollox jistaʼ jkun għal min jemmen [“għandu fidi,” NW]!” Mela Mark ukoll jisħaq fuq l-importanza tal-fidi. Kulma hemm differenti hu li, fil-vers 29, Mark jipprovdi dettall ieħor. Mark iżid dak li Ġesù qal dwar it-talb, dettall li la Mattew u lanqas Luqa ma inkludewh.
X’nistgħu ngħidu, allura? F’okkażjonijiet oħrajn kemm it-12-il appostlu u kemm is-70 dixxiplu keċċew spirti mill-agħar. (Mark 3:15; 6:13; Luqa 10:17) Imma f’dan il-każ id-dixxipli ma rnexxilhomx ikeċċu lil dan id-demonju. Għala? Jekk niġbru flimkien id-dettalji msemmijin fid-diversi rakkonti, bilfors nikkonkludu li huma ma kinux ippreparati biex jagħmlu hekk f’dan il-każ. Forsi parti mill-problema kienet it-tip taʼ demonju involut, ladarba jidher li d-demonji jistgħu jkollhom personalitajiet, interessi u saħansitra abbiltajiet differenti. Fil-każ taʼ dan id-demonju, kien hemm bżonn taʼ fidi partikolarment qawwija u talb ferventi għall-għajnuna t’Alla. M’għandniex xi ngħidu, Ġesù kellu fidi bħal din. Hu kellu wkoll l-appoġġ taʼ Missieru, is-Semmiegħ tat-talb. (Salm 65:3 [Salm 65:2, NW]) Ġesù mhux biss setaʼ jfejqu lit-tifel itturmentat billi jkeċċi lid-demonju imma fil-fatt hekk għamel.