Tistaʼ Temminha l-​Bibbja?

ĦAFNA nies għadhom jemmnuha l-​Bibbja, anki f’din id-​dinja moderna. Per eżemp­ju, fi stħarriġ reċenti mill-​Gallup dwar l-​Amerikani, 80 fil-​mija qalu li jemmnu li l-​Bibbja hija l-​Kelma ispirata t’Alla. Hu kemm hu l-​persentaġġ fejn toqgħod int, tistaʼ tifhem għala dawn il-​kredenti jippretendu li fil-​knisja jiġu mgħallmin il-​Bibbja. Imma taʼ spiss mhux hekk jiġri. Ħu, per eżempju, id-​duttrina dwar li r-​ruħ tieħu l-​kastig wara l-​mewt.

Hemm xi mkien fil-​Bibbja fejn jissemmew il-​purgatorju jew xi infern jaqbad? Illum, ħafna studjużi fil-​Kristjaneżmu jwieġbu le. In-​New Catholic Encyclopedia tistqarr: “Fl-​aħħar mill-​aħħar, id-​duttrina Kattolika tal-​purgatorju hija bbażata fuq it-​tradizzjoni, mhux fuq l-​Iskrittura Mqaddsa.” A Dictionary of Christian Theology jikkummenta dan rigward l-​infern: “Fit-​T[estment] il-​Ġ[did] ma nsibux in-​nar taʼ l-​infern bħala parti mill-​ippridkar primittiv.”

Fil-fatt, il-​kummissjoni dottrinali taċ-​Church of England dan l-​aħħar ngħatat prominenza fil-​gazzetti meta din irrikkmandat li t-​tagħlim tan-​nar taʼ l-​infern għandu jiġi miċħud għalkollox. Dr. Tom Wright, id-​dekan tal-​Katidral taʼ Litchfield, jistqarr li l-​istampa li kellna fil-​passat taʼ l-​infern “għamlet lil Alla mostru u ħalliet marki psikoloġiċi intensi fuq ħafna wħud.” Ir-​rapport tal-​kummiss­joni jiddeskrivi l-​infern bħala “ineżistenti għalkol­lox.”a B’mod simili, in-​New Catholic Encyclopedia tinnota dan rigward il-​ħarsa Kattolika: “Illum, it-​Teoloġija tikkunsidra l-​kwistjoni taʼ l-​infern mill-​aspett taʼ separazzjoni minn Alla.”

Attwalment, dak li tgħallem il-​Bibbja dwar ir-​ruħ ma jaqbel xejn mat-​tagħlim tal-​purgatorju u n-​nar taʼ l-​infern. Il-​Bibbja spiss titkellem dwar il-​mewt taʼ l-​erwieħ. “Ir-​ruħ li tidneb, tmut.” (Eżekjel 18:4, Karm Żammit; qabbel il-​verżjoni Kattolika Douay.) Skond il-​Bibbja, il-​mejtin m’humiex konxji, ma jist­għux iħossu wġigħ. “Il-​ħajjin, għallinqas, jafu li għad imutu, iżda l-​mejtin ma jafu xejn.” (Koħèlet 9:5) It-​tama li l-​Bibbja toffri għall-​mejtin hija dik taʼ rxoxt futur. Meta miet il-​ħabib tiegħu Lazzru, Ġesù qabbel il-​mewt maʼ l-​irqad. Marta, oħt Lazzru, esprimiet it-​tama mgħall­ma fil-​Bibbja meta ddikjarat: “Jiena naf li jerġaʼ jqum, fil-​qawmien mill-​imwiet fl-​aħħar jum.” Billi qajjem lil Lazzru mill-​mewt, Ġesù saħħaħ dik it-​tama għall-​umanità.—Ġwann 5:28, 29; 11:11-14, 24, 44.

L-istorjografi juru li t-​tagħlim li l-​bniedem jippossiedi ruħ separata u immortali ma oriġinax mill-​Bibbja imma mill-​filosofija Griega. In-​New Catholic Encyclopedia tosserva li l-​Lhud tal-​qedem ma kinux iqisu lill-​bniedem bħala li hu magħmul minn ġisem materjali u minn ruħ immaterjali. Din tgħid hekk dwar it-​twemmin tal-​Lhud: “Meta n-​nifs tal-​ħajja daħal fl-​ewwel bniedem li Alla kien sawwar mill-​art, hu sar ‘ħlejqa ħajja’ (Ġ[enesi] 2.7). Il-​mewt ma kinitx meqjusa bħala l-​firda taʼ żewġ elementi distinti fil-​bniedem, bħalma nsibu fil-​filosofija Griega; in-​nifs tal-​ħajja joħroġ u l-​bniedem isir ‘ħlejqa mejta’ (L[evitiku] 21.11; N[umri] 6.6; 19.13). Fiż-​żewġ każi l-​kelma ‘ħlejqa’ hija l-​kelma Ebrajka [neʹphesh], spiss tradotta ‘ruħ’ imma, fil-​fatt, tistaʼ tgħid li hija ugwali mal-​persuna.”

Dik l-​istess enċiklopedija tinnota li dan l-​aħħar xi studjużi Kattoliċi “sostnew li t-​T[estment] il-​Ġ[did] ma jgħallimx dwar l-​immortalità tar-​ruħ fis-​sens Ellenistiku [Grieg].” Din tikkonkludi: “Is-​soluzzjoni fundamentali għal din il-​problema ma tantx tins­tab fl-​ispekulazzjoni filosofika daqskemm tins­tab fl-​għotja sopranaturali taʼ l-​Irxoxt.”

Il-​Bibbja jew it-​Tradizzjoni?

Kif, iżda, daħlu dawn l-​ideat mhux Bibliċi fit-​tagħlim tal-​knisja? Ħafna knejjes isostnu li l-​Bibbja hija l-​ogħla awtorità li għandhom. Per eżempju, ftit taż-​żmien ilu l-​Papa Ġwanni Pawlu II tkellem dwar il-​ħtieġa li l-​Iskrittura tiġi “aċċettata mill-​fidili bħala li hija kompletament vera u li hija r-​regola suprema tal-​fidi tagħna.” Madankollu, huwa fatt li t-​tagħlim li nsibu llum fil-​Kristjaneżmu ma jaqbilx maʼ dak tal-​Kristjani taʼ l-​ewwel seklu. Ħafna mill-​knejjes iqisu l-​bidliet bħala parti mill-​iżvilupp gradwali tad-​duttrini tal-​knisja. Iktar minn hekk, il-​Knisja Kattolika hi taʼ l-​opinjoni li t-​tradizzjoni tal-​knisja għandha l-​istess awtorità daqskemm għandha l-​Iskrittura. In-​New Catholic Encyclopedia tgħid li l-​knisja “ma tħaddan l-​ebda verità fuq il-​bażi taʼ l-​Iskrittura waħedha, indipendentement mit-​tradizzjoni, u mill-​banda l-​oħra, lanqas ma tagħmel dan fuq il-​bażi tat-​tradizz­joni waħedha, indipendentement mill-​Iskrittura.”

Storikament, il-​knejjes bidlu t-​tagħlim Skritturali maʼ dak ibbażat fuq it-​tradizz­joni biss. Fil-​fatt, ħafna knejjes issa qed isostnu li t-​tagħlim tal-​Bibbja huwa żbaljat. Per eżemp­ju, in-​New Catholic Encyclopedia tistqarr li huwa “ovvju li ħafna stqarrijiet Bibliċi huma sempliċement foloz meta jiġu ġġudikati skond l-​għarfien modern tax-​xjenza u taʼ l-​istorja.” Rigward it-​tagħlim Bibliku li l-​mejtin m’humiex konxji, din iżżid: “Saħansitra fi kwistjonijiet reliġjużi, it-​T[estment] il-​Q[adim] jagħti xiehda li jeżisti għarfien mhux komplet rigward . . . il-​ħajja wara l-​mewt.” L-​enċiklopedija tiċċita Salm 6:6 (vers 5 f’xi Bibbji) bħala eżemp­ju taʼ dan: “Għax ħadd mill-​mejtin ma jiftakar fik; min ifaħħrek f’art l-​imwiet [“Xeol” (jew, Ħades), New World Translation]?” Xi seminarji u kulleġġi Protestanti m’għadhomx jgħallmu li l-​Bibbja hija infallibbli. Il-​Knisja Kattolika, min-​naħa l-​oħra, temmen li hi tippossiedi l-​maġisterju, jew l-​awtorità li tgħallem, u li permezz t’hekk tinterpreta dak li huwa mgħallem fil-​Bibbja. Iżda forsi tgħid bejnek u bejn ruħek, ‘Xi ngħidu jekk interpretazzjonijiet bħal dawn jidhru li jikkontradixxu l-​Iskrittura?’

L-​Importanza taʼ l-​Iskrittura

Ġesù darba wara l-​oħra kien jiċċita l-​Iskrittura bħala li hija awtoritattiva, billi spiss qabel kull punt kien jgħid: “Hemm miktub.” (Mattew 4:4, 7, 10; Luqa 19:46) Tabilħaqq, meta tkellem dwar il-​qagħda tal-​bniedem fiż-​żwieġ, Ġesù uża r-​rakkont tal-​ħolqien f’Ġenesi bħala s-​sors taʼ l-​informazzjoni, u mhux il-​konklużjonijiet filosofiċi Griegi. (Ġenesi 1:27; 2:24; Mattew 19:3-9) Biċ-​ċar, Ġesù kkunsidra l-​Iskrittura bħala mnebbħa minn Alla u fattwali. F’talba lil Missieru, hu qal: “Il-​kelma tiegħek hi l-​verità.”—Ġwann 17:17.b

Il-Bibbja tiddokumenta ċ-​ċensura li Ġesù għadda fuq il-​mexxejja reliġjużi taʼ żmienu: “Hekk intom, twarrbu l-​kmandamenti taʼ Alla biex tħaddnu t-​tradizzjoni tal-​bnedmin. . . . Hekk iġġibu fix-​xejn il-​kelma taʼ Alla bit-​tradizzjoni.” (Mark 7:6-13) Bl-​istess mod, l-​appostlu Pawlu rreżista l-​pressjoni li jinkludi kemm filosofija Griega kif ukoll tradizzjonijiet żbaljati fit-​tagħlim tiegħu. Hu qal: “Qisu li ħadd ma ijassarkom b’filosofija u kliem qarrieq u fieragħ skond dak li hu ġej mill-​bnedmin.” (Kolossin 2:8; 1 Korintin 1:22, 23; 2:1-13) Kien hemm xi tradizzjonijiet, jew tagħlim, li Pawlu ħeġġeġ lill-​Kristjani biex iżommu, però dawn kienu bbażati fuq l-​Iskrittura u kienu għalkollox fi qbil magħha. (2 Tessalonikin 2:13-15) “L-​Iskrittura kollha hija mnebbħa minn Alla, u tiswa,” kiteb Pawlu, “biex hekk il-​bniedem taʼ Alla jkun perfett [“kompetenti għalkollox,” NW], mħejji għal kull ħidma tajba.” (Korsiv tagħna.)—2 Timotju 3:16, 17.

Pawlu ra li kellu jiġi żmien meta n-​nies kienu se jitbiegħdu mit-​tagħlim tal-​Bibbja. Hu wissa lil Timotju: “Għad jiġi żmien meta għat-​tagħlim tajjeb ma jibqgħalhomx sabar, . . . u jwarrbu widnejhom mis-​sewwa biex jiġġerrew wara l-​ħrejjef.” Hu ħeġġeġ lil Timotju: “Imma int oqgħod dejjem b’għajnejk miftuħa.” (2 Timotju 4:3-5) Imma kif? Mod wieħed huwa billi jkollok “moħħ nobbli.” Dizzjunarju Grieg jispjega din il-​kelma Biblika bħala “volontà li titgħallem u tiżen xi ħaġa imparz­jalment.” Luqa uża din l-​espressjoni biex jiddeskrivi s-​semmiegħa taʼ Pawlu fil-​Berija taʼ l-​ewwel seklu. It-​tagħlim taʼ Pawlu kien ġdid għalihom, u dawn ma ridux jiġu żvijati. Waqt li faħħarhom, Luqa kiteb: “Dawn il-​Lhud [il-Berijani] kienu nies taʼ qalb kbira [“taʼ moħħ nobbli,” NW] aktar minn dawk taʼ Tessalonika; huma laqgħu l-​kelma bil-​ħeġġa kollha, u kuljum bdew iqallbu l-​Iskrittura biex jaraw jekk dak li semgħu kienx minnu.” Il-​fatt li l-​Berijani kellhom moħħ nobbli m’għamilhomx nies xettiċi, inklinati li ma jemmnu f’xejn. Minflok, ir-​riżultat tat-​tfittix onest tagħhom kien li “ħafna minnhom emmnu.”—Atti 17:11, 12.

Il-​Benefiċċji taʼ li Ngħixu fi Qbil mal-​Bibbja

Il-​Kristjani bikrin kienu magħrufin kemm għal-​lealtà tagħhom lejn il-​Bibbja u kemm għall-​imħabba li tissagrifika lilha nfisha li kellhom. Madankollu, illum, ħafna nies “jiċħ­du l-​qawwa tat-​tjieba, minkejja li minn barra jagħmluha taʼ tajbin.” (2 Timotju 3:5) Illum kwalunkwe għamla taʼ Kristjanità li m’hijiex fi qbil maʼ dik oriġinali, ma tistax tkun qawwa ġenwina għat-​tajjeb fil-​ħajjiet tan-​nies. Jistaʼ dan jgħinna biex nifhmu l-​għala, fil-​biċċa l-​kbira tal-​Kristjaneżmu, naraw żjieda fil-​vjolenza, fl-​immoralità, fil-​kollass tal-​familja, u fil-​materjaliżmu? F’xi artijiet “Kristjani,” isiru gwerer etniċi ħorox saħansitra bejn membri taʼ l-​istess reliġjon.

Għosfor dan l-​ispirtu taʼ moħħ nobbli li kell­hom il-​Berijani? Jeżisti llum xi grupp taʼ nies li jemmen fil-​Bibbja u jgħix fi qbil magħha?

L-Encyclopedia Canadiana tosserva: “Ix-​xogħol tax-​Xhieda taʼ Jehovah huwa r-​rinaxximent u t-​twaqqif mill-​ġdid tal-​Kristjanità primittiva pprattikata minn Ġesù u d-​dixxipli tiegħu matul l-​ewwel u t-​tieni seklu taʼ l-​era tagħna.” Rigward ix-​Xhieda, in-​New Catholic Encyclopedia tinnota: “Huma jqisu l-​Bibbja bħala l-​uniku sors tagħhom taʼ twemmin u linja taʼ kondotta.”

M’hemmx dubju li din hija raġuni ewlenija għala x-​Xhieda taʼ Jehovah madwar id-​dinja huma magħrufin għall-​prosperità spiritwali, il-​paċi, u l-​hena tagħhom. Għaldaqstant aħna ninkuraġġixxu lill-​qarrejja tagħna biex jitgħallmu iktar dwar it-​tagħlim tal-​Bibbja li jagħti s-​saħħa spiritwali. Iktar għarfien jistaʼ jwassal għal saħansitra fiduċja akbar fil-​Bibbja u fidi iktar qawwija f’Alla. Il-​benefiċċji eterni taʼ fidi bħal din huma vallapena tassew.

[Noti taʼ taħt]

[Stampa f’paġna 6]

L-​appostlu Pawlu u oħrajn ippridkaw fis-​suq

[Stampa f’paġna 7]

Ix-​Xhieda taʼ Jehovah “jqisu l-​Bibbja bħala l-​uniku sors tagħhom taʼ twemmin u linja taʼ kondotta”