Jipproteġu Legalment l-​Aħbar Tajba

DAQSKEMM ilu l-​bniedem jibni bliet, daqshekk ieħor ilu jibni ħitan. Speċjalment fl-​imgħoddi, dawn is-​swar kienu taʼ protezzjoni. Minn fuqhom, id-​difensuri setgħu jiġġieldu biex jipproteġu l-​ħitan milli jiġu mfarrkin jew imħaffrin minn taħt mill-​attakkanti. Mhux l-​abitanti tal-​belt biss kienu jsibu protezzjoni imma spiss anki dawk mill-​ibliet taʼ madwar sabu refuġju ġewwa dawn il-​ħitan.—2 Samwel 11:20-24; Isaija 25:12.

B’mod simili, ix-​Xhieda taʼ Jehovah bnew ħajt​—ħajt legali—​taʼ protezzjoni. Dan il-​ħajt ma ġiex imtellaʼ biex jiżola lix-​Xhieda mill-​kumplament tas-​soċjetà, għax ix-​Xhieda taʼ Jehovah huma magħrufin bħala nies soċjevoli u dħulin. Pjuttost, dan isaħħaħ il-​garanziji legali tal-​libertajiet bażiċi għan-​nies kollha. Fl-​istess ħin, jipproteġi d-​drittijiet legali tax-​Xhieda sabiex b’hekk ikunu jistgħu jipprattikaw il-​qima tagħhom bil-​libertà. (Qabbel Mattew 5:14-16.) Dan il-​ħajt jissalvagwardja l-​mod tagħhom taʼ qima u d-​dritt tagħhom li jippridkaw l-​aħbar tajba tas-​Saltna t’Alla. X’inhu dan il-​ħajt, u kif inbena?

Jibnu Ħajt Legali taʼ Protezzjoni

Għalkemm ix-​Xhieda taʼ Jehovah jgawdu l-​libertà reliġjuża f’ħafna pajjiżi, f’xi postijiet kienu l-​mira t’attakki mhux iġġustifikati. Meta ġiet sfidata l-​libertà tal-​qima tagħhom biex jiltaqgħu flimkien jew biex jippridkaw minn dar għal dar, huma ħadu l-​passi legali meħtiġin. Każi legali li jinvolvu lix-​Xhieda kien hemm bl-​eluf madwar id-​dinja kollha.a Mhux kollha ntrebħu. Imma meta l-​qrati tal-​maġistrati qatgħuha kontriehom, huma taʼ spiss appellaw lill-​qrati superjuri. B’liema riżultat?

Matul l-​għaxriet taʼ snin tas-​seklu 20, rebħiet legali f’ħafna pajjiżi stabbilew preċedenti taʼ min joqgħod fuqhom u li x-​Xhieda taʼ Jehovah rreferew għalihom f’każi iktar tard. Bħal briks jew ġebel li jintużaw biex jinbena ħajt, dawn id-​deċiżjonijiet favorevoli jikkostitwixxu ħajt legali taʼ protezzjoni. Minn fuq dan il-​ħajt taʼ preċedenti, ix-​Xhieda komplew jiġġieldu għal-​libertà reliġjuża biex jipprattikaw il-​qima tagħhom.

Ikkunsidra, bħala eżempju, il-​każ taʼ Murdock v. Commonwealth of Pennsylvania, li ġie deċiż mill-​Qorti Suprema taʼ l-​Istati Uniti fit-​3 taʼ Mejju, 1943. Il-​mistoqsija li ġiet imqajma f’dan il-​każ kienet: Għandhom ix-​Xhieda taʼ Jehovah jiksbu liċenzja bħala bejjiegħa kummerċjali biex iqassmu l-​letteratura reliġjuża tagħhom? Ix-​Xhieda taʼ Jehovah sostnew li m’għandhomx jiġu mġagħlin jagħmlu hekk. Ix-​xogħol taʼ l-​ippridkar tagħhom m’huwiex​—u qatt ma kien—​kummerċjali. L-​objettiv tagħhom m’huwiex li jagħmlu l-​flus, imma li jippridkaw l-​aħbar tajba. (Mattew 10:8; 2 Korintin 2:17) Fid-​deċiżjoni taʼ Murdock, il-​Qorti qablet max-​Xhieda, billi sostniet li kwalunkwe rikjesta taʼ ħlas taʼ taxxa taʼ liċenzja bħala kundizzjoni bil-​quddiem għat-​tqassim taʼ letteratura reliġjuża m’hijiex skond il-​kostituzzjoni.b Din id-​deċiżjoni stabbiliet preċedent importanti, u minn dakinhar ’l hawn ix-​Xhieda rreferew b’suċċess għalih bħala awtorità f’diversi każi. Id-​deċiżjoni taʼ Murdock tat prova li kienet briksa soda fil-​ħajt legali taʼ protezzjoni.

Każi bħal dawn swew ħafna biex jipproteġu l-​libertà reliġjuża għan-​nies kollha. Il-​University of Cincinnati Law Review qalet dan rigward il-​kontribut li taw ix-​Xhieda għad-​difiża tad-​drittijiet ċivili fl-​Istati Uniti: “Ix-​Xhieda taʼ Jehovah kellhom impatt qawwi fuq l-​iżvilupp tal-​liġi kostituzzjonali, partikolarment billi kabbru l-​parametri tal-​protezzjoni għad-​diskors u r-​reliġjon.”

Isaħħu l-​Ħajt

Maʼ kull rebħa legali, dan il-​ħajt kompla jissaħħaħ. Ikkunsidra ftit mid-​deċiżjonijiet tas-​snin 90 li bbenefikaw minnhom ix-​Xhieda taʼ Jehovah, kif ukoll dawk kollha li jħobbu l-​libertà, mad-​dinja kollha.

Il-Greċja. Fil-​25 taʼ Mejju, 1993, il-​Qorti Ewropea tad-​Drittijiet tal-​Bniedem appoġġat id-​dritt taʼ ċittadin Grieg biex jgħallem it-​twemmin reliġjuż tiegħu lil oħrajn. Il-​każ involva lil Minos Kokkinakis, li dak iż-​żmien kellu 84 sena. Bħala wieħed mix-​Xhieda taʼ Jehovah, Kokkinakis kien ġie arrestat iktar minn 60 darba mill-​1938, kien ittellaʼ 18-il darba quddiem il-​qrati Griegi, u kien qattaʼ iktar minn sitt snin il-​ħabs. Hu ġie kkundannat l-​iktar minħabba liġi Griega tas-​snin 30 li pprojbiet il-​proselitiżmu​—liġi li kienet responsabbli għall-​arrest taʼ kważi 20,000 Xhud taʼ Jehovah mill-​1938 sa l-​1992. Il-​Qorti Ewropea qatgħetha li l-​gvern Grieg kien kiser il-​libertà reliġjuża taʼ Kokkinakis u tagħtu kumpens li kien jammonta għal $14,400 [Lm5,760]. F’dik id-​deċiżjoni, il-​Qorti qatgħetha li x-​Xhieda taʼ Jehovah huma tabilħaqq “reliġjon magħrufa.”​—Ara The Watchtower taʼ l-​1 taʼ Settembru, 1993, paġni 27-31.

Il-Messiku. Fis-​16 taʼ Lulju, 1992, sar pass taʼ ġgant fid-​difiża tal-​libertà reliġjuża fil-​Messiku. F’din id-​data ġiet stabbilita l-​Liġi taʼ l-​Assoċjazzjonijiet Reliġjużi u l-​Qima Pubblika. Permezz taʼ din il-​liġi, grupp reliġjuż jistaʼ jiġi rrikonoxxut legalment bħala istituzzjoni reliġjuża billi jikseb ir-​reġistrazzjoni meħtieġa. Qabel, ix-​Xhieda taʼ Jehovah, bħar-​reliġjonijiet l-​oħrajn fil-​pajjiż, sempliċement eżistew imma ma kinux rikonoxxuti legalment. Fit-​13 t’April, 1993, ix-​Xhieda applikaw għar-​reġistrazzjoni. B’ferħ, fis-​7 taʼ Mejju, 1993, huma ġew irreġistrati legalment bħala La Torre del Vigía, A. R., u Los Testigos de Jehová en México, A. R., li t-​tnejn huma assoċjazzjonijiet reliġjużi.​—Ara l-​Awake! tat-​22 taʼ Lulju, 1994, paġni 12-14.

Il-Brażil. F’Novembru taʼ l-​1990, in-​National Institute of Social Security (INSS) tal-​Brażil informa lill-​uffiċċju tal-​fergħa tal-​Watch Tower Society li l-​ministri volontiera ġewwa Betel (l-isem tal-​faċilitajiet tal-​fergħa tax-​Xhieda taʼ Jehovah) ma kinux se jitqiesu iktar bħala ministri reliġjużi, u għalhekk kienu se jaqgħu taħt il-​liġijiet tax-​xogħol tal-​Brażil. Ix-​Xhieda appellaw din id-​deċiżjoni. Fis-​7 taʼ Ġunju, 1996, il-​Konsulent Ġudizzjali taʼ l-​Uffiċċju taʼ l-​Avukat tal-​Kuruna fil-​Brasília ħareġ deċiżjoni li tappoġġa l-​pożizzjoni tal-​ministri ġewwa Betel bħala membri taʼ grupp reliġjuż leġittimu, mhux bħala ħaddiema sekulari.

Il-Ġappun. Fit-​8 taʼ Marzu, 1996, il-​Qorti Suprema tal-​Ġappun għaddiet deċiżjoni fuq il-​kwistjoni taʼ l-​edukazzjoni u l-​libertà tar-​reliġjon​—għall-​benefiċċju taʼ kulħadd fil-​Ġappun. Il-​qorti unanimament qalet li l-​Kobe Municipal Industrial Technical College kiser il-​liġi meta keċċa lil Kunihito Kobayashi talli rrifjuta li jipparteċipa fit-​taħriġ taʼ l-​arti marzjali. Din id-​deċiżjoni timmarka l-​ewwel darba li l-​Qorti Suprema għaddiet deċiżjoni bbażata fuq il-​libertà reliġjuża ggarantita mill-​Kostituzzjoni Ġappuniża. Peress li segwa l-​kuxjenza tiegħu mħarrġa fuq il-​Bibbja, dan ix-​Xhud żagħżugħ ħass li dawn l-​eżerċizzji ma kinux fi qbil maʼ ċerti prinċipji Bibliċi bħal dak misjub f’Isaija 2:4, li jgħid: “Huma jibdlu x-​xwabel tagħhom f’sikek tal-​moħriet, u l-​lanez tagħhom fi mnieġel. Ebda ġens ma jerfaʼ x-​xabla kontra ġens ieħor, u s-​sengħa tal-​gwerra ma jitgħallmuhiex iżjed.” Id-​deċiżjoni tal-​Qorti stabbiliet preċedent għal każi futuri.​—Ara The Watchtower taʼ l-​1 taʼ Novembru, 1996, paġni 19-21.

Fid-9 taʼ Frar, 1998, il-​Qorti Superjuri taʼ Tokyo għaddiet deċiżjoni importanti oħra li appoġġat id-​dritt taʼ waħda Xhud jisimha Misae Takeda li tirrifjuta l-​kura medika li m’hijiex fi qbil mal-​kmand tal-​Bibbja biex wieħed ‘jitbiegħed mid-​demm.’ (Atti 15:28, 29) Dan il-​każ ġie appellat quddiem il-​Qorti Suprema, u għad irridu naraw jekk hiex se tiġi appoġġata d-​deċiżjoni tal-​Qorti Superjuri.

Il-Filippini. F’deċiżjoni li għaddiet fl-​1 taʼ Marzu, 1993, il-​Qorti Suprema Filippina ddeċidiet unanimament favur ix-​Xhieda taʼ Jehovah f’każ li kien jinvolvi Xhieda żgħażagħ li tkeċċew mill-​iskola minħabba li rrifjutaw li jsellmu lill-​bandiera għalkemm dan għamluh bir-​rispett kollu.

Kull deċiżjoni favorevoli tal-​qorti hija bħal ġebla jew briksa oħra li jsaħħu l-​ħajt legali li jipproteġi d-​drittijiet mhux biss tax-​Xhieda taʼ Jehovah imma tan-​nies kollha.

Jissalvagwardjaw il-​Ħajt

Ix-​Xhieda taʼ Jehovah huma rreġistrati legalment f’153 pajjiż, u kif jixraq qed igawdu ħafna libertajiet, bħalma qed jagħmlu r-​reliġjonijiet rikonoxxuti l-​oħrajn. Wara għaxriet taʼ snin taʼ persekuzzjoni u projbizzjoni fl-​Ewropa tal-​Lvant u f’dik li qabel kienet l-​Unjoni Sovjetika, ix-​Xhieda taʼ Jehovah qegħdin jiġu rikonoxxuti legalment f’pajjiżi bħall-​Albanija, il-​Belarus, ir-​Repubblika Ċeka, il-​Georgia, l-​Ungerija, il-​Kazakstan, il-​Kyrgyzstan, ir-​Rumanija, u s-​Slovakkja. Madankollu, f’ċerti pajjiżi llum, inkluż f’xi pajjiżi Ewropej tal-​Punent li fihom ilhom stabbiliti s-​sistemi ġudizzjali, id-​drittijiet tax-​Xhieda taʼ Jehovah qed jiġu sfidati jew miċħudin serjament. Dawk li jopponu qed jagħmlu minn kollox biex “jagħmlu l-​qerq taħt il-​libsa tal-​liġi” kontra x-​Xhieda. (Salm 94:20) Dawn kif jirreaġixxu?c

Ix-Xhieda taʼ Jehovah jixtiequ jikkooperaw mal-​gvernijiet kollha, imma jixtiequ wkoll ikollhom il-​libertà legali biex jipprattikaw il-​qima tagħhom. Għandhom konvinzjoni soda li kwalunkwe liġijiet jew deċiżjonijiet tal-​qorti li jistgħu jipprojbixxuhom milli jobdu l-​kmandi t’Alla​—inkluż il-​kmand li jippridkaw l-​aħbar tajba—​huma invalidi. (Mark 13:10) Jekk ma jistaʼ jintlaħaq ebda qbil b’mod amikevoli, ix-​Xhieda taʼ Jehovah jirrikorru għall-​passi legali, billi jsegwu kull mod t’appell meħtieġ sabiex jiksbu l-​protezzjoni legali għad-​dritt mogħti minn Alla biex jipprattikaw il-​qima tagħhom. Ix-​Xhieda taʼ Jehovah għandhom fiduċja sħiħa fil-​wegħda t’Alla: “Ebda arma magħmula kontrik ma tiswa.”—Isaija 54:17.

[Noti taʼ taħt]

[Kaxxa f’paġna 21]

Jiddefendu d-​Drittijiet tax-​Xhieda taʼ Jehovah

Il-​persekuzzjoni li nġabet fuq ix-​Xhieda taʼ Jehovah rriżultat f’li ġew imtellgħin quddiem imħallfin u uffiċjali governattivi mad-​dinja kollha. (Luqa 21:12, 13) Ix-​Xhieda taʼ Jehovah għamlu li setgħu biex jiddefendu legalment id-​drittijiet tagħhom. Ir-​rebħiet fil-​qorti f’ħafna pajjiżi għenu biex jipproteġu l-​libertà legali tax-​Xhieda taʼ Jehovah, inkluż id-​drittijiet tagħhom biex:

◻ jippridkaw minn dar għal dar meħlusin mill-​kontroll impost fuq il-​bejjiegħa kummerċjali​—Murdock v. Commonwealth of Pennsylvania, il-​Qorti Suprema taʼ l-​Istati Uniti (1943); Kokkinakis v. Greece, il-​Qorti Ewropea tad-​Drittijiet tal-​Bniedem (ECHR) (1993).

◻ jiltaqgħu għal qima fil-​libertà​—Manoussakis and Others v. Greece, ECHR (1996).

◻ jiddeċiedu kif jistgħu juru b’mod kuxjenzjuż rispett lejn il-​bandiera jew simbolu nazzjonali​—West Virginia State Board of Education v. Barnette, il-​Qorti Suprema taʼ l-​Istati Uniti (1943); Supreme Court of the Philippines (1993); Supreme Court of India (1986).

◻ jirrifjutaw is-​servizz militari li jmur kontra l-​kuxjenza Kristjana tagħhom​—Georgiadis v. Greece, ECHR (1997).

◻ jagħżlu kura u mediċini li ma jmorrux kontra l-​kuxjenza tagħhom​—Malette v. Shulman, f’Ontario, il-​Kanada, il-​Qorti taʼ l-​Appell (1990); Watch Tower v. E.L.A., il-​Qorti Superjuri, f’San Juan, il-​Puerto Rico (1995); Fosmire v. Nicoleau, New York, U.S.A., il-​Qorti taʼ l-​Appell (1990).

◻ irabbu lit-​tfal tagħhom skond it-​twemmin tagħhom ibbażat fuq il-​Bibbja saħansitra meta dan it-​twemmin jiġi sfidat fil-​kontroversji dwar il-​kustodja tat-​tfal​—St-Laurent v. Soucy, il-​Qorti Suprema tal-​Kanada (1997); Hoffmann v. Austria, ECHR (1993).

◻ ikollhom u jkunu jistgħu jmexxu aġenziji legali li jirċievu l-​istess eżenzjonijiet mit-​taxxa bħalma jirċievu l-​aġenziji mmexxijin minn reliġjonijiet rikonoxxuti oħrajn​—People v. Haring, fi New York, U.S.A., il-​Qorti taʼ l-​Appell (1960).

◻ jirċievu għal dawk maħturin f’xi forma taʼ servizz full-time speċjali l-​istess trattament favorevoli dwar taxxa bħalma jirċievu l-​ħaddiema reliġjużi full-time taʼ reliġjonijiet oħrajn​—in-​National Institute of Social Security tal-​Brażil, fil-​Brasília, (1996).

[Stampa f’paġna 20]

Minos Kokkinakis maʼ martu

[Stampa f’paġna 20]

Kunihito Kobayashi

[Sors taʼ l-​Istampa f’paġna 19]

The Complete Encyclopedia of Illustration/J. G. Heck