Magħqudin fl-​Aqwa Mod taʼ Ħajja

Jekk il-​popolazzjoni tad-​dinja tkompli tiżdied, dalwaqt se jkun hawn sitt elf miljun ruħ fuq l-​art. Għalkemm kulħadd ġej mill-​istess antenat, il-​maġġuranza ma jidhrux li jirrikonoxxu li huma membri taʼ familja globali u li jridu jagħtu kont lil Ħallieq għaref kollu mħabba. B’sogħba, in-​nuqqas t’unità u t-​taqbid bejn il-​ġnus, ir-​razez, u l-​kulturi huma xiehda taʼ dan l-​istat imnikket t’affarijiet.

META tqis il-​kundizzjonijiet preżenti tad-​dinja, l-​unità globali tistaʼ tidher bħala għan li ma jistax jintlaħaq. Il-​pubblikazzjoni The Columbia History of the World tiddikjara: “Dwar il-​kwistjoni importanti ferm taʼ kif ngħixu flimkien, id-​dinja kontemporanja m’għandha ebda idea ġdida x’toffri, lanqas waħda li hi waħda.”

Madankollu, biex tinġieb l-​unità fost l-​abitanti kollha taʼ l-​art m’hemmx bżonn taʼ xi idea ġdida. Il-​mogħdija li twassal għall-​unità tinsab fl-​Iskrittura Mqaddsa. Din tiċċentra fuq il-​qima taʼ Dak li ħalaq l-​art u l-​ħajja kollha taʼ fuqha. Il-​vera unità tal-​ħsieb, taʼ l-​iskop, u tal-​mod taʼ ħajja diġà teżisti fost in-​nies t’Alla. Għalkemm jgħoddu iktar minn ħames miljuni u nofs f’233 pajjiż, huma magħqudin fil-​konvinzjoni tagħhom li l-​mod taʼ ħajja t’Alla huwa l-​aqwa mod. Bħas-​salmista, huma jitolbu: “Urini, Mulej, triqatek, biex nimxi fis-​sewwa tiegħek; agħtini qalb waħda, biex ikolli l-​biżaʼ taʼ ismek.”—Salm 86:11.

Din l-​unità taʼ nies fil-​qima vera bassarha żmien twil ilu l-​profeta Isaija. Hu kiteb: “Għad jiġri fl-​aħħar jiem li l-​għolja tad-​dar tal-​Mulej togħla ’l fuq mill-​qċaċet tal-​muntanji, u tintrefaʼ ’l fuq mill-​għoljiet, lejha għad jiġru l-​ġnus kollha. Kotra taʼ popli għad jiġu u jgħidu: ‘Ħalli mmorru u nitilgħu fuq l-​għolja tal-​Mulej, lejn id-​dar taʼ Alla taʼ Ġakobb, biex jgħallimna triqatu, u nimxu fil-​mogħdijiet tiegħu.’”—Isaija 2:2, 3.

L-unità tax-​Xhieda taʼ Jehovah hija unika. F’iktar minn 87,000 kongregazzjoni mad-​dinja kollha, huma jieħdu sehem mill-​istess ikel spiritwali fil-​laqgħat tagħhom ġimgħa wara l-​oħra. (Mattew 24:45-47) Madankollu, minn nofs l-​1998 sal-​bidu taʼ l-​1999, ix-​Xhieda wrew l-​unità tagħhom b’mod ieħor​—billi nġabru għall-​Konvenzjonijiet tagħhom “Il-​Mod taʼ Ħajja t’Alla” li damu tlett ijiem u li saru madwar id-​dinja kollha. Fi 13-il pajjiż, dawn il-​laqgħat inkludew delegazzjonijiet kbar minn diversi pajjiżi u ssejħu konvenzjonijiet internazzjonali. L-​oħrajn kienu msejħin konvenzjonijiet distrettwali. Imma dawn il-​konvenzjonijiet kollha ppreżentaw l-​istess programm t’affarijiet tajbin spiritwalment.

Kemm ħadna pjaċir naraw delegati ferħanin, lebsin pulit, deħlin ġewwa awditorji u stadji biex jitgħallmu minn Jehovah! L-​espressjoni taʼ waħda mid-​delegati fil-​konvenzjoni internazzjonali li nżammet f’Michigan, l-​Istati Uniti, kienet tipika. Din qalet: “Tant fraħna naraw lil ħutna minn madwar id-​dinja kollha—​ir-Repubblika Ċeka, il-​Barbados, in-​Niġerja, l-​Ungerija, l-​Ingilterra, l-​Olanda, l-​Etjopja, il-​Kenja, u ħafna pajjiżi oħrajn​—jgħannqu lil xulxin! Kien sabiħ ferm li tara lill-​aħwa jgħammru flimkien f’unità, jibku biki taʼ ferħ minħabba l-​imħabba li għandhom għal xulxin u għall-​Kbir Alla tagħhom, Jehovah.” L-​artiklu li jmiss se jeżamina l-​programm tal-​konvenzjoni li miljuni sħaħ gawdew madwar id-​dinja.

[Sors taʼ l-​Istampa f’paġna 3]

Mountain High Maps® Copyright © 1997 Digital Wisdom, Inc.