Il-​Prezz tal-​Kburija—Kemm Hu Għoli?

ĠIE li kellek x’taqsam maʼ xi ħadd li pprova jċekknek apposta? Forsi xi maniġer, mgħallem, supervisor, jew saħansitra xi qarib li qiesek bħala inferjuri u ttrattak bl-​akbar disprezz? Kif ħassejtek dwar din il-​persuna? Ħassejtek miġbud lejn il-​personalità tiegħu? Dażgur li le! Għala? Għaliex il-​kburija ttellaʼ ħajt u toħnoq il-​komunikazzjoni.

Il-kburija ġġiegħel lil persuna ċċekken lil kulħadd, sabiex hu jew hi dejjem jidhru superjuri. Persuna bħal din rari biex tgħid kelma tajba dwar oħrajn. Dejjem lesta li tgħaddi kumment negattiv​—“iva, jistaʼ jkun, imma hu għandu din il-​problema jew dak id-​difett.”

Fil-ktieb Thoughts of Gold in Words of Silver, il-​kburija hija deskritta bħala “vizzju li jherri. Tirrovina lil persuna u ma tħalli xejn fiha li wieħed jistaʼ jammira.” Hija xi ħaġa taʼ l-​iskantament li ħadd ma jħossu komdu maʼ persuna kburija? Fil-​fatt, il-​prezz tal-​kburija taʼ spiss ikun nuqqas taʼ ħbieb veri. “B’kuntrast,” ikompli jgħid l-​istess ktieb, “in-​nies iħobbu lil dawk umli​—mhux lil dawk li huma kburin għax juru l-​umiltà, imma l-​umli vera.” B’mod xieraq, il-​Bibbja tistqarr: “Il-​kburija ċċekken il-​bniedem, imma min jiċċekken jikseb il-​ġieħ.”—Proverbji 29:23.

Madankollu, iktar importanti minn ħbiberija jew ġieħ min-​nies, il-​kburija kif teffettwa r-​relazzjoni taʼ dak li jkun m’Alla? Alla kif iħares lejn min hu kburi, min jippretendiha, u min hu prużuntuż? Il-​kburija jew l-​umiltà​—jimpurtah minnhom?

Lezzjoni fl-​Umiltà

Il-​kittieb imnebbaħ taʼ Proverbji jistqarr: “Qabel il-​qerda tiġi l-​kburija, u qabel il-​waqgħa t-​tkabbir. Aħjar tiċċekken mal-​fqajrin, milli taqsam il-​priża mal-​kburin.” (Proverbji 16:18, 19) L-​għerf taʼ dan il-​kliem huwa kkonfermat b’mod ċar fil-​każ tal-​ġeneral Sirjan Nagħman, li kien jgħix fi żmien il-​profeta Iżraelit Eliżew.

Nagħman kien imġiddem. Waqt li kien qed ifittex kura, hu vvjaġġa lejn is-​Samarija billi ħaseb li setaʼ jkollu kuntatt persunali maʼ Eliżew. Minflok, il-​profeta bagħat lill-​qaddej tiegħu b’istruzzjonijiet għal Nagħman biex jinħasel sebaʼ darbiet fix-​Xmara Ġordan. Nagħman ħassu offiż għat-​trattament u l-​parir li ngħatawlu. Il-​profeta għala ma setax imur hu u jkellmu personalment minflok ma jibgħat lil qaddej? U żgur li kwalunkwe xmara Sirjana kienet tajba daqs il-​Ġordan! Il-​problema tiegħu kienet il-​kburija. Ir-​riżultat? B’ferħ għalih, hu ta kas il-​parir għaqli. “Niżel fil-​Ġordan, u għodos sebaʼ darbiet, bħalma qallu Eliżew, il-​bniedem taʼ Alla, u ġismu raġaʼ sarlu qisu l-​ġisem taʼ tfajjel żagħżugħ, u ndaf mill-​ġdiem tiegħu.”—2 Slaten 5:14.

Xi drabi minn sempliċement ftit umiltà nakkwistaw benefiċċji kbar.

Il-​Prezz taʼ l-​Arroganza

Madankollu, il-​prezz li tesiġi minna l-​kburija jistaʼ jkun bil-​wisq iktar għoli milli sempliċement nitilfu xi benefiċċji jew qligħ. Hemm grad ieħor taʼ kburija li huwa espress fil-​kelma Griega hybris. Skond l-​istudjuż Grieg Barclay, “hubris hija taħlita taʼ kburija u krudeltà . . . , id-​disprezz arroganti li jġiegħel [bniedem] jumilja lil sħabu.”

Eżempju ċar taʼ din ix-​xorta taʼ kburija esaġerata tidher fil-​Bibbja. Huwa l-​każ taʼ Ħanun, sultan taʼ Għammon. L-​Insight on the Scriptures jispjega: “Minħabba l-​qalb tajba bl-​imħabba li Naħas wera lejh, David bagħat messaġġiera biex jagħtu l-​għomor lil Ħanun minħabba l-​mewt taʼ missieru. Imma Ħanun, konvint mill-​prinċpijiet tiegħu li din kienet biss mossa makakka min-​naħa taʼ David biex jispija l-​belt, għamel għajb lill-​qaddejja taʼ David billi qaxxrilhom nofs il-​leħja u ċarrtilhom ilbieshom min-​nofs sa ftit ’l isfel minn qaddhom u keċċiehom ’il barra.”a Rigward dan l-​inċident, Barclay josserva: “Dan it-​trattament kien hubris. Kien insult, offiża, u umiljazzjoni pubblika f’daqqa.”—2 Samwel 10:1-5.

Iva, wieħed kburi kapaċi jkun insolenti, jumilja lil oħrajn. Hu b’qalb iebsa jieħu pjaċir iweġġaʼ lil xi ħadd mingħajr ma jħoss ebda rimors, u mbagħad tgħidx kemm jieħu gost jara lil dik il-​persuna mdejqa u umiljata. Imma li tnaqqas jew teqred ir-​rispett li dak li jkun ikollu tiegħu nnifsu huwa sejf b’żewġt ixfar. Jirriżulta f’li titlef ħabib u, probabbilment, tagħmlu l-​għadu tiegħek.

Kristjan veru kif jistaʼ jkun qed juri kburija tant taʼ ħsara bħal din, ladarba l-​Għalliem tiegħu kkmandah biex ‘iħobb lil għajru bħalu nnifsu’? (Mattew 7:12; 22:39) Huwa sempliċement kontradittorju għal dak kollu li Alla u Kristu jirrappreżentaw. Għal din ir-​raġuni, Barclay jagħmel l-​osservazzjoni li taʼ min jikkunsidraha bis-​serjetà: “Hubris hija dik il-​kburija li ġġiegħel bniedem jisfida lil Alla.” Hija l-​kburija li tgħid: “M’hemmx Alla!” (Salm 14:1) Jew kif jesprimiha Salm 10:4: “[Il-ħażin] fi kburitu jkasbar lill-​Mulej, u f’xejn ma jfittxu; u Alla ma jidħolx fi ħsibijietu.” Kburija jew suppervja bħal din, ma tbigħedx lil dak li jkun biss mill-​ħbieb u mill-​qraba imma minn Alla wkoll. Xi prezz dak!

Tħallix il-​Kburija Tieklok

Il-​kburija jistaʼ jkollha ħafna aspetti​—kburija li tiġi minn nazzjonaliżmu, razziżmu, distinzjonijiet taʼ klassi u qasam soċjali, edukazzjoni, rikkezzi, prestiġju, u poter. B’xi mod jew ieħor, il-​kburija tistaʼ faċilment tattakkak u tikollok il-​personalità tiegħek.

Ħafna drabi bniedem jistaʼ jidher umli meta jittratta maʼ min hu superjuri jew fl-​istess ilma tiegħu. Imma x’jiġri meta dak li jidher li hu umli jispiċċa f’xi pożizzjoni t’awtorità? F’daqqa waħda, hu jsir tirann u l-​ħajja taʼ dawk li hu jqis bħala inferjuri jagħmilhielhom infern! Dan jistaʼ jiġri meta xi wħud jilbsu xi uniformi jew iġorru badge li turi ċerta awtorità. Anki l-​ħaddiema tal-​gvern jistgħu jsiru kburin f’li jittrattaw mal-​pubbliku, billi jaħsbu li l-​pubbliku qiegħed hemm biex jaqdi lilhom, u mhux il-​kontra. Il-​kburija tistaʼ tagħmlek aħrax, mingħajr sentimenti; l-​umiltà tistaʼ tagħmlek qalbek tajba.

Ġesù kieku ried setaʼ kien kburi u aħrax mad-​dixxipli tiegħu. Kien bniedem perfett, l-​Iben t’Alla, waqt li ttratta maʼ segwaċi imperfetti, impulsivi, u li jaġixxu bla ma jaħsbu. Madankollu, hu liema stedina tahom lil dawk li kienu qed jisimgħuh? “Ejjew għandi, intom ilkoll li tinsabu mħabbtin u mtaqqlin, u jiena nserraħkom. Ħudu fuqkom il-​madmad tiegħi u tgħallmu minni, għaliex jiena taʼ qalb ħelwa u umli, u intom issibu l-​mistrieħ għal ruħkom. Għax il-​madmad tiegħi ħelu u t-​toqol tiegħi ħafif.”—Mattew 11:28-30.

Inħabirku aħna biex dejjem insegwu l-​eżempju taʼ Ġesù? Jew insibu li qed inkunu ħorox, ma nċedux, kefrin, bla ħniena, u kburin? Bħal Ġesù, ipprova kun rifreskanti, u mhux oppressiv. Irreżisti l-​effett qerriedi tal-​kburija.

Meta tqis dan kollu, hija l-​kburija fiha nfisha ħażina?

Li Tirrispetta Lilek Innifsek Kontra li Tippretendiha

Il-​kburija hija wkoll “rispett ġustifikabbli jew raġunevoli tiegħek innifsek.” Rispett tiegħek innifsek ifisser li jkollok stima tiegħek innifsek. Ifisser li int tagħti kas dwar dak li n-​nies jaħsbu dwarek. Tieħu ħsieb id-​dehra u r-​reputazzjoni tiegħek. Sewwa jgħid il-​qawl Malti, “Għidli maʼ min tagħmilha u ngħidlek min int.” Jekk tippreferi tassoċja maʼ nies li huma traskurati, għażżenin, bla grazzja, u lsienhom laxk, allura int se ssir bħalhom. L-​attitudnijiet tagħhom se tittiħidhom, u ma jkollok ebda rispett tiegħek innifsek preċiż bħalhom.

M’għandniex xi ngħidu, hemm l-​estrem l-​ieħor​—kburija li twassal biex tibda tippretendi li int xi ħaġa jew tkun vanituż. L-​iskribi u l-​Fariżej fi żmien Ġesù kienu kburin dwar it-​tradizzjonijiet tagħhom u dwar id-​dehra ultra reliġjuża tagħhom. Ġesù wissa dwarhom: “Kull ma jagħmlu, jagħmluh għal għajnejn in-​nies; għalhekk ikabbru l-​filatterji u jtawwlu l-​ġmiemen tagħhom. Iħobbu l-​postijiet ewlenin fl-​imwejjed, u s-​siġġijiet taʼ quddiem fis-​sinagogi, u jixtiequ min isellmilhom fil-​pjazez u li n-​nies isejjħulhom Rabbi.”—Mattew 23:5-7.

Mela rispett xieraq tiegħek innifsek, huwa attitudni bbilanċjata. Ftakar ukoll li Jehovah jara l-​qalb, mhux biss id-​dehra taʼ barra. (1 Samwel 16:7; Ġeremija 17:10) It-​tjieba tiegħek m’hijiex it-​tjieba t’Alla. Madankollu, il-​mistoqsija issa hi, Kif nistgħu nikkultivaw umiltà vera u nevitaw li nħallsu l-​prezz għoli tal-​kburija?

[Nota taʼ taħt]

[Stampa f’paġna 4]

Ftit umiltà ġabet benefiċċji kbar lil Nagħman