Int Tqattaʼ Ħin mal-​Familja Tiegħek?

“IL-​MISSIERIJIET Ġappuniżi Huma Maħbubin​—Avolja Dejjem Xogħol u qatt ma Jilagħbu maʼ Wliedhom.” Xi ftit snin ilu dan it-​titlu deher fil-​gazzetta Mainichi Shimbun. L-​artiklu rrapporta li 87.8 fil-​mija tat-​tfal Ġappuniżi li ħadu sehem fi stħarriġ li għamel il-​gvern esprimew ix-​xewqa li jieħdu ħsieb missierhom meta dan jixjieħ. Madankollu, fl-​edizzjoni Ingliża taʼ dik il-​gazzetta, l-​istess artiklu deher b’titlu differenti. Kien jgħid “Missirijiet u Wlied: Każ taʼ Negliġenza.” Kuntrarju għall-​edizzjoni Ġappuniża, l-​artiklu enfasizza aspett ieħor taʼ l-​istess stħarriġ: Fost il-​ġimgħa, il-​missirijiet Ġappuniżi kienu qegħdin iqattgħu 36 minuta biss kuljum maʼ wliedhom. Mill-​banda l-​oħra, il-​missirijiet fil-​Ġermanja tal-​Punent kienu qegħdin iqattgħu 44 minuta maʼ wliedhom fost il-​ġimgħa, u fl-​Istati Uniti, il-​figura kienet taʼ 56 minuta.

M’humiex il-​missirijiet biss li qed iqattgħu ftit ħin maʼ wliedhom. Iktar u iktar ommijiet qed joħorġu jaħdmu. Per eżempju, ħafna ommijiet waħedhom ikollhom joħorġu jaħdmu biex imantnu l-​familja. Bħala riżultat, l-​ammont taʼ ħin li l-​ġenituri​—kemm missirijiet kif ukoll ommijiet—​iqattgħu maʼ wliedhom kważi ġie fix-​xejn.

Studju li sar fl-​1997 fuq iktar minn 12,000 żagħżugħ u żagħżugħa Amerikani wera li, dawk iż-​żgħażagħ li jkollhom relazzjoni mill-​qrib mal-​ġenituri tagħhom għandhom inqas ċans li jsofru minn stress emozzjonali, ikollhom ħsibijiet suwiċidali, iduru għall-​vjolenza, jew jużaw sustanzi li jwassluhom biex jiddependu minnhom. U wieħed mir-​riċerkaturi involuti f’dan l-​istudju estensiv qal: “Ma tistax tkun qrib taʼ wliedek jekk qatt ma tkun hemm meta jkollhom bżonnok.” Li tqattaʼ ħin maʼ wliedek u tikkomunika magħhom huwa importanti tabilħaqq.

In-​Nuqqas taʼ Komunikazzjoni

Dawk il-​familji li għandhom iktar riskju li jsofru min-​nuqqas taʼ komunikazzjoni huma dawk fejn wieħed mill-​ġenituri jgħix ’il bogħod mid-​dar għax jaħdem xi mkien imbiegħed. M’għandniex xi ngħidu, in-​nuqqas taʼ komunikazzjoni m’huwiex limitat għal familji li għandhom ġenitur jgħix ’il bogħod mid-​dar. Xi ġenituri, għalkemm jgħixu d-​dar, imorru għax-​xogħol qabel ma t-​tfal jiftħu għajnejhom u jiġu lura d-​dar wara li jkunu diġà daħlu jorqdu. Biex ipattu għan-​nuqqas taʼ kuntatt kaġun taʼ dan, ċerti ġenituri jqattgħu ħin mal-​familja fi tmiem il-​ġimgħa u fil-​vaganzi. Dawn jirraġunaw li qed iqattgħu ħin “taʼ kwalità” maʼ wliedhom.

Madankollu, jistaʼ qatt dan il-​ħin taʼ kwalità jagħmel tajjeb għan-​nuqqas taʼ ħin li jqattgħu mat-​tfal? Ir-​riċerkatur Laurence Steinberg iwieġeb: “Ġeneralment, dawk it-​tfal li jqattgħu iktar ħin mal-​ġenituri tagħhom imorru aħjar minn tfal li jqattgħu inqas ħin magħhom. Milli jidher, huwa diffiċli ħafna li tagħmel tajjeb għal dak in-​nuqqas taʼ ħin. L-​idea tal-​ħin taʼ kwalità faħħruha iktar milli jistħoqqilha.” Dan huwa eżattament kif tħossha waħda mara Burmiża. Żewġha​—raġel Ġappuniż tipiku—​kuljum imur lura d-​dar mix-​xogħol fis-​siegħa jew fis-​sagħtejn taʼ fil-​għodu. Għalkemm tmiem il-​ġimgħa jqattgħu mal-​familja tiegħu, martu tgħid: “Billi tkun id-​dar fi tmiem il-​ġimgħa ma tistax tpatti għal meta ma tkunx mal-​familja l-​bqija tal-​ġimgħa. . . . Tistaʼ taqbeż l-​ikliet kollha taʼ matul il-​ġimgħa u tiblaʼ l-​ikliet kollha tal-​ġimgħa fi tmiem il-​ġimgħa?”

Meħtieġ Sforz Kuxjenzjuż

M’huwiex faċli daqs kemm wieħed jaħseb biex iżżomm il-​komunikazzjoni għaddejja fil-​familja. Il-​bżonn li taqlaʼ l-​għajxien u tipprovdi għall-​familja ma jagħmilhiex faċli għall-​missier jew għall-​omm li toħroġ taħdem biex iqattgħu ħin mal-​familja. Ħafna wħud li ċ-​ċirkustanzi jġegħluhom jitbegħdu mid-​dar jikkomunikaw regolarment permezz tat-​telefon jew bl-​ittri. Imma kemm jekk il-​membri jinsabu flimkien id-​dar u kemm jekk le, jeħtieġ sforz kuxjenzjuż biex tinżamm komunikazzjoni tajba fil-​familja.

Il-ġenituri li jittraskuraw il-​komunikazzjoni fil-​familja tagħhom ikollhom ipattu qares għat-​traskuraġni tagħhom. Wieħed missier li ftit li xejn kien iqattaʼ ħin mal-​familja tiegħu, u li saħansitra lanqas biss jiekol magħhom, kellu jħabbat wiċċu maʼ konsegwenzi serji. Ibnu sar vjolenti, u bintu nqabdet tisraq mill-​ħwienet. Darba, hekk kif il-​Ħadd fil-​għodu l-​missier kien qed ilesti biex imur jilgħab il-​golf, it-​tifel ma felaħx iktar u għajjat: “F’did-dar ommi biss teżisti? Il-​Mamà kollox hi tiddeċiedi fil-​familja. Pa, int kieku qatt . . . ,” qal it-​tifel b’qalbu maqsuma.

Dak il-​kliem ġiegħel lill-​missier jieqaf u jaħseb. Fl-​aħħar iddeċieda li l-​ewwel ħaġa li kellu jagħmel kienet li jibda jieħu l-​kolazzjon mal-​familja tiegħu. Għall-​ewwel, kienu jkunu hu u martu biss. Bil-​mod il-​mod, it-​tfal bdew jieklu magħhom, u l-​ħin tal-​kolazzjon sar menqa taʼ komunikazzjoni. Dan wassal għal ikliet taʼ fil-​għaxija flimkien bħala familja. Bis-​saħħa t’hekk, il-​missier kien qed jagħmel sforz biex jeħles lill-​familja tiegħu minn diżastru totali.

Għajnuna mill-​Kelma t’Alla

Il-​Bibbja tinkuraġġixxi lill-​ġenituri biex isibu l-​ħin ħalli jikkomunikaw maʼ wliedhom. Permezz tal-​profeta Mosè, l-​Iżraeliti ġew istruwiti: “Ismaʼ, O Iżrael: Alla tagħna l-​Mulej, il-​Mulej waħdu. Ħobb, mela, lill-​Mulej, Alla tiegħek, b’qalbek kollha, b’ruħek kollha u b’saħħtek kollha. Żomm f’qalbek dan il-​kliem u dawn il-​kmandamenti li qiegħed nagħtik illum. Tennihom lil uliedek, u tkellem fuqhom meta tkun f’darek, u meta tkun miexi fit-​triq, u meta timtedd, u meta tqum.” (Dewteronomju 6:4-7) Iva, dawk minna li huma ġenituri jeħtieġ li jieħdu l-​inizjattiva biex iqattgħu ħin mal-​familja tagħhom jekk iridu jdaħħlu l-​kliem t’Alla fl-​imħuħ u fil-​qlub taʼ wliedhom.

Taʼ interess, l-​istħarriġ taʼ l-​1997 taʼ iktar minn 12,000 adolexxent Amerikan li ssemma iktar kmieni wera li “fost il-​kważi 88% . . . tal-​popolazzjoni li qalu li għandhom reliġjon, l-​importanza li ngħatat mit-​twelid għar-​reliġjon u t-​talb kienet taʼ protezzjoni.” Il-​veri Kristjani jirrikonoxxu li taħriġ reliġjuż xieraq fid-​dar jipproteġi liż-​żgħażagħ minn affarijiet bħall-​abbuż tad-​drogi u l-​alkoħol, inkwiet emozzjonali, suwiċidju, vjolenza, u affarijiet bħal dawn.

Xi ġenituri jħossu li huwa iebes li jsibu ħin mal-​familja tagħhom. Dan huwa tassew minnu fil-​każ taʼ l-​ommijiet waħedhom, li jippreferu jqattgħu l-​ħin maʼ wliedhom imma jkollhom joħorġu jaħdmu. Minfejn jistgħu jsibu dak in-​naqra ħin prezzjuż biex ikunu mal-​familja tagħhom? “Issalvagwardja l-​għerf prattiku u l-​abbiltà tal-​ħsieb,” tħeġġeġ il-​Bibbja. (Proverbji 3:21, New World Translation) Il-​ġenituri jistgħu jużaw “l-​abbiltà tal-​ħsieb” biex isibu ħin għall-​familja. Kif?

Jekk int omm li toħroġ taħdem u li tħossok għajjiena mejta wara ġurnata xogħol, għax ma tistaqsix lit-​tfal tiegħek biex jgħinuk tħejji l-​ikel? Dan il-​ħin li tqattgħu flimkien jipprovdi opportunità biex tersqu eqreb lejn xulxin. Għall-​ewwel, għandek mnejn iddum iktar meta tinvolvi lit-​tfal. Malajr, iżda, se ssib li se tieħu pjaċir u tiffranka l-​ħin ukoll.

Forsi int missier b’lista twila daqsiex t’affarijiet li jkollok tagħmilhom fi tmiem il-​ġimgħa. Għala ma tagħmilx xi ftit minn dan ix-​xogħol maʼ wliedek? Tistaʼ tikkomunika magħhom hekk kif taħdmu flimkien u fl-​istess ħin tagħtihom taħriġ siewi. Il-​parir tal-​Bibbja li ddaħħal il-​kliem t’Alla f’qalb uliedek jinkuraġġik biex titkellem magħhom meta “tkun f’darek, u meta tkun miexi fit-​triq”​—tabilħaqq, f’kull opportunità li ssib. Hija turija taʼ “għerf prattiku” li tikkomunika maʼ wliedek intom u taħdmu flimkien.

Li tqattaʼ ħin mal-​familja tiegħek se jġiblek barkiet fit-​tul. “Maʼ dawk li qegħdin jikkonsultaw flimkien hemm l-​għerf.” (Proverbji 13:10, NW) Billi ssib ħin biex tikkomunika mal-​familja tiegħek, se tkun f’qagħda aħjar biex tipprovdilhom gwida għaqlija għall-​problemi taʼ kuljum. Gwida bħal din mogħtija issa tistaʼ tiffranka ħafna ħin u wġigħ taʼ qalb fil-​futur. Barra minn hekk, jistaʼ jżid il-​ferħ għalik u għall-​bqija tal-​familja. Biex tagħti gwida bħal din, għandek bżonn tieħu vantaġġ mill-​ħażna abbundanti t’għerf li nsibu fil-​Kelma t’Alla, il-​Bibbja. Użaha biex tgħallem lil uliedek u biex tiggwida l-​passi tal-​familja tiegħek.—Salm 119:105.

[Stampa f’paġna 4]

Żgħażagħ li jkollhom relazzjoni mill-​qrib mal-​ġenituri tagħhom għandhom inqas ċans li jsofru minn stress emozzjonali

[Stampa f’paġna 5]

Il-​komunikazzjoni tajba tirrendi barkiet abbundanti fil-​ħajja tal-​familja

[Stampa f’paġna 6]

Hekk kif taħdem flimkien maʼ wliedek, tistaʼ tikkomunika u tipprovdi taħriġ siewi