Ibqaʼ Miexi fit-​Triq taʼ Jehovah

“Ittama fil-​Mulej u ħares triqtu, hu jerfgħek biex tikseb l-​art.”—SALM 37:34.

1, 2. Għas-​Sultan David x’kien jinvolvi li jimxi fit-​triq taʼ Jehovah, u dan x’jirrikjedi minna llum?

“GĦARRAFNI t-​triq li minnha għandi ngħaddi, għax lejk jien nerfaʼ ruħi.” (Salm 143:8) Il-​Kristjani llum b’qalbhom kollha jtennu dan il-​kliem tas-​Sultan David. Huma jridu sinċerament jogħġbu lil Jehovah u jimxu fit-​triq tiegħu. Dan x’jinvolvi? Għal David, dan kien ifisser li jħares il-​liġi t’Alla. Kien jinvolvi li jafda f’Jehovah minflok f’alleanzi mal-​ġnus. Iva, kien ifisser ukoll li jaqdi lealment lil Jehovah u mhux lill-​allat tal-​popli ġirien. Għall-​Kristjani, li jimxu fit-​triq taʼ Jehovah jinvolvi iktar minn hekk.

² Per eżempju, li nimxu fit-​triq taʼ Jehovah llum ifisser li neżerċitaw fidi fis-​sagrifiċċju li Ġesù Kristu ħallas għall-​fidwa, billi nirrikonoxxuh bħala “t-​Triq, il-​Verità u l-​Ħajja.” (Ġwann 3:16; 14:6; Lhud 5:9) Ifisser ukoll li nħarsu “l-​liġi taʼ Kristu,” li jinkludi li nuru mħabba lejn xulxin, speċjalment lejn l-​aħwa midlukin taʼ Ġesù. (Galatin 6:2; Mattew 25:34-40) Dawk li jimxu fit-​triq taʼ Jehovah jħobbu l-​prinċipji u l-​kmandamenti tiegħu. (Salm 119:97; Proverbji 4:5, 6) Huma jgħożżu l-​privileġġ prezzjuż tagħhom li jipparteċipaw fil-​ministeru Kristjan. (Kolossin 4:17; 2 Timotju 4:5) It-​talb jifforma parti regulari minn ħajjithom. (Rumani 12:12) U ‘jqisu sewwa kif iġibu ruħhom, mhux bħal nies bla dehen, iżda bħal nies għorrief.’ (Efesin 5:15) Huma ċertament ma jissagrifikawx rikkezzi spiritwali għal vantaġġi materjali temporanji jew pjaċiri illeċiti tal-​ġisem. (Mattew 6:19, 20; 1 Ġwann 2:15-17) Iktar minn hekk, lealtà lejn Jehovah u fiduċja fih huma vitali. (2 Korintin 1:9; 10:5; Efesin 4:24) Għala? Għaliex is-​sitwazzjoni tagħna hija simili ħafna għal dik taʼ Iżrael tal-​qedem.

Il-​Ħtieġa għall-​Fiduċja u l-​Lealtà

3. Il-​lealtà, il-​fidi, u l-​fiduċja għala huma t’għajnuna biex iżommuna mexjin fit-​triq taʼ Jehovah?

³ Iżrael kien ġens żgħir imdawwar minn ġirien ostili li kienu jieħdu sehem f’ċerimonji moqżieża fil-​qima taʼ l-​allat idoli. (1 Kronaki 16:26) Iżrael biss kien jaqdi lil Jehovah, l-​uniku Alla veru u inviżibbli, u dan kien jesiġi li huma jżommu livelli morali għoljin. (Dewteronomju 6:4) L-​istess illum, ftit miljuni taʼ bnedmin biss iqimu lil Jehovah, u dawn jgħixu f’dinja taʼ kważi sitt elef miljun ruħ li l-​livelli u l-​ħarsa reliġjuża tagħhom huma ferm differenti minn taʼ dawn. Jekk aħna fost dawk il-​ftit miljuni, irridu ngħassu biex ma niġux influwenzati ħażin. Kif? Lealtà lejn Alla Jehovah, fidi fih, u fiduċja qawwija li hu se jwettaq il-​wegħdi tiegħu se jgħinuna. (Lhud 11:6) Dan se jżommna milli npoġġu l-​fiduċja tagħna fl-​affarijiet li tittama fihom id-​dinja.—Proverbji 20:22; 1 Timotju 6:17.

4. Il-​ġnus għala għandhom ‘il-​fehma tagħhom imdallma’?

⁴ L-​appostlu Pawlu wera kemm il-​Kristjani jridu jkunu differenti mid-​dinja meta kiteb: “Jiena dan ngħidilkom u nwissikom quddiem il-​Mulej: li ma ġġibux iżjed ruħkom skond ma jġibu ruħhom il-​pagani bil-​bluha taʼ moħħhom. Il-​fehma tagħhom hi mdallma, maqtugħa mill-​ħajja taʼ Alla minħabba l-​injoranza li għandhom u l-​ebusija taʼ qalbhom.” (Efesin 4:17, 18) Ġesù hu d-​“dawl veru.” (Ġwann 1:9) Kulmin jiċħdu jew jistqarr li jemmen fih iżda ma jobdix il-​“liġi taʼ Kristu” għandu ‘l-​fehma tiegħu mdallma.’ Mhux talli m’humiex jimxu fit-​triq taʼ Jehovah, iżda huma “maqtugħa mill-​ħajja taʼ Alla.” Minkejja kemm jistgħu jaħsbu li huma għorrief b’mod dinji, huma ‘għandhom injoranza’ inkwantu għall-​uniku għarfien li jwassal għall-​ħajja, dak dwar Alla Jehovah u Ġesù Kristu.—Ġwann 17:3; 1 Korintin 3:19.

5. Għalkemm id-​dawl tal-​verità qed jiddi fid-​dinja, ħafna qlub għala m’humiex disposti?

⁵ Madankollu, id-​dawl tal-​verità qiegħed jiddi fid-​dinja! (Salm 43:3; Filippin 2:15) “L-​għerf jgħajjat fit-​triqat.” (Proverbji 1:20) Is-​sena l-​oħra x-​Xhieda taʼ Jehovah qattgħu iktar minn elf miljun siegħa jitkellmu mal-​proxxmu tagħhom dwar Alla Jehovah u Ġesù Kristu. Mijiet taʼ eluf aġixxew. Iżda għandna għalfejn niskantaw li ħafna oħra naqsu li jaġixxu? Le. Pawlu tkellem dwar “l-​ebusija taʼ qalbhom.” Xi wħud għandhom qalbhom m’hijiex disposta minħabba l-​egoiżmu jew l-​imħabba għall-​flus. Oħrajn huma influwenzati mir-​reliġjon falza jew mill-​ħarsa sekulari li hija tant mifruxa llum. Xi esperjenzi ibsin fil-​ħajja wasslu lil ħafna biex jagħtu daharhom lil Alla. Oħrajn jirrifjutaw li jikkonformaw mal-​livelli morali għoljin taʼ Jehovah. (Ġwann 3:20) Tistaʼ qalb xi ħadd li jkun miexi fit-​triq taʼ Jehovah titlef is-​sensittività tagħha f’dawn l-​aspetti?

6, 7. Għalkemm l-​Iżraeliti kienu adoraturi t’Alla Jehovah, f’liema okkażjonijiet żvijaw, u għala?

⁶ Dan fil-​fatt ġara lil Iżrael tal-​qedem, bħalma wera Pawlu. Hu kiteb: “Dan ġara b’eżempju għalina, biex ma nixxennqux għal ħwejjeġ ħżiena, bħalma xxennqu huma. Tmorrux wara l-​allat foloz, kif għamlu xi wħud minnhom, bħalma hemm miktub: ‘Il-​poplu qagħad bil-​qiegħda jiekol u jixrob, u qamu jixxalaw.’ Anqas ma għandna niżnu, kif xi wħud minnhom żnew, u f’jum wieħed mietu tlieta u għoxrin elf ruħ.”—1 Korintin 10:6-8.

⁷ Pawlu jirreferi l-​ewwel għall-​okkażjoni meta Iżrael qiem għoġol tad-​deheb taħt il-​muntanja Sinaj. (Eżodu 32:5, 6) Dan kien b’diżubbidjenza diretta għal kmand divin li kienu aċċettaw li jobdu biss ftit ġimgħat qabel. (Eżodu 20:4-6; 24:3) Imbagħad, Pawlu jirreferi għal meta l-​Iżraeliti mielu quddiem Bagħal mal-​bniet taʼ Mowab. (Numri 25:1-9) Il-​qima taʼ l-​għoġol kienet ikkaratterizzata minn tpaxxija bla rażan, ‘xalar.’a Il-​qima lejn Bagħal kienet akkumpanjata minn immoralità sesswali sfaċċata. (Apokalissi 2:14) L-​Iżraeliti għala kkommettew dawn id-​dnubiet? Għaliex ħallew lil qalbhom ‘tixxennaq għal ħwejjeġ ħżiena’​—kemm l-​idolatrija jew id-​drawwiet moqżieża li kienu jmorru magħha.

8. X’nistgħu nitgħallmu mill-​esperjenzi taʼ Iżrael?

⁸ Pawlu indika li aħna għandna nitgħallmu minn dawn il-​ġrajjiet. X’nitgħallmu? Lanqas biss jgħaddilna minn moħħna li xi Kristjan se jmil quddiem xi għoġol tad-​deheb jew xi alla Mowabi tal-​qedem. Imma xi ngħidu għall-​immoralità jew it-​tpaxxija bla rażan? Dawn huma komuni llum, u jekk inħallu tikber f’qalbna xewqa għalihom, dawn se jbegħduna minn Jehovah. Ir-​riżultat se jkun l-​istess daqs li kieku nkunu kkommettejna l-​idolatrija​—qtugħ minn Alla. (Qabbel Kolossin 3:5; Filippin 3:19.) Tabilħaqq, Pawlu jikkonkludi d-​diskussjoni tiegħu dwar dawk il-​ġrajjiet billi jħeġġeġ lill-​kredenti sħabu: “Aħarbu l-​idolatrija.”—1 Korintin 10:14, Saydon.

Għajnuna biex Nimxu fit-​Triq t’Alla

9. (a) X’għajnuna nirċievu biex iżżommna mexjin fit-​triq taʼ Jehovah? (b) Liema hu mod wieħed kif nisimgħu l-​‘kliem minn warajna’?

⁹ Jekk aħna determinati li nibqgħu nimxu fit-​triq t’Alla, ma nitħallewx mingħajr għajnuna. Isaija pprofetizza: “Minn warajk jisimgħu widnejk kliem li jwissik u jgħidlek: ‘Din hi t-​triq; għaddi minnha, sew jekk tikser lejn il-​lemin, sew lejn ix-​xellug.’” (Isaija 30:21) ‘Widnejna’ kif jisimgħu dak ‘il-​kliem minn warajna’? Ara, illum ħadd ma jismaʼ leħen litterali jew jirċievi messaġġ persunali mingħand Alla. Il-​“kliem” li jinstemaʼ jiġi għandna lkoll bl-​istess mod. L-​ewwel u qabel kollox, jiġi permezz taʼ l-​Iskrittura ispirata, il-​Bibbja, li fiha l-​ħsibijiet t’Alla u rakkont tal-​mod kif hu ttratta mal-​bnedmin. Peress li aħna kuljum ninsabu esposti għal propaganda minn sorsi ‘maqtugħin mill-​ħajja t’Alla,’ għandna bżonn naqraw il-​Bibbja u nimmeditaw fuqha regolarment biex inżommu b’saħħitna spiritwalment. Dan se jgħinna nevitaw “idoli [“affarijiet,” NW] fiergħa” u ‘nkunu perfetti, imħejjijin għal kull ħidma tajba.’ (Atti 14:14, 15; 2 Timotju 3:16, 17) Dan se jsaħħaħna, jiffortifikana, u jgħinna ‘nirnexxu fi triqitna.’ (Ġożwè 1:7, 8) Għaldaqstant, il-​Kelma taʼ Jehovah tħeġġeġ: “Issa wliedi, isimgħu lili: henjin dawk li jimxu fi triqati. Isimgħu t-​tagħlim u tiksbu l-​għerf, u twarrbux it-​tagħlim.”—Proverbji 8:32, 33.

10. Liema hu t-​tieni mod kif nisimgħu l-​‘kliem minn warajna’?

¹⁰ ‘Il-​kliem minn warajna’ jiġi wkoll permezz taʼ l-​“ilsir leali u diskret” li jipprovdi ‘l-​ikel fil-​ħin.’ (Mattew 24:45-47, NW) Mod wieħed kif jiġi pprovdut dan l-​ikel hu f’pubblikazzjonijiet stampati, ibbażati fuq il-​Bibbja, u fi snin reċenti din il-​provvista taʼ ikel kienet abbundanti. Per eżempju, permezz tar-​rivista It-​Torri taʼ l-​Għassa, ġiet irfinuta l-​fehma tagħna dwar il-​profeziji. F’dan il-​ġurnal, ġejna inkuraġġiti nipperseveraw fix-​xogħol taʼ l-​ippridkar u li nagħmlu dixxipli minkejja li qed tiżdied l-​apatija, ġejna megħjunin nevitaw nasbiet, u ġejna mħeġġin niżviluppaw kwalitajiet Kristjani mill-​aħjar. Kemm ngħożżuh dan l-​ikel fil-​ħin!

11. Spjega t-​tielet mod kif nistgħu nisimgħu l-​‘kliem minn warajna.’

¹¹ L-​ilsir leali u diskret jipprovdi wkoll ikel permezz tal-​laqgħat regulari tagħna. Dawn jinkludu l-​laqgħat tal-​kongregazzjonijiet lokali, laqgħat taʼ darbtejn fis-​sena magħrufin bħala assembleat tas-​circuit, u konvenzjonijiet akbar annwali. Liema hu dak il-​Kristjan leali li ma jgħożżhomx dawn il-​laqgħat? Dawn huma għajnuna vitali biex jappoġġawna waqt li nimxu fit-​triq taʼ Jehovah. Peress li ħafna jkollhom iqattgħu ħafna ħin fuq ix-​xogħol jew l-​iskola maʼ dawk li m’għandhomx l-​istess twemmin tagħhom, sħubija Kristjana regulari hija litteralment imfassla biex issalva l-​ħajja. Il-​laqgħat jagħtuna opportunità mill-​aħjar biex “[i]nħajjru lil xulxin għall-​imħabba u għall-​għemil tajjeb.” (Lhud 10:24) Aħna nħobbuhom lil ħutna u nieħdu pjaċir nassoċjaw magħhom.—Salm 133:1.

12. Ix-​Xhieda taʼ Jehovah liema determinazzjoni għandhom, u kif esprimewha reċentement?

¹² Imsaħħin b’dan l-​ikel spiritwali, kważi sitt miljun ruħ illum qed jimxu fit-​triq taʼ Jehovah, u miljuni t’oħrajn qed jistudjaw il-​Bibbja biex jitgħallmu kif għandhom jagħmlu dan. Iħossuhom huma skuraġġiti jew imdgħajfin mill-​fatt li huma ftit fl-​għadd meta mqabblin maʼ l-​eluf taʼ miljuni tal-​popolazzjoni tad-​dinja? Bl-​ebda mod! Huma determinati li jibqgħu jagħtu kas tal-​‘kliem minn warajhom,’ billi jagħmlu lealment ir-​rieda taʼ Jehovah. Bħala manifestazzjoni pubblika taʼ din id-​determinazzjoni, matul il-​Konvenzjonijiet Distrettwali u Internazzjonali taʼ l-​1998/99, “Il-​Mod taʼ Ħajja t’Alla,” id-​delegati adottaw riżoluzzjoni li tesprimi l-​waqfa tagħhom li ġejja minn qalbhom. Dan li ġej huwa t-​test taʼ dik ir-​riżoluzzjoni.

Riżoluzzjoni

13, 14. Ix-​Xhieda taʼ Jehovah liema ħarsa realistika għandhom dwar is-​sitwazzjoni dinjija?

¹³ “Aħna, bħala Xhieda taʼ Jehovah miġburin għall-​Konvenzjoni “Il-​Mod taʼ Ħajja t’Alla”, b’qalbna kollha naqblu li l-​mod t’Alla huwa l-​aqwa mod taʼ ħajja. Madankollu, aħna nirrikonoxxu li l-​biċċa l-​kbira taʼ l-​umanità llum iħossuhom mod ieħor. Is-​soċjetà umana esperimentat b’għadd taʼ konċetti, filosofiji, u ideat reliġjużi fuq dak li jikkostitwixxi l-​aħjar mod taʼ ħajja. Ħarsa onesta lejn l-​istorja umana u lejn il-​kundizzjonijiet tad-​dinja llum tixhed il-​verità tal-​pronunzjament divin iddokumentat f’Ġeremija 10:23: “Anqas min jimxi ma jistaʼ jiddirieġi l-​passi tiegħu.”

¹⁴ “Kuljum naraw iktar evidenza li tikkonferma l-​verità sħiħa taʼ dak il-​kliem. Fil-​biċċa l-​kbira, is-​soċjetà umana ma tagħtix kas il-​mod taʼ ħajja t’Alla. In-​nies isusu wara dak li jidhrilhom li hu tajjeb f’għajnejhom stess. Ir-​riżultati kienu traġiċi​—il-​kollass tal-​ħajja tal-​familja, li ħalla lit-​tfal mingħajr gwida; il-​ġiri sfrenat wara l-​materjaliżmu, li jirriżulta f’vojt u frustrazzjoni; il-​kriminalità u l-​vjolenza bla sens, li ħadu l-​ħajjiet taʼ vittmi bla għadd; il-​ġlied u l-​gwerer etniċi, li ħasdu numru waħxi taʼ ħajjiet umani; l-​immoralità bla rażan, li stimulat epidemija taʼ mard trasmess sesswalment. Dawn huma biss ftit mill-​għadd kbir taʼ problemi komplessi li jfixklu t-​tfittxija taʼ l-​hena, il-​paċi, u s-​sigurtà.

15, 16. Rigward il-​mod taʼ ħajja t’Alla, x’determinazzjoni ġiet espressa fir-​riżoluzzjoni?

¹⁵ “Meta nqisu l-​istat imwiegħer taʼ dwejjaq taʼ l-​ispeċi umana u kemm qegħdin qrib tal-​‘gwerra tal-​Jum il-​kbir taʼ Alla li jistaʼ kollox,’ imsejħa Armageddon (Apokalissi 16:14, 16), aħna bħala Xhieda taʼ Jehovah nirriżolvu li:

¹⁶ “L-​ewwel: Aħna nqisu lilna nfusna bħala li nappartjenu lil Alla Jehovah, billi ddedikajna ruħna individwalment lilu bla kundizzjoni, u se nżommu fidi li ma titħarrikx fil-​provvediment tal-​prezz tal-​fidwa li Jehovah ħallas permezz taʼ Ibnu, Ġesù Kristu. Aħna determinati li nimxu fil-​mod taʼ ħajja t’Alla, billi naqduh bħala x-​Xhieda tiegħu u nissottomettu ruħna għas-​sovranità tiegħu bħalma hija espressa permezz tal-​ħakma taʼ Ġesù Kristu.

17, 18. Ix-​Xhieda taʼ Jehovah liema pożizzjoni se jibqgħu jżommu rigward il-​livelli morali u l-​fratellanza Kristjana?

¹⁷ “It-​tieni: Se nkomplu nżommu mal-​livelli morali u spiritwali għoljin tal-​Bibbja. Aħna determinati li ma naċċettawx li nimxu bħalma jimxu l-​ġnus fil-​bluha taʼ moħħhom. (Efesin 4:17-19) Aħna riżoluti li nibqgħu nodfa quddiem Jehovah u bla tebgħa minn din id-​dinja.—Ġakbu 1:27.

¹⁸ “It-​tielet: Aħna se nżommu sod mal-​pożizzjoni Skritturali tagħna bħala fratellanza Kristjana mad-​dinja kollha. Se nżommu n-​newtralità Kristjana fost il-​ġnus, billi ma nħallux lilna nfusna ninqabdu fil-​mibegħda jew frid razzjali, nazzjonali, jew etniku.

19, 20. (a) X’se jagħmlu l-​ġenituri Kristjani? (b) Il-​Kristjani veri kollha kif se jibqgħu jidentifikaw lilhom infushom bħala dixxipli taʼ Kristu?

¹⁹ “Ir-​rabaʼ: Dawk minna li huma ġenituri se nnaqqxu t-​triq t’Alla f’uliedna. Se nkunu t’eżempju fl-​għajxien Kristjan, li jinkludi qari regulari tal-​Bibbja, studju tal-​familja, u sehem b’ruħna kollha fil-​kongregazzjoni Kristjana u fil-​ministeru taʼ l-​għalqa.

²⁰ “Il-​ħames: Ilkoll kemm aħna se nistinkaw biex nikkultivaw il-​kwalitajiet divini li l-​Ħallieq tagħna jagħtina eżempju fihom, u se nagħmlu kulma nistgħu biex nimitaw il-​personalità u l-​modi tiegħu, bħalma għamel Ġesù. (Efesin 5:1) Aħna riżoluti li nħallu l-​affarijiet kollha tagħna jseħħu bl-​imħabba, u b’hekk nidentifikaw lilna nfusna bħala dixxipli taʼ Kristu.—Ġwann 13:35.

21-23. Ix-​Xhieda taʼ Jehovah x’se jkomplu jagħmlu, u dwar liema ħaġa huma konvinti?

²¹ “Is-​sitta: Se nkomplu nippridkaw bla waqfien l-​aħbar tajba tas-​Saltna t’Alla, nagħmlu dixxipli, u se nagħtuhom istruzzjonijiet dwar il-​mod taʼ ħajja t’Alla u ninkuraġġuhom li jirċievu iktar taħriġ fil-​laqgħat tal-​kongregazzjoni.—Mattew 24:14; 28:19, 20; Lhud 10:24, 25.

²² “Is-​sebaʼ: Bħala individwi u bħala organizzazzjoni reliġjuża, se nkomplu npoġġu r-​rieda t’Alla l-​ewwel f’ħajjitna. Billi nużaw il-​Kelma tiegħu, il-​Bibbja, bħala l-​gwida tagħna, m’aħniex se niżvijaw lejn il-​lemin jew ix-​xellug, u b’hekk nikkonfermaw li l-​mod t’Alla huwa bil-​wisq iktar superjuri mill-​modi tad-​dinja. Aħna determinati li nsusu wara l-​mod taʼ ħajja t’Alla​—sodi u leali, issa u għal dejjem!

²³ “Aħna nagħmlu din ir-​riżoluzzjoni għaliex fiduċjużi bis-​sħiħ fil-​wegħda kollha mħabba taʼ Jehovah li dak li jagħmel ir-​rieda t’Alla jibqaʼ għal dejjem. Nagħmlu din ir-​riżoluzzjoni għaliex konvinti illi li ngħixu mal-​prinċipji, il-​pariri, u t-​twissijiet Skritturali se jirriżulta li jkun l-​aqwa mod taʼ ħajja llum u jqiegħed pedament mill-​aħjar għall-​futur, sabiex inkunu nistgħu naqbdu qabda soda fuq il-​ħajja vera. (1 Timotju 6:19; 2 Timotju 4:7b, 8) Fuq kollox, nagħmlu din ir-​riżoluzzjoni għaliex inħobbu lil Alla Jehovah b’qalbna, b’ruħna, b’moħħna, u b’saħħitna kollha!

24, 25. X’kienet ir-​reazzjoni għar-​riżoluzzjoni proposta, u x’inhi d-​determinazzjoni taʼ dawk li jimxu fit-​triq taʼ Jehovah?

²⁴ “Dawk kollha li qed jattendu għal din il-​konvenzjoni u jaqblu maʼ l-​adottar taʼ din ir-​riżoluzzjoni, jekk jogħġobhom jgħidu IVA!”

²⁵ Mijiet taʼ awditorji u stejdjums madwar id-​dinja kollha rbombjaw hekk kif dawk kollha preżenti wieġbu “IVA!” b’leħen qawwi. Ix-​Xhieda taʼ Jehovah m’għandhom ebda dubju li se jibqgħu jimxu fit-​triq taʼ Jehovah. Huma għandhom fiduċja sħiħa f’Jehovah u fidi li hu se jwettaq il-​wegħdi tiegħu. Huma jibqgħu leali lejh, jiġri x’jiġri. U huma determinati li jagħmlu r-​rieda tiegħu.

“Alla Hu Magħna”

26. X’inhi s-​sitwazzjoni hienja taʼ dawk li jimxu fit-​triq taʼ Jehovah?

²⁶ Ix-​Xhieda taʼ Jehovah jiftakru fit-​tħeġġiġ tas-​salmista: “Ittama fil-​Mulej u ħares triqtu, hu jerfgħek biex tikseb l-​art.” (Salm 37:34) Ma jinsewhx il-​kliem inkuraġġanti taʼ Pawlu: “Jekk Alla hu magħna min jistaʼ jkun kontra tagħna? Hu, li anqas lil Ibnu stess ma ħafirha, imma tah għalina lkoll, kif ma jagħtiniex ukoll kollox miegħu?” (Rumani 8:31, 32) Iva, jekk nibqgħu nimxu fit-​triq taʼ Jehovah, hu jipprovdilna “kollox bix-​xabaʼ biex ingawdu bih.” (1 Timotju 6:17) Liema post jistaʼ jkun hemm aħjar milli fejn qegħdin​—mexjin fit-​triq taʼ Jehovah, maġenb l-​għeżież ħutna. B’Jehovah maġenbna, ejja nkunu determinati li nibqgħu hemmhekk u nissaportu sat-​tmiem, fiduċjużi bis-​sħiħ li fil-​ħin tiegħu, se narawh iwettaq sa l-​inqas waħda mill-​wegħdi tiegħu.—Titu 1:2.

[Nota taʼ taħt]

Tiftakar Int?

◻ X’inhu meħtieġ biex Kristjan jimxi fit-​triq taʼ Jehovah?

◻ Għala hemm bżonn li nikkultivaw fiduċja f’Jehovah u lealtà lejh?

◻ Liema għajnuna hija disponibbli hekk kif nimxu fit-​triq taʼ Jehovah?

◻ Agħti xi punti prinċipali mir-​riżoluzzjoni adottata fil-​Konvenzjonijiet “Il-​Mod taʼ Ħajja t’Alla.”

[Stampi f’paġna 18]

Ġiet adottata riżoluzzjoni importanti fil-​Konvenzjonijiet Distrettwali u Internazzjonali “Il-​Mod taʼ Ħajja t’Alla”