Aċċettajt bil-​Ferħa d-​Direzzjoni taʼ Jehovah

KIF RAKKONTAT MINN ULYSSES V. GLASS

Kienet okkażjoni straordinarja. Kien hemm 127 student biss fil-​klassi tal-​gradwazzjoni, imma fl-​udjenza kien hemm 126,387 persuna entużjasta minn għadd kbir taʼ pajjiżi differenti. Din kienet il-​gradwazzjoni tal-​21 klassi taʼ l-​Iskola taʼ Gilgħad (Watchtower Bible School of Gilead), li nżammet fil-​Yankee Stadium taʼ New York City fid-​19 taʼ Lulju, 1953. Din il-​ġrajja għala kienet daqshekk sinjifikanti f’ħajti? Ħa nirrakkontalkom ftit fuq il-​ħajja tiegħi.

JIEN twelidt f’Vincennes, l-​Indjana, fl-​Istati Uniti, fis-​17 taʼ Frar, 1912, madwar sentejn qabel it-​twelid tas-​Saltna Messjanika, kif deskritt f’Apokalissi 12:1-5. Is-​sena taʼ qabel, il-​ġenituri tiegħi kienu bdew jistudjaw il-​Bibbja permezz tal-​volumi taʼ Studies in the Scriptures. Kull nhar taʼ Ħadd fil-​għodu, missieri kien jaqralna silta minn wieħed minn dawk il-​kotba, u mbagħad konna niddiskutuha flimkien.

Ommi kienet tuża dak li kienet qed titgħallem biex issawwar l-​imħuħ tat-​tfal tagħha. Kienet mara taz-​zokkor​—qalbha f’idha, tant ħerqana li tgħin. Tfal konna erbgħa, imma l-​imħabba li wriet ommna kienet tinkludi wkoll lil tfal oħra mill-​akkwati. Hi kienet tqattaʼ ħin magħna. Kienet l-​għaxqa tagħha tirrakkontalna l-​istejjer mill-​Bibbja u tkanta magħna.

Hi kienet ukoll tistieden id-​dar tagħna lil diversi wħud li kienu jaqdu full-time fil-​ministeru. Dawn kienu joqogħdu magħna għal xi ġurnata jew tnejn, u taʼ spiss kienu jorganizzaw il-​laqgħat u jagħtu t-​taħditiet fid-​dar tagħna. L-​iktar li konna nieħdu pjaċir bihom kienu dawk li kienu jużaw it-​tixbihat u jirrakkontawlna l-​istejjer. Darba waħda fl-​1919, xi sena wara li ntemmet l-​ewwel gwerra dinjija, il-​ħu li kien qiegħed iżurna indirizza l-​kummenti tiegħu b’mod speċjali lilna t-​tfal. Hu ddiskuta l-​konsagrazzjoni​—dik li issa nirreferu għaliha iktar eżatt bħala d-​dedikazzjoni—​u għenna biex nifhmu kif din kienet teffettwa l-​ħajjiet tagħna. Iktar tard fil-​għaxija x’ħin dħalt norqod, tlabt lil Missieri tas-​sema u għedtlu li ridt naqdih għal dejjem.

Madankollu, wara l-​1922 kelli ħsibijiet oħra fil-​ħajja li spiċċaw biex tefgħu dik ir-​riżoluzzjoni fit-​tieni post. Bdilna l-​post fejn noqogħdu kemm-il darba u ma kellna sħubija maʼ ebda kongregazzjoni tan-​nies taʼ Jehovah. Missieri ma kienx joqgħod magħna minħabba x-​xogħol li kellu mal-​ferrovija. L-​istudju tagħna tal-​Bibbja kien irregolari. Jien ħadt korsijiet skolastiċi bl-​iskop li nsir pittur kummerċjali u kont qed nagħmel pjanijiet biex nattendi waħda mill-​aħjar universitajiet.

Naġġusta l-​Għan Tiegħi fil-​Ħajja

Matul nofs is-​snin tletin, id-​dinja bdiet riesqa għal darb’oħra lejn gwerra dinjija. Konna qed ngħixu fi Cleveland, Ohio, meta wieħed mix-​Xhieda taʼ Jehovah ġie jħabbtilna l-​bieb. Bdejna naħsbu iktar bis-​serjetà dwar dak li konna tgħallimna bħala tfal. Ħija l-​kbir, Russell, kien tassew tifel bil-​għaqal, u kien l-​ewwel wieħed li tgħammed. Jien kont kemxejn iktar moħħ ir-​riħ, imma fit-​3 taʼ Frar, 1936, jien ukoll tgħammidt. L-​apprezzament tiegħi lejn x’kienet tinvolvi d-​dedikazzjoni lil Jehovah kien qiegħed jikber, u kont qed nitgħallem naċċetta d-​direzzjoni taʼ Jehovah. F’dik l-​istess sena ż-​żewġ ħuti bniet, Kathryn u Gertrude, tgħammdu wkoll. Ilkoll kemm aħna dħalna fis-​servizz full-time bħala pijunieri.

Madankollu, dan ma jfissirx li ma konna naħsbu fuq xejn iktar. Ftaħt widnejn daqs taʼ ħmar meta l-​mara taʼ ħija qaltli dwar tfajla gustuża ħafna jisimha Ann. Din Ann kienet saret tassew eċċitata minn mindu semgħet bil-​verità u kienet se tiġi għal-​laqgħat fid-​dar tagħna. Dak iż-​żmien Ann kienet qed taħdem bħala segretarja f’uffiċċju legali, u fi żmien sena tgħammdet. Jien ma kellix f’moħħi li niżżewweġ, imma kien evidenti li Ann kienet favur il-​verità mija fil-​mija. Hi riedet tkun involuta bis-​sħiħ fis-​servizz taʼ Jehovah. Qatt ma kienet waħda li tirraġuna, “Tgħid jirnexxili nagħmilha din?” Minflok, kienet tistaqsi, “Liema hu l-​aħjar mod kif nagħmilha din il-​ħaġa?” U kienet tkun determinata li ħaġa taraha lesta. Din il-​ħarsa pożittiva kienet togħġobni. Barra minn hekk, kienet gustuża ħafna, u għadha hekk. Saret marti, u malajr saret is-​sieħba tiegħi fis-​servizz tal-​pijunieri.

Taħriġ Siewi Bħala Pijunieri

Bħala pijunieri tgħallimna s-​sigriet taʼ kif inkunu kuntenti kemm meta kellna ftit affarijiet biex ngħaddu u kemm meta konna fix-​xabaʼ. (Filippin 4:11-13) Jum wieħed kien kważi qorob fil-​għaxija, u konna għadna ma messejna xejn maʼ ħalqna. Kellna biss ħames ċenteżmi bejnietna. Dħalna għand tal-​laħam, u staqsejtu, “Tistaʼ tagħtina b’ħames ċenteżmi zalzett?” Dan ħares lejna u mbagħad qatagħlna erbaʼ roti zalzett. Jien ċert li tana iktar mill-​ħames ċenteżmi li tajnieh, u xi ftit nutriment ħadna minnu.

Mhux l-​ewwel darba li konna niffaċċjaw oppożizzjoni ħarxa aħna u nwettqu l-​ministeru tagħna. F’belt żgħira qrib Syracuse, fi New York, konna fit-​triq inqassmu l-​volantini u lebsin il-​kartelluni biex niġbdu l-​attenzjoni għal laqgħa pubblika speċjali li kienet se ssir. Żewġt irġiel m’ogħla hawn ħatfuni u bdew jittrattawni bil-​goff. Wieħed minnhom kien fizzjal tal-​pulizija, imma ma kienx liebes l-​uniformi, u ma tax kasi meta tlabtu biex jidentifika ruħu. Proprju f’dak il-​ħin wasal Grant Suiter mill-​Betel taʼ Brooklyn u qalilna biex immorru l-​għassa tal-​pulizija ħalli nirranġaw kollox. Imbagħad hu ċempel l-​uffiċċju tas-​Soċjetà fi Brooklyn, u tnejn minna ntqalilna biex nerġgħu noħorġu dak in-​nhar stess bil-​kartelluni u l-​volantini sabiex nipprovdu l-​bażi għal kriterju. Kif kien mistenni, ġejna arrestati. Madankollu, meta għedna lill-​pulizija li huma kienu se jiġu mħarrkin fuq arrest falz, dawn ħallewna nitilqu.

L-għada, ċorma żgħażagħ storbjużi invadew il-​post fejn konna qed inżommu assemblea wara li kien xewwixhom qassis, u l-​pulizija ma kienu jidhru mkien. Il-​vandali bdew isabbtu fuq l-​art taʼ l-​injam bil-​mazez tal-​baseball, tefgħu għal isfel lil xi nies mill-​udjenza li kienu fis-​sular taʼ fuq, u telgħu fuq il-​pletform, fejn bdew ixejru bandiera Amerikana u jgħajtu, “Selmulha! Selmulha!” Imbagħad bdew ikantaw il-​“Beer Barrel Polka.” Tistaʼ tgħid li l-​laqgħa ħarbtuha. Konna qed naraw b’għajnejna u mmissu b’idejna dak li Ġesù ried ifisser meta qal: “Billi m’intomx tad-​dinja, għax jien ħriġtkom mid-​dinja, id-​dinja tobgħodkom.”—Ġwann 15:19.

It-taħdita pubblika kienet attwalment reġistrazzjoni tat-​taħdita taʼ J. F. Rutherford, li dakinhar kien il-​president tal-​Watch Tower Society. Jien u Ann bqajna f’dik il-​belt għal erbat ijiem oħra u żorna lin-​nies biex noffrulhom l-​opportunità li jisimgħu t-​taħdita ġewwa djarhom. Xi wħud aċċettawha dik l-​offerta.

Noffru Lilna Nfusna għas-​Servizz Barra l-​Pajjiż

Maż-​żmien, infetħu oqsma ġodda taʼ servizz. Ħija Russel u martu Dorothy, ġew mistiedna bħala koppja biex jattendu l-​ewwel klassi taʼ l-​Iskola taʼ Gilgħad, fl-​1943, u mbagħad intbagħtu bħala missjunarji f’Kuba. Oħti Kathryn kienet fir-​rabaʼ klassi. Hi wkoll ġiet assenjata f’Kuba. Iktar tard intbagħtet fir-​Repubblika Dominikana u mbagħad f’Puerto Rico. Xi ngħidu dwari u dwar Ann?

Meta smajna bl-​Iskola taʼ Gilgħad u l-​fatt li s-​Soċjetà xtaqet tibgħat missjunarji f’artijiet oħra, ħassejna li xtaqna noffru lilna nfusna għas-​servizz f’pajjiż ieħor. Għall-​ewwel, ħsibna li mmorru għal rasna, forsi l-​Messiku. Imma mbagħad iddeċidejna li forsi jkun aħjar jekk nistennew u nħallu lis-​Soċjetà taħtarna wara li nkunu attendejna l-​Iskola taʼ Gilgħad. Irrealizzajna li dan kien arranġament li Jehovah kien qed juża.

Aħna ġejna mistidnin għar-​rabaʼ klassi taʼ l-​Iskola taʼ Gilgħad. Imma ftit qabel ma kellha tibda l-​klassi, N. H. Knorr, li f’dak iż-​żmien kien il-​president tal-​Watch Tower Society, sar iktar konxju tal-​limitazzjonijiet li kellha Ann minħabba l-​poljo li kellha meta kienet żgħira. Hu kellimni dwar dan u ddeċieda li ma jkunx għaqli li jibagħtuna naqdu f’pajjiż ieħor.

Madwar sentejn wara, meta kont qed nagħmel xogħol bi tħejjija għal konvenzjoni, Ħuna Knorr reġaʼ rani u staqsieni jekk konniex għadna interessati li nattendu Gilgħad. Qalli li ma konniex se nintbagħtu f’inkarigu f’pajjiż barrani; kellu xi ħaġa oħra f’moħħu. Għalhekk, meta ġiet reġistrata d-​disaʼ klassi fis-​26 taʼ Frar, 1947, ġejna inklużi maʼ l-​istudenti.

Ma ninsewhom qatt dawk il-​ġranet li qattajna f’Gilgħad. Il-​korsijiet kienu spiritwalment abbundanti. Hemm għamilna ħbieb għal għomorna. Imma l-​involviment tiegħi maʼ l-​iskola kien jinkludi iktar minn hekk.

Minn Washington għal Gilgħad u Viċeversa

L-​Iskola taʼ Gilgħad kienet għadha relattivament ġdida. Il-​gvern taʼ l-​Istati Uniti ma kienx midħla biżżejjed taʼ l-​objettivi taʼ l-​iskola, u għalhekk bdew iqumu ħafna mistoqsijiet. Is-​Soċjetà riedet li jkollha rappreżentant f’Washington, D.C. Kien hemmhekk li ntbgħatna ftit xhur wara li ggradwajna minn Gilgħad. Xogħli kien li ngħin biex jinkisbu l-​viżi għal dawk li jkunu ġew mistiedna biex imorru Gilgħad minn pajjiżi oħra u li nikseb id-​dokumenti legali sabiex il-​gradwati jkunu jistgħu jintbagħtu barra l-​pajjiż fuq xogħol missjunarju. Xi uffiċjali ma kinux preġudikati lejna u kienu t’għajnuna. Oħrajn kellhom sentimenti qawwija kontra x-​Xhieda. Xi wħud li kellhom opinjonijiet politiċi qawwija sostnew li aħna kellna konnessjonijiet maʼ ċerti elementi li huma kienu jqisu bħala mhux mixtieqa.

F’wieħed mill-​uffiċċji li mort, wieħed raġel ikkritikana bl-​aħrax talli ma nsellmux il-​bandiera jew immorru għall-​gwerra. Wara li dam itaqtaq fuq din il-​ħaġa għal ftit tal-​ħin, fl-​aħħar għedtlu: “Irridek tkun taf, u inti tafu dan, li x-​Xhieda taʼ Jehovah m’huma involuti fl-​ebda gwerra maʼ xi ħadd fid-​dinja. Aħna ma ninvolvux ruħna fil-​kwistjonijiet tad-​dinja. Ma ninvolvux ruħna fil-​gwerer tagħhom, fil-​politika tagħhom. Aħna newtrali għalkollox. Diġà għelibna l-​problemi li intom qed tiffaċċjaw; aħna għandna l-​unità fl-​organizzazzjoni tagħna. . . . Issa, xi tridna nagħmlu? Tridna mmorru lura għall-​mod kif tagħmlu l-​affarijiet intom u nabbandunaw tagħna?” Ma qalx kelma oħra wara dan.

Jumejn sħaħ fil-​ġimgħa kienu jitħallew għax-​xogħol maʼ l-​uffiċċji governattivi. Flimkien maʼ dan, konna qed naqdu bħala pijunieri speċjali. Dakinhar, dan kien jinvolvi li nqattgħu 175 siegħa fil-​ministeru taʼ l-​għalqa kull xahar (iktar tard dan inbidel għal 140 siegħa), u għalhekk taʼ spiss konna ndumu fis-​servizz sa tard fil-​għaxija. Kien żmien mill-​isbaħ. Ikkonduċejna ħafna studji sbieħ maʼ familji sħaħ u dawn għamlu progress ġmielu. Jien u Ann konna ddeċidejna li ma jkollniex tfal, imma f’sens spiritwali, mhux talli kellna tfal imma wkoll tfal tat-​tfal u t-​tfal tagħhom. Kemm iferrħulna qlubna dawn!

Lejn it-​tmiem taʼ l-​1948, irċivejt inkarigu ieħor. Ħuna Knorr spjegali li Ħuna Schroeder, ir-​reġistratur u wieħed mill-​għalliema fl-​Iskola taʼ Gilgħad, kien se jkun imħabbat b’xogħol importanti ieħor, u għalhekk talbuni biex ngħallem lill-​klassijiet taʼ Gilgħad meta jkun hemm bżonn. B’imsarni f’saqajja, erġajt lura f’Gilgħad, South Lansing, fi New York, flimkien maʼ Ann fit-​18 taʼ Diċembru. Għall-​ewwel, konna ndumu Gilgħad għal ftit ġimgħat biss kull darba, u mbagħad konna mmorru lura Washington. Eventwalment, madankollu, kont qed inqattaʼ iktar ħin f’Gilgħad milli f’Washington.

Kien f’dan il-​perijodu, kif semmejt iktar kmieni, li ggradwat il-​21 klassi taʼ Gilgħad fil-​Yankee Stadium taʼ New York. Għalhekk bħala wieħed mill-​għalliema, kont privileġġat li nieħu sehem fil-​programm tal-​gradwazzjoni.

Is-​Servizz fil-​Kwartieri Ġenerali Dinjin

Fit-​12 taʼ Frar, 1955, infetaħ inkarigu taʼ servizz ieħor għalina. Sirna membri tal-​familja Betel fil-​kwartieri ġenerali dinjin taʼ l-​organizzazzjoni viżibbli taʼ Jehovah. Imma dan x’kien se jinvolvi? Bażikament, li nkunu lesti li nagħmlu dak kollu li niġu mqabbdin, u nieħdu sehem fi proġetti li kienu jirrikjedu kooperazzjoni m’oħrajn. M’għandniex xi ngħidu, dan ix-​xogħol konna diġà għamilnieh, imma issa konna se nkunu parti minn grupp ferm akbar​—il-​familja Betel tal-​kwartieri ġenerali. Aċċettajna bil-​qalb kollha dan l-​inkarigu ġdid bħala li kien evidenza tad-​direzzjoni taʼ Jehovah.

Parti prinċipali mix-​xogħol tiegħi kien jinvolvi kwistjonijiet li kellhom x’jaqsmu mal-​qasam tax-​xandir. Minħabba li n-​nies taʼ l-​istampa kienu jixtiequ jippubblikaw stejjer sensazzjonali u minħabba li kienu jiksbu l-​informazzjoni minn sorsi preġudikati, dawn kienu kitbu affarijiet ftit li xejn sbieħ dwar ix-​Xhieda taʼ Jehovah. Aħna għamilna l-​almu tagħna biex intejbu din il-​qagħda.

Ħuna Knorr ried ikun ċert li kulħadd ikollu ħafna xogħol x’jagħmel, u għalhekk kien hemm inkarigi oħra wkoll. Għal ftit minn dawn l-​inkarigi ġejt bżonn it-​taħriġ li kont ksibt bħala pittur kummerċjali. Inkarigi oħra kienu jinvolvu l-​istazzjon tar-​radju tas-​Soċjetà, il-​WBBR. Kien hemm xogħol xi jsir konness mal-​films maħruġa mis-​Soċjetà. M’għandniex xi ngħidu, l-​istorja teokratika kienet tagħmel parti mill-​kors taʼ Gilgħad, imma issa nbdew diversi proġetti sabiex in-​nies taʼ Jehovah jsiru iktar midħla tad-​dettalji taʼ l-​istorja taʼ l-​organizzazzjoni teokratika taż-​żmien modern u biex dan ikun disponibbli għall-​pubbliku wkoll. Aspett ieħor tat-​taħriġ f’Gilgħad kien jinvolvi li wieħed jitkellem fil-​pubbliku, u kien jeħtieġ ix-​xogħol sabiex iktar tagħrif bażiku għat-​taħditiet pubbliċi jkun disponibbli għall-​aħwa fil-​kongregazzjonijiet. Għalhekk kien hemm ħafna xi jsir.

Gilgħad fuq Bażi Regulari

Fl-​1961, billi fil-​futur qarib kellu jibda t-​taħriġ għall-​indokraturi li jivvjaġġaw u l-​ħaddiema fil-​fergħat, l-​Iskola taʼ Gilgħad ittieħdet fi Brooklyn, fejn il-​Watch Tower Society għandha l-​uffiċċji prinċipali tagħha. Għal darb’oħra erġajt spiċċajt fil-​klassi​—din id-​darba mhux bħala għalliem sostitut imma bħala membru regulari tal-​fakultà. Xi privileġġ! Jien konvint bis-​sħiħ li l-​Iskola taʼ Gilgħad hija għotja mingħand Jehovah, għotja li bbenefikat minnha l-​organizzazzjoni viżibbli kollha kemm hi tiegħu.

Fi Brooklyn, il-​klassijiet taʼ Gilgħad kellhom opportunitajiet li l-​istudenti mill-​klassijiet taʼ qabel ma kellhomx. Kien hemm iktar lecturers mistiedna u kien hemm sħubija mill-​qrib mal-​Ġemgħa li Tiggverna u sħubija estensiva mal-​familja Betel tal-​kwartieri ġenerali. L-​istudenti kellhom ukoll il-​possibbiltà li jirċievu taħriġ fi proċeduri taʼ l-​uffiċċji, f’xogħol prattiku fid-​dar Betel, u f’diversi aspetti tax-​xogħol fil-​fabbriki.

Matul is-​snin l-​għadd taʼ studenti varja, u l-​istess għamel l-​għadd t’għalliema. Il-​lok taʼ l-​iskola nbidel diversi drabi wkoll. Bħalissa l-​iskola tinsab f’post mill-​isbaħ f’Patterson, New York.

Ix-​Xogħol Flimkien maʼ l-​Istudenti

Kienet ħaġa mill-​isbaħ li ngħallem dawn il-​klassijiet! Hemmhekk tara żgħażagħ li m’humiex interessati li jagħmlu affarijiet fis-​sistema l-​qadima. Huma jħallu warajhom il-​familja tagħhom, ħbiebhom, darhom, u n-​nies li jitkellmu l-​lingwa tagħhom. Il-​klima, l-​ikel​—kollox se jkun differenti. Lanqas biss ikunu jafu f’liema pajjiż sejrin, imma l-​mira tagħhom hi li jkunu missjunarji. Nies bħal dawn m’hemmx għalfejn timmotivahom.

Meta kont nidħol fil-​klassi, dejjem kelli l-​mira li l-​istudenti jħossuhom rilassati. Ħadd ma jitgħallem tajjeb meta jkun imħasseb u inkwetat. Veru, jien kont l-​għalliem, imma kont naf x’jiġifieri tkun student. Darba jien ukoll poġġejt fuq dawk is-​siġġijiet. M’għandniex xi ngħidu, l-​istudenti kienu jistudjaw bl-​għama u jitgħallmu ħafna f’Gilgħad, imma jien ridthom ukoll li jieħdu pjaċir.

Kont naf li meta dawn kienu jaslu fl-​inkarigi tagħhom, kien se jkun hemm ċerti affarijiet li kien se jkollhom bżonn sabiex jirnexxu. Kien se jkollhom bżonn fidi qawwija. Kien se jkollhom bżonn l-​umiltà​—ħafna wkoll. Kien se jkollhom bżonn jitgħallmu kif jingwalawha maʼ nies oħra, kif jaċċettaw ċerti sitwazzjonijiet, kif jaħfru kemm jistgħu. Kien se jkollhom bżonn jibqgħu jikkultivaw il-​frott taʼ l-​ispirtu. Kien se jkollhom bżonn ukoll iħobbu lin-​nies u jħobbu x-​xogħol li jkunu ntbagħtu biex jagħmlu. Dawn huma l-​affarijiet li kont il-​ħin kollu nipprova nżomm quddiem għajnejn l-​istudenti waqt li jkunu f’Gilgħad.

Sinċerament ma nafx kemm-il student għallimt. Imma kif inħossni dwarhom naf. Wara li nkun qattajt ħames xhur magħhom fil-​klassi, ma stajtx ma ninġibidx lejhom. Imbagħad meta kont narahom mexjin fuq il-​pletform u jirċievu d-​diplomi tagħhom f’jum il-​gradwazzjoni, kont inkun naf li rnexxielhom itemmu l-​kors b’suċċess u li dalwaqt kienu se jħalluna. Kien ikun qisu li parti mill-​familja tiegħi kienet sejra. Kif tistaʼ żżomm lura milli tħobb nies li kienu lesti li jagħtu minnhom infushom u jagħmlu x-​xogħol li dawn iż-​żgħażagħ kienu se jagħmlu?

Snin wara, meta jerġgħu jiġu jżuruna, nismagħhom jirrakkontaw il-​ferħ li għandhom fis-​servizz, u naf li għadhom jaqdu fl-​inkarigi tagħhom, jagħmlu dak li ġew imħarrġin biex jagħmlu. Dan kif iġagħalni nħossni? Ngħidilkom bla tlaqliq, inħossni ferħan għall-​aħħar.

Inħares lejn il-​Futur

Għajnejja m’għadhomx li kienu issa, u jkolli nissaporti d-​dwejjaq li dan iġib miegħu. M’għadnix nistaʼ ngħallem fil-​klassi taʼ Gilgħad. Għall-​ewwel, dan kien aġġustament iebes għalija, imma matul ħajti tgħallimt naċċetta s-​sitwazzjonijiet u nkampa magħhom. Taʼ spiss naħseb fuq l-​appostlu Pawlu u x-​‘xewka f’ġismu.’ Tliet darbiet Pawlu talab biex jinħeles minn dik l-​afflizzjoni, imma l-​Mulej qallu: “Biżżejjed għalik il-​grazzja tiegħi; għax il-​qawwa tiegħi tidher fl-​aqwa tagħha fejn hemm id-​dgħajjef.” (2 Korintin 12:7-10) Pawlu kompla jgħix biha. Jekk hu rnexxielu, jien missni nipprova. Għalkemm m’għadnix nikkonduċi sessjonijiet fil-​klassi, ninsab grat li għadni nistaʼ nara lill-​istudenti ġejjin u sejrin kuljum. Xi kultant jirnexxili nitkellem ftit magħhom, u jferrħuli qalbi meta naħseb fuq l-​ispirtu mill-​aħjar li dawn qed juru.

Nitgħaxxaq nimmedita fuq x’hemm merfugħ għall-​futur. Bħalissa qed jitqiegħed pedament. Gilgħad lagħab parti prominenti f’dan. Wara t-​tribulazzjoni l-​kbira, meta jinfetħu l-​kotba msemmija f’Apokalissi 20:12, se jkun hemm elf sena taʼ iktar taħriġ intensiv fil-​mogħdijiet taʼ Jehovah. (Isaija 11:9) Imma saħansitra dak mhux se jkun it-​tmiem. Fil-​fatt huwa biss il-​bidu. Matul l-​eternità, se jkun hemm iktar x’nitgħallmu dwar Jehovah u iktar x’nagħmlu hekk kif naraw l-​iskopijiet tiegħu jiżvolġu. Jien fiduċjuż bis-​sħiħ li Jehovah se jwettaq il-​wegħdi grandjużi kollha li għamel, u jien irrid inkun hemm biex inkun fost dawk li jaċċettaw id-​direzzjonijiet li se jagħtina Jehovah dakinhar.

[Stampa f’paġna 26]

Il-​gradwazzjoni taʼ Gilgħad fil-​Yankee Stadium taʼ New York fl-​1953

[Stampa f’paġna 26]

Gertrude, jien, Kathryn, u Russell

[Stampa f’paġna 26]

Waqt xogħol taʼ organizzazzjoni għall-​konvenzjoni maʼ N. H. Knorr (fuq ix-​xellug fit-​tarf) u M. G. Henschel

[Stampa f’paġna 26]

Fl-​istudju tax-​xandir tal-​WBBR

[Stampa f’paġna 29]

Fil-​klassi taʼ Gilgħad

[Stampa f’paġna 31]

Maʼ Ann, reċentement