Jeżisti xi Ħadd li Verament Jimpurtah?

‘Id-​dmugħ tal-​maħqurin’ sar bħal wied igelgel. Dan id-​dmugħ qed ixerrduh nies li huma vittmi taʼ “moħqrijiet” bla għadd mad-​dinja kollha. Taʼ spiss, dawk li jispiċċaw vittmi jħossuhom li “ma hemmx min ifarraġhom” ​—li ħadd ma jimpurtah minnhom verament.—Koħèlet 4:1.

MINKEJJA dan il-​wied taʼ dmugħ, xi wħud ma jħossu xejn meta jaraw lill-​bnedmin sħabhom ibatu. Dawn jagħlqu għajnejhom għall-​uġigħ taʼ nies oħra, l-​istess bħalma għamlu l-​qassis u l-​Levita fit-​tixbieha taʼ Ġesù Kristu dwar wieħed raġel li ġie attakkat, misruq, u mitluq għal mejjet mal-​ġenb tat-​triq. (Luqa 10:30-32) Sakemm kollox ikun jidher li miexi tajjeb għalihom u għall-​familji tagħhom, ma jimpurtahomx minn ħaddieħor. Fil-​fatt, jgħidu, “X’jimpurtani?”

M’għandniex nistagħġbu b’dan. L-​appostlu Pawlu bassar li fl-​“aħħar jiem” ħafna nies kellhom ikunu “bla qalb.” (2 Timoteus 3:1, 3, Saydon) Wieħed osservatur ilmenta dwar kemm in-​nies saru ma jimpurtahom minn ħadd. “Il-​filosofija u t-​tradizzjoni antiki Irlandiżi taʼ li nieħdu ħsieb xulxin u li nagħtu milli għandna,” hu qal, “qed jinbidlu f’kodiċi ġdida taʼ x’se nagħmlu u x’se naħtfu għalina nfusna.” Madwar id-​dinja, in-​nies jaraw x’se jagħmlu u x’se jaħtfu għalihom infushom, u kważi kważi jiġu jaqgħu u jqumu mill-​qagħda mwegħra taʼ ħaddieħor.

Hemm Bżonn taʼ xi Ħadd li Jimpurtah

Ċertament li għandna bżonn taʼ xi ħadd li jimpurtah. Per eżempju, aħseb ftit dwar dak ir-​raġel sulu sulu fil-​Ġermanja li “nstab bil-​qegħda quddiem is-​sett tat-​televixin tiegħu​—ħames snin wara l-​mewt tiegħu fil-​Milied.” Ħadd ma ntebaħ li kien miet dan il-​bniedem “divorzjat, inkapaċitat u dejjem waħdu,” mimli dwejjaq minħabba l-​esperjenzi qarsa li kellu f’ħajtu. Indunaw li miet meta l-​kont tal-​bank li kien iħallas il-​kera bih spiċċa bla flus. Tistaʼ tgħid li ħadd ma kien jimpurtah minnu.

Aħseb, ukoll, dwar il-​vittmi taʼ barunijiet rgħiba u li għandhom ħafna poter. Dawn il-​vittmi m’għandhom lil ħadd min jaqbeż għalihom. F’post wieħed, madwar 200,000 ruħ (kwart tal-​popolazzjoni) “mietu minħabba r-​repressjoni u l-​ġuħ” wara li arthom inħatfet minn taħt idejhom bil-​vjolenza. Jew aħseb dwar it-​tfal li ġew esposti għal salvaġġiżmu li jġiblek għajnejk wara widnejk. Rapport minnhom qal: “Il-​persentaġġ taʼ tfal [f’pajjiż wieħed] li raw b’għajnejhom diversi tipi t’atroċitajiet​—qtil, swat, stupri, u dawn xi kultant imwettqin minn adolexxenti oħra, huwa taʼ l-​għaġeb.” Tistaʼ tifhem kif vittma taʼ inġustizzji bħal dawn għandu mnejn jistaqsi bid-​dmugħ f’għajnejh, “Jeżisti xi ħadd li verament jimpurtah minni?”

Skond rapport tal-​Ġnus Magħquda, 1.3 biljun ruħ li jgħixu f’partijiet tad-​dinja li għadhom qed jiżviluppaw ikollhom jgħaddu bl-​ekwivalenti taʼ inqas minn dollaru Amerikan kuljum [38 ċenteżmu]. Dawn żgur jitħassbu jekk hemmx xi ħadd li jimpurtah. L-​istess ħaġa jagħmlu eluf taʼ refuġjati li, skond kif jgħid rapport f’The Irish Times, “iħabbtu wiċċhom mad-​deċiżjoni xejn sabiħa li jew joqogħdu f’kamp miżerabbli tar-​refuġjati jew f’pajjiż inospitabbli jew inkella jipprovaw imorru lura f’art twelidhom li tkun għadha mbiċċra bil-​gwerra jew b’firdiet etniċi.” L-​istess rapport kien jinkludi dan l-​eżerċizzju taʼ niket: “Agħlaq għajnejk, għodd sat-​tlieta, għadu kif miet tifel, jew tifla. Dan hu wieħed mill-​35,000 tifel u tifla li se jmutu llum bin-​nuqqas taʼ ikel sustanzjuż jew b’mard li jistaʼ jiġi evitat.” Mhux taʼ b’xejn li ħafna nies jibku biki mimli diqa u mrar!—Qabbel Ġob 7:11.

Imma dan kollu hekk kellu jkun? Jekk inkunu realistiċi, jeżisti xi ħadd li mhux biss jimpurtah imma li għandu wkoll il-​qawwa li jwaqqaf it-​tbatija u li jfejjaq l-​uġigħ kollu li ġarrbu n-​nies?

[Sors taʼ l-​Istampa f’paġna 3]

A. Boulat/Sipa Press