X’Inhu l-​Muftieħ għas-​Suċċess?

ŻEWĠT irġiel żgħażagħ avventurużi kienu qegħdin jippreparaw bir-​reqqa kollha makkinarju stramb biex jagħmlu esperiment kruċjali. F’daqqa waħda, buffura riħ qawwija qabdet dan l-​apparat delikat, dawritu tnejn fl-​arja, u b’ħoss li jkexkxek sabbtitu maʼ l-​art. Skuraġġiti għall-​aħħar, iż-​żewġt irġiel baqgħu weqfin qishom statwa tal-​melħ. Ix-​xogħol iebes tagħhom li kienu għamlu b’tant attenzjoni kbira spiċċa f’munzell tifrik.

Għal Orville u Wilbur Wright, dak li ġara dakinhar, f’Ottubru taʼ l-​1900, ma kinitx xi ħaġa ġdida. Ma kinitx l-​ewwel darba li raw l-​attentat tagħhom biex jibnu makkinarju volanti itqal mill-​arja jisfaxxa fix-​xejn. Kienu diġà qattgħu diversi snin u nefqu kemxa ġmielha fl-​esperimenti tagħhom.

Iżda, fl-​aħħar il-​persistenza tagħhom ħalliet il-​frott. Fis-​17 taʼ Diċembru, 1903, f’Kitty Hawk, North Carolina, fl-​Istati Uniti taʼ l-​Amerka, l-​aħwa Wright irnexxielhom itajru mudell li jaħdem b’mutur għal 12-il sekonda—ħin qasir meta tqabblu mat-​titjiriet li jsiru llum il-​ġurnata, imma twil biżżejjed biex ibiddel id-​dinja għal dejjem!

Fil-biċċa l-​kbira tal-​każi s-​suċċess jiddependi l-​iktar fuq kemm aħna lesti li nipperseveraw bil-​paċenzja. Sew jekk inkunu qegħdin nitgħallmu xi lingwa, nitħarrġu f’xi sengħa, inkella saħansitra niżviluppaw xi ħbiberija, l-​iktar affarijiet taʼ valur jinkisbu bi sforz kontinwu. “Disaʼ darbiet minn għaxra,” jgħid l-​awtur Charles Templeton, “is-​suċċess huwa marbut direttament maʼ ħaġa waħda: xogħol iebes.” Il-​ġurnalista Leonard Pitts, Jr., jinnota: “Nitkellmu dwar it-​talenti, nagħtu l-​kredtu lix-​xorti, imma ħafna drabi, ninjoraw l-​iktar affarijiet importanti. Ix-​xogħol iebes u ħafna fallimenti. Is-​sigħat twal taʼ xogħol.”

Dan jikkonferma dak li qalet il-​Bibbja żmien twil ilu: “Min hu bieżel jimxi ’l quddiem.” (Proverbji 12:24) Il-​bżulija tfisser li nipperseveraw fl-​isforzi tagħna. Dan hu neċessarju jekk irridu nwettqu dak li nkunu bdejna. X’inhi l-​perseveranza? Kif nistgħu nipperseveraw waqt li nistinkaw biex nilħqu l-​miri tagħna, u fiex għandna nipperseveraw? Dawn il-​mistoqsijiet se jitwieġbu fl-​artiklu li jmiss.

[Sors taʼ l-​istampa f’paġna 3]

U.S. National Archives photo