Proklamaturi tas-​Saltna Jirrapportaw

ABRAHAM kien raġel li kellu fidi li ftit hawn bħalha. Meta kellu “s-​sejħa taʼ Alla,” qal l-​appostlu Pawlu, Abraham obda leħen Alla u “telaq, bla ma kien jaf fejn kien sejjer.” Wara li telaq mal-​familja kollha tiegħu, Abraham għammar “fl-​art imwegħda, qisu barrani f’art barranija” għall-​bqija tal-​mitt sena li kien baqagħlu.—Lhud 11:​8, 9.

L-istess illum, ħafna mix-​Xhieda taʼ Jehovah aċċettaw l-​isfida li jmorru f’pajjiż ieħor sabiex jaqdu fejn il-​bżonn hu akbar. Oħrajn tgħallmu lingwa differenti biex b’hekk ikunu jistgħu jagħtu xiehda lill-​barranin li jkunu emigraw lejn pajjiżhom. Bħalma juru l-​eżempji li ġejjin, dan l-​ispirtu mill-​aħjar fetaħ “bieb kbir . . . għax-​xogħol” ġewwa l-​Olanda, fejn miljun mill-​15-il miljun abitant huma minn pajjiżi oħra.—1 Korintin 16:​9, Saydon.

◻ Bahram, li qabel kien istruttur tal-​Kung Fu, ġie minn pajjiż fil-​Lvant Nofsani. Hu kiseb kopja tal-​Bibbja u xi pubblikazzjonijiet tal-​Watch Tower. Fi żmien xahar, Bahram irrealizza li kien sab il-​verità. Inbeda studju miegħu u maʼ martu, imma kien hemm problema—l-​għalliem tagħhom tal-​Bibbja ma kienx jaf jitkellem bil-​lingwa tagħhom. Bdew jiftakru kemm kienu jikkomunikaw bil-​ġesti, billi jużaw “l-​idejn u s-​saqajn.” Maż-​żmien, Bahram u martu setgħu jistabbilixxu ruħhom f’kongregazzjoni fejn kienu jitkellmu bil-​lingwa tagħhom, u wara dan malajr għamlu progress. Bahram issa hu Xhud mgħammed.

◻ Koppja Olandiża li huma pijunieri avviċinaw raġel Indoneżjan li kien quddiem supermarkit. Hu stagħġeb u tgħidx kemm ħa pjaċir meta l-​koppja kellmuh bil-​lingwa tiegħu stess. Imbagħad għamlu arranġamenti biex imorru jżuruh f’daru. Skoprew li hu kien għex ir-​Russja għal iktar minn 20 sena, u matul dak iż-​żmien sar ġinekologu. Hu stqarr li kien ateu, imma ammetta li kull darba li kien jassisti għal twelid taʼ tarbija, ma setax ma jimmeraviljax ruħu, “Kemm hu perfett il-​ġisem uman! X’miraklu!” Hu aċċetta li jistudja l-​Bibbja, u malajr sar jemmen li hemm Ħallieq li jimpurtah mill-​umanità. (1 Pietru 5:​6, 7) Issa huwa ħu mgħammed u jaqdi fil-​kongregazzjoni Indoneżjana f’Amsterdam.

◻ F’Rotterdam, wieħed mill-​akbar portijiet tal-​vapuri tal-​merkanzija fid-​dinja, grupp taʼ pijunieri saru esperti f’li jippridkaw lil diversi gruppi li jitkellmu lingwi differenti li kienu jidħlu kuljum fil-​baċir. Bħala riżultat taʼ l-​attività taʼ dan il-​grupp taʼ predikaturi entużjasti, diversi baħrin, inkluż kaptan, fizzjal, u wieħed li qabel kien gwardja persunali, aċċettaw il-​verità. Issa huma wkoll qed jgħinu f’li jxerrdu l-​aħbar tajba tas-​Saltna t’Alla mad-​dinja kollha.—Mattew 24:14.

Bħal f’partijiet oħra tad-​dinja, ix-​Xhieda taʼ Jehovah fl-​Olanda huma determinati li jagħtu sehemhom f’li jiddikjaraw l-​aħbar tajba taʼ dejjem lil kull ġens, tribù, ilsien u poplu.—Apokalissi 14:6.