“Fittxu lil Jehovah u lil Saħħtu”

“Għax għajnejh jiġru fuq l-​art kollha . . . [“biex juri saħħtu f’isem,” “NW”] dawk li qalbhom marbuta fis-​sħiħ miegħu.”​—2 KRONAKI 16:9.

1. X’inhi l-​qawwa, u l-​bnedmin kif użawha?

QAWWA tistaʼ tfisser ħafna affarijiet, bħal ngħidu aħna li wieħed ikollu kontroll, awtorità, jew influwenza fuq oħrajn; abbiltà li jaġixxi jew jipproduċi xi effett; setgħa fiżika (saħħa); jew kapaċità mentali jew morali. Ma tantx hemm x’juri li l-​bnedmin użawha tajjeb il-​qawwa tagħhom. Lord Acton, kittieb taʼ l-​istorja, qal dan dwar il-​qawwa li għandhom il-​politikanti: “Il-​qawwa għandha t-​tendenza li tikkorrompi u qawwa assoluta tikkorrompi b’mod assolut.” L-​istorja moderna hija mimlija b’eżempji li juru kemm huwa veru b’mod ġenerali l-​kliem taʼ Lord Acton. Qatt daqs is-​seklu 20 ma kien li l-​‘bniedem ħakem fuq ieħor u għamillu l-​ħsara.’ (Koħèlet 8:9) Dittaturi korrotti abbużaw kemm felħu mill-​qawwa tagħhom u qerdu miljuni taʼ nies. Qawwa li m’hijiex kontrollata mill-​imħabba, l-​għerf, u l-​ġustizzja hija perikoluża.

2. Spjega kif kwalitajiet divini oħra jeffettwaw il-​mod kif Jehovah juża l-​qawwa tiegħu.

² Għall-kuntrarju taʼ ħafna bnedmin, Alla dejjem juża l-​qawwa tiegħu għall-​ġid. “Għax għajnejh jiġru fuq l-​art kollha . . . [“biex juri saħħtu f’isem,” NW] dawk li qalbhom marbuta fis-​sħiħ miegħu.” (2 Kronaki 16:9) Jehovah jidderieġi l-​qawwa tiegħu b’mod kontrollat. Il-​paċenzja żżomm lil Alla milli jesegwixxi ġudizzju fuq il-​ħżiena biex b’hekk jagħtihom l-​opportunità li jindmu. L-​imħabba tqanqlu biex iġiegħel ix-​xemx tiddi fuq kull xorta taʼ bnedmin—tajbin u mhux tajbin. Il-​ġustizzja se tqanqlu biex fl-​aħħar juża l-​qawwa bla limitu tiegħu ħalli jġib fix-​xejn lil dak li għandu l-​mezzi biex jikkaġuna l-​mewt, Satana x-​Xitan.​—Mattew 5:​44, 45; Lhud 2:14; 2 Pietru 3:9.

3. Il-​qawwa assoluta t’Alla għala hija raġuni biex wieħed jafda fih?

³ Il-qawwa taʼ l-​għaġeb li għandu Missierna tas-​sema hija raġuni għal fiduċja u tama—kemm fil-​wegħdi tiegħu u kemm fil-​protezzjoni tiegħu. Tifel ċkejken iħossu protett fost nies li ma jafhomx hekk kif iżomm id missieru, għax jaf li missieru se jipproteġih biex ma jiġrilu xejn. Bl-​istess mod, Missierna tas-​sema, il-​wieħed li għandu tant ‘qawwa biex jgħin,’ se jipproteġina minn kwalunkwe ħsara permanenti jekk aħna nimxu miegħu. (Isaija 63:1; Mikea 6:8) U bħala Missier tajjeb, Jehovah dejjem iwettaq il-​wegħdi tiegħu. Il-​qawwa bla limitu tiegħu tiggarantixxi li ‘kelmtu ttemm dak li jkun bagħatha tagħmel.’—Isaija 55:11; Titu 1:2.

4, 5. (a) X’irriżulta meta s-​Sultan Asa fada kompletament f’Jehovah? (b) X’jistaʼ jiġri jekk nistrieħu fuq is-​soluzzjonijiet tal-​bnedmin għall-​problemi tagħna?

⁴ Għala huwa daqshekk importanti li nkunu determinati biex qatt ma nwarrbu minn quddiem għajnejna l-​protezzjoni li jagħtina Missierna tas-​sema? Għaliex jistaʼ jiġri li jkun hemm xi ċirkustanzi fil-​ħajja li jġagħluna nċedu u ninsew min hu s-​sors taʼ sigurtà veru tagħna. Dan jidher fl-​eżempju tas-​Sultan Asa, bniedem li ġeneralment kien jafda f’Jehovah. Matul ir-​renju taʼ Asa, eżerċtu taʼ iktar minn miljun Etjopjan attakkaw lil Ġuda. Billi rrealizza kemm l-​għedewwa kellhom vantaġġ militari fuqhom, Asa talab: “Mulej, m’hu xejn għalik tgħin wieħed qawwi u tgħin wieħed bla saħħa. Għinna, Mulej, Alla tagħna, fuqek nistrieħu; f’ismek ġejna kontra din il-​kotra. Mulej inti Alla tagħna; . .  . [“tħallix bniedem ikun,” Karm Żammit] aqwa minnek!” (2 Kronaki 14:10 [14:​11, KŻ]) Jehovah qataʼ x-​xewqa taʼ Asa u tah rebħa deċiżiva.

⁵ Madankollu, wara bosta snin taʼ servizz leali, il-​fiduċja li Asa kellu f’Jehovah majnat. Biex jevita theddida li kienet ġejja mis-​saltna taʼ Iżrael tat-​tramuntana, hu dar lejn is-​Sirja għall-​għajnuna. (2 Kronaki 16:​1-3) Għalkemm b’riżultat tat-​tixħim li xaħħam lis-​Sultan Sirjan Benħadad tneħħiet it-​theddida taʼ Iżrael fuq Ġuda, il-​patt li Asa għamel mas-​Sirja wera nuqqas taʼ fiduċja f’Jehovah. Il-​profeta Ħanani staqsieh ċar u tond: “Jaqaw ma kinux il-​Kusin [“Etjopin,” KŻ] u l-​Libin eżerċtu kbir b’ħafna karrijiet u rikkieba? Imma għax int striħajt fuq il-​Mulej, hu rħiehom f’idejk.” (2 Kronaki 16:​7, 8) Minkejja dan, Asa ma tax kasha din iċ-​ċanfira. (2 Kronaki 16:​9-12) Meta niffaċċjaw il-​problemi, jalla ma nistriħux fuq is-​soluzzjonijiet tal-​bnedmin. Minflok, ejja nuru fiduċja f’Alla, għax jekk nafdaw fil-​qawwa tal-​bniedem, dan bla dubju se jwassal għal diżappunt.—Salm 146:​3-5.

Fittex il-​Qawwa li Jagħti Jehovah

6. Għala għandna ‘nfittxu lil Jehovah u lil saħħtu’?

⁶ Jehovah mhux biss jistaʼ jqawwi lill-​qaddejja tiegħu, imma jistaʼ wkoll jipproteġihom. Il-​Bibbja tħeġġiġna biex ‘infittxu lil Jehovah u lil saħħtu.’ (Salm 105:​4, NW) Għala? Għaliex meta nagħmlu l-​affarijiet bis-​saħħa taʼ Jehovah, il-​qawwa tagħna se nużawha għall-​benefiċċju, u mhux għall-​ħsara t’oħrajn. Imkien ma nsibu eżempju aħjar minn dak taʼ Ġesù Kristu, li wettaq tant mirakli bil-​“qawwa tal-​Mulej.” (Luqa 5:17) Ġesù setaʼ ddedika ħajtu biex isir sinjur, famuż, jew saħansitra l-​iktar sultan setgħan. (Luqa 4:​5-7) Minflok, hu uża l-​qawwa li tah Alla biex iħarreġ u jgħallem, biex jgħin u jfejjaq. (Mark 7:37; Ġwann 7:46) X’eżempju mill-​aħjar għalina!

7. Liema kwalità vitali nkunu qed nikkultivaw meta nagħmlu l-​affarijiet bis-​saħħa t’Alla minflok bis-​saħħa tagħna?

⁷ Barra minn hekk, meta nagħmlu l-​affarijiet bis-​“saħħa li Alla jforni,” dan se jgħinna nibqgħu umli. (1 Pietru 4:​11, NW) Nies li jfittxu l-​qawwa għalihom infushom isiru prużuntużi. Eżempju taʼ dan huwa s-​Sultan Assirjan Esarħaddun, li ddikjara bi ftaħir: “Jien setgħan, jien nistaʼ kollox, jien eroj, jien ġgant, jien kolossali.” B’kuntrast, Jehovah “għażel id-​dgħajfa tad-​dinja biex iħawwad il-​qawwija.” B’hekk, jekk Kristjan jiftaħar, hu jiftaħar b’Jehovah, għax jaf li dak li jkun għamel ma ġiex imwettaq bis-​saħħa tiegħu. Jekk ‘numiljaw ruħna taħt l-​id setgħana taʼ Alla,’ dan verament se jeżaltana.—1 Korintin 1:​26-31; 1 Pietru 5:6.

8. L-​ewwel, x’irridu nagħmlu biex nirċievu l-​qawwa taʼ Jehovah?

⁸ Kif nistgħu niksbu s-​saħħa mingħand Alla? L-​ewwel, irridu nitolbu għaliha. Ġesù żgura lid-​dixxipli tiegħu li Missieru kien se jagħti l-​ispirtu qaddis lil dawk li jitolbuhulu. (Luqa 11:​10-13) Ikkunsidra kif dan mela lid-​dixxipli taʼ Kristu bil-​qawwa meta huma għażlu li jobdu lil Alla iktar milli jobdu lill-​mexxejja reliġjużi li kienu ordnawlhom biex jieqfu jxandru dwar Ġesù. Meta talbu għall-​għajnuna taʼ Jehovah, it-​talba sinċiera tagħhom ġiet mismugħa, u l-​ispirtu qaddis tahom il-​qawwa biex ikomplu jippridkaw l-​aħbar tajba bil-​qlubija.—Atti 4:​19, 20, 29-31, 33.

9. Semmi t-​tieni sors taʼ saħħa spiritwali, u rrakkonta eżempju Skritturali biex turi kemm dan hu effettiv.

⁹ It-tieni, nistgħu niksbu saħħa spiritwali mill-​Bibbja. (Lhud 4:12) Il-​qawwa tal-​kelma t’Alla kienet evidenti fi żmien is-​Sultan Ġosija. Għalkemm dan is-​sultan Ġudean kien diġà neħħa l-​idoli pagani mill-​pajjiż, l-​iskoperta għal għarrieda li għamel meta sab il-​Liġi taʼ Jehovah fit-​tempju qanqlitu biex jintensifika dan il-​programm taʼ tindif.a Wara li Ġosija kien qara personalment il-​Liġi lin-​nies, il-​ġens kollu kemm hu għamel patt maʼ Jehovah, u ngħata bidu għat-​tieni kampanja, iktar entużjażmanti, kontra l-​idolatrija. Ir-​riżultat mill-​aħjar tar-​riforma li għamel Ġosija kienet li “kemm dam ħaj hu ma warrbux mill-​Mulej.”—2 Kronaki 34:33.

10. X’inhu t-​tielet mod li bih niksbu s-​saħħa mingħand Jehovah, u dan għala huwa vitali?

¹⁰ It-tielet, aħna niksbu s-​saħħa mingħand Jehovah permezz taʼ sħubija Kristjana. Pawlu inkuraġġixxa lill-​Kristjani biex jattendu għal-​laqgħat regolarment sabiex ‘iħajru lil xulxin għall-​imħabba u għall-​għemil tajjeb’ u biex jinkuraġġixxu lil xulxin. (Lhud 10:​24, 25) Meta Pietru nħeles b’mod mirakoluż mill-​ħabs, hu ried ikun maʼ ħutu, u għalhekk mar dritt lejn id-​dar t’omm Ġwanni Marku, fejn “kien hemm ħafna miġbura jitolbu flimkien.” (Atti 12:12) M’għandniex xi ngħidu, ilkoll kemm huma setgħu baqgħu d-​dar jitolbu. Imma għażlu li jiltaqgħu flimkien biex jitolbu u jinkuraġġixxu lil xulxin matul dak iż-​żmien diffiċli. Meta Pawlu kien wasal biex itemm il-​vjaġġ twil u mimli perikli tiegħu għal Ruma, hu ltaqaʼ maʼ xi aħwa minn Putijoli u iktar tard m’oħrajn li kienu vvjaġġaw biex imorru jiltaqgħu miegħu. X’kienet ir-​reazzjoni tiegħu? “Malli rahom [lil dawn], Pawlu radd il-​ħajr ’l Alla u qawwa qalbu.” (Atti 28:​13-15) Hu ssaħħaħ minħabba l-​fatt li kien għal darb’oħra maʼ sħabu l-​Kristjani. Aħna wkoll nistgħu niksbu saħħa minn sħubija maʼ sħabna l-​Kristjani. Sakemm għandna l-​libertà u nistgħu nassoċjaw flimkien, ma rridux nipprovaw nimxu waħedna fit-​triq id-​dejqa li twassal għall-​ħajja.​—Proverbji 18:1; Mattew 7:​14.

11. Semmi xi ċirkustanzi fejn b’mod partikulari tkun meħtieġa “qawwa iktar min-​normal.”

¹¹ Billi nitolbu, nistudjaw il-​Kelma t’Alla, u nassoċjaw maʼ sħabna fit-​twemmin regolarment, aħna nibqgħu ‘nissaħħu fil-​Mulej u fil-​qawwa tas-​setgħa tiegħu.’ (Efesin 6:​10, KŻ) Ilkoll kemm aħna bla dubju neħtieġu li ‘nissaħħu fil-​Mulej.’ Xi wħud ibatu minħabba mard kiefer, oħrajn minħabba l-​effetti distruttivi tax-​xjuħija jew minħabba li jkun mitilhom is-​sieħeb jew is-​sieħba tagħhom. (Salm 41:​3, KŻ) Oħrajn jissaportu oppożizzjoni mingħand is-​sieħeb jew is-​sieħba tagħhom li m’humiex taʼ l-​istess twemmin tagħhom. Il-​ġenituri, speċjalment dawk li jrabbu t-​tfal waħedhom, jistgħu jħossuhom eżawriti minħabba li flimkien mar-​responsabbiltà li jrabbu l-​familja jkollhom xogħol sekulari full-time. Żgħażagħ Kristjani għandhom bżonn is-​saħħa biex jieqfu għall-​pressjonijiet minn dawk taʼ mparhom u biex jgħidu le għad-​drogi u għall-​immoralità. Ħadd m’għandu jistħi biex jitlob lil Jehovah għall-​“qawwa iktar min-​normal” biex ikampa maʼ sfidi bħal dawn.—2 Korintin 4:​7, NW.

“Jagħti l-​Qawwa lill-​Għajjien”

12. Jehovah kif isostnina fil-​ministeru Kristjan?

¹² Iżjed minn hekk, Jehovah jagħti l-​qawwa lill-​qaddejja tiegħu meta huma jwettqu l-​ministeru tagħhom. Fil-​profezija taʼ Isaija naqraw: “Hu li jagħti l-​qawwa lill-​għajjien, u jkattar il-​qawwa lil min hu bla saħħa. . . . Dawk li jittamaw fil-​Mulej jieħdu saħħithom, itellgħu l-​ġwienaħ bħall-​ajkli, jiġru bla ma jegħjew, jimxu bla ma jintelqu.” (Isaija 40:​29-31) L-​appostlu Pawlu rċieva personalment qawwa biex iwettaq il-​ministeru tiegħu. B’riżultat taʼ dan, il-​ministeru tiegħu kien effettiv. Lill-​Kristjani f’Tessalonika kitbilhom: “L-​Evanġelju tagħna lilkom ma kienx biss bil-​kliem, imma wkoll bil-​qawwa, bl-​Ispirtu s-​Santu.” (1 Tessalonikin 1:5) L-​ippridkar u t-​tagħlim tiegħu kellhom il-​qawwa li jwettqu bidliet kbar fil-​ħajjiet taʼ dawk li semgħuh.

13. X’kien li saħħaħ lil Ġeremija biex jippersevera minkejja oppożizzjoni?

¹³ Meta nħabbtu wiċċna maʼ spirtu taʼ indifferenza fit-​territorju tagħna—territorju li forsi min jaf kemm ilna nippridkaw fih u ftit li xejn insibu interess—għandu mnejn li nibdew naqtgħu qalbna. Anki Ġeremija ħassu skuraġġit minħabba l-​oppożizzjoni, it-​tagħjir, u l-​apatija li ltaqaʼ magħhom. “Ma nsemmihx aktar [lil Alla], ma nitkellimx aktar f’ismu,” qal bejnu u bejn ruħu. Imma ma setax jibqaʼ sieket. Il-​messaġġ tiegħu kien ‘bħal nar jaqbad, magħluq f’għadmu.’ (Ġeremija 20:9) X’kien li reġaʼ tah il-​qawwa meta kien għaddej minn dan iż-​żmien t’għawġ kbir? “Jehovah kien miegħi bħal wieħed setgħan tal-​biżaʼ.” (Ġeremija 20:​11, NW) L-​apprezzament li Ġeremija kellu għall-​importanza vitali tal-​messaġġ tiegħu u għall-​inkarigu mogħti lilu minn Alla ġagħluh iwieġeb għall-​inkuraġġiment taʼ Jehovah.

Qawwa li Tweġġaʼ u Qawwa li Ddewwi

14. (a) L-​ilsien kemm hu strument qawwi? (b) Agħti xi eżempji biex turi l-​ħsara li jistaʼ jagħmel l-​ilsien.

¹⁴ Mhux il-​qawwa kollha li għandna tiġi direttament minn Alla. L-​ilsien, per eżempju, għandu l-​qawwa li jweġġaʼ kif ukoll li jdewwi. “Il-​mewt u l-​ħajja huma fil-​qawwa taʼ l-​ilsien,” iwissi Salamun. (Proverbji 18:​21, NW) Ir-​riżultati tal-​konversazzjoni qasira li Satana kellu maʼ Eva juru li l-​kliem jistaʼ jagħmel straġi sħiħa. (Ġenesi 3:​1-5; Ġakbu 3:5) Aħna wkoll nistgħu nagħmlu ħafna ħsara bl-​ilsien. Kummenti negattivi dwar kemm tfajla għandha piż żejjed jistgħu jwassluha għall-​marda taʼ l-​anoreksja. Tqassis li jingħad bla ħsieb taʼ xejn jistaʼ jħassar ħbiberija li tkun ilha s-​snin. Iva, l-​ilsien għandu bżonn jiġi kontrollat.

15. Kif nistgħu nużaw ilsienna biex nibnu u biex indewwu?

¹⁵ Madankollu, l-​ilsien jistaʼ kemm jibni kif ukoll ikisser. Il-​qawl Bibliku jgħid: “Min iqassas b’ilsienu jinfed bħal sejf, imma lsien l-​għorrief idewwi.” (Proverbji 12:18) Kristjani għaqlin jużaw il-​qawwa taʼ l-​ilsien biex ifarrġu lil uħud dipressi u mnikktin. Kliem kollu mogħdrija jistaʼ jinkuraġġixxi lill-​adolexxenti li qegħdin jissieltu mal-​pressjoni minn dawk taʼ mparhom. Jekk l-​ilsien jintuża bil-​ħsieb, dan jistaʼ juri lill-​aħwa mdaħħlin fiż-​żmien kemm huma għadhom utli u maħbubin. Kliem ħanin jistaʼ jferraħ qalb dawk li huma morda. Fuq kollox, nistgħu nużaw ilsienna biex naqsmu l-​messaġġ tant qawwi tas-​Saltna maʼ dawk kollha li jridu jisimgħuh. Aħna jistaʼ jkollna l-​qawwa li nxandru l-​Kelma t’Alla jekk dan nagħmluh b’qalbna kollha. Il-​Bibbja tgħid: “Min ħaqqu l-​ġid tiċħadhulux, meta dan tistaʼ tagħmlu.”​—Proverbji 3:​27.

L-​Użu Xieraq tal-​Qawwa

16, 17. L-​anzjani, il-​ġenituri,u l-​irġiel u n-​nisa miżżewġin kif jistgħu jimitaw lil Jehovah meta jeżerċitaw l-​awtorità li tahom Alla?

¹⁶ Għalkemm Jehovah jistaʼ kollox, hu jaħkem fuq il-​kongregazzjoni bl-​imħabba. (1 Ġwann 4:8) Biex jimitawh, l-​indokraturi Kristjani jieħdu ħsieb il-​merħla t’Alla bl-​imħabba—billi jużaw, mhux jabbużaw mill-​awtorità tagħhom. Veru li l-​indokraturi xi kultant ikollhom bżonn ‘iċanfru, iwiddbu, u jwissu,’ imma dan jagħmluh “bis-​sabar kollu u bit-​tagħlim.” (2 Timotju 4:2) Għalhekk, l-​anzjani jimmeditaw spiss fuq il-​kliem li l-​appostlu Pietru kiteb lil dawk li għandhom awtorità fil-​kongregazzjoni: “Irgħu l-​merħla taʼ Alla fdata f’idejkom. Ħudu ħsiebha, mhux bilfors, imma minn qalbkom, kif irid Alla; mhux għall-​qligħ baxx, imma bil-​ħeġġa taʼ l-​imħabba; mhux bħallikieku taħkmu bil-​qawwa fuq dawk li . . . [“huma l-​wirt t’Alla,” NW], imma billi tkunu eżempju tal-​merħla.”—1 Pietru 5:​2, 3; 1 Tessalonikin 2:​7, 8.

¹⁷ Il-ġenituri u l-​irġiel miżżewġin ukoll għandhom awtorità mogħtija lilhom minn Jehovah, u din il-​qawwa għandha tiġi wżata biex tgħin, tmantni, u tgħożż. (Efesin 5:​22, 28-​30; 6:4) L-​eżempju taʼ Ġesù juri li l-​awtorità tistaʼ tiġi eżerċitata b’mod effettiv u bl-​imħabba. Jekk id-​dixxiplina tkun bilanċjata u konsistenti, it-​tfal ma jaqtgħux qalbhom. (Kolossin 3:21) Iż-​żwiġijiet jissaħħu meta l-​irġiel Kristjani miżżewġin jeżerċitaw l-​istat tagħhom taʼ kap bl-​imħabba u n-​nisa jirrispettaw profondament lil żwieġhom bħala l-​kapijiet tagħhom, minflok ma jabbużaw mill-​abbiltà li tahom Alla li jinfluwenzaw lil żwieġhom billi jużawha biex jiddominaw jew jagħmlu taʼ rashom.—Efesin 5:​28, 33; 1 Pietru 3:7.

18. (a) Kif nistgħu nimitaw l-​eżempju taʼ Jehovah f’li nikkontrollaw ir-​rabja tagħna? (b) Dawk li għandhom awtorità x’għandhom jipprovaw inaqqxu fi qlub dawk li qegħdin taħt il-​ħarsien tagħhom?

¹⁸ Dawk li għandhom l-​awtorità fil-​familja u fil-​kongregazzjoni għandhom speċjalment ikunu attenti li jikkontrollaw ir-​rabja tagħhom, ladarba r-​rabja tqanqal il-​biżaʼ u mhux l-​imħabba. Il-​profeta Naħum qal: “Il-​Mulej tqil biex jagħdab, għalkemm kbir fil-​qawwa.” (Naħum 1:3; Kolossin 3:19) Jekk nikkontrollaw ir-​rabja, nuru kemm aħna b’saħħitna, filwaqt li jekk inħalluha tirbaħna, din tkun prova taʼ kemm aħna dgħajfin. (Proverbji 16:32) Kemm fil-​familja u kemm fil-​kongregazzjoni, il-​mira hi li nkebbsu l-​imħabba—l-​imħabba lejn Jehovah, l-​imħabba lejn xulxin, u l-​imħabba lejn il-​prinċipji tajbin. L-​imħabba hija l-​iktar rabta b’saħħitha li tgħaqqadna flimkien u l-​iktar forza b’saħħitha li tqanqalna nagħmlu dak li hu tajjeb.—1 Korintin 13:​8, 13; Kolossin 3:14.

19. Jehovah liema assiguranza li tfarraġna jagħtina, u kif nistgħu nwieġbu?

¹⁹ Li tkun taf lil Jehovah jfisser li tirrikonoxxi l-​qawwa tiegħu. Permezz taʼ Isaija, Jehovah qal: “Jaqaw ma tafx, lanqas ma smajt, ‘Il-​Mulej hu Alla taʼ dejjem, il-​ħallieq taʼ truf l-​art?’ Ma jegħja qatt, u ma jinkeddx.” (Isaija 40:28) Il-​qawwa taʼ Jehovah ma tispiċċa qatt. Jekk nistrieħu fuqu u mhux fuqna nfusna, hu mhux se jabbandunana. Hu jassigurana: “La tibżax, għax miegħek jien! La titħassibx, għax Alla tiegħek jien! Jiena . . . [“nsaħħek,” KŻ], jien ngħinek; nwieżnek bil-​leminija rebbieħa tiegħi!” (Isaija 41:10) Kif għandna nwieġbu għall-​attenzjoni kollha mħabba tiegħu? Bħal Ġesù, ejja dejjem nużaw kwalunkwe qawwa li Jehovah jagħtina biex ngħinu u nibnu lil oħrajn. Jalla nikkontrollaw ilsienna sabiex idewwi u mhux biex iweġġaʼ lil ħaddieħor. U jalla dejjem nibqgħu mqajmin spiritwalment, nibqgħu sodi fil-​fidi, u nissaħħu permezz tal-​qawwa tal-​Ħallieq Grandjuż tagħna, Alla Jehovah.—1 Korintin 16:13.

[Nota taʼ taħt]

Tistaʼ Tispjega?

• Jehovah kif jużaha l-​qawwa tiegħu?

• B’liema modi nistgħu aħna niksbu l-​qawwa taʼ Jehovah?

• Il-​qawwa taʼ l-​ilsien kif tistaʼ tiġi wżata?

• L-​awtorità mogħtija minn Alla kif tistaʼ tkun barka?

[Stampa f’paġna 15]

Ġesù uża s-​saħħa mingħand Jehovah biex jgħin lil oħrajn

[Stampi f’paġna 17]

Aħna jistaʼ jkollna l-​qawwa li nxandru l-​Kelma t’Alla jekk dan nagħmluh b’qalbna kollha