Jehovah Jagħti l-Qawwa lill-Għajjien
“[Jehovah] jagħti l-qawwa lill-għajjien, u jkattar il-qawwa lil min hu bla saħħa [jew, enerġija dinamika].”—ISAIJA 40:29.
1. Agħti eżempju tal-qawwa li hemm fl-affarijiet li ħalaq Alla.
JEHOVAH għandu qawwa bla limitu. U kemm enerġija dinamika nsibu fl-affarijiet li ħalaq! Id-daqsxejn taʼ atomu li minnu huma mibnijin l-affarijiet kollha, tant hu ċkejken, li qatra ilma waħda fiha mitt biljun atomu għal biljun darba.a Il-ħajja kollha fuq il-globu tagħna tiddependi mill-enerġija li tiġġenera permezz taʼ reazzjonijiet atomiċi fix-xemx. Imma kemm hemm bżonn taʼ enerġija mix-xemx biex issostni l-ħajja fuq l-art? Id-dinja tirċievi biss farka mill-enerġija kollha li tipproduċi x-xemx. Minkejja dan, din in-nitfa enerġija mix-xemx li taqaʼ fuq id-dinja hi bla qjies meta tqabbilha maʼ l-enerġija kollha li tintuża fl-industriji tad-dinja.
2. Isaija 40:26 x’qiegħed fil-fatt jgħid dwar il-qawwa taʼ Jehovah?
2 Sew jekk naħsbu dwar l-atomu u sew jekk nitfgħu l-attenzjoni tagħna fuq l-univers bla tarf, aħna nibqgħu impressjonati bil-qawwa taʼ l-għaġeb li għandu Jehovah. Mhux taʼ b’xejn li hu setaʼ jgħid: “Erfgħu għajnejkom ’il fuq u araw: min ħalaqhom dawn il-ħlejjaq kollha? Imexxi u jgħodd l-eżerċti tiegħu, u jsejjħilhom b’isimhom wieħed wieħed. Bis-saħħa taʼ qawwietu [jew, l-enerġija dinamika tiegħu], bil-qawwa taʼ setgħetu, ħadd minnhom ma jonqos”! (Isaija 40:26) Iva, Jehovah għandu saħħa bla tarf, u hu s-Sors taʼ l-enerġija dinamika li ntużat biex inħoloq l-univers.
Meħtieġa Iktar minn Qawwa Normali
3, 4. (a) X’inhuma xi fatturi li jistgħu jġagħluna nħossuna għajjenin? (b) Liema mistoqsija nagħmlu tajjeb li nikkunsidraw?
3 Għalkemm Alla għandu qawwa bla limitu, madankollu l-bnedmin malajr jgħejjew. Kulfejn tħares tistaʼ tara nies għajjenin. Iqumu għajjenin, imorru x-xogħol jew l-iskola għajjenin, jiġu lura d-dar għajjenin, u meta jidħlu fis-sodda mhux biss ikunu għajjenin imma eżawriti. Xi wħud jixtiequ jmorru xi mkien fejn ikunu jistgħu jieħdu dak il-ftit mistrieħ li tant ikollhom bżonn. Bħala qaddejja taʼ Jehovah aħna wkoll inkunu għajjenin għax biex ngħixu l-ħajja tagħna taʼ devozzjoni lejn Alla jeħtieġ li nitħabtu b’kemm għandna saħħa. (Mark 6:30, 31; Luqa 13:24; 1 Timotju 4:8) U hemm ħafna fatturi oħra li jiħdulna saħħitna.
4 Il-fatt li aħna Kristjani ma jfissirx li aħna meħlusin mill-problemi li jkollhom in-nies in ġenerali. (Ġob 14:1) Il-mard, il-problemi finanzjarji, jew xi diffikultajiet oħrajn li nġarrbu f’ħajjitna jistgħu jiskuraġġuna, u anki jdgħajfuna. Barra minn dawn l-isfidi hemm ukoll il-provi li jiffaċċjaw dawk li jiġu persegwitati minħabba s-sewwa. (2 Timotju 3:12; 1 Pietru 3:14) Minħabba l-pressjonijiet li jkollna kuljum mid-dinja u l-oppożizzjoni li nsibu meta nxandru l-aħbar tajba tas-Saltna, xi wħud minna tant inkunu għajjenin li nħossuna rridu nnaqqsu l-pass fis-servizz taʼ Jehovah. Barra minn hekk, Satana x-Xitan qed juża kull mezz għad-dispożizzjoni tiegħu biex iġagħalna niksru l-integrità tagħna lejn Alla. Allura, kif nistgħu niksbu s-saħħa spiritwali li għandna bżonn biex iżżommna milli ngħajjew u naqtgħu qalbna?
5. Għala għandna bżonn iktar minn saħħa umana biex inwettqu l-ministeru Kristjan?
5 Għas-saħħa spiritwali rridu nistrieħu fuq Jehovah, il-Ħallieq li jistaʼ kollox. L-appostlu Pawlu wera li l-ministeru Kristjan kien jirrikjedi iktar mill-qawwa normali li għandhom bnedmin imperfetti. Hu kiteb: “Dan it-teżor qiegħed għandna f’ġarar tal-fuħħar, ħalli b’hekk jidher sewwa li l-kobor taʼ din il-qawwa ġej minn Alla, u mhux minna.” (2 Korintin 4:7) Il-Kristjani midlukin qed iwettqu “l-ministeru taʼ din il-ħbiberija tal-bnedmin maʼ Alla” bl-appoġġ taʼ sħabhom li għandhom it-tama li jgħixu fuq l-art. (2 Korintin 5:18; Ġwann 10:16; Apokalissi 7:9) Ladarba aħna l-bnedmin imperfetti qed inwettqu x-xogħol t’Alla minkejja li niffaċċjaw il-persekuzzjoni, ma jistax ikun li qed nagħmlu dan sempliċement bis-saħħa tagħna stess. Jehovah qiegħed jgħinna permezz taʼ l-ispirtu qaddis tiegħu, u b’hekk minħabba d-dgħjufija tagħna jidher ċar kemm hi kbira l-qawwa tiegħu. Kemm tfarraġna l-assiguranza li ‘l-Mulej iwieżen lit-tajbin’!—Salm 37:17, Saydon.
‘Jehovah Hu l-Enerġija Vitali Tagħna’
6. L-Iskrittura kif tiżgurana li Jehovah hu s-Sors tal-qawwa tagħna?
6 Missierna tas-sema għandu saħħa bla tarf u jistaʼ faċilment jimliena bl-enerġija. Fil-fatt il-Bibbja tgħidilna: “[Jehovah] jagħti l-qawwa lill-għajjien, u jkattar il-qawwa lil min hu bla saħħa [jew, enerġija dinamika]. Jintelqu ż-żgħażagħ u jegħjew, fl-aħjar tagħhom jogħtru l-irġiel. Imma dawk li jittamaw fil-Mulej jieħdu saħħithom, itellgħu l-ġwienaħ bħall-ajkli, jiġru bla ma jegħjew, jimxu bla ma jintelqu.” (Isaija 40:29-31) Minħabba l-pressjonijiet li dejjem jiżdiedu, xi drabi forsi nħossuna bħal xi ġerrej eżawrit li ma jkunx jiflaħ joqgħod fuq riġlejh. Imma t-tmiem tat-tellieqa għall-ħajja jinsab preċiż quddiemna, u ma rridux inċedu. (2 Kronaki 29:11) L-Għadu tagħna, ix-Xitan, qiegħed jgħarrex “qisu ljun jgħajjat,” u jrid iwaqqafna. (1 Pietru 5:8) Ejja niftakru li ‘l-Mulej hu l-qawwa tagħna u t-tarka tagħna.’ Ma rridux ninsew ukoll li hu għamel ħafna provvedimenti biex ‘jagħti l-qawwa lill-wieħed għajjien.’—Salm 28:7.
7, 8. Liema provi hemm li Jehovah saħħaħ lil David, lil Ħabakkuk, u lil Pawlu?
7 Jehovah ta lil David il-qawwa li kellu bżonn biex ma jaqtax qalbu minkejja l-ostakli kbar li ħabbat wiċċu magħhom. B’fidi soda u fiduċja sħiħa, David kiteb: “B’Alla aħna nagħmlu l-ħila [jew, niksbu l-enerġija vitali], u Hu jrażżan l-għedewwa tagħna.” (Salm 60:14, Saydon [60:12, NW]) Jehovah ta wkoll l-enerġija lil Ħabakkuk sabiex ikun jistaʼ jtemm l-inkarigu tiegħu bħala profeta. Ħabakkuk 3:19 jgħid: “Il-Mulej Sidi huwa l-qawwa [jew, l-enerġija vitali] tiegħi; riġlejja jagħmilhomli bħal taċ-ċriev u fuq l-għoljiet jeħodni.” Taʼ min jinnota wkoll l-eżempju taʼ Pawlu li kiteb: “Għal kollox niflaħ bis-saħħa taʼ dak [Alla] li jqawwini.”—Filippin 4:13.
8 Bħal David, Ħabakkuk, u Pawlu aħna wkoll għandna nuru fidi fl-abbiltà li għandu Alla biex isaħħaħna u fil-qawwa tiegħu biex isalvana. Billi aħna konxji li l-Mulej Sovran Jehovah hu s-Sors tal-“qawwa” u l-enerġija vitali tagħna, ejja issa nikkunsidraw xi modi kif nistgħu niksbu s-saħħa spiritwali mill-provvedimenti li Alla tant jagħtina b’abbundanza.
Provvedimenti Spiritwali li Jimlewna bl-Enerġija
9. Il-pubblikazzjonijiet Kristjani kemm huma importanti biex isostnuna?
9 Jekk inħabirku biex nistudjaw l-Iskrittura bl-għajnuna taʼ pubblikazzjonijiet Kristjani, dan jistaʼ jimliena bl-enerġija u jsostnina. Is-salmista kanta: “Hieni l-bniedem li . . . fil-liġi tal-Mulej hi l-għaxqa tiegħu, lejl u nhar [jaqra u] jaħseb fil-liġi tiegħu. Hu bħal siġra mħawwla ħdejn nixxigħat taʼ l-ilma li tagħmel il-frott fi żmienha, u l-weraq tagħha ma jidbielx; hu jirnexxi f’kull ma jagħmel.” (Salm 1:1-3) Sewwa sew bħalma għandna bżonn nieklu biex nibqgħu f’saħħitna fiżikament, hekk ukoll għandna bżonn nieħdu l-ikel spiritwali, li Alla jipprovdilna permezz tal-Kelma tiegħu u taʼ pubblikazzjonijiet Kristjani, biex nibqgħu f’saħħitna spiritwalment. Għaldaqstant, huwa essenzjali li nistudjaw u nimmeditaw bis-serjetà kollha.
10. Meta nistgħu nsibuh il-ħin biex nistudjaw u nimmeditaw?
10 M’hemm ebda dubju li hu premjanti li nimmeditaw fuq l-affarijiet profondi t’Alla. (1 Korintin 2:10) Imma meta nistgħu nsibuh il-ħin biex nimmeditaw? Iżakk, bin Abraham, “ħareġ biex jimmedita fir-rabaʼ għal filgħaxija.” (Ġenesi 24:63-67, Karm Żammit) Is-salmista David immedita u ‘ħaseb fuq Alla fis-sahriet tal-lejl.’ (Salm 63:7 [63:6, NW]) Aħna nistgħu nistudjaw il-Kelma t’Alla u nimmeditaw fuqha fil-għodu, fil-għaxija, jew bil-lejl; kull x’ħin irridu. Jekk nistudjaw u nimmeditaw aħna se nkunu nistgħu ngawdu provvediment ieħor li jsaħħaħna mingħand Jehovah. Dan hu t-talb.
11. Għala għandna nqisu t-talb bħala xi ħaġa importanti ferm?
11 Talb regulari lil Alla jgħinna biex nimtlew bl-enerġija. Għalhekk jalla ‘nitolbu bla waqfien.’ (Rumani 12:12) Xi kultant, meta nkunu għaddejjin minn xi prova, jeħtieġ li nitolbu speċifikament għall-għerf u għas-saħħa li jkollna bżonn biex inkunu nistgħu nibqgħu sodi. (Ġakbu 1:5-8) Ejja wkoll infaħħru u nirringrazzjaw lil Alla meta naraw l-iskopijiet tiegħu jitwettqu, jew meta jsaħħaħna biex inkomplu bla ma naqtgħu qalbna fis-servizz tiegħu. (Filippin 4:6, 7) Jekk nibqgħu qrib taʼ Jehovah permezz tat-talb, hu qatt ma se jabbandunana. “Ara,” kanta David, “Alla l-għajnuna tiegħi.”—Salm 54:6 [54:4, NW].
12. Għala għandna nitolbu lil Alla biex jagħtina l-ispirtu qaddis tiegħu?
12 Missierna tas-sema jimliena bl-enerġija u jsaħħaħna permezz taʼ l-ispirtu qaddis, jew forza attiva, tiegħu. Pawlu kiteb: “Jiena ninżel għarkobbtejja quddiem il-Missier . . . biex skond l-għana tal-glorja tiegħu, jagħtikom li bil-qawwa tiegħu permezz taʼ l-Ispirtu tiegħu, tissaħħu fil-bniedem taʼ ġewwa.” (Efesin 3:14-16) Għandna nitolbu għall-ispirtu qaddis, u jkollna l-fiduċja li Jehovah se jberikna u jagħtihulna. Ġesù rraġuna hekk: Jekk tfajjel ċkejken jitlob ħuta lil missieru li tant iħobbu, dan se jagħtih serp? Ibqaʼ ċert li le! Għaldaqstant, hu kkonkluda: “Mela jekk intom, nies [midinbin u għalhekk ftit jew wisq] ħżiena . . . tafu tagħtu lil uliedkom ħwejjeġ tajba, kemm aktar il-Missier mis-smewwiet jagħti spirtu qaddis lil dawk li jitolbuhulu!” (Luqa 11:11-13) Ejja nitolbu b’fiduċja sħiħa u niftakru dejjem li l-qaddejja leali t’Alla jistgħu ‘jissaħħu’ bil-qawwa permezz taʼ l-ispirtu tiegħu.
Il-Kongregazzjoni Għajnuna li Ssaħħaħna
13. Kif għandna nqisuhom il-laqgħat Kristjani?
13 Jehovah jimliena bl-enerġija permezz tal-laqgħat tal-kongregazzjoni Kristjana. Ġesù qal: “Għax fejn tnejn jew tlieta jkunu miġbura f’ismi hemm inkun jien f’nofshom.” (Mattew 18:20) Meta Ġesù għamel din il-wegħda, hu kien qiegħed jiddiskuti affarijiet li kienu jeħtieġu l-attenzjoni taʼ dawk li kellhom it-tmexxija fil-kongregazzjoni. (Mattew 18:15-19) Madankollu, il-prinċipju taʼ dan il-kliem japplika għal-laqgħat, l-assembleat, u l-konvenzjonijiet tagħna, li kollha kemm huma jibdew u jispiċċaw b’talba f’ismu. (Ġwann 14:14) Għalhekk huwa privileġġ li nattendu għal dawn il-laqgħat Kristjani, kemm jekk ikun hemm ftit u kemm jekk ikun hemm ħafna preżenti. Mela ejja nuru li aħna grati għal dawn l-okkażjonijiet li huma mfasslin biex isaħħuna spiritwalment u jħajruna biex inħobbu u nagħmlu affarijiet tajbin.—Lhud 10:24, 25.
14. Liema benefiċċju niksbu mill-isforzi li jagħmlu l-anzjani Kristjani?
14 L-anzjani Kristjani jipprovdu għajnuna spiritwali u inkuraġġiment. (1 Pietru 5:2, 3) Pawlu kien jgħin u jinkuraġġixxi lill-kongregazzjonijiet, bħalma jagħmlu l-indokraturi li jivvjaġġaw illum. Fil-fatt, hu kien ikollu sebaʼ mitt sena sakemm jiltaqaʼ maʼ ħutu spiritwali sabiex ikunu jistgħu jinkuraġġixxu lil xulxin. (Atti 14:19-22; Rumani 1:11, 12) Jalla dejjem nuru apprezzament lejn l-anzjani tal-kongregazzjoni tagħna u l-indokraturi Kristjani l-oħra, li għandhom sehem kbir f’li jsaħħuna spiritwalment.
15. Sħabna fil-kongregazzjoni kif juru li huma taʼ “faraġ kbir” għalina?
15 Sħabna Kristjani fil-kongregazzjoni tagħna jistgħu jkunu taʼ “faraġ kbir” għalina. (Kolossin 4:10, 11) Bħala ‘ħbieb veri’ jistgħu jgħinuna fi żmien taʼ niket. (Proverbji 17:17) Per eżempju, fl-1945, 220 qaddej t’Alla ġew maħruġin mill-kamp tal-konċentrament taʼ Sachsenhausen u kellhom jivvjaġġaw 200 kilometru taħt għassa stretta minn Nazi. Huma vvjaġġaw fi grupp, u dawk li kienu l-iktar b’saħħithom rikkbu lil dawk dgħajfin fuq karrettuni żgħar u ġibduhom. X’kien ir-riżultat? Din il-mixja lejn il-mewt swiet il-ħajjiet taʼ iktar minn 10,000 ruħ li kienu fl-istess kamp tal-konċentrament maʼ dawn ix-Xhieda, imma ħadd mix-Xhieda taʼ Jehovah ma miet! Rakkonti bħal dawn, li jidhru fil-pubblikazzjonijiet tal-Watch Tower, inkluż il-Yearbook of Jehovah’s Witnesses u Jehovah’s Witnesses—Proclaimers of God’s Kingdom, huma prova taʼ kemm Alla jagħti l-qawwa lin-nies tiegħu sabiex ma jaqtgħux qalbhom.—Galatin 6:9.b
Imsaħħin mill-Ministeru taʼ l-Għalqa
16. Is-sehem regulari tagħna fil-ministeru kif isaħħaħna spiritwalment?
16 Is-sehem regulari tagħna fix-xogħol taʼ l-ippridkar tas-Saltna jsaħħaħna spiritwalment. Din l-attività tgħinna niffokaw fuq is-Saltna t’Alla u nżommu quddiem għajnejna l-eternità u l-prospetti mberkin li din se ġġib magħha. (Ġuda 20, 21) Il-wegħdi tal-Bibbja li nitkellmu dwarhom fil-ministeru tagħna jagħtuna tama u jistgħu jgħinuna biex inkunu determinati bħalma kien il-profeta Mikea, li qal: “Aħna nimxu f’isem il-Mulej, Alla tagħna, għal dejjem taʼ dejjem.”—Mikea 4:5.
17. Liema suġġerimenti ningħataw rigward l-istudji tal-Bibbja?
17 Iktar ma nużaw l-Iskrittura biex ngħallmu lil oħrajn iktar se tissaħħaħ ir-relazzjoni tagħna maʼ Jehovah. Per eżempju, meta nkunu qed nistudjaw il-Bibbja maʼ xi ħadd permezz tal-ktieb Għarfien Li Jwassal Għall-Ħajja Taʼ Dejjem, ikun għaqli li naqraw u niddiskutu xi ftit skritturi li jkunu ċitati. Dan jgħin lil dak li jkun qed jistudja u se jgħin lilna stess intejbu l-fehma spiritwali tagħna. Jekk dak li jkun qed jistudja jsibha diffiċli biex jifhem xi ħaġa mill-Bibbja, jew xi tixbieha, ikun hemm bżonn li l-kapitlu li jkun qed jiġi studjat mill-ktieb Għarfien jinqasam f’iktar minn sessjoni waħda. Kemm nieħdu gost meta nippreparaw tajjeb u nagħmlu iktar sforz biex ngħinu lil oħrajn jersqu qrib lejn Alla!
18. Uri kif il-ktieb Għarfien qed jintuża b’mod effettiv.
18 Kull sena, il-ktieb Għarfien qed jiġi wżat b’mod effettiv biex jgħin lil eluf taʼ nies isiru qaddejja dedikati taʼ Jehovah, u dan jinkludi ħafna li lanqas biss kienu jafu x’inhi Bibbja. Per eżempju, meta raġel Ħindu mis-Sri Lanka kien għadu żgħir samaʼ Xhud taʼ Jehovah titkellem dwar il-Ġenna taʼ l-art. Xi ftit tas-snin wara hu mar ikellimha u r-raġel tagħha ma damx ma beda jagħmillu studju tal-Bibbja. Fil-fatt dan iż-żagħżugħ kien imur kuljum biex jagħmel l-istudju, u f’qasir żmien lesta l-ktieb Għarfien. Beda jattendi l-laqgħat kollha, inqataʼ mir-reliġjon li kien jipprattika qabel, u sar pubblikatur tas-Saltna. Meta tgħammed kien diġà qed jistudja l-Bibbja maʼ xi ħadd li kien jafu qabel.
19. Dwar liema ħaġa nistgħu nkunu ċerti hekk kif infittxu s-Saltna l-ewwel?
19 Meta nfittxu s-Saltna l-ewwel, dan iġibilna ferħ li jsaħħaħna. (Mattew 6:33) Għalkemm ngħaddu minn ħafna provi, xorta nkomplu nxandru l-aħbar tajba b’ferħ u b’żelu kbir. (Titu 2:14) Ħafna minna qed nikkwalifikaw bħala pijunieri full-time, u xi wħud qed jaqdu fejn hemm iktar bżonn għall-evanġelizzaturi. Jekk bil-ferħ qed nistinkaw biex inpoġġu l-interessi tas-Saltna l-ewwel f’ħajjitna permezz taʼ servizz bħal dan jew b’xi modi oħra, aħna fiduċjużi li Jehovah m’huwiex se jinsa x-xogħol tagħna u l-imħabba li nuru għal ismu.—Lhud 6:10-12.
Inkomplu bis-Saħħa li Jagħtina Jehovah
20. Kif nistgħu nuru li qed nistrieħu fuq Jehovah biex jagħtina s-saħħa?
20 Mela ejja b’qalbna kollha nuru li t-tama tagħna qegħda f’Jehovah u li qed nistrieħu fuqu biex jagħtina s-saħħa. Dan nistgħu nagħmluh billi nieħdu vantaġġ sħiħ mill-provvedimenti spiritwali li jagħtina permezz taʼ “l-ilsir leali.” (Mattew 24:45, NW) Hemm ħafna provvedimenti li jsaħħulna r-relazzjoni tagħna maʼ Jehovah u jagħtuna l-qawwa biex ma naqtgħux qalbna fis-servizz sagru tiegħu. Dawn jinkludu l-istudju tal-Kelma t’Alla li nagħmlu waħedna jew mal-kongregazzjoni bl-għajnuna taʼ pubblikazzjonijiet Kristjani, it-talb mill-qalb, l-għajnuna spiritwali li jagħtuna l-anzjani, l-eżempji mill-aħjar taʼ sħabna Kristjani, u s-sehem regulari tagħna fil-ministeru.
21. L-appostli Pietru u Pawlu kif urew li kellhom bżonn is-saħħa li Alla biss setaʼ jagħtihom?
21 Minkejja li aħna bnedmin debboli, Jehovah xorta jsaħħaħna biex nagħmlu r-rieda tiegħu jekk nistrieħu fuqu għall-għajnuna. L-appostlu Pietru, li kien konxju li kellu bżonn din l-għajnuna, kiteb: “Jekk xi ħadd għandu d-don tal-ministeru, [ħa] jħaddmu bis-setgħa li Alla tah.” (1 Pietru 4:11) U Pawlu wera kemm kien jistrieħ fuq is-saħħa li Alla biss setaʼ jagħtih meta qal: “Nitgħaxxaq bid-debbulizzi tiegħi, bit-tagħjir, bl-għaks, bil-persekuzzjonijiet, bid-dwejjaq minħabba Kristu: għax meta nkun dgħajjef, nkun qawwi.” (2 Korintin 12:10) Jalla aħna wkoll nuru li konvinti dwar dan u nġibu glorja lill-Mulej Sovran Jehovah, li jagħti l-qawwa lill-għajjien.—Isaija 12:2.
[Noti taʼ taħt]
a Dan in-numru, skond is-sistema Amerikana taʼ l-għadd, huwa n-numru 1 segwit minn 20 żero.
b Pubblikat mill-Watchtower Bible and Tract Society of New York, Inc.
Int Kif Twieġeb?
• In-nies taʼ Jehovah għala għandhom bżonn qawwa iktar min-normal?
• Xi provi hemm fl-Iskrittura li Alla jagħti l-qawwa lill-qaddejja tiegħu?
• Liema huma xi ftit mill-provvedimenti spiritwali li Jehovah għamel sabiex isaħħaħna?
• Kif nistgħu nuru li qed nistrieħu fuq Alla biex jagħtina s-saħħa?
[Stampa f’paġna 12]
Ir-relazzjoni tagħna maʼ Jehovah tkompli tissaħħaħ hekk kif nużaw il-Bibbja biex ngħallmu lil oħrajn