‘Salva Lilek Innifsek u lil Dawk li Jisimgħuk’

“Għasses fuqek innifsek u fuq it-​tagħlim tiegħek; . . . jekk tagħmel hekk, issalva lilek innifsek u lil dawk li jisimgħuk.”—1 TIMOTJU 4:​16.

1, 2. X’inhu li jqanqal lill-​Kristjani veri biex jissoktaw fix-​xogħol tagħhom li jsalva l-​ħajjiet tan-​nies?

ĠEWWA raħal ċkejken fit-​tramuntana tat-​Tajlandja, koppja miżżewġa li huma Xhieda taʼ Jehovah jipprovaw jitkellmu bil-​lingwa li għadhom kif tgħallmu maʼ membri taʼ tribù li joqogħdu fl-​għoljiet. Dan l-​aħħar, dawn it-​tnejn bdew jistudjaw il-​lingwa Laħu sabiex ikunu jistgħu jitkellmu man-​nies tar-​raħal dwar l-​aħbar tajba tas-​Saltna t’Alla.

² “Ma nistgħux niddeskrivu l-​ferħ u s-​sodisfazzjon li nħossu meta naħdmu fost dawn in-​nies hekk interessanti,” jispjega r-​raġel. “Verament inħossuna involuti fit-​twettiq t’Apokalissi 14:​6, 7, billi nħabbru bxajjar tajba ‘lil kull ġens, tribù, u lsien.’ Ma tantx baqaʼ postijiet fejn l-​aħbar tajba għadha ma waslitx, u dan żgur li hu wieħed minnhom. L-​istudji tal-​Bibbja li għandna lanqas kważi nistgħu nlaħħqu magħhom.” Jidher ċar li dawn it-​tnejn qed jittamaw li jsalvaw mhux biss lilhom infushom, imma wkoll lil dawk kollha li jisimgħuhom. Bħala Kristjani, mhux ilkoll kemm aħna nittamaw li nagħmlu bħalhom?

“Għasses Fuqek Innifsek”

3. L-​ewwel x’għandna nagħmlu aħna nfusna sabiex inkunu nistgħu nsalvaw lil oħrajn?

³ “Għasses fuqek innifsek u fuq it-​tagħlim tiegħek,” kien il-​parir li l-​appostlu Pawlu ta lil Timotju, u dan japplika għall-​Kristjani kollha. (1 Timotju 4:​16) Huwa fatt li biex ngħinu lil ħaddieħor jikseb is-​salvazzjoni rridu l-​ewwel ngħassu fuqna nfusna. Dan kif nistgħu nagħmluh? L-​ewwelnett, irridu noqogħdu b’sebaʼ għajnejn għaż-​żminijiet li qed ngħixu fihom. Ġesù ta sinjal magħmul minn ħafna affarijiet sabiex is-​segwaċi tiegħu jindunaw meta jkun wasal “tmiem id-​dinja.” Però, Ġesù qal ukoll li m’aħniex se nkunu nafu eżattament meta se jiġi t-​tmiem. (Mattew 24:​3, 36) Kif għandna naġixxu għal dan il-​fatt?

4. (a) Liema attitudni għandu jkollna lejn iż-​żmien li għad baqaʼ minn din is-​sistema? (b) Liema attitudni għandna nevitaw?

⁴ Kull wieħed minna jagħmel tajjeb li jistaqsi, ‘Qiegħed jien nuża l-​ħin li baqaʼ minn din is-​sistema biex insalva lili nnifsi u lil dawk li jisimgħuni? Jew qed naħseb, “La ma nafx eżatt meta ġej it-​tmiem, m’għandix għalfejn inħabbel rasi dwaru”?’ Jekk l-​attitudni tagħna hija bħal din taʼ l-​aħħar, ninsabu fil-​periklu. Inkunu qed niħduha direttament kontra t-​twissija taʼ Ġesù: “Kunu lesti intom ukoll, għax qatt ma tistgħu tobsru s-​siegħa li fiha jiġi Bin il-​bniedem.” (Mattew 24:44) Dan żgur li m’huwiex iż-​żmien li nitilfu l-​ħeġġa tagħna għas-​servizz taʼ Jehovah jew li nittamaw li d-​dinja tipprovdilna s-​sigurtà jew is-​sodisfazzjon.—Luqa 21:​34-36.

5. Liema eżempji tawna xi xhieda taʼ Jehovah li għexu qabel Kristu?

⁵ Mod ieħor kif nistgħu nuru li qegħdin ngħassu fuqna nfusna hu billi nissaportu fedelment bħala Kristjani. Fl-​imgħoddi, il-​qaddejja t’Alla baqgħu jissaportu, sew jekk kienu jistennew li jinħelsu fil-​pront, u sew jekk le. Wara li semma l-​eżempju taʼ xi xhieda li għexu qabel Kristu, bħal Abel, Ħenok, Noè, Abraham, u Sara, Pawlu nnota dan: “Kienu għadhom ma ħadux dak li kien imwiegħed, iżda huma rawh mill-​bogħod u sellmulu, waqt li għarfu [“u ddikjaraw pubblikament,” NW] li huma kienu barranin u għorba fuq l-​art.” Huma ma ċedewx għal xi xewqa biex ikollhom ħajja komda, lanqas ma ċedew għall-​pressjonijiet immorali li kien hemm madwarhom, imma ħarsu ’l quddiem bil-​ħeġġa lejn ‘li jieħdu dak li kien imwiegħed.’​—Lhud 11:13; 12:1.

6. Il-​mod kif il-​Kristjani taʼ l-​ewwel seklu kienu jqisu s-​salvazzjoni kif effettwalhom ħajjithom?

⁶ Il-Kristjani taʼ l-​ewwel seklu qiesu lilhom infushom bħala “barranin” f’din id-​dinja. (1 Pietru 2:​11) Anki wara li l-​Kristjani veri ġew salvati mill-​qerda taʼ Ġerusalemm fis-​sena 70 E.K., huma ma waqfux jippridkaw jew reġgħu lura għall-​ħajja taʼ qabel ma saru Kristjani. Kienu jafu li kien hemm salvazzjoni grandjuża tistenna lil dawk li jibqgħu leali. Fil-​fatt, fis-​sena 98 E.K., l-​appostlu Ġwanni kiteb: “[I]d-dinja bil-​ġibdiet tagħha tgħaddi, iżda min jagħmel ir-​rieda taʼ Alla jibqaʼ għal dejjem.”—1 Ġwann 2:​17, 28.

7. Ix-​Xhieda taʼ Jehovah fi żmienna kif urew li żammew sħiħ?

⁷ Fi żmienna x-​Xhieda taʼ Jehovah wkoll ipperseveraw fix-​xogħol Kristjan, avolja ġarrbu persekuzzjoni ħarxa. Kien is-​sabar tagħhom għalxejn? Dażgur li le, għax Ġesù assigurana: “Min jibqaʼ jżomm sħiħ sa l-​aħħar, dan isalva,” kemm jekk dan ikun l-​aħħar taʼ din is-​sistema qadima u kemm jekk ikun l-​aħħar taʼ ħajjitna. Fl-​irxoxt, Jehovah se jiftakar fil-​qaddejja leali tiegħu li jkunu mietu u se jippremjahom.—Mattew 24:13; Lhud 6:10.

8. Kif nistgħu nuru li aħna napprezzaw is-​sabar li wrew il-​Kristjani taʼ qabilna?

⁸ Iktar minn hekk, aħna grati li dawk il-​Kristjani leali tal-​passat ma ħasbux biss fis-​salvazzjoni tagħhom stess. Żgur li aħna, li tgħallimna dwar is-​Saltna t’Alla grazzi għall-​isforzi li għamlu huma, ninsabu grati li ssaportew f’li jwettqu l-​inkarigu li tahom Ġesù: “Morru, mela, agħmlu dixxipli mill-​ġnus kollha, . . . u għallmuhom iħarsu dak kollu li ordnajtilkom jien.” (Mattew 28:​19, 20) Sakemm għad għandna l-​opportunità, aħna nistgħu nuru l-​gratitudni tagħna billi nxandru lil dawk li għadhom lanqas biss semgħu bl-​aħbar tajba. Madankollu, ix-​xandir huwa biss l-​ewwel pass f’li nagħmlu dixxipli.

‘Għasses fuq it-​Tagħlim Tiegħek’

9. Attitudni pożittiva kif tistaʼ tgħinna nibdew studji tal-​Bibbja?

⁹ L-inkarigu tagħna ma jinkludix biss li nippridkaw imma wkoll li ngħallmu. Ġesù inkarigana biex ngħallmu lin-​nies ħalli huma jħarsu l-​affarijiet kollha li ordnalna hu. Veru li f’xi territorji ma tantx insibu nies li jridu jsiru jafu dwar Jehovah. Imma jekk inkunu negattivi dwar it-​territorju tagħna, dan jistaʼ jfixkilna milli nibdew studji tal-​Bibbja. Yvette, pijuniera li ħadmet f’territorju fejn xi wħud kienu jħossu li m’hemmx interess, innotat li meta jiġu xi viżitaturi li jkollhom ħarsa pożittiva u jaħdmu dan it-​territorju, dawn kienu jibdew studji tal-​Bibbja. Wara dan, Yvette bdiet tkun iktar pożittiva, u b’hekk hi wkoll sabet nies li riedu jistudjaw il-​Bibbja.

10. Bażikament x’inhu mistenni minna bħala għalliema tal-​Bibbja?

¹⁰ Xi Kristjani jħossuhom ibsin li joffru studju tal-​Bibbja lil dawk li juru interess għax jaħsbu li m’humiex kapaċi jmexxu studju tal-​Bibbja. Veru, kulħadd għandu abbiltajiet differenti. Madankollu m’hemmx għalfejn inkunu xi għalliema professjonali biex jirnexxilna ngħallmu l-​Kelma t’Alla. Il-​messaġġ pur tal-​Bibbja huwa mimli qawwa, u Ġesù qal li dawk bħal nagħaġ se jagħrfu leħen ir-​Ragħaj malli jisimgħuh. Mela, xogħolna hu sempliċement li nagħtu l-​messaġġ tar-​Ragħaj mill-​Aħjar, Ġesù, ċar kemm jistaʼ jkun.​—Ġwann 10:​4, 14.

11. Kif tistaʼ tkun iktar effettiv meta tkun qed tgħin lil dak li tistudja l-​Bibbja miegħu?

¹¹ Kif tistaʼ twassal il-​messaġġ taʼ Ġesù b’mod iktar effettiv? L-​ewwel ħaġa, trid tkun familjari maʼ dak li l-​Bibbja tgħid dwar is-​suġġett li tkun qed tiddiskuti. Suġġett trid tifhmu inti stess qabel ma tistaʼ tfehmu lil ħaddieħor. Barra minn hekk, ipprova li waqt l-​istudju jkun hemm atmosfera xierqa però fl-​istess ħin rilassata. L-​istudenti, inkluż iż-​żgħar, se jitgħallmu iktar meta jkunu rilassati u meta min ikun qed jagħmel l-​istudju jittrattahom bir-​rispett u jkun qalbu tajba magħhom.​—Proverbji 16:21.

12. Kif tistaʼ tkun ċert li l-​istudent li qed tistudja miegħu jkun qed jifhem dak li tkun qed tgħallmu?

¹² Bħala għalliem ma tridx li sempliċement tippreżenta l-​fatti lill-​istudent u dan jirrepeti warajk bħall-​pappagall. Għinu jifhem x’qed jitgħallem. L-​abbiltà taʼ student biex jifhem dak li tgħidlu hija effettwata mill-​edukazzjoni li jkollu, l-​esperjenza tiegħu fil-​ħajja, u kemm ikun familjari mal-​Bibbja. Għalhekk għandek mnejn tistaqsi lilek innifsek, ‘Jifhem x’ifissru l-​iskritturi li jkun hemm kwotati fil-​materjal li nkunu qed nistudjaw?’ Tistaʼ tara x’fehem billi tistaqsih xi mistoqsijiet li ma jistax iweġibhom sempliċement b’iva jew le, imma li jkollu bilfors jagħti xi spjegazzjoni għalihom. (Luqa 9:​18-​20) Mill-​banda l-​oħra, xi studenti jiddejqu jistaqsu mistoqsijiet lil min ikun qed jgħallimhom. Għalhekk, huma forsi jibqgħu ma jifhmux eżatt dak li jkunu qed jitgħallmu. Inkuraġġixxi lill-​istudent biex jistaqsi mistoqsijiet u jgħidlek meta ma jkunx qed jifhem xi punt.​—Mark 4:​10; 9:​32, 33.

13. Kif tistaʼ tgħin lill-​istudent isir għalliem?

¹³ Hemm skop importanti għala aħna nagħmlu studju tal-​Bibbja maʼ xi ħadd, u dan hu biex dak l-​istudent isir għalliem. (Galatin 6:​6, NW) Għal dan l-​għan, fl-​aħħar taʼ l-​istudju tistaʼ tgħidlu biex jispjegalek xi punt fi kliemu stess bħallikieku kien qed jispjegah lil xi ħadd li samaʼ bih għall-​ewwel darba. Iktar ’il quddiem, meta jikkwalifika biex jieħu sehem fil-​ministeru, tistaʼ tistiednu biex jaħdem miegħek fuq il-​bibien. Hu x’aktarx li se jħossu komdu jaħdem miegħek, u l-​esperjenza se tgħinu jsir iktar kunfidenti tant li b’hekk hu stess jibda jitkellem fuq il-​bibien bla biżaʼ.

Għin lill-​Istudent Isir il-​Ħabib taʼ Jehovah

14. X’inhu l-​għan ewlieni tiegħek bħala għalliem, u dan kif jistaʼ jinkiseb b’suċċess?

¹⁴ L-għan ewlieni taʼ kull għalliem Kristjan hu li jgħin lill-​istudent isir ħabib taʼ Jehovah. Dan tistaʼ twettqu mhux biss bil-​kliem imma wkoll bl-​eżempju tiegħek. Meta tgħallem bl-​eżempju, dan se jkollu effett qawwi fuq il-​qalb taʼ dawk li tistudja magħhom. L-​eżempju jkaxkar, speċjalment biex tnaqqax kwalitajiet morali u biex tqanqal iż-​żelu fl-​istudent. Jekk bi kliemek u bl-​azzjonijiet tiegħek hu jara kemm għandek relazzjoni tajba maʼ Jehovah, x’aktarx li hu stess ikun jixtieq li jkollu relazzjoni bħal din.

15. (a) Għala huwa importanti li l-​istudent jiżviluppa l-​motiv xieraq f’li jaqdi lil Jehovah? (b) Kif tistaʼ tgħin lill-​istudent ikompli jagħmel progress spiritwali?

¹⁵ Int tixtieq li dak li tistudja miegħu jaqdi lil Jehovah għax iħobbu, mhux sempliċement għax ma jridx jinqered f’Armageddon. Meta tgħinu jiżviluppa dan il-​motiv pur, int tkun qed tibni b’materjal li jirreżisti n-​nar, b’materjal li se jibqaʼ sħiħ meta jiġu provi fuq il-​fidi tiegħu. (1 Korintin 3:​10-​15) Motiv ħażin, bħal ngħidu aħna xewqa esaġerata biex isir bħalek jew bħal xi bniedem ieħor hu min hu, la se jagħtih il-​qawwa biex jirreżisti influwenzi ħżiena u lanqas il-​kuraġġ biex jagħmel dak li hu tajjeb. Ftakar li int m’intix se tibqaʼ tgħallmu għal dejjem. Waqt li għandek l-​opportunità, tistaʼ tinkuraġġih biex jersaq dejjem iktar qrib lejn Jehovah billi jaqra l-​Kelma t’Alla kuljum u jimmedita fuqha. B’hekk hu se jkompli jkun medhi fuq “l-​eżempju tat-​tagħlim sħiħ” mimli saħħa mill-​Bibbja u minn letteratura bbażata fuq il-​Bibbja wara li tkun ilek li waqaft tistudja miegħu.​—2 Timotju 1:​13.

16. Kif tistaʼ tgħallem lill-​istudent jitlob bil-​qalb?

¹⁶ Tista tgħin lill-​istudent iħossu iktar qrib taʼ Jehovah billi tgħallmu kif jitlob bil-​qalb. Dan kif tistaʼ tagħmlu? Forsi għandek mnejn tiddiskuti t-​talba tal-​Missierna miegħu, kif ukoll xi talb ieħor mill-​qalb li nsibu fil-​Bibbja, bħalma hemm fis-​salmi. (Salmi 17, 86, 143; Mattew 6:​9, 10) Barra minn hekk, meta l-​istudent jisimgħek titlob qabel u wara l-​istudju, hu se jinduna kif tħossok int dwar Jehovah. B’hekk, it-​talb tiegħek għandu dejjem isir bis-​sinċerità kollha u mill-​qalb, kif ukoll juri kemm int bniedem bilanċjat, kemm spiritwalment kif ukoll emozzjonalment.

Aħdem biex Issalva lil Uliedek

17. Il-​ġenituri kif jistgħu jgħinu lil uliedhom jibqgħu fit-​triq tas-​salvazzjoni?

¹⁷ Naturalment, fost dawk li aħna nixtiequ nsalvaw hemm il-​membri tal-​familja tagħna. Il-​maġġuranza tat-​tfal li għandhom ġenituri Kristjani huma sinċieri u “sħaħ fil-​fidi.” Iżda, oħrajn forsi ma ħallewx il-​verità trabbi għeruq fil-​fond ġewwa qalbhom. (1 Pietru 5:9; Efesin 3:​17; Kolossin 2:7) Ħafna minn dawn iż-​żgħażagħ ma jibqgħux fil-​verità meta jkunu waslu biex jagħlqu t-​tmintax, jew wara. Jekk int għandek it-​tfal, x’tistaʼ tagħmel biex tevita kemm jistaʼ jkun li jkollok riżultat bħal dan? L-​ewwel, tistaʼ tagħmel ħiltek biex toħloq ambjent bnin fil-​familja tiegħek. Familja magħquda sservi bħala pedament biex l-​ulied ikollhom ħarsa xierqa lejn l-​awtorità, apprezzament lejn il-​valuri xierqa, u relazzjonijiet ferriħin m’oħrajn. (Lhud 12:9) Għalhekk, dik ir-​rabta speċjali ġewwa l-​familja tistaʼ tkun sors t’għajnuna biex il-​ħbiberija maʼ Jehovah tibqaʼ dejjem tikber. (Salm 22:10) Familji b’saħħithom iħobbu jagħmlu kollox bħala familja—anki jekk dan ikun ifisser li l-​ġenituri jissagrifikaw ħin li forsi setgħu jużawh biex jiggwadanjaw personalment. B’dan il-​mod tkun tistaʼ bl-​eżempju tgħallem lil uliedek jieħdu deċiżjonijiet tajbin f’ħajjithom. Ġenituri, l-​iktar li għandhom bżonn uliedkom m’humiex l-​affarijiet materjali, imma lilkom—il-​ħin, l-​enerġija, u l-​imħabba tagħkom. Qegħdin intom tagħtu lil uliedkom dawn l-​affarijiet?

18. Il-​ġenituri liema xorta taʼ mistoqsijiet iridu jgħinu lil uliedhom isibu t-​tweġibiet għalihom?

¹⁸ Ġenituri Kristjani qatt m’għandhom jagħmluha fatta li wliedhom se jsiru awtomatikament Kristjani wkoll. Daniel, missier taʼ ħamest itfal li jaqdi bħala anzjan fil-​kongregazzjoni jgħid: “Il-​ġenituri jridu jsibu l-​ħin biex jiċċaraw xi dubji li wliedhom ikunu semgħu l-​iskola jew xi mkien ieħor. Huma bil-​paċenzja jridu jgħinu lil uliedhom isibu t-​tweġibiet għall-​mistoqsijiet bħal: ‘Veru qed ngħixu fi żmien it-​tmiem? Veru li reliġjon tajba waħda biss hemm? Xi ħabib fl-​iskola li jidher tant mill-​aħjar għala m’huwiex sħubija tajba? Huwa dejjem ħażin li tagħmel is-​sess qabel iż-​żwieġ?’” Ġenituri, tistgħu tibqgħu ċerti li Jehovah se jbierek l-​isforzi tagħkom, għax hu wkoll jinteressa ruħu fil-​ġid taʼ wliedkom.

19. Għala jkun aħjar jekk il-​ġenituri nfushom jistudjaw maʼ wliedhom?

¹⁹ Xi ġenituri jistgħu jħossu li m’humiex kapaċi jagħmlu studju maʼ wliedhom stess. Madankollu, m’għandkomx għalfejn tħossukom hekk, għax ħadd m’hu kapaċi jgħallem lil uliedkom iktar minnkom. (Efesin 6:4) Meta tistudjaw maʼ wliedkom, se jkollkom iċ-​ċans li ssiru tafu direttament kif jaħsbuha u x’għandhom f’qalbhom. Jesprimu ruħhom mill-​qalb jew bla ħeġġa taʼ xejn? Veru jemmnu dak li qed jitgħallmu? Hu Jehovah reali għalihom? It-​tweġibiet għal dawn il-​mistoqsijiet u għal mistoqsijiet vitali oħra tistaʼ ssibhom biss jekk tistudja int personalment maʼ wliedek.—2 Timotju 1:5.

20. Il-​ġenituri kif jistgħu jagħmlu l-​istudju tal-​familja pjaċevoli u jaraw li kulħadd jibbenefika minnu?

²⁰ Kif tistaʼ żżommu għaddej il-​programm taʼ l-​istudju tal-​familja wara li tkun bdejtu? Joseph, anzjan fil-​kongregazzjoni, missier taʼ tifel u tifla, jgħid: “Bħal kull studju tal-​Bibbja ieħor, l-​istudju tal-​familja jrid ikun pjaċevoli, xi ħaġa li kulħadd ikun qed jistenna bil-​ħerqa. Biex jirnexxilna niksbu dan fil-​familja tagħna, ma rridux inkunu ffissati fuq kemm ħin nagħmlu. L-​istudju tagħna għandu mnejn idum siegħa, imma anki jekk ikollna biss għaxar minuti ċans, xorta nagħmluh. It-​tfal ikollhom sebaʼ mitt sena sakemm jasal dak il-​jum taʼ l-​istudju għax tgħidx kemm jieħdu gost meta nirreċtaw xeni mill-​Ktieb Tiegħi taʼ Stejjer mill-​Bibbja.a Ir-​riżultat—kemm effettwana u kemm fhimna sew il-​materjal—hu l-​iktar ħaġa importanti, u mhux kemm paragrafi għaddejna.”

21. Il-​ġenituri meta jistgħu jgħallmuhom lil uliedhom?

²¹ M’għandniex xi ngħidu, it-​tfal ma ngħallmuhomx biss matul il-​ħin li nkunu ppjanajna għall-​istudju. (Dewteronomju 6:​5-7) Dak ix-​Xhud fit-​Tajlandja li semmejna fil-​bidu jgħid: “Niftakar qisu l-​bieraħ meta missieri kien jiħodni miegħu fix-​xogħol tax-​xandir, bir-​rota, fl-​iktar postijiet imbegħdin tat-​territorju tal-​kongregazzjoni tagħna. Bla ebda dubju, kien l-​eżempju mill-​aħjar tal-​ġenituri tagħna u tal-​mod kif kienu jgħallmuna fi kwalunkwe ċirkustanza, li għenuna niddeċiedu biex nibdew naqdu fil-​ministeru full-time. U veru dak li tgħallimt żammejtu f’moħħi għax għadni naħdem fl-​iktar postijiet imbegħdin tat-​territorju tagħna!”

22. X’se jkun ir-​riżultat jekk ‘ngħassu fuqna nfusna u fuq it-​tagħlim tagħna’?

²² F’qasir żmien, preċiż f’waqtu, Ġesù se jiġi biex iwettaq il-​ġudizzju t’Alla fuq din is-​sistema. Dik il-​ġrajja kbira mbagħad se tkun parti mill-​istorja universali, imma l-​qaddejja leali taʼ Jehovah se jkomplu jaqduh bla waqfien bis-​salvazzjoni eterna quddiem għajnejhom. Tittama li tkun magħhom, flimkien maʼ wliedek u maʼ dawk li studjajt il-​Bibbja magħhom? Mela ftakar: “Għasses fuqek innifsek u fuq it-​tagħlim tiegħek; żomm sħiħ f’dawn il-​ħwejjeġ, għax, jekk tagħmel hekk, issalva lilek innifsek u lil dawk li jisimgħuk.”—1 Timotju 4:16.

[Nota taʼ taħt]

Tistaʼ Tispjega?

• X’għandha tkun l-​attitudni tagħna ladarba ma nafux il-​waqt eżatt tal-​ġudizzju t’Alla?

• B’liema modi nistgħu ‘ngħassu fuq it-​tagħlim tagħna’?

• Kif tistaʼ tgħin lill-​istudent isir il-​ħabib taʼ Jehovah?

• Għala huwa importanti li l-​ġenituri jieħdu l-​ħin biex jgħallmu lil uliedhom?

[Stampa f’paġna 15]

Wieħed jitgħallem iktar meta jkun hemm atmosfera xierqa u fl-​istess ħin rilassata

[Stampa f’paġna 18]

Meta nirreċtaw l-​istejjer tal-​Bibbja, bħal dik fejn Salamun jiġġudika liż-​żewġ nisa żienja, l-​istudju tal-​familja jsir iktar pjaċevoli