Oqgħod Attent għall-​“Arti tat-​Tagħlim” Tiegħek

“Ippriedka l-​kelma . . . widdeb, ċanfar, ħeġġeġ, bil-​paċenzja kollha u bl-​arti tat-​tagħlim.”—2 TIM. 4:2.

1. Ġesù liema kmand ta lid-​dixxipli tiegħu, u liema eżempju ħalla?

MINKEJJA l-​għemejjel taʼ l-​għaġeb taʼ fejqan li wettaq Ġesù matul il-​ministeru tiegħu fuq l-​art, primarjament hu ma kienx magħruf bħala wieħed li jfejjaq jew li jagħmel il-​mirakli, imma bħala għalliem. (Mk. 12:19; 13:1) Il-​prijorità taʼ Ġesù kienet li jxandar l-​aħbar tajba tas-​Saltna t’Alla, u din hi l-​istess prijorità tas-​segwaċi tiegħu llum. Il-​Kristjani għandhom inkarigu biex ikomplu x-​xogħol taʼ li jagħmlu dixxipli billi jgħallmu lin-​nies josservaw dak kollu li kkmanda Ġesù.—Mt. 28:19, 20.

2. Xi rridu nagħmlu sabiex inwettqu l-​inkarigu tagħna taʼ l-​ippridkar?

² Sabiex inwettqu l-​inkarigu tagħna ħalli nagħmlu dixxipli, aħna kontinwament infittxu modi kif nistgħu ntejbu l-​abbiltà tagħna biex ngħallmu. L-​appostlu Pawlu enfasizza l-​importanza taʼ din l-​abbiltà meta kiteb lil sieħbu fl-​ippridkar Timotju. Hu qal: “Oqgħod attent il-​ħin kollu għalik innifsek u għat-​tagħlim tiegħek. Żomm maʼ dawn l-​affarijiet, għax jekk tagħmel dan issalva kemm lilek innifsek u kemm lil dawk li jisimgħuk.” (1 Tim. 4:16) It-​tagħlim li Pawlu kellu f’moħħu ma kienx sempliċement l-​għoti t’għarfien. Ministri Kristjani effettivi jmissu qalb in-​nies u jimmotivawhom biex jagħmlu bidliet f’ħajjithom. Din hi arti. Allura kif nistgħu niżviluppaw l-​“arti tat-​tagħlim” meta nkunu qed nippreżentaw l-​aħbar tajba tas-​Saltna t’Alla lil oħrajn?—2 Tim. 4:2.

Żviluppa l-​“Arti tat-​Tagħlim”

3, 4. (a) Kif nistgħu niżviluppaw l-​“arti tat-​tagħlim”? (b) L-​Iskola tal-​Ministeru Teokratiku kif tgħinna nsiru għalliema effettivi?

³ Dizzjunarju wieħed ifisser il-​kelma “arti” bħala “sengħa li tinkiseb permezz taʼ l-​istudju, il-​prattika, jew l-​osservazzjoni.” Aħna rridu noqogħdu attenti għal dawn it-​tliet elementi sabiex insiru għalliema effettivi taʼ l-​aħbar tajba. Aħna nistgħu niksbu fehma korretta tas-​suġġett tagħna biss jekk nistudjawh bit-​talb. (Aqra Salm 119:27, 34.) Jekk nosservaw ministri effettivi huma u jgħallmu se niġu megħjunin nitgħallmu l-​metodi tagħhom u nimitawhom. U jekk nistinkaw fuq bażi regulari biex nipprattikaw dak li nitgħallmu se niġu megħjunin nirfinaw l-​abbiltajiet tagħna.—Lq. 6:40; 1 Tim. 4:13-15.

⁴ Ġeħova hu l-​Istruttur Grandjuż tagħna. Permezz tal-​parti viżibbli taʼ l-​organizzazzjoni tiegħu, hu jipprovdi lill-​qaddejja tiegħu fuq l-​art bi gwida dwar kif għandhom iwettqu l-​inkarigu tagħhom taʼ l-​ippridkar. (Is. 30:20, 21) F’dan ir-​rigward, kull kongregazzjoni jkollha klassijiet kull ġimgħa taʼ l-​Iskola tal-​Ministeru Teokratiku, li hija disinjata biex tgħin lil dawk kollha li jieħdu sehem biex isiru proklamaturi effettivi tas-​Saltna t’Alla. L-​iktar ktieb li jintuża f’din l-​iskola huwa l-​Bibbja. Il-​Kelma ispirata taʼ Ġeħova tgħidilna x’għandna ngħallmu. Iktar minn hekk, din tindika liema metodi taʼ tagħlim huma effettivi u xierqa. L-​Iskola tal-​Ministeru Teokratiku tfakkarna regolarment li se nsiru iktar tas-​sengħa bħala għalliema jekk nibbażaw it-​tagħlim tagħna fuq il-​Kelma t’Alla, nużaw mistoqsijiet b’mod effettiv, ngħallmu bis-​sempliċità, u nuru interess sinċier f’oħrajn. Ejja neżaminaw kull wieħed minn dawn il-​punti wieħed wieħed. Imbagħad se niddiskutu kif nistgħu mmissu qalb l-​istudenti.

Ibbaża t-​Tagħlim Tiegħek fuq il-​Kelma t’Alla

5. X’għandha tkun il-​bażi għat-​tagħlim tagħna, u għala?

⁵ Ġesù, l-​akbar mill-​għalliema umani kollha, ibbaża t-​tagħlim tiegħu fuq l-​Iskrittura. (Mt. 21:13; Ġw. 6:45; 8:17) Hu ma tkellimx f’ismu stess, imma f’isem il-​Wieħed li bagħtu. (Ġw. 7:16-18) Dan hu l-​eżempju li aħna nsegwu. Għalhekk, dak li ngħidu fil-​ministeru minn bieb għal bieb jew fuq studji tal-​Bibbja fid-​djar għandu jiffoka fuq l-​awtorità tal-​Kelma t’Alla. (2 Tim. 3:16, 17) L-​irraġunar intelliġenti tagħna qatt ma jistaʼ jkun effettiv jew qawwi daqs l-​Iskrittura ispirata. Il-​Bibbja għandha l-​awtorità. Ikun xi jkun il-​punt li qed nipprovaw ngħinu lill-​istudent jifhem, l-​aħjar metodu li nistgħu nużaw hu li nħallu lilu stess jaqra dak li tgħid l-​Iskrittura dwaru.—Aqra Ebrej 4:12.

6. Għalliem kif jistaʼ jagħmel ċert li l-​istudent jifhem il-​punt tal-​materjal li qed jiġi kunsidrat?

⁶ M’għandniex xi ngħidu, dan ma jfissirx li għalliem Kristjan m’għandux għalfejn jipprepara għal studju tal-​Bibbja. Għall-​kuntrarju, għandu jkun hemm ħsieb bir-​reqqa minn qabel biex tiddeċiedi liema mill-​iskritturi ċitati se jaqra mill-​Bibbja l-​għalliem jew l-​istudent matul l-​istudju. Ġeneralment, ikun tajjeb li naqraw l-​iskritturi li jipprovdu bażi għat-​twemmin tagħna. Huwa neċessarju wkoll li ngħinu lill-​istudent jifhem kull vers li jaqra.—1 Kor. 14:8, 9.

Uża Mistoqsijiet Effettivi

7. L-​użu tal-​mistoqsijiet għala huwa metodu tajjeb taʼ tagħlim?

⁷ L-​użu tajjeb tal-​mistoqsijiet iqanqal il-​ħsieb u jgħin lill-​għalliem biex jilħaq qalb l-​istudent. Allura, minflok ma tispjega l-​iskritturi lill-​istudent tiegħek, staqsih biex jispjegahomlok hu. Kultant ikun hemm bżonn taʼ mistoqsija supplimentarja jew saħansitra serje taʼ mistoqsijiet biex tgħin lill-​istudent tiegħek jasal għall-​fehma t-​tajba. Meta tinvolvi lill-​istudent fil-​proċess tat-​tagħlim b’dan il-​mod, int tkun fil-​fatt qed tgħinu mhux biss jifhem ir-​raġuni għal ċerta konklużjoni imma wkoll biex dik il-​konklużjoni jagħmilha l-​konvinzjoni tiegħu stess.—Mt. 17:24-26; Lq. 10:36, 37.

8. Kif nistgħu nsiru nafu x’hemm f’qalb l-​istudent?

⁸ Il-​metodu taʼ l-​istudju użat fil-​pubblikazzjonijiet tagħna huwa wieħed taʼ mistoqsija u tweġiba. Bla dubju, il-​biċċa l-​kbira min-​nies li tistudja l-​Bibbja magħhom se jkunu jistgħu jwieġbu malajr il-​mistoqsijiet stampati, billi jużaw l-​informazzjoni fil-​paragrafi relatati. Xorta waħda, l-​għalliem li jrid imiss il-​qalb mhux se jkun sodisfatt sempliċement bit-​tweġiba t-​tajba. Per eżempju, student għandu mnejn ikun jistaʼ jispjega tajjeb dak li tgħid il-​Bibbja dwar iż-​żína. (1 Kor. 6:18) Madankollu, mistoqsijiet li bit-​tattika jitolbu opinjoni jistgħu jindikaw dak li jaħseb verament l-​istudent dwar dak li qed jitgħallem. B’hekk, l-​għalliem forsi jistaqsi: “Il-​Bibbja għala tikkundanna relazzjonijiet sesswali barra ż-​żwieġ? X’taħseb dwar din ir-​restrizzjoni mogħtija minn Alla? Taħseb li hemm xi benefiċċju milli ngħixu fi qbil mal-​livelli morali t’Alla?” It-​tweġiba għal dawn il-​mistoqsijiet tistaʼ tikxef ħafna dwar dak li hemm f’qalb l-​istudent.—Aqra Mattew 16:13-17.

Żomm l-​Informazzjoni Sempliċi

9. X’għandna nżommu f’moħħna meta naqsmu informazzjoni Skritturali m’oħrajn?

⁹ Il-​maġġuranza mill-​veritajiet li jinsabu fil-​Kelma t’Alla huma relattivament sempliċi. Però, jistaʼ jkun li wħud li studjajna l-​Bibbja magħhom ġew imħawdin mid-​duttrini tar-​reliġjon falza. L-​irwol tagħna bħala għalliema hu li nagħmlu l-​Bibbja faċli biex tinftiehem. Għalliema effettivi jgħaddu informazzjoni sempliċi, ċara, u eżatta. Jekk insegwu din il-​gwida, m’aħniex se nagħmlu l-​verità iktar diffiċli biex tinftiehem. Evita dettalji mhux neċessarji. M’għandniex għalfejn nikkummentaw fuq kull aspett taʼ l-​iskrittura li naqraw. Sempliċement iffoka fuq dak li hu essenzjali biex il-​punt li qed jiġi kunsidrat ikun ċar. L-​istudent se jibda japprezza veritajiet Skritturali iktar profondi hekk kif jagħmel progress fil-​fehma tiegħu.—Ebr. 5:13, 14.

10. Liema fatturi jiddeterminaw kemm se nkopru materjal matul l-​istudju tal-​Bibbja?

¹⁰ Kemm għandna ngħaddu materjal f’sessjoni waħda taʼ studju? Biex inkunu nafu għandna bżonn id-​dixxerniment. L-​abbiltajiet u ċ-​ċirkustanzi kemm taʼ l-​istudent u kemm taʼ l-​għalliem se jvarjaw, imma dejjem għandna nżommu f’moħħna li l-​mira tagħna bħala għalliema hi li ngħinu lill-​istudent tagħna jibni fidi soda. Allura nagħtuh biżżejjed ħin biex jaqra, jifhem, u jaċċetta l-​veritajiet preżentati fil-​Kelma t’Alla. Ma nikkunsidrawx iktar materjal milli jistaʼ jifhem. Fl-​istess ħin, inżommu l-​istudju mexxej. Ladarba l-​istudent tagħna jkun fehem il-​punt, ngħaddu għall-​punt li jmiss.—Kol. 2:6, 7.

11. Liema lezzjoni rigward it-​tagħlim nistgħu nitgħallmu mill-​appostlu Pawlu?

¹¹ L-​appostlu Pawlu żamm il-​messaġġ taʼ l-​aħbar tajba sempliċi meta kien qed jitkellem maʼ wħud ġodda. Avolja kellu edukazzjoni għolja, hu evita li juża lingwaġġ intelletwali. (Aqra l-​1 Korintin 2:1, 2.) Is-​sempliċità tal-​veritajiet Skritturali tiġbed u tissodisfa lil nies sinċieri. M’hemmx għalfejn wieħed ikun taʼ skola biex jifhimha.—Mt. 11:25; Atti 4:13; 1 Kor. 1:26, 27.

Għin lill-​Istudenti Japprezzaw Dak li Jitgħallmu

12, 13. X’jistaʼ jqanqal student biex jaġixxi fuq dak li qed jitgħallem? Agħti eżempju.

¹² It-​tagħlim tagħna jrid imiss qalb l-​istudent sabiex inkunu effettivi. L-​istudent irid jifhem kif l-​informazzjoni tapplika għalih personalment, kif jibbenefika minnha, u kif ħajtu se titjieb jekk isegwi d-​direzzjoni Skritturali.—Is. 48:17, 18.

¹³ Per eżempju, forsi nkunu qed nikkunsidraw il-​versi t’Ebrej 10:24, 25, li jinkuraġġixxu lill-​Kristjani biex jinġabru maʼ sħabhom fit-​twemmin għal inkuraġġiment Skritturali u sħubija kollha mħabba. Jekk l-​istudent ikun għadu mhux qed jattendi l-​laqgħat tal-​kongregazzjoni, nistgħu niddeskrivu fil-​qosor kif dawn isiru u xi jkun se jiġi kunsidrat. Forsi nistgħu nsemmu li l-​laqgħat tal-​kongregazzjoni huma parti mill-​qima tagħna u nuruh li aħna nibbenefikaw minnhom personalment. Imbagħad nistgħu nistiednu lill-​istudent biex jattendi. Għandha tkun ix-​xewqa tiegħu li jobdi lil Ġeħova li timmotivah biex iwieġeb għall-​kmandi Skritturali, mhux biex jogħġob lill-​individwu li jistudja miegħu.—Gal. 6:4, 5.

14, 15. (a) Student tal-​Bibbja x’jistaʼ jitgħallem dwar Ġeħova? (b) Student tal-​Bibbja kif jistaʼ jibbenefika minn għarfien dwar il-​personalità t’Alla?

¹⁴ Benefiċċju fundamentali li jiksbu l-​istudenti mill-​istudju tal-​Bibbja u l-​applikar tal-​prinċipji tagħha hu li jsiru jafu u japprezzaw lil Ġeħova bħala persuna. (Is. 42:8, NW) Mhux biss huwa Missier kollu mħabba u l-​Ħallieq u s-​Sid taʼ l-​univers, imma wkoll jikxef il-​personalità u l-​abbiltajiet tiegħu lil dawk li jħobbuh u jaqduh. (Aqra Eżodu 34:6, 7.) Meta Mosè kien se jmexxi lill-​ġens taʼ Iżrael ’il barra mill-​jasar fl-​Eġittu, Ġeħova identifika lilu nnifsu bl-​espressjoni: “Jien se nsir dak li rrid insir.” (Eżo. 3:13-15, NW) Dan ifisser li Ġeħova kien se jsir dak kollu li kien neċessarju għalih sabiex iwettaq l-​iskopijiet tiegħu rigward il-​poplu magħżul tiegħu. B’hekk, l-​Iżraelin saru jafu lil Ġeħova bħala Salvatur, Gwerrier, Wieħed li jipprovdi, u Wieħed li jwettaq il-​wegħdi u li għenhom b’modi oħrajn.—Eżo. 15:2, 3; 16:2-5; Ġoż. 23:14.

¹⁵ Jistaʼ jkun li l-​istudenti tagħna ma jesperjenzawx intervent drammatiku minn Ġeħova f’ħajjithom bħalma ġralu Mosè. Minkejja dan, hekk kif l-​istudenti tagħna jkabbru l-​fidi u l-​apprezzament tagħhom għal dak li qed jitgħallmu u jibdew japplikawh, bla dubju huma se jaraw il-​bżonn li jistrieħu fuq Ġeħova għall-​kuraġġ, l-​għerf, u l-​gwida. Hekk kif jagħmlu dan, huma wkoll se jsiru jafu lil Ġeħova bħala Kunsillier u Protettur għaqli u fdat, u wieħed li jipprovdi l-​bżonnijiet kollha tagħhom b’mod ġeneruż.—Salm 55:23 [55:22, NW]; 63:8 [63:7, NW]; Prov. 3:5, 6.

Uri Interess bl-​Imħabba

16. L-​abbiltà naturali għala m’hijiex l-​iktar fattur importanti fl-​effettività tagħna bħala għalliema?

¹⁶ Jekk tħoss li m’intix għalliem tajjeb daqskemm tixtieq, taqtax qalbek. Ġeħova u Ġesù qed jindokraw il-​programm edukattiv li llum qed isir madwar id-​dinja. (Atti 1:7, 8; Riv. 14:6) Huma jistgħu jbierku l-​isforzi tagħna sabiex kliemna jkollu effett pożittiv fuq individwu li għandu attitudni xierqa. (Ġw. 6:44) L-​imħabba sinċiera t’għalliem għall-​istudent tiegħu tistaʼ tpatti għan-​nuqqas t’abbiltà naturali. L-​appostlu Pawlu wera li hu fehem l-​importanza taʼ li nħobbu lil dawk li ngħallmu.—Aqra l-​1 Tessalonikin 2:7, 8.

17. Kif nistgħu nuru interess sinċier f’kull student tal-​Bibbja?

¹⁷ B’mod simili, aħna nistgħu nuru interess sinċier f’kull student tal-​Bibbja billi nieħdu l-​ħin biex insiru nafuh. Hekk kif niddiskutu prinċipji Skritturali miegħu, x’aktarx li se nsiru midħla taċ-​ċirkustanzi tiegħu. Forsi nosservaw li hu diġà qed jgħix ħajtu fi qbil maʼ xi punti li tgħallem mill-​Bibbja. F’affarijiet oħrajn, forsi għad għandu fejn jagħmel aġġustamenti. Meta ngħinu lill-​istudent jara kif l-​informazzjoni preżentata fis-​sessjonijiet taʼ l-​istudju tal-​Bibbja tapplika għalih personalment, inkunu nistgħu ngħinuh bl-​imħabba biex isir dixxiplu ġenwin taʼ Kristu.

18. Għala huwa importanti li nitolbu maʼ l-​istudent tagħna u għalih?

¹⁸ Fuq kollox, nistgħu nitolbu maʼ l-​istudent tagħna u għalih. Hu għandu jara ċar li l-​mira tagħna hi li ngħinuh isir jaf lill-​Ħallieq tiegħu b’mod iktar intimu, jersaq eqreb Lejh, u jibbenefika mill-​gwida t’Alla. (Aqra Salm 25:4, 5.) It-​talb tagħna għall-​barka taʼ Ġeħova fuq l-​isforzi taʼ student biex japplika dak li qed jitgħallem jistaʼ jgħinu jara l-​importanza taʼ li hu jsir wieħed li ‘jagħmel il-​kelma.’ (Ġak. 1:22) U hekk kif l-​istudent jismaʼ t-​talb sinċier tagħna, hu wkoll se jitgħallem kif għandu jitlob. X’ferħ niksbu meta ngħinu studenti tal-​Bibbja jiżviluppaw relazzjoni għalihom infushom maʼ Ġeħova!

19. X’se jiġi kunsidrat fl-​artiklu li jmiss?

¹⁹ Huwa inkuraġġanti li nkunu nafu li iktar minn sitt miljun u nofs Xhieda madwar id-​dinja jinsabu beżlin jipprattikaw l-​“arti tat-​tagħlim,” bl-​iskop li jgħinu individwi taʼ qalb onesta josservaw l-​affarijiet kollha li kkmanda Ġesù. Liema riżultati qed jinkisbu mill-​attività tagħna taʼ l-​ippridkar? It-​tweġiba għal din il-​mistoqsija se tiġi kunsidrata fl-​artiklu li jmiss.

Tiftakar Int?

• Il-Kristjani għala għandhom jiżviluppaw l-​“arti tat-​tagħlim”?

• Liema metodi jistgħu jagħmlu t-​tagħlim tagħna iktar effettiv?

• X’jistaʼ jpatti għal kwalunkwe nuqqas fl-​abbiltà naturali tagħna biex ngħallmu?

[Stampa f’paġna 9]

Tipparteċipa int fl-​Iskola tal-​Ministeru Teokratiku?

[Stampa f’paġna 10]

Għala huwa importanti li tistieden lill-​istudent tiegħek biex jaqra mill-​Bibbja?

[Stampa f’paġna 12]

Itlob maʼ l-​istudent tiegħek u għalih