Nixtru l-Ħin għall-Qari u l-Istudju
“[Ixtru] ż-żmien opportun għalikom infuskom, għaliex il-jiem huma mill-agħar.”—EFESIN 5:16, NW.
1. Għala huwa għaqli li nippjanaw kif nużaw il-ħin, u l-mod kif inqassmu l-ħin tagħna x’juri dwarna?
Jingħad li “jekk tagħżel kif tuża l-ħin tkun qed tiffranka l-ħin.” Bniedem li jwarrab ħin fiss biex jagħmel l-affarijiet li hemm bżonn isiru x’aktarx li jirnexxilu jlaħħaq maʼ ħafna iktar affarijiet. L-għaref Sultan Salamun kiteb: “Għal kollox hemm siegħa ffissata, hemm ħin għal kollox taħt is-sema.” (Ekkleżjasti 3:1, Moffatt) Ilkoll għandna l-istess ammont taʼ ħin li nistgħu nużaw, imma jiddependi minna kif nagħmlu dan. Il-mod kif aħna niddeċiedu x’inhuma l-affarijiet l-iktar importanti li rridu nagħmlu u kif inqassmu l-ħin jgħid ħafna dwar x’inhu l-iktar għal qalbna.—Mattew 6:21.
2. (a) X’qal Ġesù dwar il-bżonn spiritwali tagħna fil-Priedka taʼ fuq il-Muntanja? (b) Liema eżami tagħna nfusna jkun tajjeb li nagħmlu?
2 Minħabba li l-ikel u l-irqad huma ħtieġa għal ġisimna, bilfors irridu nwarrbu l-ħin għalihom. Imma xi ngħidu għall-bżonnijiet spiritwali tagħna? Nafu li dawn irridu nissodisfawhom ukoll. Fil-Priedka li għamel fuq il-Muntanja, Ġesù ddikjara: “Henjin huma dawk konxji tal-bżonn spiritwali tagħhom.” (Mattew 5:3, NW) Huwa għalhekk li “l-ilsir leali u diskret” ifakkarna regolarment dwar kemm hu importanti li nqattgħu l-ħin naqraw u nistudjaw il-Bibbja. (Mattew 24:45, NW) Għandek mnejn tirrealizza kemm hu importanti li tagħmel dan, imma forsi tħoss li m’għandekx ħin biex tistudja jew biex taqra l-Bibbja. Jekk inhu hekk, ejja neżaminaw xi modi kif tistaʼ ssib iktar ħin biex taqra l-Kelma t’Alla, biex tagħmel studju persunali, u biex timmedita.
Insibu l-Ħin biex Naqraw u Nistudjaw il-Bibbja
3, 4. (a) L-appostlu Pawlu ta liema parir dwar kif għandna nużaw il-ħin tagħna, u dan x’jinkludi? (b) Pawlu x’ried ifisser meta tana l-parir biex ‘nixtru ż-żmien opportun għalina nfusna’?
3 Meta nqisu f’liema żminijiet qed ngħixu, ilkoll kemm aħna jeħtieġ li nagħtu kas kliem l-appostlu Pawlu: “Żommu għassa stretta li kif timxu ma jkunx bħala persuni bla għaqal imma bħala [wħud] bil-għaqal, billi tixtru ż-żmien opportun għalikom infuskom, għaliex il-jiem huma mill-agħar. Minħabba f’dan ieqfu milli ssiru bla raġuni, imma ibqgħu araw x’inhi r-rieda taʼ Jehovah.” (Efesin 5:15-17, NW) M’għandniex xi ngħidu, dan il-parir jgħodd f’kull aspett tal-ħajja tagħna bħala Kristjani dedikati, inkluż li nsibu l-ħin għat-talb, għall-istudju, għal-laqgħat, u biex nieħdu sehem kemm nistgħu fl-ippridkar taʼ “l-Evanġelju tas-Saltna.”—Mattew 24:14; 28:19, 20.
4 Illum, ħafna mill-qaddejja taʼ Jehovah jidhru li qed isibuha diffiċli biex iwarrbu l-ħin ħalli jaqraw il-Bibbja u jistudjawha fil-fond. Huwa ovvju li ħadd ma jistaʼ jżid xi siegħa mal-ġurnata tiegħu, u għalhekk il-parir taʼ Pawlu bilfors li jfisser xi ħaġa oħra. Bil-Grieg, il-frażi ‘tixtri ż-żmien opportun’ tfisser li tixtri xi ħaġa li biex tixtriha jkollok tissagrifika xi ħaġa oħra. Fl-Expository Dictionary, W. E. Vine jagħti t-tifsira tagħha bħala li “tieħu l-akbar vantaġġ li tistaʼ minn kull opportunità billi tużaha bl-aħjar mod possibbli, ladarba ma tkunx tistaʼ ġġibha lura jekk tkun tliftha.” Kif jew minn liema ħaġa nistgħu nixtru l-ħin opportun biex naqraw u nistudjaw il-Bibbja?
Irridu Nistabbilixxu l-Prijoritajiet
5. Għala u kif għandna ‘nkunu żguri mill-affarijiet iktar importanti’?
5 Barra mill-obbligi sekulari tagħna għandna ħafna affarijiet taʼ natura spiritwali x’nieħdu ħsieb. Bħala qaddejja dedikati taʼ Jehovah, għandna ħafna x’nagħmlu fix-xogħol tiegħu. (1 Korintin 15:58) Kien għalhekk li Pawlu qal lill-Kristjani ġewwa Filippi biex ‘ikunu żguri mill-affarijiet iktar importanti.’ (Filippin 1:10, NW) Dan ifisser li rridu nistabbilixxu liema affarijiet huma l-iktar importanti li nagħmlu. Affarijiet spiritwali għandhom dejjem jiġu qabel affarijiet materjali. (Mattew 6:31-33) Madankollu, hemm bżonn li nżommu l-bilanċ anki f’li nwettqu l-obbligi spiritwali tagħna. Kif qegħdin inqassmu l-ħin tagħna bejn id-diversi aspetti tal-ħajja li ngħixu bħala Kristjani? Ir-rapporti taʼ l-indokraturi li jivvjaġġaw juru li minn fost l-“affarijiet iktar importanti” li l-Kristjani għandhom jagħmlu, l-istudju persunali u l-qari tal-Bibbja huma dawk l-affarijiet li ħafna drabi ma jsirux.
6. X’jistaʼ jkollna nagħmlu biex nixtru l-ħin opportun meta niġu għax-xogħol sekulari jew ix-xogħol tad-dar?
6 Bħalma diġà rajna, li tixtri ż-żmien opportun jinvolvi li “tieħu l-akbar vantaġġ li tistaʼ minn kull opportunità,” u “tużaha bl-aħjar mod possibbli.” Għalhekk, jekk id-drawwiet tagħna tal-qari u l-istudju tal-Bibbja ma tantx huma tajbin, ikun għaqli li neżaminaw sew kif qed inqattgħu l-ħin tagħna. Jekk ix-xogħol sekulari tagħna qed jitlob ħafna minna, billi jiħdilna ħafna mill-ħin u l-enerġija tagħna, għandna nitolbu lil Jehovah dwar dan. (Salm 55:22, KŻ) Għandu mnejn inkunu nistgħu nirranġaw l-affarijiet b’tali mod li jkollna iktar ħin għall-affarijiet importanti li għandhom x’jaqsmu mal-qima taʼ Jehovah, inkluż li nistudjaw u li naqraw il-Bibbja. Jingħad li x-xogħol tal-mara ma jiqafx, u dan huwa veru. Għalhekk, l-aħwa nisa wkoll iridu jaraw x’inhuma l-prijoritajiet tagħhom u jwarrbu ħin fiss biex jaqraw il-Bibbja u jagħmlu studju bir-reqqa.
7, 8. (a) Ħafna drabi minn liema attivitajiet inkunu nistgħu nixtru l-ħin għall-qari u l-istudju? (b) X’inhu l-iskop tar-rikreazzjoni, u li nżommu dan f’moħħna kif jistaʼ jgħinna nistabbilixxu l-prijoritajiet tagħna?
7 Ġeneralment, ħafna minna jistgħu jixtru l-ħin għall-istudju billi jnaqqsu attivitajiet li m’humiex neċessarji. Nistgħu nistaqsu lilna nfusna, ‘Jien kemm inqattaʼ ħin naqra xi rivisti sekulari jew gazzetti, nara programmi televiżivi, nismaʼ l-mużika, jew nilgħab il-logħob tal-kompjuter? Inqattaʼ iktar ħin quddiem il-kompjuter milli nqattaʼ naqra l-Bibbja?’ Pawlu jgħid: “Ieqfu milli ssiru bla raġuni, imma ibqgħu araw x’inhi r-rieda taʼ Jehovah.” (Efesin 5:17, NW) Milli jidher, waħda mir-raġunijiet ewlenin għala ħafna Xhieda ma jkollhomx ħin biżżejjed għall-istudju persunali u għall-qari tal-Bibbja hi li jqattgħu ħafna iktar ħin milli hu raġunevoli quddiem it-televixin.—Salm 101:3; 119:37, 47, 48.
8 Xi wħud jistgħu jgħidu li ma jistax ikun li joqogħdu jistudjaw il-ħin kollu, li jkollhom bżonn ir-rikreazzjoni. Waqt li dan huwa minnu, ikun tajjeb li nikkunsidraw kemm inqattgħu ħin nistrieħu u nqabbluh mal-ħin li fil-fatt inqattgħu nistudjaw jew naqraw il-Bibbja. Għandu mnejn li nibqgħu sorpriżi b’dak li nsibu. Huwa veru li r-rikreazzjoni u l-mistrieħ għandna bżonnhom, iżda jeħtieġ li dawn inżommuhom f’posthom. L-iskop tagħhom hu li jirrifreskawna biex inkomplu bl-attivitajiet spiritwali tagħna. Ħafna programmi televiżivi u logħob tal-kompjuter iġagħlu lil dak li jkun iħossu għajjien, waqt li l-qari u l-istudju tal-Kelma t’Alla jirrifreskawna u jagħtuna s-saħħa.—Salm 19:8, 9 [19:7, 8, NW].
Kif Xi Wħud Jagħmlu l-Ħin għall-Istudju
9. X’vantaġġi jkollna jekk napplikaw il-parir mogħti fil-ktejjeb Neżaminaw l-Iskrittura Kuljum taʼ l-1999?
9 Id-daħla taʼ l-edizzjoni taʼ l-1999 tal-ktejjeb Neżaminaw l-Iskrittura Kuljum tgħid: “Ikun verament vantaġġuż li tikkunsidra l-iskrittura tal-ġurnata u l-kummenti minn dan il-ktejjeb fil-għodu. Tħossok bħallikieku Jehovah, l-Istruttur il-Kbir, kien qed iqajmek bl-istruzzjonijiet tiegħu. Profetikament jingħad li Ġesù Kristu jibbenefika kull għodwa mill-istruzzjonijiet taʼ Jehovah: ‘Taʼ kull filgħodu Jehovah jqajjimli ’l widinti, biex nismaʼ bħal wieħed mgħallem.’ Istruzzjonijiet taʼ din il-kwalità taw lil Ġesù ‘lsien taʼ wieħed mgħallem,’ sabiex b’hekk hu setaʼ ‘jagħraf jgħin lill-għajjien b’xi kelma.’ (Is. 30:20; 50:4; Mt. 11:28-30) Li tkun imqajjem għal pariri fi żmienhom mill-Kelma t’Alla kull fil-għodu mhux biss jgħinek tkampa mal-problemi tiegħek, imma wkoll jarmak bl-‘ilsien taʼ wieħed mgħallem’ biex tgħin lil ħaddieħor.”a
10. Xi wħud kif jagħmlu l-ħin biex jaqraw u jistudjaw il-Bibbja, u liema benefiċċji jgawdu permezz taʼ dan?
10 Ħafna mill-Kristjani japplikaw dan il-parir billi jaqraw l-iskrittura tal-ġurnata flimkien mal-kummenti, u billi jaqraw il-Bibbja jew jistudjaw kmieni fil-għodu. Pijuniera leali minn Franza tqum kmieni kull fil-għodu u tqattaʼ nofsiegħa taqra l-Bibbja. X’kien li għenha tagħmel dan matul dawn is-snin kollha? Hi tgħid: “Jien għandi motiv sod, u nżomm maʼ l-iskeda tal-qari tiegħi jiġri x’jiġri!” Nagħżlu liema ħin nagħżlu, l-importanti hu li nżommu maʼ l-iskeda tagħna. René Mica, li ilu jaqdi bħala pijunier għal iktar minn 40 sena fl-Ewropa u fl-Afrika taʼ Fuq, jistqarr: “Mill-1950 ’l hawn, dejjem kienet il-mira tiegħi li naqra l-Bibbja kollha kemm hi kull sena, u issa dan għamiltu 49 darba. Inħoss li dan hu vitali biex inkun nistaʼ nżomm relazzjoni mill-qrib mal-Ħallieq tiegħi. Il-meditazzjoni fuq il-Kelma t’Alla tgħinni nifhem aħjar il-ġustizzja taʼ Jehovah u l-kwalitajiet l-oħrajn tiegħu, u dan iqawwini ferm.”b
“Provvisti taʼ Ikel fiż-Żmien Xieraq”
11, 12. (a) Liema “provvisti taʼ ikel” ġew provduti mill-“prokuratur leali”? (b) Dawn il-“provvisti taʼ ikel” kif ġew provduti fiż-żmien xieraq?
11 Sewwa sew bħalma l-fatt li nieklu regolarment jgħinna nibqgħu f’saħħitna fiżikament, hekk ukoll skeda regulari biex nistudjaw u naqraw il-Bibbja tgħinna biex inkunu f’saħħitna spiritwalment. Fl-Evanġelju taʼ Luqa naqraw dan il-kliem taʼ Ġesù: “Min tassew hu l-prokuratur leali, il-wieħed diskret, li lilu sidu se jaħtar fuq il-ġemgħa taʼ qaddejja tiegħu biex jibqaʼ jagħtihom il-kejl tagħhom taʼ provvisti taʼ ikel fiż-żmien xieraq?” (Luqa 12:42, NW) Dawn il-“provvisti taʼ ikel [spiritwali] fiż-żmien xieraq” issa ilhom iktar minn 120 sena jiġu provduti f’It-Torri taʼ l-Għassa, kif ukoll f’kotba u letteratura oħra bbażata fuq il-Bibbja.
12 Innota l-espressjoni “fiż-żmien xieraq.” Meta jkun il-waqt, Jehovah, l-Istruttur il-Kbir tagħna, dejjem iggwida lin-nies tiegħu fi kwistjonijiet taʼ twemmin u prinċipji u fi kwistjonijiet taʼ kondotta. Dan jagħmlu permezz taʼ Ibnu u tal-klassi taʼ l-ilsir. Ikun bħallikieku bħala poplu nisimgħu leħen minn warajna jgħidilna: ‘Din hi t-triq; għaddu minnha, sew jekk tiksru lejn il-lemin, [u] sew lejn ix-xellug.’ (Isaija 30:20, 21) Iktar minn hekk, meta xi ħadd jaqra l-Bibbja u l-letteratura kollha bbażata fuq il-Bibbja bir-reqqa, ħafna drabi jiġri li hu jħoss li dak li hemm miktub ikun apposta għalih. Iva, il-pariri u d-direzzjoni t’Alla jaslu għandna fiż-żmien meta jkollna bżonnhom, u jgħinuna nirreżistu t-tentazzjonijiet u nagħmlu deċiżjonijiet għaqlin.
Tgħallem Kul b’Mod Tajjeb Regolarment
13. Kif nistgħu nkunu qegħdin nonqsu milli nitimgħu lilna nfusna spiritwalment b’mod tajjeb u regulari?
13 Jekk irridu nibbenefikaw bis-sħiħ minn dawn il-“provvisti taʼ ikel” li qed jiġu provduti fiż-żmien xieraq, jeħtieġ li nitimgħu lilna nfusna tajjeb regolarment. Huwa importanti li jkollna skeda regulari għall-qari tal-Bibbja u l-istudju persunali, u li nżommu magħha jiġri x’jiġri. Qiegħed int titmaʼ lilek innifsek tajjeb spiritwalment? Iżżomm perijodi regulari li fihom tagħmel studju persunali fil-fond? Jew sempliċement taqra fuq fuq dak li ġie preparat b’tant reqqa għalina u tiblaʼ kollox f’salt, biex ngħidu hekk, jew saħansitra kultant tgħaddi mingħajr ma tiekol xejn? Meta xi wħud ma jitimgħux lilhom infushom spiritwalment b’mod tajjeb u regulari, dan iġagħalhom isiru dgħajfin fil-fidi, u saħansitra jitilqu mill-verità.—1 Timotju 1:19; 4:15, 16.
14. Għala huwa taʼ benefiċċju li naqraw bir-reqqa xi artikli li forsi jidhru li nkunu diġà qrajna bħalhom qabel?
14 Xi wħud iħossu li huma diġà jafu t-tagħlim bażiku u li mhux kull artiklu jkun fih xi ħaġa kompletament ġdida. Għalhekk, jaħsbu li m’hemmx għalfejn jistudjaw u jattendu l-laqgħat regolarment. Madankollu, il-Bibbja turi li għandna bżonn niġu mfakkrin dawk l-affarijiet li nkunu diġà tgħallimna. (Salm 119:95, 99; 2 Pietru 3:1, NW; Ġuda 5) Bħalma kok tajjeb jipprepara l-istess ingredjenti bażiċi b’ħafna modi differenti li jħajruk, hekk ukoll il-klassi taʼ l-ilsir tipprovdi ikel spiritwali sustanzjuż b’modi differenti. Saħansitra f’artikli dwar xi suġġetti li jkunu diġà ġew spjegati kemm-il darba, xorta waħda jkun hemm xi dettalji li żgur li ma nkunux irridu li ma nindunawx bihom. Il-fatt hu li dak li jirnexxilna nitgħallmu mill-qari li nagħmlu jiddependi ħafna minn kemm inqattgħu ħin u kemm nagħmlu sforz fl-istudju tagħna.
Benefiċċji Spiritwali li Jiġu mill-Qari u l-Istudju
15. Il-qari u l-istudju tal-Bibbja kif jgħinuna nsiru ministri aħjar tal-Kelma t’Alla?
15 Il-benefiċċji li nieħdu mill-qari u l-istudju tal-Bibbja huma ħafna, tant li lanqas nistgħu ngħodduhom. Dawn jgħinuna biex inwettqu waħda mir-responsabbiltajiet bażiċi taʼ Kristjan, jiġifieri li kull wieħed minna jsir “ħaddiem li m’għandux mniex jistħi, li . . . [‘jimmaniġġa sewwa,’ NW] l-kelma tal-verità.” (2 Timotju 2:15) Iktar ma naqraw u nistudjaw il-Bibbja, iktar moħħna se jkun mimli bil-ħsibijiet t’Alla. Imbagħad, bħal Pawlu, inkunu kapaċi ‘nirraġunaw man-nies mill-Iskrittura, billi nispjegaw u nagħtu prova b’referenzi’ biex nuruhom x’inhi l-verità meraviljuża dwar l-iskopijiet taʼ Jehovah. (Atti 17:2, 3, NW) Insiru iktar tas-sengħa f’li ngħallmu lil oħrajn, u l-konversazzjonijiet, it-taħditiet, u l-pariri tagħna se jkunu iktar t’għajnuna biex oħrajn jinbnew spiritwalment.—Proverbji 1:5.
16. B’liema modi se nibbenefikaw personalment jekk naqraw u nistudjaw il-Kelma t’Alla?
16 Barra minn hekk, il-ħin li nużaw biex neżaminaw il-Kelma t’Alla se jgħinna nġibu ħajjitna iktar fi qbil mar-rieda taʼ Jehovah. (Salm 25:4; 119:9, 10; Proverbji 6:20-23) Se jsaħħilna l-kwalitajiet spiritwali tagħna, bħall-umiltà, il-lealtà, u l-ferħ. (Dewteronomju 17:19, 20; Apokalissi 1:3) Meta napplikaw l-għarfien li nkunu ksibna mill-qari u l-istudju tal-Bibbja, l-ispirtu t’Alla jkun jistaʼ jaħdem iktar fuqna, u b’hekk nuru iktar il-frott taʼ l-ispirtu f’kulma nagħmlu.—Galatin 5:22, 23.
17. Il-kwantità u l-kwalità tal-qari u l-istudju persunali tal-Bibbja li nagħmlu kif jeffettwaw ir-relazzjoni tagħna maʼ Jehovah?
17 Fuq kollox, dak il-ħin li nkunu xtrajna minn attivitajiet oħra biex naqraw u nistudjaw il-Kelma t’Alla se jrendi barkiet kbar fejn tidħol ir-relazzjoni tagħna m’Alla. Pawlu talab li sħabu l-Kristjani jkunu jistgħu ‘jimtlew bil-għarfa kollha tar-rieda t’Alla bil-għerf kollu u dehen spiritwali, biex jimxu kif jixraq lill-Mulej u jogħġbuh f’kollox.’ (Kolossin 1:9, 10, Saydon) Bl-istess mod, jekk irridu li ‘nimxu kif jixraq lill-Mulej,’ aħna rridu ‘nimtlew bil-għarfa kollha tar-rieda t’Alla bil-għerf kollu u dehen spiritwali.’ Ilkoll nixtiequ li jkollna l-barka u l-approvazzjoni taʼ Jehovah. Jidher ċar li dan jiddependi ħafna mill-kwantità u mill-kwalità tal-qari u l-istudju persunali tal-Bibbja li nagħmlu.
18. Liema barkiet nistgħu ngawdu jekk nobdu l-kliem taʼ Ġesù fi Ġwann 17:3?
18 “Din hi l-ħajja taʼ dejjem, li . . . [“jieħdu għarfien dwarek,” NW], Alla waħdek veru, u . . . [dwar] Ġesù Kristu, li inti bgħatt.” (Ġwann 17:3) Din hija waħda mill-iktar skritturi li jużaw ix-Xhieda taʼ Jehovah biex jgħinu lin-nies japprezzaw l-importanza taʼ li jistudjaw il-Kelma t’Alla. Ċertament, li nagħmlu dan huwa daqstant importanti għal kull wieħed u waħda minna. It-tama li ngħixu għal dejjem tiddependi fuq li nikbru fl-għarfien dwar Jehovah u Ibnu, Ġesù Kristu. U aħseb ftit x’ifisser dan. Qatt m’aħna se nieqfu nitgħallmu dwar Jehovah—u se jkollna eternità sħiħa biex nitgħallmu dwaru!—Ekkleżjasti 3:11, NW; Rumani 11:33.
[Noti taʼ taħt]
a Pubblikat mill-Watchtower Bible and Tract Society of New York, Inc.
b Ara l-artiklu “Meta Jaqrawha u Kif Jibbenefikaw,” li ġie pubblikat f’It-Torri taʼ l-Għassa taʼ l-1 taʼ Mejju, 1995, paġni 31-2.
Mistoqsijiet Bħala Reviżjoni
• X’juri dwarna l-mod kif nużaw il-ħin tagħna?
• Minn liema attivitajiet nistgħu nixtru l-ħin biex naqraw u nistudjaw il-Bibbja?
• Għala għandna nieħdu ħsieb li nitimgħu lilna nfusna spiritwalment b’mod tajjeb u regulari?
• Liema benefiċċji jiġu mill-qari u l-istudju taʼ l-Iskrittura?
[Stampi f’paġna 21]
Billi naqraw u nistudjaw il-Bibbja regolarment se nkunu kapaċi ‘nimmaniġġaw sewwa l-kelma tal-verità’
[Stampi f’paġna 23]
Jekk, fil-ħajja mgħaġġla li ngħixu, nibbilanċjaw affarijiet oħra m’attivitajiet spiritwali, dan se jrendilna barkiet kbar