Mistoqsijiet mill-​Qarrejja

Fid-​dawl tal-​kmandi tal-​Bibbja dwar l-​użu xieraq tad-​demm, ix-​Xhieda taʼ Jehovah kif iħarsu lejn il-​proċedura medika taʼ li jintuża d-​demm tiegħek stess?

Kull Kristjan għandu jikkunsidra bis-​serjetà dak li tgħid il-​Bibbja, minflok ma jibbaża d-​deċiżjoni tiegħu fuq xi preferenza persunali biss jew xi rakkomandazzjoni medika. Din hi kwistjoni bejnu u bejn Jehovah.

Jehovah, li lilu nafu ħajjitna, ikkmandana biex la nieklu u lanqas nixorbu d-​demm. (Ġenesi 9:3, 4) Fil-​Liġi li ta lil Iżrael tal-​qedem, Alla poġġa limitu fuq l-​użu tad-​demm għaliex dan jirrappreżenta l-​ħajja. Hu ordna: “Għax ħajjet il-​laħam hi fid-​demm, u jien tajthulkom għal fuq l-​artal biex tagħmlu bih l-​espjazzjoni għalikom.” Xi ngħidu għal meta wieħed kien joqtol xi annimal għall-​ikel? Alla qal li f’dan il-​każ ir-​raġel “għandu jxerred demmha [tal-vittma] u jgħattih bit-​trab.”a (Levitiku 17:​11, 13) Jehovah rrepeta dan il-​kmand iktar minn darba. (Dewteronomju 12:​16, 24; 15:23) Il-​ktieb Ebrajk The Soncino Chumash jinnota: “Id-​demm m’għandux jiġi maħżun imma jrid jintgħamel mhux tajjeb għall-​użu billi jiġi mxerred maʼ l-​art.” L-​ebda Iżraeli ma kellu jieħu, jaħżen, u juża d-​demm taʼ ħlejqa oħra, ladarba l-​ħajja tagħha tappartjeni lil Alla.

L-​obbligu biex tinżamm il-​Liġi Mosajka spiċċa meta miet il-​Messija. Madankollu, il-​ħarsa t’Alla dwar il-​qdusija tad-​demm baqgħet l-​istess. Imqanqlin mill-​ispirtu qaddis t’Alla, l-​appostli ggwidaw lill-​Kristjani biex ‘jitbegħdu mid-​demm.’ Dan il-​kmand ma kellux jittieħed ħafif ħafif. Kien importanti moralment daqskemm kien importanti li jitbegħdu mill-​immoralità sesswali jew l-​idolatrija. (Atti 15:​28, 29; 21:25) Meta l-​għoti u t-​trasfużjonijiet tad-​demm saru komuni fis-​seklu 20, ix-​Xhieda taʼ Jehovah fehmu li din il-​prattika kienet tmur kontra l-​Kelma t’Alla.b

Xi kultant, jistaʼ jkun hemm xi tabib li jħeġġeġ lill-​pazjent biex xi ġimgħat qabel ma dan jagħmel operazzjoni jaħżen bil-​quddiem id-​demm tiegħu stess (preoperative autologous blood donation, jew PAD). Dan isir bil-​ħsieb li jekk jinqalaʼ l-​bżonn, il-​pazjent ikun jistaʼ jingħata trasfużjoni tad-​demm tiegħu stess. Madankollu, dan il-​mod kif jittieħed id-​demm, jinħażen, u mbagħad jingħata bħala trasfużjoni jmur direttament kontra dak li nsibu f’Levitiku u Dewteronomju. Id-​demm m’għandux jiġi maħżun; irid jiġi mxerred, bħallikieku jingħata lura lil Alla. Huwa veru li l-​Liġi Mosajka m’għadhiex tgħodd illum. Minkejja dan, ix-​Xhieda taʼ Jehovah jirrispettaw il-​prinċipji li Alla inkluda fiha, u huma determinati li ‘jitbegħdu mid-​demm.’ Għaldaqstant, aħna mhux biss ma nagħtux demm, imma lanqas ma naħżnu d-​demm tagħna stess għal xi trasfużjoni, ladarba dan għandu ‘jiġi mxerred.’ Din il-​prattika tmur kontra l-​liġi t’Alla.

Xi proċeduri jew testijiet oħrajn li jinvolvu d-​demm taʼ l-​individwu nnifsu m’humiex daqshekk f’konflitt ċar mal-​prinċipji t’Alla. Per eżempju, ħafna Kristjani aċċettaw li jittieħed xi ftit mid-​demm tagħhom biex jiġi eżaminat jew iċċekkjat, u mbagħad, dan il-​kampjun taʼ demm jintrema. Xi tobba jistgħu jirrikkmandaw xi proċeduri komplikati oħrajn li jinvolvu d-​demm taʼ l-​individwu nnifsu.

Per eżempju, matul ċerti proċeduri kirurġiċi, xi demm jistaʼ jintgħamel jiċċirkola ’l barra mill-​ġisem fi proċess imsejjaħ hemodilution. Il-​qawwa tad-​demm li jkun għad baqaʼ fil-​pazjent titnaqqas permezz taʼ fluwidu. Imbagħad, id-​demm li jkun qed jiċċirkola barra mill-​ġisem jerġaʼ jmur lura fil-​pazjent, u b’hekk il-​livell tad-​demm jerġaʼ jiġi għan-​normal. Bl-​istess mod, id-​demm li jgħaddi minn ġo ferita jistaʼ jinġabar u jitnaddaf biex b’hekk iċ-​ċelluli ħomor ikunu jistgħu jerġgħu jmorru lura fil-​pazjent. Dan il-​metodu fejn jiġu salvati ċ-​ċelluli huwa msejjaħ cell salvage. Fi proċess ieħor, id-​demm jistaʼ jgħaddi minn magna li għal xi ħin tagħmel ix-​xogħol li normalment isir mill-​organi tal-​ġisem (per eżempju, il-​qalb, il-​pulmun, jew il-​kliewi). Id-​demm mill-​magna mbagħad jerġaʼ jmur lura fil-​pazjent. Jerġaʼ fi proċeduri oħrajn, id-​demm jgħaddi minn apparat bħal passatur (ċentrifuga) sabiex jissaffa minn partijiet ħżiena jew li jagħmlu l-​ħsara. Jew il-​mira tistaʼ tkun ukoll li jittieħed xi ftit minn komponent primarju tad-​demm biex jintuża fuq parti oħra tal-​ġisem. Hemm testijiet ukoll fejn jittieħed ċertu ammont taʼ demm biex jiġi mmarkat jew biex jiġi mħallat maʼ xi mediċina, u mbagħad dan jerġaʼ jmur lura fil-​pazjent.

Id-dettalji jistgħu jvarjaw, u bla dubju, se jibqaʼ jkun hemm żviluppi ġodda f’dawk li huma proċeduri, kuri, u testijiet. M’hijiex ir-​responsabbiltà tagħna li noqogħdu nanalizzaw kull metodu differenti u nagħmlu deċiżjoni. Kull Kristjan irid jiddeċiedi għalih innifsu kif għandu jiġi wżat id-​demm tiegħu stess f’każ taʼ proċedura kirurġika, test mediku, jew terapija kurrenti. Hu għandu jikseb mingħand it-​tabib jew it-​tekniku l-​fatti bil-​quddiem dwar x’se jsir mid-​demm tiegħu fil-​proċedura. Imbagħad irid jiddeċiedi skond ma tippermettilu l-​kuxjenza tiegħu. (Ara l-​kaxxa.)

Il-Kristjani jridu jżommu f’moħħhom id-​dedikazzjoni tagħhom lil Alla u l-​obbligu tagħhom ‘li jħobbuh b’qalbhom kollha, b’ruħhom kollha, bil-​qawwa kollha tagħhom, u b’moħħhom kollu.’ (Luqa 10:27) Għal kuntrarju tal-​biċċa l-​kbira min-​nies fid-​dinja, ix-​Xhieda taʼ Jehovah jgħożżuha ħafna r-​relazzjoni tajba li għandhom m’Alla. Il-​Wieħed li Jagħti l-​Ħajja jħeġġiġna lkoll biex nafdaw fid-​demm li xerred Ġesù. Naqraw: “Fih [f’Ġesù Kristu] aħna għandna l-​fidwa bid-​demm tiegħu, il-​maħfra tad-​dnubiet.”—Efesin 1:7.

[Noti taʼ taħt]

[Kaxxa/Stampi f’paġna 31]

Mistoqsijiet li Għandek Tistaqsi Lilek Innifsek

Jekk xi ftit mid-​demm tiegħi se jintgħamel jiċċirkola ’l barra minn ġismi u din iċ-​ċirkulazzjoni tistaʼ saħansitra titwaqqaf għal xi ħin, se tippermettili l-​kuxjenza tiegħi biex inkompli nqis dan id-​demm bħala li għadu parti minni, u b’hekk ma jkunx meħtieġ li ‘jiġi mxerred maʼ l-​art’?

Se tniggiżni l-​kuxjenza tiegħi mħarrġa fuq il-​Bibbja jekk matul xi proċedura dijanjostika jew terapewtika jittieħed ftit mid-​demm tiegħi, jiġi trasformat, u mbagħad mitfugħ lura f’ġismi jew użat fuq ġismi?