Ix-​Xhieda taʼ Jehovah Jimxu ’l Quddiem b’Konvinzjoni Soda!

Rapport tal-​Laqgħa Annwali

F’DAN iż-​żmien taʼ xettiċiżmu u dubji, ix-​Xhieda taʼ Jehovah jispikkaw bħala Kristjani li għandhom konvinzjoni soda. Dan ħareġ ċar fil-​laqgħa annwali tal-​Watch Tower Bible and Tract Society of Pennsylvania. Din il-​laqgħa saret is-​Sibt, 7 t’Ottubru, 2000, fis-​Sala taʼ l-​Assemblea tax-​Xhieda taʼ Jehovah f’Jersey City, New Jersey.a

Iċ-chairman kien John E. Barr, membru tal-​Ġemgħa li Tiggverna tax-​Xhieda taʼ Jehovah. Fir-​rimarki tal-​ftuħ, hu stqarr: “Mill-​eluf taʼ miljuni li jgħixu fid-​dinja, aħna nafu u nemmnu li l-​Iben għażiż taʼ Jehovah, Kristu Ġesù, issa qiegħed fuq it-​tron fis-​smewwiet, jaħkem fost l-​għedewwa tiegħu.” Evidenza taʼ din il-​konvinzjoni soda kienet preżentata f’sitt rapporti kommoventi minn madwar id-​dinja.

Jegħlbu l-​Ispiritiżmu fil-​Ħaiti bil-​Verità tal-​Bibbja

L-​ispiritiżmu huwa mifrux sew fil-​Ħaiti. “Ħafna drabi,” qal John Norman, il-​koordinatur tal-​Kumitat tal-​Fergħa, “in-​nies jipprattikaw il-​vudu biex jipproteġu lilhom infushom.” Wieħed saħħâr bdew jidħlulu d-​dubji meta tilef riġlu f’inċident. ‘Jekk għandi l-​protezzjoni taʼ l-​ispirti, kif setgħet tiġrili ħaġa bħal din?’ ħaseb bejnu u bejn ruħu. Bħal ħafna oħrajn, dan ir-​raġel tgħallem il-​verità mingħand ix-​Xhieda taʼ Jehovah u ġie megħjun jeħles mill-​ispiritiżmu. Il-​possibbiltà li jkun hemm żjieda fil-​Ħaiti tidher mill-​fatt li fid-​19 t’April, 2000, l-​attendenza għall-​Mafkar tal-​mewt taʼ Kristu kienet erbaʼ darbiet iktar min-​numru taʼ pubblikaturi tas-​Saltna.

Żelu fit-​Territorju Vast tal-​Korea

Fil-​Korea, 40 fil-​mija tax-​Xhieda taʼ Jehovah huma fis-​servizz full-time. “B’din l-​armata tassew kbira taʼ pubblikaturi, it-​territorju tagħna taʼ ’l fuq minn 47 miljun ruħ jinħadem kważi darba fix-​xahar,” qal Milton Hamilton, il-​koordinatur tal-​Kumitat tal-​Fergħa. L-​iktar żjieda li tispikka kienet dik fil-​kongregazzjonijiet tal-​lingwa bis-​sinjali. F’wieħed mis-​circuits tal-​lingwa bis-​sinjali qed jikkonduċu mat-​800 studju tal-​Bibbja fid-​djar. Din hi medja taʼ studju għal kull pubblikatur. Sfortunatament, l-​aħwa żgħażagħ irġiel għadhom qed jiġu mitfugħin il-​ħabs minħabba n-​newtralità tagħhom. Madankollu, dawn il-​Kristjani leali jiġu trattati tajjeb u taʼ spiss iqabbduhom jagħmlu xogħol li jkun jirrikjedi fiduċja.

Ilaħħqu mal-​Bżonnijiet taż-​Żjieda fil-​Messiku

F’Awissu tas-​sena 2000, kien hemm quċċata taʼ 533,665 pubblikatur tas-​Saltna li għamlu r-​rapport tas-​servizz taʼ l-​għalqa fil-​Messiku. Għall-​Mafkar, l-​attendenza kienet iktar mit-​triplu taʼ dan in-​numru. “Il-​mira tagħna għal din is-​sena hija li nibnu 240 Sala tas-​Saltna oħra,” qal Robert Tracy, il-​koordinatur tal-​Kumitat tal-​Fergħa. “Madankollu,” kompla hu, “għandna bżonn ħafna iktar.”

Iż-żgħażagħ fost ix-​Xhieda taʼ Jehovah fil-​Messiku huma eżemplari. Qassis Kattoliku qal hekk dwar ċertu żagħżugħ: “Nixtieq li jkolli mqar wieħed bħalu fost is-​segwaċi tiegħi. Nammirahom lil dawn in-​nies għar-​rieda soda tagħhom u għal mod għaqli kif jużaw il-​Bibbja. Huma jiddefendu lil Alla, saħansitra billi jirriskjaw li jitilfu ħajjithom.”

Iżommu l-​Integrità Fost it-​Taqlib fi Sierra Leone

Minn mindu faqqgħet il-​gwerra ċivili fi Sierra Leone, f’April tas-​sena 1991, eluf taʼ nies sfaw maqtulin, feruti, jew immankati. “Il-​gwerra u t-​tbatija ħallew effett profond fuq in-​nies,” irrapporta Bill Cowan, il-​koordinatur tal-​Kumitat tal-​Fergħa. “Ħafna li qabel kienu indifferenti għall-​messaġġ tagħna issa jisimgħuna b’interess. M’hijiex xi ħaġa rari li jkun hemm xi ħadd li mingħajr ma jkun mistieden jaqbad u jidħol fis-​Sala tas-​Saltna għall-​ewwel laqgħa tiegħu. Fit-​triq, in-​nies taʼ sikwit iwaqqfu lill-​aħwa biex jitolbuhom studju tal-​Bibbja.” Minkejja t-​taqlib li għadu sejjer fil-​pajjiż, ix-​xogħol taʼ l-​ippridkar tas-​Saltna qed jagħti l-​frott fi Sierra Leone.

Proġett Kbir taʼ Bini fl-​Afrika t’Isfel

Bħalissa, hemm bżonn t’eluf taʼ Swali tas-​Saltna fit-​territorju li jaqaʼ taħt l-​uffiċċju tal-​fergħa fl-​Afrika t’Isfel. Diġà nbnew mijiet taʼ swali. “Minflok ma jiltaqgħu f’xi gabuba taʼ l-​injam jew taħt xi siġra, bħalma kienu jagħmlu qabel, ħutna jistgħu jiltaqgħu f’post xieraq fejn jistgħu joqogħdu bil-​qegħda komdi,” qal John Kikot, wieħed mill-​membri tal-​Kumitat tal-​Fergħa. “Għalkemm ħafna minn dawn is-​Swali tas-​Saltna huma sempliċi ħafna, ġeneralment jispikkaw bħala l-​iktar impressjonanti meta mqabblin mal-​bqija tal-​bini fil-​lokal tagħhom. F’xi żoni ġie rapportat li wara li tinbena Sala tas-​Saltna, il-​kongregazzjoni tiżdied iktar mid-​doppju fis-​sena taʼ wara.”

Ġenerazzjoni Ġdida taʼ Xhieda fl-​Ukraina

Matul is-​sena taʼ servizz 2000, dan il-​pajjiż kellu quċċata taʼ 112,720 pubblikatur. Iktar minn 50,000 minnhom tgħallmu l-​verità tal-​Bibbja f’dawn l-​aħħar ħames snin. “Tabilħaqq, Jehovah qajjem ġenerazzjoni ġdida u żagħżugħa taʼ Xhieda biex ixandru ismu!” qal John Didur, il-​koordinatur tal-​Kumitat tal-​Fergħa. “F’dawn l-​aħħar sentejn,” żied hu, “ħallejna iktar minn 50 miljun rivista. Dan l-​ammont hu daqs il-​popolazzjoni tal-​pajjiż. Kull xahar, bħala medja, nirċievu maʼ l-​elf ittra mingħand nies interessati fil-​messaġġ u li jridu iktar informazzjoni.”

Partijiet Eċċitanti Oħrajn fil-​Programm

Daniel Sydlik, membru tal-​Ġemgħa li Tiggverna, ta taħdita interessanti ħafna. L-​artiklu “Kif il-​Ġemgħa li Tiggverna Hi Differenti minn Korporazzjoni Legali,” li jidher f’din ir-​rivista, huwa bbażat fuq din il-​preżentazzjoni informattiva.

Theodore Jaracz tal-​Ġemgħa li Tiggverna ta taħdita li ġġagħlek taħseb bit-​titlu “L-​Indokraturi u l-​Qaddejja Ministerjali Huma Maħturin b’Mod Teokratiku.” Wieħed mill-​artikli f’din ir-​rivista hu bbażat fuq dan is-​suġġett.

Il-​laqgħa annwali inkludiet ukoll taħdita minn David Splane, membru tal-​Ġemgħa li Tiggverna. Din it-​taħdita li tqanqal kienet dwar l-​iskrittura għas-​sena 2001. Din hi bbażata fuq il-​kliem taʼ l-​appostlu Pawlu: “Ieqfu sħaħ u b’konvinzjoni soda fir-​rieda kollha t’Alla.” (Kolossin 4:​12, NW) Madwar id-​dinja, ix-​Xhieda taʼ Jehovah huma determinati li jagħmlu dan waqt li jippridkaw lealment l-​aħbar tajba tas-​Saltna t’Alla maʼ l-​art kollha.—Mattew 24:14.

[Noti taʼ taħt]