Ibqgħu Mqajmin, Imxu ’l Quddiem b’Kuraġġ!

Rapport Dwar Laqgħat Speċjali

MIN jistaʼ sinċerament jiċħad li qed ngħixu fi “żmien iebes”? Bħala Xhieda taʼ Jehovah, m’aħniex skansati mill-​pressjonijiet tal-​ħajja f’dan iż-​żmien taʼ “l-​aħħar tad-​dinja.” (2 Timotju 3:​1-5) Iżda aħna nirrikonoxxu li n-​nies għandhom bżonn l-​għajnuna. Huma ma jafux xi jfissru l-​ġrajjiet li qed iseħħu fid-​dinja. Għandhom bżonn il-​faraġ u t-​tama. X’inhu l-​irwol prinċipali tagħna f’li ngħinu lil għajrna?

Għandna inkarigu mogħti lilna minn Alla biex naqsmu l-​aħbar tajba tas-​Saltna stabbilità tiegħu. (Mattew 24:14) In-​nies għandhom bżonn ikunu jafu li din is-​Saltna tas-​sema hija l-​unika tama għall-​bnedmin. Madankollu, il-​messaġġ tagħna mhux dejjem jintlaqaʼ tajjeb. F’xi postijiet l-​attività tagħna ġiet projbita u ħutna ġew persegwitati. Xorta waħda, ma naqtgħux qalbna. B’fiduċja sħiħa f’Jehovah, ninsabu determinati li nibqgħu mqajmin u mexjin ’il quddiem b’kuraġġ, waqt li niddikjaraw l-​aħbar tajba bla waqfien.—Atti 5:42.

Din id-​determinazzjoni soda kienet tidher ċara f’laqgħat speċjali li saru f’Ottubru taʼ l-​2001. Nhar is-​Sibt, 6 t’Ottubru, inżammet il-​laqgħa annwali tal-​Watch Tower Bible and Tract Society of Pennsylvania fis-​Sala taʼ l-​Assembleat tax-​Xhieda taʼ Jehovah fil-​Belt taʼ Jersey, New Jersey, ġewwa l-​Istati Uniti.a Fil-​jum taʼ wara, saru iżjed laqgħat f’erbaʼ postijiet, tlieta fl-​Istati Uniti u waħda fil-​Kanada.b

Fil-kummenti tal-​ftuħ għal din il-​laqgħa annwali, iċ-​chairman, Samuel F. Herd, membru tal-​Ġemgħa li Tiggverna tax-​Xhieda taʼ Jehovah, irrefera għal Salm 92:​2, 5 (92:​1, 4, NW) u mbagħad qal: “Għandna nuru li aħna grati.” Tabilħaqq, ġew provduti raġunijiet għala għandna nkunu grati f’ħames rapporti minn madwar id-​dinja.

Rapporti minn Kull Parti tad-​Dinja

Ħuna Alfred Kwakye tana rapport dwar il-​progress tax-​xogħol taʼ l-​ippridkar fil-​Gana, li qabel kienet magħrufa bħala l-​Gold Coast. Ix-​xogħol tagħna f’dan il-​pajjiż kien projbit għal ammont taʼ snin. In-​nies kienu jistaqsuna: “Għala ġejtu projbiti? X’għamiltu?” Dan kien jipprovdilna opportunitajiet biex nagħtu xiehda, spjega Ħuna Kwakye. Fl-​1991, meta tneħħiet il-​projbizzjoni, kien hemm 34,421 Xhud taʼ Jehovah fil-​Gana. F’Awissu taʼ l-​2001, it-​total kien taʼ 68,152—żjieda taʼ 98 fil-​mija. Bħalissa għaddejjin pjanijiet biex tinbena Sala taʼ l-​Assembleat li tesaʼ 10,000 ruħ. Jidher ċar li ħutna spiritwali fil-​Gana qed jużaw bl-​aħjar mod il-​libertà reliġjuża li kisbu.

Minkejja t-​taqlib politiku, ħutna fl-​Irlanda qed jieħdu sehem fil-​ministeru b’mod attiv, u huma rispettati għan-​newtralità tagħhom. Fl-​Irlanda hemm 115-il kongregazzjoni f’6 circuits, qal il-​koordinatur tal-​Kumitat tal-​Fergħa Peter Andrews. Ħuna Andrews tkellem dwar l-​esperjenza taʼ Liam, tifel t’għaxar snin li ma jibżax jagħti xiehda l-​iskola. Liam ħalla Il-​Ktieb Tiegħi taʼ Stejjer mill-​Bibbja, pubblikat mix-​Xhieda taʼ Jehovah, maʼ 25 minn sħabu tal-​klassi u maʼ l-​għalliema tiegħu. Liam ried jitgħammed, iżda xi ħadd staqsieh jekk ma jaħsibx li għadu żgħir wisq. Liam wieġeb: “Mhux l-​età tiegħi imma l-​imħabba tiegħi għal Jehovah għandha tkun l-​iktar ħaġa li tgħodd. Il-​magħmudija tiegħi se turi kemm inħobbu.” Liam għandu l-​mira li jsir missjunarju meta jikber.

Fl-​1968 kien hemm 5,400 pubblikatur taʼ l-​aħbar tajba fil-​Venezwela. Imma issa hemm iktar minn 88,000 innota Stefan Johansson, il-​koordinatur tal-​Kumitat tal-​Fergħa. U hemm il-​potenzjal għal iktar żjieda peress li iktar minn 296,000 attendew il-​Mafkar fis-​sena 2001. F’Diċembru taʼ l-​1999, xita bil-​qliel kaxkret magħha ħafna ġebel u tajn li ġie stmat li qatel 50,000 ruħ, inkluż għadd taʼ Xhieda. Waħda mis-​Swali tas-​Saltna mtliet bit-​tajn sa nofs metru ’l isfel mis-​saqaf. Meta xi ħadd issuġġerixxa li l-​bini jiġi abbandunat, l-​aħwa wiġbuh: “Ma tarax! Din hija s-​Sala tas-​Saltna tagħna u żgur li mhux se nabbandunawha issa.” Huma bdew jaħdmu, u neħħew minnha tunnellati taʼ tajn, ġebel, u imbarazz ieħor. Is-​sala ġiet irranġata, u l-​aħwa jgħidu li issa hi isbaħ milli kienet qabel ma seħħ id-​diżastru!

Fil-​Filippini jitkellmu b’87 lingwa u djalett differenti, qal Ħuna Denton Hopkinson, il-​koordinatur tal-​Kumitat tal-​Fergħa. Matul din l-​aħħar sena taʼ servizz, in-​New World Translation of the Holy Scriptures kompluta ġiet pubblikata fit-​tliet lingwi prinċipali tal-​pajjiż—is-​Cebuano, l-​Ilokon, u t-​Tagalog. Ħuna Hopkinson tkellem dwar l-​esperjenza taʼ tifel taʼ disaʼ snin li qara l-​ktieb Good News—To Make You Happy, pubblikat mix-​Xhieda taʼ Jehovah. Hu kiseb iktar pubblikazzjonijiet mill-​fergħa, li qrahom ukoll, iżda l-​familja tiegħu opponietlu. Snin wara meta kien qed jattendi l-​iskola tal-​mediċina, ikkuntattja lill-​fergħa u talab għal studju tal-​Bibbja. Tgħammed fl-​1996 u ftit wara daħal fil-​ministeru full-time. Issa qed jaqdi fl-​uffiċċju tal-​fergħa flimkien maʼ martu.

‘Puerto Rico tagħmel ix-​xogħol taʼ l-​“esportazzjoni tax-​Xhieda,”’ spjega l-​koordinatur tal-​Kumitat tal-​Fergħa Ronald Parkin. Hemm xi 25,000 pubblikatur fuq il-​gżira, u n-​numru baqaʼ l-​istess għal snin sħaħ. Għala? Mela, huwa stmat li Puerto Rico “tesporta” lejn l-​Istati Uniti xi 1,000 pubblikatur fis-​sena, għax ħafna minnhom imorru joqogħdu hemmhekk minħabba raġunijiet ekonomiċi. Ħuna Parkin tkellem dwar deċiżjoni storika li ttieħdet mill-​qorti u li tinvolvi lil Luis, Xhud taʼ 17-il sena li kellu l-​lewkimja. Minħabba li Luis irrifjuta d-​demm, il-​każ tiegħu ttieħed il-​qorti. L-​imħallef riedet tkellmu direttament, u għalhekk żaritu l-​isptar. Luis staqsieha: “X’inhi r-​raġuni li kieku wettaqt att kriminali serju, kont tiġġudikani bħala adult, iżda għaliex irrid nobdi ’l Alla, tittrattani bħala minorenni?” L-​imħallef ikkonvinċiet ruħha li hu kien minorenni matur u kapaċi jiddeċiedi għalih innifsu.

Wara r-​rapporti mill-​pajjiżi ’l bogħod, Harold Corkern, mill-​Kumitat tal-​Fergħa taʼ l-​Istati Uniti, intervista lil erbaʼ aħwa li ilhom jaqdu lil Jehovah għal żmien twil. Arthur Bonno qattaʼ 51 sena fis-​servizz full-time u issa qed jaqdi fil-​Kumitat tal-​Fergħa fl-​Ekwador. Angelo Catanzaro qattaʼ 59 sena fis-​servizz full-time, u f’ħafna minnhom qeda bħala indokratur li jivvjaġġa. Richard Abrahamson iggradwa mill-​Iskola taʼ Gilgħad fl-​1953, u kellu l-​privileġġ li jindokra x-​xogħol fid-​Danimarka għal 26 sena qabel ma reġaʼ lura fil-​Betel taʼ Brooklyn. Fl-​aħħarnett, kulħadd ħa pjaċir jisma lil Carey W. Barber li għandu 96 sena. Ħuna Barber tgħammed fl-​1921, qattaʼ 78 sena fil-​ministeru full-time, u ilu jaqdi bħala membru tal-​Ġemgħa li Tiggverna mill-​1978.

Taħditiet li Jqanqlu

Il-​laqgħa annwali kienet tinkludi serje taʼ taħditiet li jġagħluk taħseb. Ħuna Robert W. Wallen tkellem dwar is-​suġġett “Poplu għal Ismu.” Aħna l-​poplu li nġorru l-​isem t’Alla, u ninsabu f’iktar minn 230 pajjiż. Jehovah tana “ġejjieni mimli tama.” (Ġeremija 29:11) Irridu nkomplu nxerrdu l-​għarfien dwar is-​Saltna t’Alla, billi naqsmu maʼ kulħadd il-​messaġġ meraviljuż taʼ faraġ u serħan. (Isaija 61:1) “Jalla jum wara l-​ieħor inkomplu ngħixu fi qbil maʼ dak l-​isem li bih nissejħu, Xhieda taʼ Jehovah,” ikkonkluda Ħuna Wallen.—Isaija 43:10.

L-​aħħar parti tal-​programm kienet serje taʼ taħditiet li ngħataw minn tliet membri tal-​Ġemgħa li Tiggverna. Kien jisimha “Issa Huwa ż-​Żmien li Nibqgħu Mqajmin, Nieqfu Sodi, u Nsiru Setgħanin.”—1 Korintin 16:13.

L-ewwel, Ħuna Stephen Lett tkellem dwar is-​suġġett “Ibqgħu Mqajmin f’Din is-​Siegħa taʼ l-​Aħħar.” L-​irqad fiżiku huwa rigal, spjega Ħuna Lett. Jerġaʼ jagħtina s-​saħħa. Madankollu, l-​irqad spiritwali qatt m’hu tajjeb. (1 Tessalonikin 5:6) Mela, kif nistgħu nibqgħu mqajmin spiritwalment? Ħuna Lett semmaʼ tliet “pilloli” spiritwali: (1) Inħabirku dejjem fil-​ħidma tal-​Mulej. (1 Korintin 15:58) (2) Inkunu konxji tal-​bżonn spiritwali tagħna. (Mattew 5:​3, NW) (3) Inwieġbu b’mod pożittiv għall-​pariri tal-​Bibbja sabiex naġixxu bil-​għaqal.—Proverbji 13:20.

Ħuna Theodore Jaracz ta taħdita li tqanqal jisimha “Żommu Sodi taħt Prova.” Filwaqt li rrefera għal Apokalissi 3:​10, Ħuna Jaracz staqsa: “X’inhi ‘s-​siegħa tat-​tiġrib’?” Dan it-​tiġrib jiġi “f’jum il-​Mulej,” iż-​żmien li qed ngħixu fih bħalissa. (Apokalissi 1:10) Il-​prova hija marbuta mal-​kwistjoni ewlenija—nappoġġaw aħna s-​Saltna stabbilità t’Alla jew is-​sistema t’affarijiet mill-​agħar taʼ Satana? Sakemm tintemm din is-​siegħa tat-​tiġrib, żgur li se niffaċċjaw provi u diffikultajiet. Se nibqgħu leali lejn Jehovah u l-​organizzazzjoni tiegħu? ‘Se jkollna nuru lealtà bħal din b’mod individwali,’ innota Ħuna Jaracz.

Fl-aħħar, Ħuna John E. Barr tkellem dwar it-​tema “Sir Setgħani Bħala Bniedem Spiritwali.” Waqt li rrefera għal Luqa 13:​23-25, hu nnota li rridu nitħabtu biex ‘nidħlu mill-​bieb id-​dejjaq.’ Ħafna ma jirnexxilhomx għax ma jħabirkux biżżejjed biex isiru setgħanin. Sabiex insiru Kristjani maturi, irridu nitgħallmu napplikaw il-​prinċipji tal-​Bibbja f’kull aspett taʼ ħajjitna. Ħuna Barr ħeġġeġ: “Żgur taqblu li issa huwa ż-​żmien li (1) inżommu ’l Jehovah l-​ewwel u qabel kollox; (2) insiru setgħanin; u (3) nitħabtu biex nagħmlu r-​rieda tiegħu. B’dan il-​mod se nkunu nistgħu ngħaddu mill-​bieb id-​dejjaq li jwassal għal ħajja meraviljuża u bla tmiem.”

Hekk kif il-​laqgħa annwali waslet fl-​aħħar, kien għad hemm mistoqsija li ma ġietx imwieġba: X’se tkun l-​iskrittura għas-​sena taʼ servizz 2002? Dik il-​mistoqsija ġiet imwieġba l-​għada.

Laqgħa Oħra

Kulħadd kien qed jistenna bil-​ħerqa l-​Ħadd fil-​għodu hekk kif beda l-​programm tal-​laqgħa supplimentarja. Din bdiet b’reviżjoni fil-​qosor tat-​Torri taʼ l-​Għassa għal dik il-​ġimgħa, segwita minn preżentazzjoni qasira taʼ xi punti prinċipali tal-​laqgħa annwali. Imbagħad, kulħadd ħa pjaċir jismaʼ taħdita bbażata fuq l-​iskrittura tas-​sena 2002: “Ejjew għandi, . . . u jiena nserraħkom.” (Mattew 11:28) It-​taħdita kienet ibbażata fuq l-​artikli taʼ studju li ħarġu iktar tard fit-​Torri taʼ l-​Għassa tal-​15 taʼ Diċembru, 2001.

Wara dan, xi wħud li f’Awissu taʼ l-​2001 kienu delegati tal-​konvenzjonijiet speċjali “Għalliema tal-​Kelma t’Alla” li saru fi Franza u l-​Italja tkellmu dwar dak li laqathom.c Fl-​aħħarnett, żewġ taħditiet taʼ interess speċjali fil-​programm tal-​jum ngħataw minn żewġ kelliema li kienu fuq żjara mill-​Betel taʼ Brooklyn.

L-ewwel taħdita kien jisimha “Nafdaw f’Jehovah b’Kuraġġ Matul Dawn iż-​Żminijiet Kritiċi.” Il-​kelliemi żviluppa l-​punti prinċipali li ġejjin: (1) Għall-​poplu t’Alla dejjem kien vitali li jafda f’Jehovah b’kuraġġ. Il-​Bibbja fiha ħafna eżempji taʼ nies li wrew kuraġġ u fidi meta ffaċċjaw l-​oppożizzjoni. (Lhud 11:1—12:3) (2) Jehovah jipprovdilna bażi soda sabiex nafdawh b’għajnejna magħluqa. L-​għemil u l-​Kelma tiegħu huma garanzija li hu jieħu ħsieb il-​qaddejja tiegħu u qatt m’hu se jinsiehom. (Lhud 6:10) (3) Il-​kuraġġ u l-​fiduċja huma speċjalment bżonnjużi llum. Kif bassar Ġesù, aħna ‘mibgħudin.’ (Mattew 24:9) Sabiex nissaportu għandna bżonn nistrieħu fuq il-​Kelma t’Alla, ikollna fiduċja li l-​ispirtu tiegħu qiegħed magħna, u nuru kuraġġ biex inkomplu niddikjaraw l-​aħbar tajba. (4) L-​eżempji juruna li anki bħalissa qed niffaċċjaw l-​oppożizzjoni. Kulħadd tqanqal profondament meta l-​kelliemi beda jirrakkonta minn xiex għaddew ħutna fl-​Armenja, fi Franza, fil-​Georgia, fil-​Kazakstan, fir-​Russja, u fit-​Turkmenistan. Verament, issa huwa ż-​żmien li nuru kuraġġ u fiduċja f’Jehovah!

L-aħħar kelliemi żvolġa t-​tema “Nimxu ’l Quddiem Magħqudin maʼ l-​Organizzazzjoni taʼ Jehovah.” It-​taħdita ħarġet għadd taʼ punti li huma f’waqthom. (1) Il-​progress kontinwu tal-​poplu taʼ Jehovah qed ikun osservat minn ħafna. Ix-​xogħol taʼ l-​ippridkar u l-​konvenzjonijiet tagħna jiġbdu l-​attenzjoni tal-​pubbliku fuqna. (2) Jehovah waqqaf organizzazzjoni li hi magħquda. Fis-​sena 29 E.K., Ġesù ġie midluk bl-​ispirtu qaddis bl-​iskop li jġib “kollox”—kemm lil dawk li għandhom il-​prospett għas-​sema kif ukoll lil dawk bit-​tama għall-​ħajja fuq l-​art—fil-​familja magħquda t’Alla. (Efesin 1:​8-10) (3) Il-​konvenzjonijiet huma turija li tispikka taʼ għaqda internazzjonali. Dan kien jidher ċar fil-​konvenzjonijiet speċjali li saru fi Franza u l-​Italja f’Awissu li għadda. (4) Riżoluzzjoni inkuraġġanti ntlaqgħet fi Franza u l-​Italja. Il-​kelliemi kkwota xi siltiet minn din ir-​riżoluzzjoni li tqanqlek. Il-​kliem kollu tar-​riżoluzzjoni jidher hawn taħt.

Fil-konklużjoni taʼ l-​aħħar taħdita, il-​kelliemi mistieden qara avviż li jmiss il-​qalb imħejji mill-​Ġemgħa li Tiggverna. Parti minnu kien jgħid: “Issa huwa ż-​żmien biex nibqgħu mqajmin u għassa, filwaqt li nagħrfu kif qed jiżviluppaw il-​ġrajjiet fix-​xena dinjija. . . . Nixtiequ ngħaddulkom l-​istima u l-​imħabba li l-​Ġemgħa li Tiggverna għandha lejkom u lejn il-​kumplament tal-​poplu t’Alla. Jalla jkompli jberikkom bil-​kbir filwaqt li tagħmlu r-​rieda tiegħu b’qalbkom kollha.” Il-​poplu taʼ Jehovah maʼ kullimkien jinsab determinat li jibqaʼ mqajjem f’dawn iż-​żminijiet ebsin u jibqaʼ miexi ’l quddiem b’kuraġġ maʼ l-​organizzazzjoni magħquda taʼ Jehovah.

[Noti taʼ taħt]

[Kaxxa/Stampi f’paġna 29-31]

Riżoluzzjoni

F’Awissu taʼ l-​2001 inżammu konvenzjonijiet speċjali “Għalliema tal-​Kelma t’Alla” fi Franza u l-​Italja. F’dawn il-​konvenzjonijiet, ġiet preżentata riżoluzzjoni inkuraġġanti. Fil-​paragrafi li ġejjin hawn imniżżel il-​kliem taʼ din ir-​riżoluzzjoni.

“BĦALA XHIEDA TAʼ JEHOVAH, ilkoll kemm aħna miġburin flimkien f’din il-​konvenzjoni ‘Għalliema tal-​Kelma t’Alla’ ngħatajna tagħlim li hu ferm taʼ benefiċċju. Is-​sors taʼ dan it-​tagħlim ġie identifikat biċ-​ċar. It-​tagħlim mhux ġej mill-​bniedem, iżda ġej mill-​Wieħed deskritt mill-​profeta Isaija bħala ‘l-​Istruttur Grandjuż’ tagħna. (Isaija 30:​20, NW) Innota t-​tfakkira taʼ Jehovah li nsibu f’Isaija 48:17: ‘Jien hu l-​Mulej, Alla tiegħek; jien ngħallmek għall-​ġid tiegħek, u nqabbdek it-​triq fejn għandek timxi.’ Kif iwettqu dan? Il-​mod ewlieni hu permezz tal-​Bibbja, l-​iktar ktieb li ġie tradott u mifrux fid-​dinja, li tgħidilna mingħajr tlaqliq: ‘L-​Iskrittura kollha hija mnebbħa minn Alla u taʼ benefiċċju.’—2 Timotju 3:​16, NW.

“Illum, l-​umanità għandha bżonn urġenti taʼ dan it-​tagħlim li hu tant taʼ benefiċċju. Għala nistgħu ngħidu hekk? X’jirrikonoxxu n-​nies li għandhom id-​dehen meta jaħsbu dwar ix-​xena taʼ din id-​dinja mħawda u li dejjem tinbidel? Sempliċement dan: Għalkemm miljuni ġew mgħallma permezz tas-​sistemi t’edukazzjoni tad-​dinja, hawn nuqqas kbir taʼ valuri tajbin u n-​nies ma jafux jagħżlu bejn it-​tajjeb u l-​ħażin. (Isaija 5:​20, 21) Hawn ħafna nies li ma jafu xejn dwar il-​Bibbja. Filwaqt li t-​teknoloġija tipprovdi aċċess għal informazzjoni bix-​xabaʼ permezz tal-​kompjuters, fejn huma t-​tweġibiet għall-​mistoqsijiet vitali bħal, X’inhu l-​iskop tal-​ħajja? Kif nistgħu nifhmu l-​ġrajjiet li qed iseħħu fi żmienna? Hemm tama ċerta għall-​futur? Il-​paċi u s-​sigurtà qatt se jsiru realtà? Minbarra dan, fuq l-​ixkafef tal-​libreriji ssib miljuni taʼ paġni b’xogħlijiet taʼ referenza li jitkellmu prattikament fuq kull suġġett. Xorta waħda, il-​bniedem jerġaʼ jirrepeti l-​istess żbalji tal-​passat. Il-​kriminalità qed tiżdied bl-​addoċċ. Ċertu mard li kien maħsub li tneħħa għalkollox reġaʼ feġġ, filwaqt li mard ieħor, bħall-​AIDS, qed jinfirex b’mod allarmanti. Il-​ħajja tal-​familja qed tispiċċa fix-​xejn b’ħeffa tal-​biżaʼ. It-​tinġis qed iħassar l-​ambjent. It-​terroriżmu u l-​armamenti li jeqirdu popolazzjonijiet sħaħ qed jheddu l-​paċi u s-​sigurtà. Problemi li m’hawnx soluzzjoni għalihom qed ikomplu jiżdiedu. X’inhu l-​irwol xieraq tagħna f’li ngħinu lil għajrna f’dawn iż-​żminijiet kritiċi? Hemm xi tagħlim li jispjega x’qed jikkaġuna l-​inkwiet tal-​bniedem u mhux biss juri kif tgħix ħajja aħjar issa iżda joffri tama sabiħa u ċerta għall-​futur?

“L-​inkarigu Skritturali tagħna hu li ‘mmorru nagħmlu dixxipli mill-​ġnus kollha, ngħallmuhom iħarsu dak kollu li Kristu ordnalna.’ (Mattew 28:​19, 20) Dan l-​inkarigu ġie mogħti minn Ġesù Kristu nnifsu wara li miet u ġie rxoxtat, meta ngħata l-​awtorità kollha fis-​sema u fl-​art. Hija ferm superjuri mill-​attivitajiet kollha li jinkuraġġixxi l-​bniedem. Mill-​ħarsa t’Alla, l-​inkarigu tagħna, li jiffoka fuq il-​bżonnijiet spiritwali taʼ dawk li huma bil-​ġuħ għat-​tjieba, hu l-​iktar wieħed importanti u għandu jingħata l-​prijorità. Għandna bażi Skritturali soda biex nieħdu dan l-​inkarigu bis-​serjetà.

“Għalhekk huwa meħtieġ li nżommu din l-​attività l-​ewwel f’ħajjitna. Bl-​għajnuna u l-​barka t’Alla, ix-​xogħol se jsir. Dan minkejja l-​ħafna distrazzjonijiet, ostakli, u oppożizzjoni mingħand gruppi reliġjużi u politiċi, li huma kollha mfasslin biex jipprovaw iwaqqfu l-​progress taʼ dan il-​programm globali taʼ tagħlim. Ninsabu kunfidenti u fiduċjużi li dan ix-​xogħol se jkompli jirnexxi u se jitwettaq kompletament. Għala nistgħu nkunu daqshekk ċerti? Għaliex il-​Mulej Ġesù Kristu wiegħed li se jkun magħna fil-​ministeru mogħti lilna minn Alla sat-​tmiem taʼ din is-​sistema t’affarijiet.

“L-​umanità mnikkta waslet fi tmiemha. L-​inkarigu li għandna f’idejna jrid jitwettaq qabel jasal it-​tmiem. Għalhekk, aħna bħala Xhieda taʼ Jehovah, ninsabu riżoluti li:

“L-​ewwel: Bħala ministri dedikati, aħna determinati li nżommu l-​interessi tas-​Saltna l-​ewwel f’ħajjitna u li nkomplu nikbru spiritwalment. Biex nagħmlu dan, it-​talb tagħna jinsab fi qbil mal-​kliem taʼ Salm 143:10: ‘Għallimni nagħmel ir-​rieda tiegħek, għax int Alla tiegħi.’ Dan jirrikjedi li nkunu studenti ħabrieka, li nistinkaw biex naqraw il-​Bibbja kuljum, u li nagħmlu studju u riċerka persunali. Sabiex nuru lil kulħadd li aħna mexjin ’il quddiem, se nagħmlu kull sforz raġunevoli biex nippreparaw u nibbenefikaw bis-​sħiħ mill-​edukazzjoni teokratika provduta fil-​laqgħat tal-​kongregazzjoni, fl-​assembleat tas-​circuit, u fil-​konvenzjonijiet distrettwali, nazzjonali, u internazzjonali.—1 Timotju 4:15; Lhud 10:​23-25.

“It-​tieni: Sabiex niġu mgħallmin minn Alla, se nieklu biss mill-​mejda tiegħu u noqogħdu attenti li nobdu t-​twissija tal-​Bibbja dwar it-​tagħlim qarrieq tad-​demonji. (1 Korintin 10:21; 1 Timotju 4:1) Se nieħdu prekawzjoni speċjali biex nevitaw kulma hu taʼ ħsara, inkluż il-​gideb reliġjuż, l-​argumenti vojta, il-​perverżjonijiet sesswali taʼ mistħija, il-​pjaga tal-​pornografija, id-​divertiment mhux dinjituż, u dak kollu li m’huwiex fi qbil mat-​tagħlim li jibni. (Rumani 1:​26, 27; 1 Korintin 3:20; 1 Timotju 6:3; 2 Timotju 1:13) B’apprezzament lejn l-​għotjiet fi rġiel, li huma kwalifikati biex jgħallmu dak li jibni, se nuru rispett ġenwin lejn l-​isforzi tagħhom u se nikkooperaw magħhom b’qalbna kollha biex inżommu l-​indafa u t-​tjieba f’dawk li huma livelli morali u spiritwali tal-​Kelma t’Alla.—Efesin 4:​7, 8, 11, 12; 1 Tessalonikin 5;12, 13; Titu 1:9.

“It-​tielet: Bħala ġenituri Kristjani, se nagħmlu sforz b’qalbna kollha sabiex ngħallmu ’l uliedna mhux biss bil-​kliem iżda wkoll bl-​eżempju. It-​tħassib ewlieni tagħna hu li ngħinuhom miċ-​ċokon biex jitgħallmu ‘l-​Kotba Mqaddsa’ ħalli jkollhom ‘l-​għerf li jwassal għas-​salvazzjoni.’ (2 Timotju 3:15) Se nżommu sew f’moħħna li jekk irrabbuhom fid-​dixxiplina u t-​twiddib taʼ Jehovah inkunu qed nagħtuhom l-​aqwa opportunità biex jesperjenzaw il-​wegħda divina li ‘jaħbtilhom tajjeb u jdumu żmien twil fuq l-​art.’—Efesin 6:​1-4, NW.

“Ir-​rabaʼ: Meta niffaċċjaw ansjetajiet jew problemi serji, l-​ewwel u qabel kollox, se ‘nuru ’l Alla xi jkollna bżonn,’ billi għandna ċ-​ċertezza li ‘s-​sliem taʼ Alla, sliem li jgħaddi kull ma l-​moħħ jistaʼ jifhem,’ se jħarisna. (Filippin 4:​6, 7) Peress li ġejna taħt il-​madmad taʼ Kristu, se nsibu s-​serħan. Għax nafu li Alla jieħu ħsiebna, mhux se noqogħdu lura milli nitfgħu l-​ansjetajiet tagħna fuqu.—Mattew 11:​28-30; 1 Pietru 5:​6, 7.

Il-​ħames: Biex nesprimu l-​gratitudni tagħna lejn Jehovah għall-​privileġġ li nkunu għalliema tal-​Kelma tiegħu, se nġeddu l-​isforzi tagħna biex ‘inxandru bir-​reqqa l-​kelma tal-​verità’ u ‘naqdu sew il-​ministeru tagħna.’ (2 Timotju 2:15; 4:5) Peress li aħna konxji ħafna taʼ dak li hu involut, nixtiequ minn qalbna nfittxu nies li jixirqilhom u nikkultivaw iż-​żerriegħa li niżirgħu. Barra minn hekk, se ntejbu t-​tagħlim tagħna billi nikkonduċu b’mod effettiv iktar studji tal-​Bibbja fid-​djar. Dan se jġibna iktar fi qbil mar-​rieda t’Alla ‘li jrid li l-​bnedmin kollha jsalvaw u jaslu biex jagħrfu l-​verità.’—1 Timotju 2:​3, 4.

“Is-​sitta: Matul is-​seklu li għadda u f’dan is-​seklu, ix-​Xhieda taʼ Jehovah f’ħafna pajjiżi għaddew minn diversi għamliet t’oppożizzjoni u persekuzzjoni. Iżda Jehovah dejjem wera li hu magħna. (Rumani 8:31) Il-​Kelma tiegħu li ma tonqosx tiżgurana li l-​‘ebda arma magħmula kontrina’ biex tfixkel, tnaqqas, jew twaqqaf l-​ippridkar tagħna tas-​Saltna u x-​xogħol tat-​tagħlim m’hi se tirnexxi. (Isaija 54:17) Fi staġun favorevoli jew taʼ inkwiet, ma nistgħux nieqfu nitkellmu l-​verità. Aħna determinati li nwettqu l-​inkarigu taʼ ppridkar u taʼ tagħlim li għandna b’urġenza. (2 Timotju 4:​1, 2) Il-​mira tagħna hi li nxerrdu l-​aħbar tajba tas-​Saltna t’Alla bl-​iktar mod sħiħ possibbli u man-​nies tal-​ġnus kollha. B’hekk, dawn se jibqaʼ jkollhom l-​opportunità jitgħallmu dwar il-​provvediment li jiksbu ħajja taʼ dejjem f’dinja ġdida taʼ tjieba. Bħala folla magħquda taʼ għalliema tal-​Kelma t’Alla, id-​determinazzjoni tagħna hi li nkomplu nsegwu l-​eżempju taʼ l-​Għalliem il-​Prim, Ġesù Kristu, u nirriflettu l-​kwalitajiet qaddisa tiegħu. Dan kollu se nagħmluh biex nonoraw u nfaħħru lill-​Istruttur Grandjuż u d-​Donatur tal-​Ħajja, Alla Jehovah.

“Dawk kollha li qed jattendu din il-​konvenzjoni u li jridu jadottaw din ir-​riżoluzzjoni, jekk jogħġobhom jgħidu IVA!”

Meta l-​mistoqsija taʼ l-​għeluq tar-​riżoluzzjoni saret lill-​160,000 miġburin fit-​tliet konvenzjonijiet ġo Franza u lill-​289,000 fid-​disaʼ postijiet ġo l-​Italja, kulħadd għajjat “Iva” b’leħen għoli bil-​ħafna lingwi rappreżentati mid-​delegati.