Proklamaturi tas-​Saltna Jirrapportaw

Reazzjoni Favorevoli għall-​Aħbar Tajba fil-​Latvja

IL-​BIBBJA turi biċ-​ċar li Alla jrid li “l-​bnedmin kollha [“kull xorta taʼ bnedmin,” NW] jsalvaw u jaslu biex jagħrfu l-​verità.” (1 Timotju 2:4) Nies li għal ħafna snin ma setgħux jisimgħu l-​aħbar tajba issa qegħdin jisimgħuha! Fil-​Latvja, bħal f’postijiet oħrajn fid-​dinja, nies taʼ kull età li ġejjin minn ambjenti differenti qegħdin iwieġbu b’mod favorevoli għall-​messaġġ, bħalma juru l-​esperjenzi li ġejjin.

• Ġewwa l-​belt taʼ Rēzekne, li tinsab fil-​lvant tal-​Latvja, waħda mara u bintha żagħżugħa talbu xi informazzjoni lil mara oħra li kienet għaddejja fit-​triq. Wara li tathom l-​informazzjoni li kellhom bżonn, il-​mara, li nzertat kienet waħda mix-​Xhieda taʼ Jehovah, stidnithom jattendu l-​laqgħat tax-​Xhieda.

Peress li kemm il-​mara u kemm bintha kienu nies reliġjużi, iddeċidew li jmorru l-​laqgħa. Huma u sejrin, ftehmu li jekk ikun hemm xi ħaġa ħażina joħorġu ’l barra mill-​ewwel. Madankollu, il-​laqgħa tant kienet interessanti li lanqas biss għaddielhom minn rashom li jitilqu. Huma aċċettaw li jistudjaw il-​Bibbja, u bdew jattendu l-​laqgħat regolarment. F’temp taʼ tliet xhur, huma kienu diġà wrew ix-​xewqa li jibdew jieħdu sehem fix-​xogħol taʼ l-​ippridkar u kienu qed iħarsu ’l quddiem lejn il-​magħmudija.

• Ġewwa belt fil-​punent tal-​Latvja, wieħed Xhud iltaqaʼ maʼ mara taʼ 85 sena jisimha Anna, li wriet interess ġenwin u aċċettat studju tal-​Bibbja. It-​tifla tagħha u membri oħrajn tal-​familja bdew jagħmlulha ħafna oppożizzjoni. Imma Anna ma ħallietx dan l-​aġir jew l-​età avanzata u s-​saħħa dgħajfa tagħha jwaqqfuha milli tkompli tistudja l-​Bibbja.

Jum wieħed, Anna qalet lil bintha li kienet se titgħammed. “Jekk titgħammed, naqflek f’dar tax-​xjuħ,” wieġbet it-​tifla t’Anna. Imma din it-​theddida ma qatgħetilhiex qalbha lil Anna. Minħabba l-​kundizzjoni taʼ saħħitha, hi tgħammdet fid-​dar tagħha stess.

It-​tifla t’Anna kif irreaġixxiet għal dan? Hi biddlet l-​attitudni tagħha, u ppreparat ikla speċjali għal ommha wara li tgħammdet. Imbagħad staqsiet lil ommha, “Kif tħossok issa li tgħammidt?” X’wieġbet Anna? “Inħossni qisni twelidt mill-​ġdid!”

• F’Diċembru taʼ l-​1998, żewġ Xhieda ltaqgħu maʼ uffiċjal irtirat li qabel kien jaqdi fl-​armata taʼ dik li kienet l-​Unjoni Sovjetika. Billi kien jemmen li jeżisti Ħallieq, hu aċċetta studju tal-​Bibbja, u martu bdiet tistudja ftit iktar tard. F’qasir żmien, huma għamlu ħafna progress u malajr saru pubblikaturi mhux mgħammdin. Sas-​sajf taʼ wara, dan ir-​raġel kien tgħammed. L-​imħabba kbira li kellhom din il-​koppja għall-​affarijiet spiritwali kienet u għadha sservi taʼ inkuraġġiment għall-​kongregazzjoni kollha. Barra minn hekk, huma taw sehemhom fix-​xogħol biex dar fil-​lokal fejn joqogħdu tiġi mibdula f’Sala tas-​Saltna mill-​isbaħ.