Qiegħed Int Tgħix fi Qbil mad-​Dedikazzjoni Tiegħek?

“Kull ma tagħmlu, agħmluh minn qalbkom bħallikieku lill-​Mulej u mhux lill-​bnedmin.”—KOLOSSIN 3:23.

1. X’tifsira ġġorr il-​kelma “dedikazzjoni” f’sens sekulari?

L-​ATLETI kif jilħqu l-​aqwa forma tagħhom? Fit-​tennis, fil-​futbol, fil-​basketball, fil-​baseball, fit-​tlielaq, fil-​golf, jew fi kwalunkwe sport ieħor, l-​aqwa wieħed jilħaq il-​quċċata biss jekk ikun dedikat għalkollox. L-​ewwel u qabel kollox huwa essenzjali li jikkundizzjonaw lil ġisimhom u lil moħħhom. Dan jaqbel ħafna maʼ waħda mit-​tifsiriet tal-​kelma “dedikat” li hi “jintrabat totalment biex iwettaq xi ħsieb jew azzjoni partikulari.”

2. Xi tfisser il-​kelma “dedikazzjoni” fil-​Bibbja? Agħti eżempju.

² Madankollu, xi tfisser il-​kelma “dedikazzjoni” fis-​sens Bibliku? Il-​kelma “tiddedika” tittraduċi l-​verb Ebrajk li jfisser “iżżomm separat; tinfired; twarrab.”a F’Iżrael tal-​qedem, il-​Qassis il-​Kbir Aron kien jilbes fuq it-​turbant tiegħu “s-​sinjal qaddis tad-​dedikazzjoni,” li kien pjanċa tleqq taʼ deheb pur bil-​kliem Ebrajk imnaqqax fuqha li jfisser “Il-​Qdusija tappartjeni lil Jehovah.” Dan serva biex ifakkar lill-​qassis il-​kbir li hu kellu jevita li jagħmel xi ħaġa li kienet tipprofana s-​santwarju “għaliex is-​sinjal taʼ dedikazzjoni, iż-​żejt tad-​dlik t’Alla tiegħu, [kien] fuqu.”—Eżodu 29:6; 39:​30, NW; Levitiku 21:​12, NW.

3. Id-​dedikazzjoni kif teffettwa l-​kondotta tagħna?

³ F’dan il-​kuntest nistgħu naraw li d-​dedikazzjoni hija xi ħaġa serja. Turi li wieħed jagħżel minn jeddu li jidentifika ruħu bħala li hu qaddej t’Alla, u dan ikun jeħtieġ kondotta nadifa minnu. Għalhekk, nistgħu napprezzaw għala l-​appostlu Pietru kkwota dak li qal Jehovah: “Kunu qaddisin, għax qaddis jien.” (1 Pietru 1:​15, 16) Bħala Kristjani dedikati aħna nġorru responsabbiltà kbira biex ngħixu fi qbil mad-​dedikazzjoni tagħna, billi nuru l-​fedeltà sat-​tmiem. Imma x’hemm involut fid-​dedikazzjoni Kristjana?​—Levitiku 19:2; Mattew 24:13.

4. Kif naslu biex nagħmlu l-​pass tad-​dedikazzjoni, u dan maʼ liema ħaġa jistaʼ jiġi mxebbah?

⁴ Wara li ksibna għarfien eżatt dwar Alla Jehovah u l-​iskopijiet tiegħu, kif ukoll dwar Ġesù Kristu u l-​irwol tiegħu f’dawn l-​iskopijiet, aħna għamilna deċiżjoni persunali li naqdu lil Alla b’qalbna kollha, b’moħħna kollu, u bil-​qawwa tagħna kollha. (Mark 8:34; 12:30; Ġwann 17:3) Dan jistaʼ jitqies saħansitra bħala wegħda persunali, dedikazzjoni bla riżerva lil Alla. Id-​dedikazzjoni tagħna ma kinitx minħabba xi kapriċċ emozzjonali. Aħna ħsibna fuqha bir-​reqqa u bit-​talb, billi wżajna l-​qawwa tar-​raġuni. B’hekk, ma kinitx xi deċiżjoni temporanja. Ma nistgħux inkunu bħal dak li jibda jaħrat għalqa u wara ftit iħalliha nofs leħja għax iħoss li x-​xogħol huwa iebes wisq jew għax il-​ħsad jidher li għad baqagħlu ħafna jew li forsi jistaʼ ma jirnexxix. Ikkunsidra xi eżempji taʼ wħud li ‘qegħdu idejhom fuq il-​moħriet’ taʼ responsabbiltà teokratika u baqgħu sejrin, sew fil-​bnazzi u sew fil-​maltemp.—Luqa 9:62; Rumani 12:​1, 2.

Ma Ċaħdux id-​Dedikazzjoni Tagħhom

5. Ġeremija kif kien eżempju li jispikka taʼ qaddej dedikat t’Alla?

⁵ Il-​ministeru profetiku taʼ Ġeremija kien mifrux fuq iktar minn 40 sena (647-607 Q.E.K.). Dan ma kienx xi inkarigu ħafif. Hu kien konxju ħafna tal-​limitazzjonijiet tiegħu. (Ġeremija 1:​2-6) Kellu bżonn il-​kuraġġ u s-​sabar biex kuljum jiffaċċja lill-​poplu stinat taʼ Ġuda. (Ġeremija 18:18; 38:​4-6) Madankollu, Ġeremija fada f’Alla Jehovah, li saħħu sabiex setaʼ juri li kien qaddej verament dedikat t’Alla.—Ġeremija 1:​18, 19.

6. L-​appostlu Ġwanni liema eżempju ħallielna?

⁶ Xi ngħidu dwar l-​appostlu leali Ġwanni, li fi xjuħitu kien eżiljat lejn il-​gżira inospitabbli taʼ Patmos talli tkellem dwar Alla u ta xiehda dwar Ġesù? (Apokalissi 1:9) Issaporta u baqaʼ jgħix fi qbil mar-​responsabbiltà tiegħu bħala Kristjan dedikat għal madwar 60 sena. Kien għadu ħaj wara li l-​armati Rumani kienu qerdu lil Ġerusalemm. Kellu l-​privileġġ li jikteb wieħed mill-​evanġelji, tliet ittri ispirati, u l-​ktieb taʼ l-​Apokalissi, li fih kellu dehra bil-​quddiem tal-​gwerra t’Armageddon. Qataʼ qalbu hu meta sar jaf li Armageddon ma kinitx se tiġi fi żmienu? Beda jieħu kollox bil-​lajma u waqaʼ fl-​apatija? Le, Ġwanni baqaʼ leali sal-​mewt, billi kien jaf li, għalkemm ‘iż-​żmien maħtur kien qorob,’ it-​twettiq tad-​dehriet tiegħu kienu iktar fil-​futur.—Apokalissi 1:3; Danjel 12:4.

Eżempji taʼ Dedikazzjoni fi Żmienna

7. Wieħed ħu kif kien eżempju mill-​aqwa taʼ dedikazzjoni Kristjana?

⁷ Fi żmienna, eluf taʼ Kristjani leali żammew sod b’mod żeluż mad-​dedikazzjoni tagħhom minkejja li ma baqgħux ħajjin biex jaraw Armageddon. Wieħed minn dawn kien Ernest E. Beavor mill-​Ingilterra li sar Xhud taʼ Jehovah fl-​1939, fil-​bidu tat-​Tieni Gwerra Dinjija. Għalkemm kien sejjer tajjeb ħafna fin-​negozju tiegħu tal-​fotografija għall-​istamperiji, hu neħħa kollox biex ikun jistaʼ jaqdi fil-​ministeru full-time. Talli żamm in-​newtralità Kristjana weħel sentejn ħabs. Hu kellu l-​appoġġ tal-​familja tiegħu, u fl-​1950, it-​tliet uliedu attendew l-​Iskola taʼ Gilgħad (Watchtower Bible School of Gilead), fi New York. Ħuna Beavor tant kien żeluż fl-​attività tiegħu taʼ l-​ippridkar li ħbiebu kienu jsejħulu Armageddon Ernie. Hu wettaq lealment id-​dedikazzjoni tiegħu, u kompla jiddikjara kemm kienet qrib il-​gwerra t’Alla t’Armageddon sa ma miet fl-​1986. Id-​dedikazzjoni tiegħu ma kienx iqisha bħallikieku xi kuntratt li kien għamel m’Alla u li kellu jiskadi wara ċertu snin!b—1 Korintin 15:58.

8, 9. (a) Liema eżempju tawna l-​irġiel żgħażagħ ġewwa Spanja fi żmien ir-​reġim taʼ Franco? (b) Liema mistoqsijiet huma xierqa?

⁸ Eżempju ieħor taʼ wħud li ż-​żelu tagħhom qatt ma naqas ġej minn Spanja. Matul ir-​reġim taʼ Franco (1939-75), mijiet taʼ Xhieda żgħażagħ dedikati ħadu l-​waqfa tagħhom bħala Kristjani newtrali. Bosta minnhom qattgħu għaxar snin jew iktar f’ħabsijiet militari. Wieħed minnhom kien Jesús Martín, li s-​sentenzi li weħel kollha flimkien ammontaw għal 22 sena ħabs. Ġie msawwat bl-​aħrax waqt li kien f’ħabs militari ġewwa l-​Afrika taʼ Fuq. Xejn minn dan ma kien faċli, imma hu rrifjuta li jagħmel kompromess.

⁹ Fil-​biċċa l-​kbira tal-​każi, dawn iż-​żgħażagħ ma kellhom ebda idea meta jew jekk kinux se jinħelsu minħabba l-​fatt li kienu jeħlu sentenza waħda wara l-​oħra. Madankollu, huma żammew l-​integrità u ż-​żelu għall-​ministeru saħansitra waqt li kienu maqfulin. Fl-​1973, is-​sitwazzjoni sa fl-​aħħar bdiet titjib, u ħafna minn dawn ix-​Xhieda li dakinhar kellhom 30 sena jew iktar bdew jinħelsu mill-​ħabs. Malli nħelsu bdew mill-​ewwel fil-​ministeru full-time, u xi wħud minnhom saru pijunieri speċjali u indokraturi li jivvjaġġaw. Fil-​ħabs huma għexu fi qbil mad-​dedikazzjoni tagħhom, u ħafna minnhom komplew jagħmlu hekk wara li nħelsu mill-​ħabs.c Xi ngħidu għalina llum? Qegħdin aħna nwettqu fedelment id-​dedikazzjoni tagħna bħal dawn l-​uħud leali?—Lhud 10:​32-34; 13:3.

Inqisu Kif Jixraq id-​Dedikazzjoni Tagħna

10. (a) Kif għandna nqisu d-​dedikazzjoni tagħna? (b) Jehovah kif iqis is-​servizz tagħna lejh?

¹⁰ Kif inqisuha d-​dedikazzjoni tagħna lil Alla biex nagħmlu r-​rieda tiegħu? Tiġi din l-​ewwel f’ħajjitna? Huma x’inhuma ċ-​ċirkustanzi tagħna, sew jekk żgħażagħ jew xjuħ, miżżewġin jew le, f’saħħitna jew morda, aħna għandna nistinkaw biex ngħixu fi qbil mad-​dedikazzjoni tagħna skond iċ-​ċirkustanzi li jkollna. Jistaʼ jkun hemm min li ċ-​ċirkustanzi tiegħu jippermettulu li jaqdi fil-​ministeru full-time forsi bħala pijunier, jew volontier f’xi uffiċċju tal-​fergħa tal-​Watch Tower Society, jew missjunarju jew indokratur li jivvjaġġa. Xi ġenituri, mill-​banda l-​oħra, jistgħu jkunu okkupati ferm f’li jieħdu ħsieb il-​bżonnijiet fiżiċi u spiritwali tal-​familja. Is-​sigħat li jagħmlu fil-​ministeru kull xahar għandu mnejn jidhru ftit ħdejn taʼ dawk li jaqdu full-time. Imma dawn jiswew inqas f’għajnejn Jehovah? Le. Alla qatt ma jistenna minna li nagħtuh dak li m’għandniex. L-​appostlu Pawlu stqarr dan il-​prinċipju: “Jekk il-​qalb tkun hemm, dak li jkun jingħoġob skond ma għandu, u mhux skond li ma għandux.”—2 Korintin 8:12.

11. Is-​salvazzjoni tagħna fuqiex tiddependi?

¹¹ Ikun x’ikun il-​każ, is-​salvazzjoni ma tiddependix minn xi ħaġa li nistgħu nagħmlu aħna, imma mill-​qalb tajba mhix mistħoqqa taʼ Jehovah permezz taʼ Ġesù Kristu, il-​Mulej tagħna. “Il-​bnedmin kollha dinbu u ċċaħħdu mill-​glorja taʼ Alla; għalhekk issa huma jkunu ġġustifikati [“bil-​qalb tajba mhix mistħoqqa,” NW] tiegħu . . . permezz tal-​fidwa li hemm fi Kristu Ġesù.” Madankollu, l-​għemejjel tagħna huma prova tal-​fidi attiva tagħna fil-​wegħdi t’Alla.—Rumani 3:​23, 24; Ġakbu 2:​17, 18, 24.

12. Għala m’għandniex noqogħdu nagħmlu paraguni?

¹² M’hemmx għalfejn noqogħdu nqabblu m’oħrajn kemm għamilna ħin fis-​servizz t’Alla, jew kemm ħallejna letteratura Biblika, jew kemm għandna studji tal-​Bibbja. (Galatin 6:​3, 4) Nagħmlu kemm nagħmlu fil-​ministeru Kristjan irridu lkoll niftakru l-​kliem taʼ Ġesù li jġagħalna numiljaw ruħna: “Hekk ukoll intom, meta tagħmlu kull ma tkunu ordnati, għidu, ‘Aħna qaddejja li ma niswew għal xejn: għamilna biss dak li kellna nagħmlu.’” (Luqa 17:10) Kemm-il darba nistgħu verament ngħidu li għamilna ‘kull ma konna ordnati’? Għalhekk il-​mistoqsija hi, X’għandha tkun il-​kwalità tas-​servizz li nagħtu lil Alla?—2 Korintin 10:​17, 18.

Kull Ġurnata Rridu Nużawha Tajjeb

13. Liema attitudni għandna bżonn biex inwettqu d-​dedikazzjoni tagħna?

¹³ Wara li ta parir lin-​nisa u lill-​irġiel miżżewġin, lit-​tfal, lill-​ġenituri, u lill-​ilsiera, Pawlu kiteb: “Kull ma tagħmlu, agħmluh minn qalbkom bħallikieku lill-​Mulej u mhux lill-​bnedmin; għax tafu li għad tieħdu l-​ħlas li ħejja b’wirt għalikom il-​Mulej. Aqdu lil Kristu Sidna.” (Kolossin 3:​23, 24) M’aħniex naqdu biex nimpressjonaw lill-​bnedmin b’dak li nwettqu fis-​servizz taʼ Jehovah. Imma qed nipprovaw naqdu lil Alla billi nsegwu l-​eżempju taʼ Ġesù Kristu. Hu wettaq il-​ministeru tiegħu, li kien relattivament qasir, b’sens t’urġenza.—1 Pietru 2:21.

14. Liema twissija jagħti Pietru dwar l-​aħħar jiem?

¹⁴ L-​appostlu Pietru wkoll wera sens t’urġenza. Fit-​tieni ittra tiegħu, hu wissa li fl-​aħħar jiem se jkun hemm dawk li jwaqqgħu għaż-​żuffjett, li jinkludu l-​apostati u lil dawk li ma jemmnux, u dawn jibdew jaġixxu skond ix-​xewqat tagħhom stess u kienu se jqajmu d-​dubji dwar il-​preżenza taʼ Kristu. Madankollu, Pietru qal: “Mhux għax jiddawwar il-​Mulej li jtemm il-​wegħdiet tiegħu, kif jaħsbu xi wħud, imma qiegħed jistabar bikom għax ma jridx li xi ħadd jintilef, imma li kulħadd jersaq għall-​indiema. Jasal, tabilħaqq, jum il-​Mulej bħal ħalliel.” Iva, il-​jum taʼ Jehovah se jasal żgur. Għalhekk, irridu naraw kuljum kemm hija verament ċerta u soda l-​fidi tagħna fil-​wegħdi t’Alla.—2 Pietru 3:​3, 4, 9, 10.

15. Kif għandna nqisuha kull ġurnata taʼ ħajjitna?

¹⁵ Biex inkunu nistgħu ngħixu fi qbil mad-​dedikazzjoni tagħna b’mod kuxjenzjuż għandna nużaw kull ġurnata biex nagħtu tifħir lil Jehovah. Fit-​tmiem taʼ kull ġurnata, nistgħu aħna nagħtu ħarsa lura u naraw jekk tajniex sehemna b’xi mod f’li nqaddsu l-​isem t’Alla u nxandru l-​aħbar tajba tas-​Saltna? Forsi għamilna dan bil-​kondotta nadifa tagħna, bil-​konversazzjoni li tinkuraġġixxi tagħna, jew billi wrejna tħassib b’imħabba għall-​familja jew għall-​ħbieb. Użajna aħna l-​opportunitajiet li kienu disponibbli għalina biex naqsmu t-​tama Kristjana tagħna m’oħrajn? Għinna lil xi ħadd jibda jaħseb bis-​serjetà dwar il-​wegħdi t’Alla? Ejja nġemmgħu xi ħaġa pożittiva f’sens spiritwali kull ġurnata li tgħaddi, biex b’hekk inkunu qisna qed inġemmgħu fil-​kont spiritwali tagħna.—Mattew 6:20; 1 Pietru 2:12; 3:15; Ġakbu 3:13.

Tħallix il-​Vista Tiegħek Tiċċajpar

16. Satana b’liema modi jipprova jdgħajfilna d-​dedikazzjoni tagħna lil Alla?

¹⁶ Qegħdin ngħixu fi żmien li qed isir iktar u iktar diffiċli għall-​Kristjani. Satana u l-​aġenti tiegħu jipprovaw iċajprulna l-​vista biex ma narawx id-​differenza bejn it-​tajjeb u l-​ħażin, bejn in-​nadif u l-​maħmuġ, bejn dak li hu morali u immorali, bejn dak li hu etiku u dak li m’huwiex. (Rumani 1:​24-28; 16:​17-19) Hu għamilhielna tant faċli biex inniġġsu qalbna u moħħna billi nagħfsu l-​buttuni tar-​remote control tat-​TV jew dawk tal-​kompjuter għall-​Internet. Il-​vista spiritwali tagħna tistaʼ ssir imċajpra, jew ma tibqax iffokata, u b’hekk ma nindunawx bil-​makakkeriji tiegħu. Id-​determinazzjoni tagħna li ngħixu fi qbil mad-​dedikazzjoni tagħna tistaʼ tiddgħajjef u l-​qabda li għandna fuq il-​“moħriet” tistaʼ ma tibqax soda jekk nikkompromettu l-​valuri spiritwali tagħna.—Luqa 9:62; Filippin 4:8.

17. Il-​parir taʼ Pawlu kif jistaʼ jgħinna nżommu r-​relazzjoni tagħna m’Alla?

¹⁷ Il-​kliem taʼ Pawlu lill-​kongregazzjoni f’Tessalonika huwa għalhekk verament f’waqtu: “Dan irid Alla minnkom: il-​qdusija tagħkom, li titbiegħdu miż-​żína, u li kull wieħed minnkom iżomm ’il ġismu fil-​qdusija u l-​ġieħ, u ma jħallix il-​passjoni tegħelbu bħall-​pagani li ma jagħrfux lil Alla.” (1 Tessalonikin 4:​3-5) L-​immoralità wasslet biex xi wħud jiġu maqtugħin mis-​sħubija tal-​kongregazzjoni Kristjana, għaliex ittraskuraw id-​dedikazzjoni tagħhom lil Alla. Ħallew ir-​relazzjoni li kellhom m’Alla tiddgħajjef, u b’hekk ma kienx għadu importanti f’ħajjithom. Madankollu, Pawlu qal: “Alla ma sejjħilniex biex ngħixu fiż-​żína, imma fil-​qdusija. Għalhekk min iwarrab dan it-​tagħlim, ikun iwarrab mhux lill-​bniedem, iżda lil Alla li takom l-​Ispirtu qaddis tiegħu.”—1 Tessalonikin 4:​7, 8.

X’Inhi d-​Determinazzjoni Tagħna?

18. X’għandha tkun id-​determinazzjoni tagħna?

¹⁸ Jekk napprezzaw kemm hi serja d-​dedikazzjoni tagħna lil Alla Jehovah, x’għandna nkunu determinati li nagħmlu? Id-​determinazzjoni soda tagħna għandha tkun li nżommu kuxjenza safja f’dik li hi kondotta u fil-​ministeru tagħna. Pietru ħeġġeġ: “Żommu safja l-​kuxjenza tagħkom biex, meta jgħidu fuqkom, dawk stess li jkasbru l-​imġiba tajba tagħkom fi Kristu jkollhom għalxiex jistħu.” (1 Pietru 3:16) Forsi jkollna ngħaddu minn xi tbatija u jgħajruna minħabba l-​kondotta Kristjana tagħna, imma Ġesù hekk ukoll ġralu minħabba l-​fidi u l-​lealtà tiegħu lejn Alla. Pietru qal: “Ladarba Kristu bata f’ġismu, intom ukoll armaw ruħkom bl-​istess ħsieb, jiġifieri li kull min bata f’ġismu ma għandux x’jaqsam iżjed mad-​dnub.”—1 Pietru 4:1.

19. X’irridu li jgħidu fuqna?

¹⁹ Tabilħaqq, id-​determinazzjoni soda tagħna li ngħixu fi qbil mad-​dedikazzjoni tagħna se tipproteġina mix-​xinxilli li toffri d-​dinja taʼ Satana li hi marida spiritwalment, moralment, u fiżikament. Mhux hekk biss, imma se niksbu fiduċja li għandna l-​approvazzjoni t’Alla, li hi bil-​wisq aħjar minn kwalunkwe ħaġa li Satana u l-​aġenti tiegħu jistgħu joffrulna. Għalhekk, jalla qatt ħadd ma jgħid dwarna li m’għadx għandna dik l-​imħabba li kellna fil-​bidu meta sirna nafu l-​verità. Minflok, jalla jgħidu dwarna kif qalu dwar dawk taʼ l-​ewwel seklu li kienu fil-​kongregazzjoni taʼ Tijatira: “Jiena naf l-​opri tiegħek, l-​imħabba u l-​fidi tiegħek, is-​servizz u s-​sabar tiegħek, naf kemm l-​opri tiegħek taʼ l-​aħħar huma aħjar minn dawk tal-​bidu.” (Apokalissi 2:​4, 18, 19) Iva, ħalli ma nkunux berdin fejn tidħol id-​dedikazzjoni tagħna, imma ħalli nkunu ‘mħeġġin bl-​ispirtu,’ żelużi sat-​tmiem li hu tant qrib.—Rumani 12:11; Apokalissi 3:​15, 16.

[Noti taʼ taħt]

Tiftakar Int?

• Id-dedikazzjoni x’tinvolvi?

• Liema eżempji taʼ qaddejja dedikati t’Alla fl-​imgħoddi u fi żmienna tajjeb li nimitaw?

• Kif għandna nqisuh is-​servizz tagħna lejn Alla?

• X’għandha tkun id-​determinazzjoni tagħna f’konnessjoni mad-​dedikazzjoni tagħna?

[Stampa f’paġna 15]

Ġeremija baqaʼ leali minkejja li ġie trattat b’mod kiefer

[Stampa f’paġna 16]

Ernest Beavor ta eżempju lil uliedu bħala Kristjan żeluż

[Stampa f’paġna 17]

Mijiet taʼ Xhieda żgħażagħ fil-​ħabsijiet ġewwa Spanja żammew l-​integrità tagħhom

[Stampi f’paġna 18]

Ejja nġemmgħu xi ħaġa pożittiva f’sens spiritwali kuljum