“Il-​Kelma taʼ Alla Baqgħet Tikber”

“Hu jibgħat fuq l-​art il-​kmand tiegħu; bil-​ħeffa tiġri l-​kelma tiegħu.”—SALM 147:15.

1, 2. Ġesù liema inkarigu tahom lid-​dixxipli tiegħu, u dan x’kien jinvolvi?

WAĦDA mill-​iktar profeziji taʼ l-​għaġeb li hemm fil-​Bibbja tinsab f’Atti 1:8. Ftit qabel ma telaʼ s-​sema, Ġesù qal lis-​segwaċi leali tiegħu: “Meta jiġi fuqkom l-​Ispirtu s-​Santu, intom tirċievu l-​qawwa, u tkunu xhieda tiegħi . . . sa truf l-​art.” X’biċċa xogħol enormi kellha tkun din!

² L-​inkarigu li jipproklamaw il-​kelma t’Alla maʼ l-​art kollha żgur li deher li kien sfida kbira f’għajnejn il-​ftit dixxipli li rċivewh. Aħseb ftit dwar dak li kien hemm involut. Huma kellhom jgħinu lin-​nies jifhmu l-​aħbar tajba tas-​Saltna t’Alla. (Mattew 24:14) Li jkunu xhieda taʼ Ġesù kien jirrikjedi wkoll li jaqsmu t-​tagħlim effettiv tiegħu m’oħrajn u li jispjegaw l-​irwol tiegħu fl-​iskop taʼ Jehovah. Barra minn hekk, ix-​xogħol kien jinkludi li jagħmlu dixxipli u mbagħad jgħammduhom. U dan kellu jsir mad-​dinja kollha!—Mattew 28:​19, 20.

3. Ġesù dwar liema ħaġa żgurahom lis-​segwaċi tiegħu, u huma x’għamlu bl-​inkarigu li tahom?

³ Madankollu, Ġesù żgura lis-​segwaċi tiegħu li l-​ispirtu qaddis kellu jkun magħhom hekk kif iwettqu x-​xogħol li kien tahom. Għalhekk, minkejja li l-​inkarigu li ngħatalhom kien enormi u li kellhom jiffaċċjaw oppożizzjoni vjolenti li ma qatgħet xejn mill-​għedewwa biex jipprovaw isikktuhom, l-​ewwel dixxipli taʼ Ġesù rnexxielhom jagħmlu dak li kien ikkmandahom. Dan huwa fatt storiku li ħadd ma jistaʼ jiċħdu.

4. L-​imħabba t’Alla kif dehret permezz taʼ l-​inkarigu taʼ ppridkar u tagħlim lil oħrajn?

⁴ Il-​kampanja taʼ ppridkar u tagħlim madwar id-​dinja kollha kienet mod kif Alla esprima l-​imħabba tiegħu lejn dawk li ma kinux jafuh. Tathom l-​opportunità li jiżviluppaw relazzjoni mill-​qrib maʼ Jehovah u jiksbu l-​maħfra tad-​dnubiet. (Atti 26:18) L-​inkarigu biex jippridkaw u jgħallmu wera wkoll l-​imħabba t’Alla għal dawk li jġorru l-​messaġġ, għaliex dan kien jagħmilha possibbli biex huma jesprimu d-​devozzjoni tagħhom lejn Jehovah u juru l-​imħabba tagħhom għall-​bnedmin sħabhom. (Mattew 22:​37-39) L-​appostlu Pawlu tant kien jgħożż il-​ministeru Kristjan li kien jirreferi għalih bħala “teżor.”—2 Korintin 4:7.

5. (a) Fejn nistgħu nsibu l-​iktar kitba dwar il-​Kristjani tal-​bidu li nistgħu noqogħdu fuqha, u liema tkattir jiġi deskritt hemmhekk? (b) Il-​ktieb taʼ l-​Atti għala hu taʼ siwi għall-​qaddejja t’Alla llum?

⁵ L-​iktar rakkont bil-​miktub dwar l-​attività taʼ l-​ippridkar tal-​Kristjani tal-​bidu li nistgħu noqogħdu fuqu jinsab fil-​ktieb ispirat taʼ l-​Atti, li nkiteb mid-​dixxiplu Luqa. Dan jitkellem dwar tkattir straordinarju li seħħ f’qasir żmien. Dan it-​tkattir taʼ l-​għarfien tal-​Kelma t’Alla jfakkarna f’Salm 147:15: “[Jehovah] jibgħat fuq l-​art il-​kmand tiegħu; bil-​ħeffa tiġri l-​kelma tiegħu.” Ir-​rakkont dwar il-​Kristjani tal-​bidu, li kienu msaħħin permezz taʼ l-​ispirtu qaddis, huwa tassew eċċitanti u taʼ siwi għalina llum. Ix-​Xhieda taʼ Jehovah qed jieħdu sehem fl-​istess xogħol taʼ li jippridkaw u jagħmlu dixxipli, biss fuq skala ferm akbar. Aħna niffaċċjaw problemi li huma simili għal dawk li kienu jiffaċċjaw il-​Kristjani fl-​ewwel seklu. Meta nikkunsidraw kif Jehovah bierek u saħħaħ lill-​Kristjani tal-​bidu, il-​fidi tagħna fl-​għajnuna li jagħtina ssir iktar b’saħħitha.

Żjieda fl-​Għadd taʼ Dixxipli

6. Liema frażi dwar it-​tkattir tidher tliet darbiet fil-​ktieb taʼ l-​Atti, u din għalxiex tirreferi?

⁶ Mod wieħed kif nagħtu ħarsa mill-​qrib lejn it-​twettiq t’Atti 1:8 huwa billi nikkunsidraw l-​espressjoni “l-​kelma taʼ Alla baqgħet tikber.” Din il-​frażi tidher tliet darbiet biss fil-​Bibbja, għalkemm hemm xi differenza żgħira, u d-​drabi kollha fejn tidher jinsabu fil-​ktieb taʼ l-​Atti. (Atti 6:7; 12:​24, korsiv tagħna; 19:20) “Il-​kelma taʼ Alla” f’dawn is-​siltiet tirreferi għall-​aħbar tajba—il-​messaġġ li jqanqal taʼ verità divina, messaġġ ħaj u qawwi li biddel il-​ħajjiet taʼ dawk li aċċettawh.—Lhud 4:12.

7. Maʼ xiex huwa marbut it-​tkattir tal-​kelma t’Alla f’Atti 6:​7, u x’ġara f’jum Pentekoste tas-​sena 33 E.K.?

⁷ L-​ewwel darba li jissemma t-​tkattir tal-​kelma t’Alla hija f’Atti 6:7. Hemmhekk naqraw: “U l-​kelma taʼ Alla kienet tixtered dejjem aktar; l-​għadd tad-​dixxipli kien jiżdied ħafna f’Ġerusalemm, u kotra kbira taʼ qassisin kienu joqogħdu għall-​fidi.” Hawnhekk, it-​tkattir hu marbut maʼ żjieda fl-​għadd tad-​dixxipli. Ftit qabel, f’jum Pentekoste tas-​sena 33 E.K., madwar 120 dixxiplu li kienu miġburin f’kamra taʼ fuq irċivew l-​ispirtu qaddis t’Alla. L-​appostlu Pietru mbagħad ta taħdita li tqanqal, u xi 3,000 ruħ minn fost dawk li semgħuha saru jemmnu dak in-​nhar stess. Min jaf x’eċċitament kien hemm hekk kif eluf taʼ nies marru lejn l-​għadira jew għadajjar ġewwa Ġerusalemm jew madwarha biex jitgħammdu f’isem Ġesù, ir-​raġel li xi 50 jum qabel kien ngħata mewta taʼ kriminal billi ġie mdendel m’għuda!—Atti 2:41.

8. L-​għadd taʼ dixxipli kif żdied fis-​snin taʼ wara Pentekoste tas-​sena 33 E.K.?

⁸ M’għandniex xi ngħidu, dan kien biss il-​bidu. Kien għalxejn li l-​mexxejja reliġjużi Lhud baqgħu jipprovaw iwaqqfu l-​attività taʼ l-​ippridkar. Biex dawn il-​mexxejja jkollhom iktar għalxiex jinkeddu, “minn jum għal ieħor [lid-dixxipli] il-​Mulej kien iżidilhom magħhom lil dawk li jkunu salvi.” (Atti 2:47) Malajr, “l-​għadd tagħhom kien jilħaq mal-​ħamest elef ruħ.” Wara dan, “l-​għadd taʼ dawk li kienu jemmnu fil-​Mulej, kemm irġiel kemm nisa, kien dejjem jiżdied u joktor.” (Atti 4:4; 5:14) Dwar xi żmien iktar tard naqraw: “Il-​Knisja kienet fis-​sliem fil-​Lhudija u l-​Galilija u s-​Samarija kollha: kienet dejjem tikber u timxi ’l quddiem bil-​biżaʼ tal-​Mulej, u tiżdied fl-​għadd bl-​għajnuna taʼ l-​Ispirtu s-​Santu.” (Atti 9:31) Xi snin wara, forsi madwar is-​sena 58 E.K., issemma li ħafna eluf kienu saru jemmnu. (Atti 21:20) Sa dak iż-​żmien laħaq kien hemm ukoll ħafna Ġentili li saru jemmnu.

9. Kif tiddeskrivihom lill-​Kristjani tal-​bidu?

⁹ Fil-​biċċa l-​kbira, din iż-​żjieda fl-​għadd seħħet minħabba li kien hemm ħafna wħud li kkonvertew. Ir-​reliġjon kienet ġdida—imma kienet żeluża u attiva ferm. Id-​dixxipli mhux talli ma kinux membri tal-​knisja passivi imma talli kienu nies li kellhom devozzjoni kbira lejn Jehovah u l-​Kelma tiegħu, u xi wħud minnhom kienu tgħallmu l-​verità mingħand dawk li kienu ġew persegwitati bl-​aħrax. (Atti 16:​23, 26-33) Dawk li aċċettaw il-​Kristjanità kienu għamlu dan wara li ħadu deċiżjoni li rraġunawha huma stess u li kienet ibbażata fuq il-​prinċipji tal-​kuxjenza tagħhom. (Rumani 12:​1, NW) Huma kienu tgħallmu l-​mogħdijiet t’Alla, u l-​verità kienet f’moħħhom u f’qalbhom. (Lhud 8:​10, 11) Kienu lesti li jmutu għal dak li kienu jemmnu fih.—Atti 7:​51-60.

10. Liema responsabbiltà aċċettaw il-​Kristjani tal-​bidu, u liema xebh insibu fi żmienna?

¹⁰ Dawk li ħaddnu t-​tagħlim Kristjan għarfu li kellhom ir-​responsabbiltà li jaqsmu l-​verità m’oħrajn. Dan ikkontribwixxa direttament għal iktar żjieda fl-​għadd. Wieħed studjuż tal-​Bibbja qal: “It-​tixrid tal-​fidi ma kienx meqjus bħala dritt riżervat biss għal dawk li kienu żelużi ħafna jew għal dawk li kienu maħturin uffiċjalment bħala evanġelisti. L-​evanġelizzazzjoni kienet privileġġ speċjali u dmir taʼ kull membru tal-​Knisja. . . . Minħabba li l-​komunità Kristjana kollha kemm hi kienet ixxerred il-​fidi minn jeddha, il-​moviment kien wieħed attiv immens sa mill-​bidunett.” Hu kiteb ukoll: “Għall-​Kristjani tal-​bidu, l-​evanġeliżmu kien il-​forza li tagħti l-​ħajja.” L-​istess huwa minnu dwar il-​Kristjani ġenwini llum.

Il-​Kelma Tinxtered f’Iktar Pajjiżi

11. Liema tip taʼ tkattir huwa deskritt f’Atti 12:​24, u dan kif seħħ?

¹¹ It-​tieni darba li jissemma t-​tkattir tal-​kelma t’Alla hija f’Atti 12:24: “Il-​kelma taʼ Alla baqgħet tikber u toktor [“tinxtered,” NW].” Hawnhekk il-​frażi hi marbuta mat-​tixrid tal-​kelma f’iktar pajjiżi. Minkejja l-​oppożizzjoni min-​naħa tal-​gvernijiet, ix-​xogħol kompla jikber u jinfirex. Id-​dixxipli rċivew l-​ispirtu qaddis għall-​ewwel darba f’Ġerusalemm, u minn hemm il-​kelma ġriet malajr. Il-​persekuzzjoni f’Ġerusalemm xerrdet lid-​dixxipli lejn diversi reġjuni fil-​Lhudija u s-​Samarija. B’liema riżultat? “Dawk li xterdu bdew ixandru l-​kelma kull fejn marru.” (Atti 8:​1, 4) Filippu ntqallu biex jagħti xiehda lil raġel li, wara li tgħammed, ħa l-​messaġġ lejn l-​Etjopja. (Atti 8:​26-28, 38, 39) Il-​verità malajr ġiet stabbilita f’Lidda, fil-​Pjanura taʼ Saron, u f’Ġaffa. (Atti 9:​35, 42) Iktar tard, l-​appostlu Pawlu vvjaġġa eluf taʼ kilometri bil-​baħar u fuq l-​art, u stabbilixxa l-​kongregazzjonijiet f’ħafna pajjiżi tal-​Mediterran. L-​appostlu Pietru mar Babilonja. (1 Pietru 5:13) Pawlu kiteb li fi żmien 30 sena minn meta d-​dixxipli rċivew l-​ispirtu qaddis f’Pentekoste, l-​aħbar tajba kienet ‘tħabbret lill-​ħlejjaq kollha taħt is-​smewwiet,’ espressjoni li jistaʼ jkun li tirreferi għall-​parti tad-​dinja li kienet magħrufa dak iż-​żmien.—Kolossin 1:23.

12. Dawk li kienu jopponu l-​Kristjanità kif urew li kienu jirrikonoxxu li l-​kelma t’Alla kienet xterdet f’iktar pajjiżi?

¹² Saħansitra dawk li kienu jopponu l-​Kristjanità rrikonoxxew li l-​kelma t’Alla kienet ġiet stabbilita fl-​Imperu Ruman kollu. Per eżempju, Atti 17:6 jgħid li f’Tessalonika, li kienet tinsab fit-​tramuntana tal-​Greċja, dawk li kienu jopponu għajtu: “Dawn l-​irġiel, li qallbu d-​dinja taʼ taħt fuq, ġew hawn ukoll.” Iktar minn hekk, fil-​bidu tat-​tieni seklu, Plinju ż-​Żgħir kiteb lill-​Imperatur Ruman Trajanu mill-​Bitinja rigward il-​Kristjanità. Hu lmenta: “[Din] m’hijiex qegħda biss fil-​bliet, imma l-​ħsara li għamlet infirxet għal ġo l-​irħula u l-​kampanja taʼ madwar.”

13. It-​tixrid tal-​kelma f’iktar pajjiżi b’liema mod irrifletta l-​imħabba t’Alla għall-​umanità?

¹³ Dan it-​tixrid tal-​kelma f’iktar pajjiżi kien mod kif Jehovah esprima l-​imħabba profonda tiegħu lejn l-​umanità li setgħet tiġi mifdija. Meta Pietru osserva li l-​ispirtu qaddis kien qed jaħdem fuq Kornelju, li kien mill-​Ġentili, hu qal: “Issa tassew qiegħed nifhem li Alla ma jħares lejn wiċċ ħadd, imma jilqaʼ lil kull min għandu l-​biżaʼ tiegħu u jagħmel is-​sewwa, ikun minn liema poplu jkun.” (Atti 10:​34, 35) Iva, l-​aħbar tajba kienet u għadha messaġġ għan-​nies kollha, u permezz tat-​tixrid tal-​kelma t’Alla f’iktar pajjiżi, in-​nies kullimkien ngħataw l-​opportunità li jwieġbu għall-​imħabba t’Alla. Fis-​seklu 21 li qed ngħixu fih, il-​kelma t’Alla nfirxet letteralment sa kull parti taʼ l-​art.

Tkattir li Ttrijonfa

14. Kif inhu deskritt it-​tkattir tal-​kelma t’Alla f’Atti 19:​20, u l-​kelma t’Alla fuq xiex ittrijonfat?

¹⁴ It-​tielet darba li jissemma t-​tkattir tal-​kelma t’Alla hija f’Atti 19:20: “Il-​kelma tal-​Mulej baqgħet tikber u tissaħħaħ bil-​qawwa kollha.” Il-​kelma Griega oriġinali li hi tradotta bħala “tissaħħaħ” iġġorr il-​ħsieb taʼ “li tuża s-​saħħa fuq.” Il-​versi taʼ qabel jgħidu li f’Efesu kien hemm ħafna li saru jemmnu, u xi wħud li kienu jipprattikaw il-​maġija ħarqu l-​kotba tagħhom quddiem kulħadd. B’dan il-​mod, il-​kelma t’Alla użat is-​saħħa, jew ittrijonfat, fuq it-​twemmin reliġjuż falz. L-​aħbar tajba ttrijonfat ukoll fuq ostakli oħrajn, bħall-​persekuzzjoni. Xejn ma setaʼ jwaqqafha. F’dan għal darb’oħra naraw kemm tassew hemm xebh mal-​Kristjanità vera llum.

15. (a) Wieħed kittieb taʼ l-​istorja Biblika x’kiteb dwar il-​Kristjani tal-​bidu? (b) Id-​dixxipli lil min taw il-​kredtu għas-​suċċess tagħhom?

¹⁵ L-​appostli u Kristjani tal-​bidu oħrajn kienu jxandru l-​kelma t’Alla biż-​żelu. Dwarhom, wieħed kittieb taʼ l-​istorja Biblika osserva: “Meta n-​nies ikollhom ix-​xewqa li jitkellmu dwar il-​Mulej tagħhom, jużaw kwalunkwe metodu biex jagħmlu dan. Tabilħaqq, hija l-​motivazzjoni li għandhom dawn l-​irġiel u n-​nisa li timpressjonana iktar mill-​metodi li jużaw.” Xorta waħda, dawk il-​Kristjani tal-​bidu kienu jirrikonoxxu li s-​suċċess fil-​ministeru tagħhom ma kienx jiddependi biss mill-​isforz li jagħmlu. Huma kienu ngħataw l-​inkarigu taʼ xogħol tagħhom mingħand Alla, u kellhom l-​appoġġ tiegħu biex iwettquh. Huwa Alla li jikkaġuna t-​tkattir spiritwali. L-​appostlu Pawlu rrikonoxxa dan fl-​ittra tiegħu lill-​kongregazzjoni f’Korintu. Hu kiteb: “Jiena ħawwilt, Apollo saqqa, imma Alla hu li kabbar. Aħna ħaddiema maʼ Alla.”—1 Korintin 3:​6, 9.

Il-​Ħidma taʼ l-​Ispirtu Qaddis

16. X’juri li l-​ispirtu qaddis saħħaħ lid-​dixxipli biex jitkellmu b’kuraġġ?

¹⁶ Ftakar li Ġesù kien żgura lid-​dixxipli tiegħu li l-​ispirtu qaddis kellu jkollu sehem fit-​tkattir tal-​kelma t’Alla u li l-​ispirtu qaddis kellu jsaħħaħ lid-​dixxipli biex iwettqu l-​attività taʼ l-​ippridkar. (Atti 1:8) Dan kif ġara? Mhux wisq wara li d-​dixxipli rċivew l-​ispirtu f’Pentekoste, Pietru u Ġwanni ġew imsejħin biex jitkellmu mas-​Sinedriju Lhudi, li kien l-​ogħla qorti fil-​pajjiż, u li l-​imħallfin tiegħu kienu responsabbli għall-​qtil taʼ Ġesù Kristu. Kienu l-​appostli se jitregħdu bil-​biżaʼ quddiem ġemgħa taʼ nies daqshekk importanti u ostili? Lanqas xejn! L-​ispirtu qaddis saħħaħ lil Pietru u lil Ġwanni biex jitkellmu b’kuraġġ hekk kbir li l-​għedewwa tagħhom baqgħu mistagħġbin, u “fehmu sewwa li kienu nies taʼ madwar Ġesù.” (Atti 4:​8, 13) L-​ispirtu qaddis għen ukoll lil Stiefnu jagħti xiehda b’kuraġġ kbir lis-​Sinedriju. (Atti 6:12; 7:​55, 56) Ftit qabel, l-​ispirtu qaddis kien qanqal lid-​dixxipli biex jippridkaw bil-​kuraġġ. Luqa jirrapporta: “Kif spiċċaw jitolbu, il-​post fejn kienu miġbura theżheż, u lkoll imtlew bl-​Ispirtu s-​Santu u bdew ixandru l-​kelma taʼ Alla bil-​kuraġġ kollu.”—Atti 4:31.

17. L-​ispirtu qaddis b’liema modi oħrajn għen lid-​dixxipli fil-​ministeru tagħhom?

¹⁷ Permezz taʼ l-​ispirtu qaddis tant qawwi tiegħu, Jehovah, flimkien maʼ Ġesù rxoxtat, idderieġa l-​attività taʼ l-​ippridkar. (Ġwann 14:28; 15:26) Meta l-​ispirtu ġie mferraʼ fuq Kornelju, fuq qrabatu, u l-​ħbieb tal-​qalb tiegħu, l-​appostlu Pietru għaraf li l-​Ġentili mhux ċirkonċiżi setgħu jikkwalifikaw biex jitgħammdu f’isem Ġesù Kristu. (Atti 10:​24, 44-48) Iktar tard, l-​ispirtu kellu sehem ewlieni biex Barnaba u Sawl (l-appostlu Pawlu) ġew maħturin biex iwettqu attività missjunarja u biex jidderiġihom fejn kellhom u ma kellhomx imorru. (Atti 13:​2, 4; 16:​6, 7) Idderieġa lill-​appostli u lill-​irġiel ixjeħ f’Ġerusalemm fil-​mod kif kellhom jieħdu d-​deċiżjonijiet. (Atti 15:​23, 28, 29) L-​ispirtu qaddis iggwida wkoll il-​ħatra taʼ indokraturi fil-​kongregazzjoni Kristjana.—Atti 20:28.

18. Il-​Kristjani tal-​bidu kif kienu jesprimu l-​imħabba?

¹⁸ Barra minn dan, il-​ħidma taʼ l-​ispirtu qaddis dehret fil-​Kristjani nfushom, għaliex dan ipproduċa fihom kwalitajiet li jogħġbu lil Alla, bħalma hi l-​imħabba. (Galatin 5:​22, 23) L-​imħabba qanqlet lid-​dixxipli biex jaqsmu l-​affarijiet flimkien. Per eżempju, wara Pentekoste tas-​sena 33 E.K., twaqqaf fond biex jipprovdi għall-​bżonnijiet fiżiċi tad-​dixxipli f’Ġerusalemm. Ir-​rakkont Bibliku jgħid: “Ħadd minnhom ma kien jonqsu xejn; għax kull min kellu oqsma jew djar kien ibigħhom, u l-​flus li jdaħħal minnhom kien imur iqegħedhom f’riġlejn l-​appostli. Mbagħad kien jitqassam kollox skond il-​ħtieġa taʼ kull wieħed.” (Atti 4:​34, 35) Din l-​imħabba ma ntwerietx biss lejn uħud li kienu jemmnu imma lejn oħrajn ukoll, kemm bix-​xandir taʼ l-​aħbar tajba u kemm permezz t’atti oħrajn taʼ qalb tajba. (Atti 28:​8, 9) Ġesù qal li s-​segwaċi tiegħu kellhom jintgħarfu mill-​imħabba taʼ bejniethom, li tqanqalhom biex iġibu l-​interessi taʼ ħuthom qabel tagħhom stess. (Ġwann 13:​34, 35) Żgur li l-​kwalità vitali taʼ l-​imħabba ressqet lin-​nies lejn Alla u wasslet biex ikun hemm it-​tkattir fl-​ewwel seklu l-​istess bħalma qed tagħmel illum.—Mattew 5:​14, 16.

19. (a) Il-kelma taʼ Jehovah b’liema tliet modi tkattret fl-​ewwel seklu? (b) X’se neżaminaw fl-​artiklu li jmiss?

¹⁹ B’kollox, l-​espressjoni “spirtu qaddis” tidher 41 darba fil-​ktieb taʼ l-​Atti. Nistgħu naraw kemm it-​tkattir Kristjan ġenwin fl-​ewwel seklu kien dovut għall-​qawwa u l-​gwida taʼ l-​ispirtu qaddis. L-​għadd taʼ dixxipli żdied, il-​kelma t’Alla xterdet f’ħafna postijiet, u ttrijonfat fuq ir-​reliġjonijiet u l-​filosofiji taʼ dik l-​era. It-​tkattir tal-​kelma t’Alla fl-​ewwel seklu huwa simili għax-​xogħol tax-​Xhieda taʼ Jehovah llum. Fl-​artiklu li jmiss, se neżaminaw it-​tkattir tal-​kelma t’Alla fi żmienna, xi ħaġa li wkoll hi impressjonanti ferm.

Tiftakar Int?

• Id-dixxipli tal-​bidu kif żdiedu fl-​għadd?

• Il-kelma t’Alla b’liema mod xterdet f’iktar pajjiżi?

• Il-kelma t’Alla kif ittrijonfat fl-​ewwel seklu?

• Liema sehem kellu l-​ispirtu qaddis fit-​tkattir tal-​kelma t’Alla?

[Stampa f’paġna 12]

Filippu ppriedka lill-​Etjopjan, u b’hekk l-​aħbar tajba xterdet f’iktar pajjiżi

[Stampa f’paġna 13]

L-​ispirtu qaddis idderieġa lill-​appostli u lill-​irġiel ixjeħ f’Ġerusalemm

[Sors tal-​Istampa f’paġna 10]

Stampa tal-​lemin, fuq: Riproduzzjoni tal-​Belt taʼ Ġerusalemm fi żmien it-​Tieni Tempju – tinsab fil-​propjetà tal-​Holyland Hotel, f’Ġerusalemm