‘Fl-​Isem tal-​Ispirtu Qaddis’

“Morru għalhekk u agħmlu dixxipli min-​nies tal-​ġnus kollha, billi tgħammduhom fl-​isem ... tal-​ispirtu qaddis.”​—MATTEW 28:19.

1. Liema espressjoni ġdida uża Ġwanni l-​Għammied f’konnessjoni mal-​ispirtu qaddis?

FIS-​SENA 29 tal-​Era Komuni tagħna, Ġwanni l-​Għammied kien attiv f’Iżrael f’li jħejji t-​triq għall-​Messija, u fil-​korsa tal-​ministeru tiegħu, hu annunzja xi ħaġa ġdida dwar l-​ispirtu qaddis. M’għandniex xi ngħidu, il-​Lhud kienu diġà jafu x’kienet tgħid l-​Iskrittura Ebrajka dwar l-​ispirtu. Forsi setgħu stagħġbu, iżda, meta Ġwanni qal: “Jien, inkwantu għalija, ngħammidkom bl-​ilma minħabba l-​indiema tagħkom; imma dak li ġej warajja . . . se jgħammidkom bl-​ispirtu qaddis.” (Mattew 3:11) ‘Magħmudija bl-​ispirtu qaddis’ kienet espressjoni ġdida.

2. Liema espressjoni li tinvolvi l-​ispirtu qaddis introduċa Ġesù?

² Il-​wieħed li kellu jiġi kien Ġesù. Matul il-​ħajja tiegħu fuq l-​art, Ġesù fil-​fatt ma għammed lil ħadd bl-​ispirtu qaddis, għalkemm kien tkellem dwar l-​ispirtu ħafna drabi. Barra minn dan, wara l-​irxoxt tiegħu, hu rrefera għall-​ispirtu qaddis jerġaʼ b’mod ġdid ieħor. Hu qal lid-​dixxipli tiegħu: “Morru għalhekk u agħmlu dixxipli min-​nies tal-​ġnus kollha, billi tgħammduhom fl-​isem tal-​Missier u tal-​Iben u tal-​ispirtu qaddis.” (Mattew 28:19) L-​espressjoni “fl-​isem tal-​” tfisser “b’rikonoxximent taʼ.” Magħmudija tal-​ilma b’rikonoxximent tal-​Missier, tal-​Iben, u tal-​ispirtu qaddis kellha tkun differenti minn magħmudija fl-​ispirtu qaddis. Kienet ukoll espressjoni ġdida li tinvolvi l-​ispirtu qaddis.

Imgħammdin fl-​Ispirtu Qaddis

3, 4. (a) Meta seħħew l-​ewwel magħmudijiet fl-​ispirtu qaddis? (b) Minbarra li għammidhom l-​ispirtu qaddis kif aġixxa lejn id-​dixxipli taʼ Ġesù f’Pentekoste tas-​sena 33 E.K.?

³ Rigward magħmudija fl-​ispirtu qaddis, Ġesù wiegħed lid-​dixxipli tiegħu preċiż qabel ma talaʼ s-​sema: “Se tkunu mgħammdin fl-​ispirtu qaddis mhux ħafna jiem wara dan.” (Atti 1:5, 8) Ftit wara dan dik il-​wegħda twettqet. Spirtu qaddis niżel fuq madwar 120 dixxipli miġburin f’kamra taʼ fuq f’Ġerusalemm hekk kif Ġesù, mis-​sema, wettaq l-​ewwel magħmudijiet tiegħu fl-​ispirtu qaddis. (Atti 2:1-4, 33) B’liema riżultat? Id-​dixxipli saru parti mill-​ġisem spiritwali taʼ Kristu. Kif jispjega l-​appostlu Pawlu, ‘bi spirtu wieħed huma lkoll kienu mgħammdin f’ġisem wieħed.’ (1 Korintin 12:13) Fl-​istess ħin, huma ġew midlukin biex ikunu slaten u qassisin futuri fis-​Saltna tas-​sema t’Alla. (Efesin 1:13, 14; 2 Timotew 2:12; Rivelazzjoni 20:6) L-​ispirtu qaddis serva wkoll bħala siġill u indikazzjoni inizzjali taʼ dak il-​wirt futur glorjuż, imma dak ma kienx kollox.—2 Korintin 1:21, 22.

⁴ Ftit snin qabel, Ġesù kien qal lil Nikodemu: “Jekk xi ħadd ma jitwelidx mill-​ġdid, ma jistax jara s-​saltna t’Alla. ... Jekk xi ħadd ma jitwelidx mill-​ilma u mill-​ispirtu, ma jistax jidħol ġos-​saltna t’Alla.” (Ġwann 3:3, 5) Issa 120 bniedem kienu ġew imweldin mill-​ġdid. Permezz tal-​ispirtu qaddis, huma ġew addottati bħala wlied spiritwali t’Alla, aħwa taʼ Kristu. (Ġwann 1:11-13; Rumani 8:14, 15) Dawn l-​attivitajiet kollha tal-​ispirtu qaddis huma fil-​mod tagħhom iktar tal-​għaġeb mill-​mirakli. Barra minn dan, kuntrarju għall-​mirakli li saru darba, l-​ispirtu qaddis ma waqafx wara l-​mewt tal-​appostli imma baqaʼ jkun attiv b’dan il-​mod sa żmienna. Huwa l-​privileġġ tax-​Xhieda taʼ Jehovah li jkollhom fosthom l-​aħħar membri mgħammdin bl-​ispirtu tal-​ġisem taʼ Kristu, u dawn jaqdu bħala “rsir fidil u diskret” biex jipprovdu ikel spiritwali fil-​ħin xieraq tiegħu.—Mattew 24:45-47.

Imgħammdin “fl-​Isem tal-​ . . . Ispirtu Qaddis”

5, 6. L-​ewwel magħmudijiet fl-​ispirtu qaddis kif wasslu għall-​magħmudijiet tal-​ilma?

⁵ Imma xi ngħidu dwar il-​magħmudija tal-​ilma mwiegħda fl-​isem tal-​Missier, tal-​Iben, u tal-​ispirtu qaddis? Dawk l-​ewwel dixxipli li kienu mgħammdin fl-​ispirtu ma ħadux magħmudija bħal din. Huma kienu diġà ħadu l-​magħmudija tal-​ilma taʼ Ġwanni, u ladarba dik kienet aċċettabbli għal Jehovah f’dak iż-​żmien partikulari, ma kellhomx għalfejn jerġgħu jitgħammdu. Imma f’Pentekoste tas-​sena 33 E.K., folla kbira taʼ erwieħ irċeviet il-​magħmudija ġdida tal-​ilma. Dan kif ġara?

⁶ Il-​magħmudija tal-​120 fl-​ispirtu qaddis kienet akkumpanjata minn ħoss qawwi li attira folol taʼ nies. Dawn stagħġbu meta semgħu lid-​dixxipli jitkellmu bl-​ilsna, jiġifieri, b’lingwi barranin mifhumin minn dawk preżenti. L-​appostlu Pietru spjega li dan il-​miraklu kien evidenza li l-​ispirtu t’Alla kien ġie mferraʼ minn Ġesù, li kien ġie mqajjem mill-​mewt u kien issa bil-​qiegħda fuq il-​lemin t’Alla fis-​sema. Pietru nkuraġġixxa lis-​semmiegħa tiegħu: “Ħalli d-​dar kollha taʼ Iżrael tkun taf fiċ-​ċert li Alla għamlu kemm Mulej u kemm Kristu, dan Ġesù li lilu intom dendiltu maʼ zokk.” Hu mbagħad ikkonkluda billi qal: “Indmu, u ħalli kull wieħed minnkom jitgħammed fl-​isem taʼ Ġesù Kristu għall-​maħfra taʼ dnubietkom, u se tirċievu l-​għotja b’xejn tal-​ispirtu qaddis.” Madwar 3,000 ruħ wieġbu.—Atti 2:36, 38, 41.

7. It-​3,000 imgħammdin f’Pentekoste tas-​sena 33 E.K. b’liema mod kienu mgħammdin fl-​isem tal-​Missier, tal-​Iben, u tal-​ispirtu qaddis?

⁷ Jistaʼ jingħad li dawn ġew imgħammdin fl-​isem (b’rikonoxximent) tal-​Missier, tal-​Iben, u tal-​ispirtu qaddis? Iva. Għalkemm Pietru ma qalilhomx biex jitgħammdu fl-​isem tal-​Missier, huma kienu diġà jirrikonoxxu lil Jehovah bħala Mulej Sovran, ladarba huma kienu Lhud naturali, membri taʼ ġens iddedikat Lilu. Pietru imma qal: ‘Kunu mgħammdin fl-​isem tal-​Iben.’ Mela l-​magħmudija tagħhom issinjifikat ir-​rikonoxximent tagħhom taʼ Ġesù bħala Mulej u Kristu. Huma kienu issa d-​dixxipli tiegħu u aċċettaw li l-​maħfra tad-​dnubiet kienet se tiġi permezz tiegħu. Fl-​aħħar, il-​magħmudija kienet b’rikonoxximent tal-​ispirtu qaddis, u saret bi tweġiba għall-​wegħda li huma kienu se jirċievu l-​ispirtu bħala għotja b’xejn.

8. (a) Minbarra l-​magħmudija tal-​ilma, liema magħmudija oħra rċevew il-​Kristjani midlukin? (b) Min minbarra l-​144,000 jirċievi l-​magħmudija tal-​ilma fl-​isem tal-​ispirtu qaddis?

⁸ Dawk imgħammdin fl-​ilma fil-​jum taʼ Pentekoste tas-​sena 33 E.K. ġew ukoll imgħammdin fl-​ispirtu, billi ġew midlukin bħala slaten u qassisin futuri fis-​Saltna tas-​sema. Skond il-​ktieb taʼ Rivelazzjoni, hemm biss 144,000 minn dawn. Mela dawk imgħammdin fl-​ispirtu qaddis u fl-​aħħar ‘issiġillati’ bħala werrieta tas-​Saltna jgħoddu biss 144,000. (Rivelazzjoni 7:4; 14:1) Madankollu id-​dixxipli ġodda kollha—hi x’inhi t-​tama tagħhom—jiġu mgħammdin fl-​ilma fl-​isem tal-​Missier, tal-​Iben, u tal-​ispirtu qaddis. (Mattew 28:19, 20) X’timplika, allura, il-​magħmudija fl-​isem tal-​ispirtu qaddis għall-​Kristjani kollha, kemm jekk mill-​“merħla ċkejkna” jew min-​“ngħaġ oħra”? (Luqa 12:32; Ġwann 10:16) Qabel inwieġbu dan, ejjew ninnotaw xi ftit mill-​attivitajiet tal-​ispirtu fl-​era Kristjana.

Il-​Frott tal-​Ispirtu

9. Liema attività tal-​ispirtu qaddis hija importanti għall-​Kristjani kollha?

⁹ Attività importanti tal-​ispirtu qaddis hija f’li jgħinna niżżviluppaw personalitajiet Kristjani. Veru, minħabba l-​imperfezzjoni ma nistgħux nevitaw li nidinbu. (Rumani 7:21-23) Imma meta nindmu sinċerament, Jehovah jaħfrilna fuq il-​bażi tas-​sagrifiċċju taʼ Kristu. (Mattew 12:31, 32; Rumani 7:24, 25; 1 Ġwann 2:1, 2) Barra minn dan, Jehovah jistenna li aħna niġġieldu kontra t-​tendenza tagħna li nidinbu, u l-​ispirtu qaddis igħinna biex nagħmlu dan. “Ibqgħu imxu bl-​ispirtu,” qal Pawlu, “u ma se twettqu l-​ebda xewqa tal-​laħam affattu.” (Galatin 5:16) Pawlu ssokta juri li l-​ispirtu jistaʼ jipproduċi l-​aqwa kwalitajiet ġewwa fina. Hu kiteb: “Il-​frott tal-​ispirtu ħu mħabba, ferħ, paċi, sabar fit-​tul, qalb tajba, tjubija, fidi, ħlewwa, kontroll fuqek innifsek.”−Galatin 5:22, 23.

10. Il-​frott tal-​ispirtu kif inhu żviluppat fi Kristjan?

¹⁰ L-​ispirtu kif jagħmel possibbli dan il-​frott fi Kristjan? Ma jseħħx awtomatikament sempliċement għaliex aħna Kristjani ddedikati u mgħammdin. Irridu naħdmu għalih. Imma jekk nassoċjaw maʼ Kristjani oħrajn li juru dawn il-​kwalitajiet, jekk nitolbu lil Alla għall-​ispirtu tiegħu biex igħinna niżżviluppaw kwalitajiet speċifiċi, jekk nevitaw sħubijiet ħżiena u nistudjaw il-​Bibbja għall-​pariri u eżempji tajbin, imbagħad il-​frott tal-​ispirtu se jikber fina.—Proverbji 13:20; 1 Korintin 15:33; Galatin 5:24-26; Ebrej 10:24, 25.

Maħturin mill-​Ispirtu Qaddis

11. L-​anzjani b’liema mod huma maħturin mill-​ispirtu qaddis?

¹¹ Pawlu, meta indirizza lill-​anzjani taʼ Efesu, introduċa attività oħra tal-​ispirtu qaddis meta qal: “Oqogħdu attenti għalikom infuskom u għall-​merħla kollha, li fostha l-​ispirtu qaddis ħatarkom indokraturi, biex tirgħu l-​kongregazzjoni t’Alla, li hu xtara bid-​demm taʼ Ibnu stess.” (Atti 20:28) Iva, indokraturi, jew anzjani, tal-​kongregazzjoni huma maħturin bl-​ispirtu qaddis. B’liema mod? F’li anzjani maħturin iridu jilħqu l-​kwalifiki mniżżlin fil-​Bibbja mnebbħa. (1 Timotew 3:1-13; Titus 1:5-9) Huma jistgħu jiżżviluppaw dawk il-​kwalifiki bil-​għajnuna tal-​ispirtu qaddis biss. Barra minn hekk, il-​ġemgħa tal-​anzjani li tirrikkmanda lil xi anzjan ġdid titlob għall-​gwida tal-​ispirtu qaddis biex tagħraf jekk hu jilħaqx il-​kwalifiki jew le. U l-​ħatra attwali ssir taħt is-​superviżjoni tal-​irsir fidil u diskret midluk bl-​ispirtu.

Kun Iggwidat mill-​Ispirtu

12. L-​ispirtu kif jistaʼ jinfluwenzana permezz tal-​Bibbja?

¹² Il-​Kristjani jirrikonoxxu li l-​Iskrittura Mqaddsa nkitbet taħt l-​influwenza tal-​ispirtu qaddis. Għaldaqstant, huma jfittxu fil-​fond fiha għal għerf imnebbaħ mill-​ispirtu, kif għamlu x-​xhieda taʼ Jehovah taʼ qabel il-​Kristjanità. (Proverbji 2:1-9) Huma jaqrawha, jimmeditaw fuqha, u jħalluha tiggwidalhom il-​ħajjiet tagħhom. (Salm 1:1-3; 2 Timotew 3:16) Huma b’hekk jiġu mgħejjunin mill-​ispirtu biex ‘ifittxu fl-​affarijiet profondi t’Alla.’ (1 Korintin 2:10, 13; 3:19) Li jiggwida lill-​qaddejja t’Alla b’dan il-​mod hija attività importanti tal-​ispirtu t’Alla għal żmienna.

13, 14. Ġesù x’uża biex jittratta maʼ problemi fil-​kongregazzjoni, u kif jagħmel l-​istess illum?

¹³ Jerġaʼ, fil-​ktieb taʼ Rivelazzjoni, Ġesù rxoxtat bagħat messaġġi lil sebaʼ kongregazzjonijiet fl-​Asja Minuri. (Rivelazzjoni, kapitli 2 u 3) Fihom hu rrivela li kien spezzjona l-​kongregazzjonijiet u għaraf il-​qagħda spiritwali tagħhom. Xi wħud, hu sab, kienu qegħdin jagħtu eżempju mill-​aħjar taʼ fidi. F’oħrajn, l-​anzjani kienu ħallew is-​settarjaniżmu, l-​immoralità, u l-​bruda jikkorrompu lill-​merħla. Il-​kongregazzjoni taʼ Sardis, minbarra xi ftit erwieħ leali, kienu mejtin spiritwalment. (Rivelazzjoni 3:1, 4) Ġesù kif ittratta dawn il-​problemi? Bl-​ispirtu qaddis. Meta ta pariri lis-​sebaʼ kongregazzjonijiet, il-​messaġġ taʼ Ġesù kkonkluda f’kull każ bl-​espressjoni: “Ħalli lil min għandu widna jismaʼ dak li l-​ispirtu jgħid lill-​kongregazzjonijiet.”−Rivelazzjoni 2:7, 11, 17, 29; 3:6, 13, 22.

¹⁴ Illum, ukoll, Ġesù jispezzjona lill-​kongregazzjonijiet. U meta jagħraf li hemm xi problemi, hu xorta waħda jittrattahom permezz tal-​ispirtu qaddis. L-​ispirtu jistaʼ jgħinna nagħrfu u negħlbu l-​problemi direttament permezz tal-​qari tagħna tal-​Bibbja. Għajnuna tistaʼ tiġi wkoll permezz tal-​letteratura biblika ppubblikata mill-​irsir fidil u diskret midluk bl-​ispirtu. Jew tistaʼ tiġi mingħand anzjani maħturin bl-​ispirtu fil-​kongregazzjoni. Hu x’inhu l-​każ, kemm jekk il-​parir jingħata lil individwi jew lill-​kongregazzjoni f’daqqa, nagħtu aħna kas tal-​kliem taʼ Ġesù: “Ħalli lil min għandu widna jismaʼ dak li l-​ispirtu jgħid”?

L-​Ispirtu u x-​Xogħol tal-​Ippridkar

15. L-​ispirtu kif aġixxa lejn Ġesù rigward ix-​xogħol tal-​ippridkar?

¹⁵ F’okkażjoni minnhom meta Ġesù ppriedka f’sinagoga ġewwa Nazzaret, hu wera jerġaʼ attività oħra tal-​ispirtu. Ir-​rakkont igħidilna: “Hu fetaħ ir-​romblu u sab il-​post fejn kien hemm miktub: ‘L-​ispirtu taʼ Jehovah qiegħed fuqi, għaliex hu dilikni biex niddikjara aħbar tajba lill-​foqra, bagħatni biex nippriedka ħelsien lill-​imjassrin u dawl mill-​ġdid lill-​għomja, biex nibgħat lill-​imgħaffġin ’il hemm b’ħelsien.’ Imbagħad beda jgħidilhom: ‘Illum din l-​iskrittura li għadkom kemm smajtu twettqet.’” (Luqa 4:17, 18, 21; Isaija 61:1, 2) Iva, Ġesù kien midluk bl-​ispirtu qaddis biex jippriedka aħbar tajba.

16. Fl-​ewwel seklu, l-​ispirtu qaddis kif kien involut fil-​fond fl-​ippridkar tal-​aħbar tajba?

¹⁶ Ftit qabel mewtu, Ġesù bassar dwar kampanja grandjuża taʼ ppridkar li kellha titwettaq mis-​segwaċi tiegħu. Hu qal: “Fil-​ġnus kollha l-​aħbar tajba trid tiġi ppridkata.” (Mark 13:10) Dawn il-​kelmiet kellhom twettieq inizzjali fl-​ewwel seklu, u s-​sehem li kellu l-​ispirtu qaddis kien notevoli. Kien l-​ispirtu qaddis li dderieġa lil Filippu biex jippriedka lill-​ewnuku Etjopjan. Spirtu qaddis idderieġa lil Pietru għand Kornelju, u spirtu qaddis idderieġa li Pawlu u Barnaba jintbagħtu bħala appostli minn Antijokija. Iktar tard, meta Pawlu ried jippriedka fl-​Asja u f’Bitinja, spirtu qaddis b’xi mod ma ħalliehx. Alla ried li x-​xogħol taʼ għoti taʼ xiehda jidħol ġewwa l-​Ewropa.—Atti 8:29; 10:19; 13:2; 16:6, 7.

17. Illum, l-​ispirtu qaddis kif inhu involut fix-​xogħol tal-​ippridkar?

¹⁷ Illum, spirtu qaddis huwa għal darb’oħra involut fil-​fond fix-​xogħol tal-​ippridkar. Fi twettieq ieħor taʼ Isaija 61:1, 2, l-​ispirtu taʼ Jehovah dilek lil ħut Ġesù biex jippridkaw. Fit-​twettieq finali taʼ Mark 13:10, dawn l-​uħud midlukin, mgħejjunin mill-​folla l-​kbira, ippridkaw l-​aħbar tajba litteralment fil-​“ġnus kollha.” (Rivelazzjoni 7:9) U l-​ispirtu jappoġġjahom ilkoll f’dan. Bħal fl-​ewwel seklu, jiftaħ territorji u jiggwida l-​progress ġenerali tax-​xogħol. Isaħħaħ individwi, billi jgħinhom jegħlbu l-​mistħija u jiżżviluppaw l-​abbiltajiet tagħhom taʼ kif igħallmu. Barra minn dan, Ġesù qal lid-​dixxipli tiegħu: “Se tiġu msejħin quddiem gvernaturi u slaten minħabba fija, bħala xiehda lilhom u lill-​ġnus. Madankollu, meta jtellgħukom, issirux anzjużi dwar kif jew x’għandkom tgħidu ..., għax mhux intom li qed titkellmu, imma hu l-​ispirtu taʼ Missierkom li jitkellem bikom.”—Mattew 10:18-20.

18, 19. L-​ispirtu b’liema mod jingħaqad mal-​għarusa f’li jistieden lil uħud taʼ qalb ġwejda biex ‛jieħdu l-​ilma tal-​ħajja b’xejn’?

¹⁸ Fil-​ktieb taʼ Rivelazzjoni, il-​Bibbja mill-​ġdid tenfasizza l-​involviment tal-​ispirtu qaddis fix-​xogħol tal-​ippridkar. Hemm l-​appostlu Ġwanni jirrapporta: “L-​ispirtu u l-​għarusa jibqgħu jgħidu: ‘Ejja!’ U ħalli kulmin qiegħed jismaʼ jgħid: ‘Ejja!’ U ħalli kulmin hu bil-​għatx jiġi; ħalli kulmin jixtieq jieħu l-​ilma tal-​ħajja b’xejn.” (Rivelazzjoni 22:17) Il-​għarusa, irrappreżentata mill-​fdal tal-​144,000 li għadhom fuq l-​art, jistiednu lil kulħadd biex jieħu mill-​ilma tal-​ħajja b’xejn. Imma innota, l-​ispirtu qaddis ukoll igħid “Ejja!” B’liema mod?

¹⁹ F’li l-​messaġġ li qed jiġi ppridkat mill-​klassi tal-​għarusa—illum imgħejjunin mill-​folla l-​kbira taʼ ngħaġ oħra—jiġi mill-​Bibbja, miktuba taħt l-​influwenza diretta tal-​ispirtu qaddis. U dak l-​istess spirtu fetaħ il-​qlub u l-​imħuħ tal-​klassi tal-​għarusa biex jifhmu l-​Kelma mnebbħa u jispjegawha lil oħrajn. Dawk li huma mgħammdin bħala dixxipli ġodda taʼ Ġesù Kristu jitgħaxxqu jieħdu mill-​ilma tal-​ħajja b’xejn. U huma jithennew f’li jikkoperaw mal-​ispirtu u l-​għarusa f’li jgħidu “Ejja!” lil jerġaʼ oħrajn. Illum, iktar minn erbaʼ miljuni jieħdu sehem mal-​ispirtu f’dan ix-​xogħol.

Ingħixu Denji tal-​Magħmudija Tagħna

20, 21. Kif nistgħu ngħixu denji tal-​magħmudija tagħna fl-​isem tal-​ispirtu qaddis, u kif għandna nħarsu lejn din il-​magħmudija?

²⁰ Magħmudija fl-​isem tal-​ispirtu qaddis hija dikjarazzjoni pubblika li aħna nirrikonoxxu lill-​ispirtu qaddis u nagħrfu l-​irwol li għandu fil-​għanijiet taʼ Jehovah. Dan jimplika li aħna se nikkoperaw mal-​ispirtu, billi ma nagħmlu xejn biex infixklu l-​ħidma tiegħu fost il-​poplu taʼ Jehovah. B’hekk, aħna nirrikonoxxu u nikkoperaw mal-​irsir fidil u diskret. Nikkoperaw mal-​arranġament tal-​anzjani fil-​kongregazzjoni. (Ebrej 13:7, 17; 1 Pietru 5:1-4) Aħna ngħixu b’għerf spiritwali, mhux tal-​laħam, u nħallu l-​ispirtu jagħġen il-​personalità tagħna, billi jagħmilha iktar bħal taʼ Kristu. (Rumani 13:14) U aħna ningħaqdu b’qalbna kollha mal-​ispirtu u l-​għarusa f’li ngħidu “Ejja!” lill-​miljuni li għad forsi jwieġbu.

²¹ Kemm hi ħaġa serja li tkun imgħammed ‘fl-​isem tal-​ispirtu qaddis’! Iżda, x’barkiet jistgħu jirriżultaw! Jalla l-​għadd taʼ dawk imgħammdin hekk ikompli jiżdied. U jalla lkoll kemm aħna nkomplu ngħixu denji għas-​sinjifikat taʼ dik il-​magħmudija, hekk kif naqdu bħala rsiera għal Jehovah u nibqgħu nkunu ‘mlellxin bl-​ispirtu.’—Rumani 12:11.

X’Tiftakar Dwar l-​lspirtu Qaddis?

◻ L-​ispirtu qaddis b’liema modi kien attiv f’Pentekoste tas-​sena 33 E.K.?

◻ Kif nistgħu nipproduċu l-​frott tal-​ispirtu?

◻ L-​anzjani b’liema mod huma maħturin mill-​ispirtu qaddis?

◻ Ġesù kif jittratta maʼ problemi fil-​kongregazzjoni permezz tal-​ispirtu qaddis?

◻ L-​ispirtu kif inhu nvolut fil-​fond fix-​xogħol tal-​ippridkar?

[Stampa f’paġna 15]

L-​ispirtu hu involut b’mod profond fl-​ippridkar tal-​aħbar tajba