Kif l-Ispirtu t’Alla Jistaʼ Jeffettwa Lilek

“FIL-​BIDU Alla ħalaq is-​smewwiet u l-​art. L-​art kienet mingħajr forma u vojta, u dlam kien fuq wiċċ il-​fond; u l-​Ispirtu t’Alla kien qed jiċċaqlaq fuq wiċċ l-​ilmijiet.” (Ġenesi 1:1, 2, Revised Standard Version) Din l-​istqarrija Skritturali ġġib fuq quddiem mod wieħed li jispikka li bih kulmin hu ħaj ibbenefika mill-​ispirtu qaddis. Dak l-​ispirtu kien attiv matul il-​ħolqien, u grazzi għall-​attività tiegħu, l-​art saret dar taʼ pjaċir għall-​bniedem.

Imma n-​nies jistgħu jibbenefikaw ferm iktar mill-​ispirtu qaddis. Proverbju mnebbaħ igħid: “Duru lura maċ-​ċanfir tiegħi. Imbagħad għalikom se nġiegħel l-​ispirtu tiegħi jbaqbaq ’il barra; se nagħmel il-​kelmiet tiegħi magħrufin għalikom.” (Proverbji 1:23) Fi żmienna l-​“kelmiet” miġburin t’Alla jinsabu fil-​Bibbja Mqaddsa, miktuba minn irġiel li kienu “mqanqlin mill-​ispirtu qaddis.” (2 Pietru 1:21; Mark 12:36; 2 Timotew 3:16) Kull meta wieħed ġwejjed jaqra l-​Bibbja, hu jibbenefika mill-​ispirtu qaddis.

L-​Ispirtu Qaddis u x-​Xogħol tal-​Ippridkar

Meta wieħed mix-​Xhieda taʼ Jehovah iżurek f’darek biex jitkellem dwar l-​aħbar tajba tas-​Saltna, l-​ispirtu qaddis jistaʼ jeffettwalek il-​ħajja tiegħek b’mod ieħor. Kif nafu? Sewwa, meta Ġesù Kristu beda jippriedka l-​aħbar tajba, hu applika għalih innifsu l-​kliem tal-​profeta Isaija, billi qal: “L-​ispirtu taʼ Jehovah qiegħed fuqi, għaliex hu dilikni biex niddikjara aħbar tajba lill-​foqra, . . . biex nippriedka s-​sena aċċettabbli taʼ Jehovah.” (Luqa 4:18, 19; Isaija 61:1, 2) Iva, Ġesù kien midluk mill-​ispirtu qaddis biex jippriedka l-​aħbar tajba.

Iktar minn hekk, Ġesù bassar li l-​ippridkar tal-​aħbar tajba kellu jkompli wara mewtu. Hu pprofetizza: “Din l-​aħbar tajba tas-​saltna se tkun ippridkata mal-​art abitata kollha bħala xiehda lill-​ġnus kollha; imbagħad se jiġi t-​tmiem.” (Mattew 24:14) Ftit qabel it-​tlugħ tiegħu fis-​sema, Ġesù ta lis-​segwaċi tiegħu din il-​ħatra: “Morru . . . u agħmlu dixxipli min-​nies tal-​ġnus kollha, billi tgħammduhom fl-​isem tal-​Missier u tal-​Iben u tal-​ispirtu qaddis, billi tgħallmuhom josservaw l-​affarijiet kollha li kkmandajtkom.” (Mattew 28:19, 20) Wara t-​tlugħ taʼ Kristu fis-​sema, għalhekk, id-​dixxipli tiegħu għamlu x-​xogħol awtorizzat mill-​ispirtu taʼ li jippridkaw u jgħallmu. Ix-​Xhieda taʼ Jehovah illum jimitaw lil dawk id-​dixxipli tal-​bidu f’li jippridkaw l-​aħbar tajba mad-​dinja kollha.

Il-​Magħmudija u l-​Ispirtu Qaddis

Meta individwu jwieġeb b’mod favorevoli għall-​aħbar tajba, Ġesù qal li dan għandu jitgħammed “fl-​isem tal-​Missier u tal-​Iben u tal-​ispirtu qaddis.” Mela dixxipli ġodda jerġgħu jiġu effettwati iktar mill-​ispirtu qaddis. L-​espressjoni “fl-​isem tal-​” propjament tfisser “bl-​awtorità tal-​” jew “billi tirrikonoxxi l-​pożizzjoni tal-​.”a B’hekk, billi nkunu mgħammdin fl-​isem tal-​Missier ifisser li naċċettaw bla tlaqliq is-​sovranità t’Alla fil-​ħajjiet tagħna. Magħmudija fl-​isem tal-​Iben tfisser li naċċettaw lil Ġesù bħala Dak li Jifdina, l-​Eżemplar, u s-​Sultan. U magħmudija fl-​isem tal-​ispirtu qaddis tinvolvi li nistrieħu fuq l-​ispirtu u nissottomettu rwieħna għall-​qawwa tiegħu.b

L-​Ispirtu Qaddis fil-​Ħajja Tiegħek

B’dispjaċir, id-​diżonestà, l-​immoralità, il-​vjolenza, u l-​ksur ġenerali tal-​liġi li naraw f’artijiet “Kristjani” llum jikxfu l-​fatt li l-​biċċa l-​kbira taʼ dawk li jgħidu li huma Kristjani attwalment jirreżistu lill-​ispirtu qaddis. Imma dawk li jissottomettu rwieħhom lejh huma mberkin ferm. L-​ewwelnett, huma jieħdu bis-​serjetà dak li jaqraw fil-​Bibbja mnebbħa mill-​ispirtu u japplikawh fil-​ħajjiet tagħhom. B’hekk, huma għandhom il-​għerf, id-​dehen, il-​ġudizzju, l-​għaqal, il-​għarfien, u l-​abbiltà li jaħsbu. (Proverbji 1:1-4) Dawn huma assi taʼ valur fiż-​żminijiet taʼ nkwiet tagħna.

L-ispirtu qaddis igħin ukoll lil individwi bħal dawn biex jegħlbu problemi diffiċli. Fi żminijiet tal-​qedem, Alla wera lin-​nies tiegħu kif huma kellhom ikunu kapaċi jwettqu biċċa xogħol diffiċli ferm. Jehovah qal li dan kellu jsir “mhux b’forza militari, mhux bil-​qawwa, imma bl-​ispirtu” tiegħu. (Żakkarija 4:6) Jekk nissottomettu rwieħna lejn Alla u lejn l-​ispirtu tiegħu, aħna wkoll se niġu mgħejjunin inwettqu xogħlijiet u negħlbu ostakli li altrimenti kienu jkunu kbar wisq għalina.—Mattew 6:33; Filippin 4:13.

Iktar minn hekk, l-​ispirtu t’Alla jgħinna ngawdu libertà li mhix magħrufa għad-​dinja inġenerali. L-​appostlu Pawlu kiteb: “Fejn hemm l-​ispirtu taʼ Jehovah, hemm il-​ħelsien.” (2 Korintin 3:17) Dawk li jissottomettu ruħhom lejn l-​ispirtu t’Alla jgawdu ħelsien mir-​reliġjon falza, mis-​superstizzjoni, mill-​biżaʼ tal-​futur, u minn ħafna fatturi oħra li jżommuna fil-​jasar. L-​ispirtu t’Alla huwa verament qawwa għall-​ġid! Jistaʼ saħansitra jbiddel lin-​nies. Il-​Bibbja tmiss dan il-​punt meta tgħid: “Il-​frott tal-​ispirtu hu l-​imħabba, il-​ferħ, il-​paċi, is-​sabar fit-​tul, il-​qalb tajba, it-​tjubija, il-​fidi, il-​ħlewwa, ir-​rażna. Kontra dawn l-​affarijiet ma hemmx liġi.” (Galatin 5:22, 23) Kemm kienet tkun differenti din id-​dinja kieku kulħadd issottometta ruħu lejn l-​influwenza tal-​ispirtu t’Alla!

Bħala grupp, il-​Kristjani ġenwini wkoll igawdu “l-​unità tal-​ispirtu fir-​rabta li tgħaqqad tal-​paċi.” (Efesin 4:3) L-​unità u l-​paċi huma affarijiet rari llum. Imma tassew li jeżistu fejn l-​ispirtu t’Alla hu attiv. Tabilħaqq, fost ix-​Xhieda taʼ Jehovah ir-​rabta li tgħaqqad tal-​ispirtu qaddis ġabet lil nies mir-​razez, mil-​lingwi u min-​nazzjonalitajiet kollha fi “sħubija tal-​aħwa” ġenwina.—1 Pietru 2:17.

L-​Ispirtu t’Alla u Int

Tarah int il-​benefiċċju taʼ li jkollok il-​għerf li jagħti Alla u taʼ li tgawdi l-​veru ħelsien? Ma jkunx tal-​għaġeb li jkollok għajnuna divina f’li ssolvi l-​problemi u f’li tikkultiva l-​imħabba, il-​ferħ, il-​paċi, is-​sabar fit-​tul, il-​qalb tajba, it-​tjubija, il-​fidi, il-​ħlewwa, u r-​rażna? Mela ssottometti ruħek lejn il-​qawwa tal-​ispirtu qaddis t’Alla. Imma wieħed kif jistaʼ jagħmel dan?

Ħalli l-​Kelma t’Alla, il-​Bibbja, tinfluwenza lil moħħok u lil qalbek. Assoċja maʼ dawk li jħallu lill-​ispirtu qaddis jinfluwenzalhom ħajjithom. Ħu passi issa biex titgħallem u biex tagħmel ir-​rieda divina. Imbagħad, “jalla dak Alla li jagħti t-​tama jimliekom bil-​ferħ kollu u l-​paċi bit-​twemmin tagħkom, biex tistgħu toktru fit-​tama bil-​qawwa tal-​ispirtu qaddis.”—Rumani 15:13.

[Noti taʼ taħt]