Sib il-​Ferħ m’Alla l-​Hieni

“Mill-​bqija, ħuti, ifirħu, . . . u Alla taʼ l-​imħabba u s-​sliem ikun magħkom.”—2 KORINTIN 13:11.

1, 2. (a) Ħafna nies għala m’għandhomx ferħ f’ħajjithom? (b) X’inhu l-​ferħ, u kif nistgħu rrawmuh ġewwa fina?

F’DAWN iż-​żminijiet mudlama, ħafna nies ma jħossux li għandhom għalxiex jifirħu. Meta tiġri xi diżgrazzja lilhom jew lill-​maħbubin tagħhom, x’aktarx iħossuhom bħalma ħassu Ġob tal-​qedem, li qal: “Il-​bniedem imwieled minn mara għandu ħajja qasira, imma tbatija għandu biżżejjed.” (Ġob 14:1) Il-​Kristjani m’humiex meħlusin mill-​istress u t-​tensjoni taʼ dan iż-​“żmien iebes,” u ma niskantawx li xi qaddejja leali taʼ Jehovah kultant iħossuhom skuraġġiti.—2 Timotju 3:1.

² Madankollu, il-​Kristjani jistgħu jsibu l-​ferħ, saħansitra meta jkunu għaddejjin minn xi prova. (Atti 5:​40, 41) Biex nifhmu kif dan hu possibbli, l-​ewwel ejja nikkunsidraw x’inhu l-​ferħ. Il-​ferħ ġie deskritt bħala l-​emozzjoni mqanqla minn akkwist jew stennija taʼ xi ħaġa tajba.a Għaldaqstant, aħna nistgħu nkunu tassew ferħanin jekk noqogħdu naħsbu ftit dwar il-​barkiet li għandna issa u fl-​istess ħin nimmeditaw fuq l-​affarijiet taʼ l-​għaġeb li se jkollna fid-​dinja l-​ġdida t’Alla.

3. F’liema sens jistaʼ jingħad li kulħadd għandu minn taʼ l-​inqas xi ftit raġunijiet biex ikun ferħan?

³ Kulħadd għandu xi ħaġa li għaliha għandu jkun grat. Kap taʼ familja forsi jitlef l-​impjieg tiegħu. M’għandniex xi ngħidu, dan jinkwieta. Hu jixtieq jipprovdi għall-​maħbubin tiegħu. Xorta waħda, jekk hu b’saħħtu u jiflaħ jaħdem għandu għalxiex ikun grat. Jekk isib ix-​xogħol, se jkun kapaċi jaħdem iebes. Mill-​banda l-​oħra, mara Kristjana għandha mnejn tintlaqat minn xi marda li tiħdilha saħħitha. Iżda, hi tistaʼ tkun grata għall-​appoġġ li jagħtuha xi ħbieb li jħobbuha u membri tal-​familja li jgħinuha tiffaċċja l-​marda tagħha bid-​dinjità u l-​kuraġġ. U l-​Kristjani veri kollha, minkejja ċ-​ċirkustanzi tagħhom, jistgħu jifirħu bil-​privileġġ li jafu lil Jehovah, “Alla l-​imbierek [jew, il-​hieni]” u lil Ġesù Kristu, “Dak li hu l-​hieni u waħdu setgħani.” (1 Timotju 1:11; 6:15) Iva, Alla Jehovah u Ġesù Kristu huma mill-​iktar henjin. Huma żammew il-​ferħ tagħhom minkejja l-​fatt li l-​kundizzjonijiet fuq l-​art huma ferm differenti minn dak li kellu f’moħħu Jehovah fil-​bidu. L-​eżempju tagħhom jistaʼ jgħallimna ħafna dwar kif nistgħu nibqgħu ferħanin.

Qatt Ma Tilfu l-​Ferħ Tagħhom

4, 5. (a) Jehovah kif irreaġixxa meta l-​ewwel bnedmin irribellaw? (b) Jehovah b’liema mod żamm attitudni pożittiva lejn il-​bnedmin?

⁴ Fil-​ġnien taʼ Għeden, Adam u Eva kienu jbigħu s-​saħħa u kellhom moħħ perfett. Kellhom xogħol produttiv u ambjent ideali fejn jaħdmu. Fuq kollox, kellhom il-​privileġġ li jikkomunikaw regolarment maʼ Jehovah. Kien l-​iskop t’Alla li huma jgawdu futur hieni. Imma l-​ewwel ġenituri tagħna ma kinux sodisfatti b’dawn l-​għotjiet tajbin kollha; huma serqu l-​frotta projbita “mis-​siġra taʼ tagħrif it-​tajjeb u l-​ħażin.” Dan l-​att taʼ diżubbidjenza fetaħ it-​triq għan-​nuqqas taʼ kuntentizza li qed inġarrbu aħna, id-​dixxendenti tagħhom, illum.—Ġenesi 2:​15-17; 3:6; Rumani 5:12.

⁵ Madankollu, Jehovah ma ħalliex l-​attitudni ingrata taʼ Adam u Eva tisraqlu l-​ferħ tiegħu. Kien fiduċjuż li għallinqas xi wħud minn nisilhom kienu se jħossu fil-​fond taʼ qalbhom li għandhom jaqduh. Fil-​fatt, tant kien fiduċjuż dwar dan li, saħansitra qabel ma Adam u Eva kellhom l-​ewwel tarbija, hu ħabbar l-​iskop tiegħu li jifdi lid-​dixxendenti ubbidjenti tagħhom! (Ġenesi 1:31; 3:15) Fis-​sekli taʼ wara, il-​maġġuranza tal-​bnedmin imxew fuq il-​passi taʼ Adam u Eva, imma Jehovah ma warrabx lill-​familja umana minħabba din id-​diżubbidjenza li tant kienet mifruxa. Minflok, hu tefaʼ l-​attenzjoni tiegħu fuq l-​irġiel u n-​nisa li ‘ferrħulu qalbu,’ dawk li għamlu sforz qawwi biex jogħġbuh għax iħobbuh.—Proverbji 27:11; Lhud 6:10.

6, 7. Liema fatturi għenu lil Ġesù biex jibqaʼ hieni?

⁶ Xi ngħidu dwar Ġesù? Hu x’għamel biex baqaʼ hieni? Bħala spirtu setgħan fis-​sema, Ġesù kellu kull opportunità josserva dak li jagħmlu l-​bnedmin fuq l-​art. Għalkemm kien jara l-​imperfezzjonijiet tagħhom, hu xorta ħabbhom. (Proverbji 8:31) Iktar tard, meta ġie fuq l-​art u fil-​veru sens tal-​kelma “għammar fost” il-​bnedmin, l-​opinjoni tiegħu dwar l-​umanità ma nbidlitx. (Ġwann 1:14) X’kien li għen lill-​Iben perfett t’Alla jżomm ħarsa daqshekk pożittiva dwar il-​familja umana midinba?

⁷ L-​ewwelnett, Ġesù kien raġunevoli f’dak li kien jistenna minnu nnifsu u minn oħrajn. Kien jaf li ma kienx se jirnexxilu jikkonverti lid-​dinja kollha. (Mattew 10:​32-39) Għalhekk, hu tgħidx kemm kien jifraħ meta saħansitra persuna sinċiera waħda kienet taċċetta l-​messaġġ tas-​Saltna. Għalkemm xi drabi d-​dixxipli tiegħu kienu jonqsu fl-​imġiba u fl-​attitudni tagħhom, Ġesù kien jaf li fil-​fond taʼ qalbhom huma verament riedu jagħmlu r-​rieda t’Alla, u għal dan kien iħobbhom. (Luqa 9:46; 22:​24, 28-32, 60-62) Taʼ min jinnota li, f’talba lil Missieru tas-​sema, Ġesù semma fil-​qosor il-​passi pożittivi li kienu ħadu d-​dixxipli tiegħu sa dak il-​mument: “Huma ħarsu kelmtek.”—Ġwann 17:6.

8. Semmi xi modi li bihom nistgħu nimitaw lil Jehovah u lil Ġesù fil-​kwistjoni taʼ kif nibqgħu henjin.

⁸ Bla dubju, ilkoll kemm aħna nistgħu nibbenefikaw jekk nirriflettu fuq l-​eżempju li jagħtuna Alla Jehovah u Kristu Ġesù f’dan ir-​rigward. Nistgħu aħna nimitaw iżjed bis-​sħiħ lil Jehovah, forsi billi ma nsirux ansjużi żżejjed meta l-​affarijiet ma jmorrux eżatt kif nixtiquhom? Nistgħu aħna nsegwu l-​passi taʼ Ġesù iżjed mill-​qrib billi nżommu ħarsa pożittiva lejn iċ-​ċirkustanzi preżenti tagħna, kif ukoll billi nkunu raġunevoli f’dak li nistennew minna nfusna u minn oħrajn? Ejja naraw kif xi ftit minn dawn il-​prinċipji jistgħu jiġu applikati b’mod prattiku fil-​ministeru Kristjan, li hu għal qalb il-​Kristjani żelużi f’kull parti tad-​dinja.

Ibqaʼ Ħares Lejn il-​Ministeru b’Mod Pożittiv

9. Ġeremija kif reġaʼ kiseb il-​ferħ, u l-​eżempju tiegħu kif jistaʼ jgħinna?

⁹ Jehovah jridna nkunu henjin fis-​servizz tiegħu. Il-​ferħ tagħna m’għandux ikun marbut mar-​riżultati li niksbu. (Luqa 10:​17, 20) Il-​profeta Ġeremija ppriedka għal snin sħaħ f’territorju li ma ġablux riżultati tajbin. Meta kien jikkonċentra fuq ir-​reazzjoni negattiva tan-​nies, kien jitlef il-​ferħ li kellu. (Ġeremija 20:8) Imma meta kien jimmedita fuq il-​ġmiel tal-​messaġġ innifsu, kien jerġaʼ jikseb il-​ferħ. Ġeremija qallu lil Jehovah: “Jien sibt kliemek, u kiltu; u kelmtek saritli l-​ferħ u l-​hena taʼ qalbi; għax ismek issejjaħ fuqi, Mulej, Alla taʼ l-​eżerċti.” (Ġeremija 15:16) Iva, Ġeremija thenna bil-​privileġġ li kellu li jippriedka l-​kelma t’Alla. L-​istess nistgħu nagħmlu aħna.

10. Kif nistgħu nibqgħu henjin fil-​ministeru anki jekk fil-​preżent mhux qed ikollna riżultati tajbin fit-​territorju tagħna?

¹⁰ Anki jekk il-​maġġuranza tan-​nies ma jaċċettawx l-​aħbar tajba, aħna għandna kull raġun biex inkunu ferħanin hekk kif nieħdu sehem fil-​ministeru taʼ l-​għalqa. Ftakar li Jehovah kellu fiduċja sħiħa li xi bnedmin kienu se jħossu li għandhom jaqduh. Bħal Jehovah, qatt m’għandna naqtgħu qalbna li għallinqas xi wħud maż-​żmien se jsiru konxji tal-​kwistjoni li hemm involuta u jaċċettaw il-​messaġġ tas-​Saltna. Qatt m’għandna ninsew li ċ-​ċirkustanzi tan-​nies jinbidlu. Anki l-​iktar bniedem li jħossu li ma jonqsu xejn jistaʼ jibda jaħseb serjament dwar it-​tifsir tal-​ħajja jekk dan iġarrab xi telfa jew jgħaddi minn xi kriżi ħabta u sabta. Se tkun hemm biex tagħti l-​għajnuna meta bniedem bħal dan isir konxju tal-​bżonn spiritwali tiegħu? (Mattew 5:​3, NW) Iva, xi ħadd fit-​territorju tiegħek għandu mnejn ikun lest li jismaʼ l-​aħbar tajba l-​ewwel darba li terġaʼ żżuru!

11, 12. X’seħħ f’belt żgħira, u x’nistgħu nitgħallmu minn dan?

¹¹ It-​territorju tagħna jistaʼ wkoll jinbidel b’mod ieħor. Ikkunsidra dan l-​eżempju. F’belt żgħira kien hemm grupp taʼ koppji żgħażagħ bit-​tfal. Dawn il-​koppji kienu jiftehmu ħafna u meta kienu jżuruhom ix-​Xhieda taʼ Jehovah, kollha kienu jgħidulhom l-​istess ħaġa, “M’aħniex interessati!” Jekk kien ikun hemm xi ħadd li juri xi interess fil-​messaġġ tas-​Saltna, il-​ġirien malajr kienu jiskuraġġuh biex ma jkomplix jismaʼ lix-​Xhieda. M’għandniex xi ngħidu, kienet sfida biex tippriedka hemmhekk. Minkejja dan, ix-​Xhieda ma qatgħux qalbhom, u xorta baqgħu jippridkaw. B’liema riżultat?

¹² Maż-​żmien, ħafna mit-​tfal f’dik il-​belt kibru, iżżewġu, u baqgħu joqogħdu hemmhekk. Xi wħud minn dawn iż-​żgħażagħ irrealizzaw li f’ħajjithom ma kellhomx hena ġenwin, u bdew ifittxu l-​verità. Din sabuha meta bdew jaċċettaw l-​aħbar tajba mxandra mix-​Xhieda. B’dan il-​mod, wara ħafna snin, il-​kongregazzjoni ċkejkna bdiet tikber. Immaġina l-​ferħ tal-​pubblikaturi tas-​Saltna li ma qatgħux qalbhom! Jalla nuru l-​perseveranza u nibqgħu nxandru l-​messaġġ glorjuż tas-​Saltna biex aħna wkoll ikollna l-​ferħ!

Sħabek fit-​Twemmin Se Jagħtuk Appoġġ

13. Għand min nistgħu mmorru meta nħossuna skuraġġiti?

¹³ Meta ħajtek tkun mimlija b’ħafna pressjonijiet jew jiġi fuqek l-​għawġ, minfejn tistaʼ tikseb il-​faraġ? Miljuni taʼ qaddejja dedikati taʼ Jehovah l-​ewwel jirrikorru lejh permezz tat-​talb, imbagħad jitkellmu maʼ ħuthom Kristjani. Meta kien fuq l-​art, Ġesù nnifsu apprezza l-​appoġġ tad-​dixxipli tiegħu. Fil-​lejla qabel ma miet, hu tkellem dwarhom bħala ‘dawk li żammew sħiħ miegħu fit-​tiġrib kollu li ġie fuqu.’ (Luqa 22:28) M’għandniex xi ngħidu, dawn id-​dixxipli kienu imperfetti, imma l-​lealtà tagħhom kienet taʼ faraġ għall-​Iben t’Alla. Aħna wkoll nistgħu niġu msaħħin minn adoraturi sħabna.

14, 15. X’għen lil koppja biex ikampaw mal-​mewt taʼ binhom, u x’titgħallem int mill-​esperjenza tagħhom?

¹⁴ Koppja Kristjana li jisimhom Michel u Diane saru jafu sew kemm jiswa l-​appoġġ taʼ ħuthom. Binhom Jonathan taʼ 20 sena, Kristjan mimli ħajja u b’futur quddiemu, instab li kellu tumur f’rasu. It-​tobba għamlu minn kollox biex jipprovaw isalvawh, imma Jonathan qaleb għall-​agħar sakemm darba tard wara nofsinhar, hu raqad fil-​mewt. Michel u Diane kellhom qalbhom maqsuma. Huma rrealizzaw li l-​Laqgħa tas-​Servizz, li kienet qed issir dik il-​lejla, kienet waslet biex tispiċċa. Xorta waħda, peress li kellhom bżonn min ifarraġhom, staqsew lil anzjan li kien magħhom jekk setax iwassalhom is-​Sala tas-​Saltna. Waslu sewwa sew x’ħin il-​kongregazzjoni kienet qed tiġi mgħarrfa bil-​mewt taʼ Jonathan. Wara l-​laqgħa, l-​aħwa daru maʼ dawn il-​ġenituri mbikkija u bdew jgħannquhom u jgħidulhom kliem taʼ faraġ. Diane tiftakar: “Meta wasalna s-​sala konna qisna żewġ iċċassati, imma kemm kienu taʼ faraġ l-​aħwa, kemm inkuraġġewna! Għalkemm ma setgħux ineħħulna l-​uġigħ, huma għenuna nissaportu t-​toqol tan-​niket!”—Rumani 1:​11, 12; 1 Korintin 12:​21-26.

¹⁵ L-​għawġ ġiegħel lil Michel u lil Diane jersqu eqreb lejn ħuthom. Ġagħalhom ukolljersqu eqreb lejn xulxin. Michel jgħid: “Tgħallimt ngħożż lill-​għażiża marti saħansitra iżjed. F’mumenti meta nħossuna skuraġġiti, inkellmu ’l xulxin dwar il-​verità tal-​Bibbja u dwar kif Jehovah qiegħed isostnina.” Diane iżżid: “It-​tama tas-​Saltna tfisser saħansitra iżjed għalina issa.”

16. Għala hu importanti li nieħdu l-​inizjattiva biex lil ħutna ngħarrfuhom bil-​bżonnijiet tagħna?

¹⁶ Iva, ħutna Kristjani jistgħu jkunu “taʼ faraġ kbir” għalina f’mumenti diffiċli fil-​ħajja, u b’hekk jgħinuna nibqgħu henjin. (Kolossin 4:11) M’għandniex xi ngħidu, huma ma jistgħux jaqrawlna moħħna. Għalhekk, meta jkollna bżonn l-​appoġġ tagħhom, tajjeb li ngħidulhom x’għandna bżonn. Imbagħad nistgħu nesprimu apprezzament ġenwin għal kwalunkwe faraġ li ħutna jistgħu jagħtuna, waqt li nħarsu lejh bħala li ġej mingħand Jehovah.—Proverbji 12:25; 17:17.

Ħares Lejn il-​Kongregazzjoni Tiegħek

17. Liema sfidi tiffaċċja waħda omm bla raġel, u aħna kif inħarsu lejhom uħud bħal dawn?

¹⁷ Iktar ma tħares mill-​qrib lejn sħabek fit-​twemmin, iktar issir tapprezzahom u tithenna tagħmilha magħhom. Ħares ftit lejn il-​kongregazzjoni tiegħek. X’tara? Hemm xi mara bla raġel li qed titħabat biex trabbi lil uliedha fit-​triq tal-​verità? Qatt ħsibt kemm din tagħti eżempju tajjeb? Ipprova immaġina xi ftit mill-​problemi li jkollha tiffaċċja. Jeanine, omm bla raġel, issemmi xi ftit minnhom: is-​solitudni, rimarki mhux xierqa minn irġiel fuq ix-​xogħol, nuqqas taʼ finanzi. Imma l-​akbar diffikultà minnhom kollha, tgħid hi, tinvolvi l-​attenzjoni li trid tagħti lill-​bżonnijiet emozzjonali taʼ wliedha, peress li kull wieħed minnhom hu uniku. Jeanine issemmi problema oħra: “Mhux faċli tirbaħ it-​tendenza li lil ibnek tgħabbih bir-​responsabbiltà taʼ kap tad-​dar biex jimla l-​vojt taʼ missieru. Jien għandi tifla, u nsibha iebsa biex niftakar li m’għandix ngħabbiha bil-​problemi intimi tiegħi.” Bħal eluf taʼ ġenituri oħra li għandhom il-​biżaʼ t’Alla u li m’għandhomx sieħeb, Jeanine taħdem full-time u tieħu ħsieb id-​dar u l-​familja tagħha. Barra minn hekk, hi tistudja l-​Bibbja mat-​tfal tagħha, tħarriġhom fil-​ministeru, u tiħodhom magħha għal-​laqgħat tal-​kongregazzjoni. (Efesin 6:4) Żgur li Jehovah jkun kuntent ħafna x’ħin jara kuljum lil din il-​familja tistinka biex iżżomm l-​integrità! Ma nħossux qlubna jfuru bil-​ferħ li fostna għandna nies bħal dawn? Iva, tabilħaqq.

18, 19. Uri kif nistgħu nkabbru l-​apprezzament tagħna għall-​membri tal-​kongregazzjoni.

¹⁸ Ħares mill-​ġdid lejn il-​kongregazzjoni tiegħek. Forsi tistaʼ tara rġiel u nisa leali li huma romol u li qatt ma jonqsu mil-​laqgħat. (Luqa 2:37) Iħossuhom waħedhom dawn kultant? Dażgur. Dawn iħossuh ħafna l-​vojt tas-​sieħeb jew sieħba tagħhom! Imma jżommu ruħhom attivi fis-​servizz taʼ Jehovah u jieħdu interess persunali f’oħrajn. L-​attitudni stabbli u pożittiva tagħhom iżżid il-​ferħ fil-​kongregazzjoni! Mara Kristjana li ilha fil-​ministeru full-time għal iktar minn 30 sena qalet: “L-​akbar ferħ tiegħi hu li nara aħwa mdaħħlin fiż-​żmien u li għaddew minn ħafna provi għadhom jaqdu lil Jehovah fedelment!” Iva, Kristjani fostna li huma mdaħħlin fiż-​żmien huma taʼ inkuraġġiment kbir għal oħrajn li huma iżgħar.

¹⁹ Xi ngħidu għall-​ġodda li għadhom kif bdew jassoċjaw mal-​kongregazzjoni? Ma nħossuniex inkuraġġiti meta dawn jesprimu l-​fidi tagħhom fil-​laqgħat? Aħseb ftit dwar il-​progress li għamlu minn meta bdew jistudjaw il-​Bibbja. Jehovah żgur ferħan ħafna bihom. Xi ngħidu għalina? Ngħidulhom kemm aħna ferħanin bihom u nfaħħruhom taʼ l-​isforzi li jagħmlu?

20. Għala jistaʼ jingħad li kull membru għandu post importanti fil-​kongregazzjoni?

²⁰ Int miżżewweġ, għażeb, jew ġenitur waħdek? Int tifel jew tifla bla missier (jew bla omm)? Int armel jew armla? Int ilek tassoċja mal-​kongregazzjoni għal ħafna snin jew għadek kif bdejt tassoċja? Ibqaʼ ċert li l-​eżempju tiegħek taʼ fedeltà hu inkuraġġanti għalina lkoll. U meta tingħaqad magħna biex tkanta xi għanja tas-​Saltna, meta tikkummenta jew tieħu ħsieb xi inkarigu bħala student fl-​Iskola tal-​Ministeru Teokratiku, il-​kontribut tiegħek iżidilna l-​ferħ. Iktar importanti, dan iferraħ qalb Jehovah.

21. Il-​ħafna raġunijiet li għandna xi jġagħluna nagħmlu, imma liema mistoqsijiet iqumu?

²¹ Iva, saħansitra f’dan iż-​żmien imqalleb, aħna nistgħu nithennew waqt li nqimu lil Alla hieni tagħna. Għandna bosta raġunijiet biex naċċettaw l-​inkuraġġiment taʼ Pawlu: “Ħuti, ifirħu, . . . u Alla taʼ l-​imħabba u s-​sliem ikun magħkom.” (2 Korintin 13:11) Iżda, xi ngħidu jekk niffaċċjaw xi diżastru naturali, xi persekuzzjoni, jew xi tbatija ekonomika kbira? Ikun possibbli li nżommu l-​ferħ tagħna anki f’sitwazzjonijiet bħal dawn? Ara għalik innifsek hekk kif tikkunsidra l-​artiklu li jmiss.

[Nota taʼ taħt]

Taf Twieġeb?

• Kif jiġi deskritt il-​ferħ?

• Il-fatt li nżommu attitudni pożittiva kif se jgħinna nibqgħu ferħanin?

• X’jistaʼ jgħinna nħarsu b’mod pożittiv lejn it-​territorju tal-​kongregazzjoni tagħna?

• Int b’liema mod tapprezzahom l-​aħwa fil-​kongregazzjoni tiegħek?

[Stampi f’paġna 10]

In-​nies fit-​territorju tagħna jistgħu jinbidlu

[Stampa f’paġna 12]

Liema sfidi jiffaċċjaw id-​diversi membri tal-​kongregazzjoni tiegħek?