Jehovah Jgħallimna Ngħoddu Jiem Ħajjitna

“Għallimna ngħoddu jiem ħajjitna, sabiex aħna nimxu bil-​għaqal.”—SALM 90:12.

1. Għala huwa xieraq li nitolbu lil Jehovah biex jurina kif “ngħoddu jiem ħajjitna”?

ALLA JEHOVAH hu l-​Ħallieq tagħna u d-​Donatur tal-​ħajja. (Salm 36:10 [36:​9, NW]; Apokalissi 4:11) Għalhekk, ħadd ħliefu ma jistaʼ jkun f’pożizzjoni aħjar biex jurina kif nużaw is-​snin taʼ ħajjitna b’mod għaqli. Bix-​xieraq, mela, is-​salmista talab lil Alla: “Għallimna ngħoddu jiem ħajjitna, sabiex aħna nimxu bil-​għaqal.” (Salm 90:12) Din it-​talba nsibuha f’Salm 90, u żgur li jkun xieraq li dan is-​salm nikkunsidrawh b’attenzjoni. Iżda qabel xejn, ejja nagħtu ħarsa fuq fuq lejn din l-​għanja mnebbħa b’mod divin.

2. (a) Min jissemma bħala l-​kittieb taʼ Salm 90, u dan meta setaʼ nkiteb? (b) Salm 90 kif għandu jeffettwa l-​ħarsa tagħna lejn il-​ħajja?

² Is-​sopraskrizzjoni taʼ Salm 90 issejjaħlu “talba taʼ Mosè, il-​bniedem taʼ Alla.” Ladarba dan is-​salm jenfasizza kemm hi qasira l-​ħajja tal-​bniedem, x’aktarx inkiteb wara li l-​Iżraelin inħelsu mill-​jasar taʼ l-​Eġittu u matul l-​40 sena li għamlu jiġġerrew fid-​deżert, meta l-​mewt ħadet eluf taʼ ħajjiet u ġabet fix-​xejn ġenerazzjoni bla fidi. (Numri 32:​9-13) Inkiteb meta nkiteb, Salm 90 juri li l-​ħajja tal-​bnedmin imperfetti hi qasira. Jidher ċar, mela, li għandna nużaw il-​jiem prezzjużi tagħna bil-​għaqal.

3. X’inhu l-​kontenut bażiku taʼ Salm 90?

³ Versi 1 sa 6 taʼ Salm 90 jidentifikaw lil Jehovah bħala l-​kenn etern tagħna. Versi 7 sa 12 juruna x’għandna bżonn sabiex nużaw il-​ftit snin taʼ ħajjitna b’tali mod li nogħġbuh. U bħalma jesprimu versi 13 sa 17, aħna b’qalbna kollha nixtiequ li Jehovah juri magħna qalb tajba bl-​imħabba u jberikna. M’għandniex xi ngħidu, dan is-​salm ma jgħidilniex minn qabel dak li se ngħaddu minnu personalment bħala qaddejja taʼ Jehovah. Minkejja dan, kull wieħed u waħda minna għandu jagħti kas u jimita l-​attitudni taʼ devozzjoni lejn Alla li jesprimi dan is-​salm f’forma taʼ talba. Għalhekk, ejja nagħtu ħarsa mill-​qrib lejn Salm 90 mil-​lenti taʼ min hu dedikat lil Alla.

Jehovah​—Il-​“Kenn” Tagħna

4-6. Jehovah kif inhu tassew “kenn” għalina?

⁴ Is-​salmista jiftaħ bil-​kliem: “Mulej, int kont għalina kenn minn nisel għal nisel. Qabel ma twieldu l-​muntanji, qabel ma tnisslu [“bl-​uġigħ tal-​ħlas,” “NW”] l-​art u d-​dinja, minn dejjem taʼ dejjem int, o Alla!”—Salm 90:​1, 2.

⁵ Għalina Jehovah, “Alla taʼ dejjem,” hu tassew “kenn”—refuġju spiritwali. (Rumani 16:26) Inħossuna fis-​sigurtà għax bħala Semmiegħ it-​talb hu qiegħed dejjem hemm, lest biex jgħinna. (Salm 65:3 [65:​2, NW]) Ladarba aħna nitfgħu l-​ansjetajiet tagħna fuq Missierna tas-​sema permezz taʼ Ibnu l-​maħbub, ‘is-​sliem taʼ Alla, li jgħaddi kull ma l-​moħħ jistaʼ jifhem, iżommilna qalbna u moħħna sħaħ.’—Filippin 4:​6, 7; Mattew 6:9; Ġwann 14:​6, 14.

⁶ Aħna ngawdu sigurtà spiritwali għax, b’mod figurattiv, Jehovah hu tassew “kenn” għalina. Hu jipprovdi wkoll “kmamar” bħala menqa spiritwali. Dawn x’aktarx huma marbutin mill-​qrib mal-​kongregazzjonijiet tan-​nies tiegħu, fejn ir-​rgħajja bl-​imħabba kollha jaħdmu iebes biex inħossuna fis-​sigurtà. (Isaija 26:20; 32:​1, 2; Atti 20:​28, 29) Iktar minn hekk, xi wħud minna ġejjin minn familji li ilhom ħafna jaqdu lil Alla u raw personalment li Alla hu tassew “kenn minn nisel għal nisel.”

7. F’liema sens “twieldu” l-​muntanji u l-​art tnisslet bħallikieku “bl-​uġigħ tal-​ħlas”?

⁷ Jehovah eżista qabel ma “twieldu” l-​muntanji jew qabel ma l-​art tnisslet bħallikieku “bl-​uġigħ tal-​ħlas.” Mill-​mod kif iħares lejha l-​bniedem, kien jinħtieġ xogħol kbir biex tintgħamel din l-​art bil-​karatteristiċi, fatturi kimiċi, u mekkaniżmi komplikati kollha tagħha. Billi jgħid li l-​muntanji “twieldu” u li l-​art tnisslet bħallikieku “bl-​uġigħ tal-​ħlas,” is-​salmista qed juri rispett kbir għax-​xogħol kollu li ħa Jehovah biex joħloq dawn l-​affarijiet. M’għandniex aħna jkollna dan it-​tip taʼ rispett u apprezzament għal xogħol idejn il-​Ħallieq?

Jehovah Dejjem Lest li Jgħinna

8. Xi tfisser l-​istqarrija li Jehovah hu Alla “minn dejjem taʼ dejjem”?

⁸ “Minn dejjem taʼ dejjem int, o Alla,” kanta s-​salmista. Il-​kelma oriġinali li hawnhekk hi tradotta “dejjem” tistaʼ tirreferi għal affarijiet li għandhom tmiem però t-​tul taʼ żmien tagħhom m’huwiex speċifikat. (Eżodu 31:​16, 17; Lhud 9:15) Iżda, f’Salm 90:2 u f’postijiet oħra fl-​Iskrittura Ebrajka tfisser “eternità,” bħalma qed turi ċar it-​traduzzjoni. (Koħèlet 1:4) Moħħna ma jistax jifhem kif inhu possibbli li Alla ilu jeżisti minn dejjem. Madankollu, Jehovah la kellu bidu u lanqas ma se jkollu tmiem. (Ħabakkuk 1:12) Hu dejjem se jkun ħaj u lest li jgħinna.

9. Is-​salmista maʼ xiex iqabbel elf sena t’eżistenza umana?

⁹ Is-​salmista kien imnebbaħ biex iqabbel elf sena t’eżistenza umana maʼ perijodu qasir ħafna fl-​esperjenza tal-​Ħallieq etern. Waqt li indirizza lil Alla, hu kiteb: “Int traġġaʼ l-​bnedmin lejn it-​trab, u tgħidilhom: ‘Erġgħu lura, intom bnedmin!’ Elf sena huma għalik bħal jum taʼ lbieraħ li għadda, jew bħal sahra tal-​lejl.”—Salm 90:​3, 4.

10. Alla kif ireġġaʼ ’l-bniedem lura “lejn it-​trab”?

¹⁰ Il-​bniedem huwa mortali, u Alla ‘jreġġgħu lura lejn it-​trab.’ Fil-​fatt, Jehovah jgħid: ‘Erġaʼ lura lejn it-​trab taʼ l-​art li minnha int meħud.’ (Ġenesi 2:7; 3:​19) Dan japplika għal kulħadd—b’saħħithom jew dgħajfin, sinjuri jew fqar—għax l-​ebda bniedem imperfett ma jistaʼ jifdi ’l ħadd jew jagħti lil Alla l-​prezz tal-​fidwa tiegħu sabiex ikun jistaʼ jgħix għal dejjem. (Salm 49:​7-10 [49:​6-9, NW]) Imma kemm aħna grati li ‘Alla ta lil Ibnu l-​waħdieni, biex kull min jemmen fih ikollu l-​ħajja taʼ dejjem’!—Ġwann 3:16; Rumani 6:23.

11. Għala nistgħu ngħidu li żmien twil għalina hu qasir ferm għal Alla?

¹¹ Mill-​ħarsa taʼ Jehovah, anki Matusala, li kellu 969 sena, għex inqas minn ġurnata. (Ġenesi 5:27) Għal Alla, elf sena qishom ilbieraħ—perijodu taʼ 24 siegħa—meta jkunu għaddew. Is-​salmista jsemmi wkoll li għal Alla, elf sena huma bħall-​għassa t’erbaʼ sigħat li l-​għassies kien jagħmel mal-​kamp bil-​lejl. (Mħallfin 7:19) Jidher ċar, mela, li dak li għalina jistaʼ jidher żmien twil, għal dak Alla etern, Jehovah, hu qasir ferm.

12. Il-​bnedmin kif inhuma ‘miknusin’ minn Alla?

¹² B’kuntrast maʼ l-​eżistenza eterna t’Alla, il-​ħajja preżenti tal-​bniedem hija qasira tabilħaqq. Is-​salmista jgħid: “Int taħsadhom [‘tiknishom,’ “Karm Żammit”], u jsiru bħal ħolma. Huma bħall-​ħaxix li jinbet fil-​għodu; fil-​għodu jwarrad u jħaddar, fil-​għaxija jidbiel u jinxef.” (Salm 90:​5, 6) Mosè ra eluf taʼ Iżraelin imutu fid-​deżert, ‘miknusin’ minn Alla bħallikieku f’għargħar. Din il-​parti tas-​salm ġiet tradotta: “Int tiknes lill-​bniedem fir-​raqda tal-​mewt.” (New International Version) Mill-​banda l-​oħra, għomor il-​bniedem imperfett huwa biss “ħolma” qasira meta tqabbilha maʼ lejl sħiħ taʼ rqad.

13. Kif aħna “bħall-​ħaxix,” u dan kif għandu jeffettwa l-​mod kif naħsbu?

¹³ Aħna ‘bħall-​ħaxix li fil-​għodu jwarrad u jħaddar’ imma li sa fil-​għaxija jkun dbiel bis-​sħana qawwija tax-​xemx. Iva, il-​ħajja tagħna tgħaddi malajr sewwa sew bħall-​ħaxix li jidbiel f’ġurnata. Għalhekk, ejja ma naħluhx dan it-​teżor li għandna. Minflok, għandna nfittxu l-​gwida t’Alla dwar kif għandna nużaw is-​snin li baqgħalna f’din is-​sistema preżenti t’affarijiet.

Jehovah Jgħinna “Ngħoddu Jiem Ħajjitna”

14, 15. Salm 90:​7-9 kif twettaq fil-​każ taʼ l-​Iżraelin?

¹⁴ Dwar Alla, is-​salmista jżid: “Ninsabu mifnija [“mitmumin,” “Saydon”] bil-​qilla tiegħek, mibluha minħabba l-​għadab tiegħek. Int ġibt quddiem għajnejk ħtijietna, dnubietna l-​moħbija fid-​dawl taʼ wiċċek. Jiemna kollha jgħibu minħabba qilltek, jintemmu bħal tnehida s-​snin taʼ ħajjitna.”—Salm 90:​7-9.

¹⁵ L-​Iżraelin mingħajr fidi ‘ntemmu bil-​qilla t’Alla.’ Huma kienu ‘mibluha minħabba lgħadab tiegħu,’ jew ‘imwerwrin minħabba l-​qilla tiegħu.’ (Saydon) Xi wħud “waqgħu mejta fid-​deżert” b’riżultat tal-​ġudizzju divin. (1 Korintin 10:5) Jehovah ‘ġab quddiem għajnejh ħtijiethom.’ Hu żammhom responsabbli għall-​ħażen li għamlu fil-​beraħ, imma anki ‘dnubiethom il-​moħbija’ kienu ‘fid-​dawl taʼ wiċċu.’ (Proverbji 15:3) Billi qanqlu r-​rabja t’Alla, l-​Iżraelin li baqgħu ma nidmux ‘temmu s-​snin taʼ ħajjithom bħal tnehida.’ Bl-​istess mod, ħajjitna stess hi qasira bħal nifs li jgħaddi minn fommna fi tnehida.

16. Jekk xi ħadd qed jidneb bil-​moħbi, x’għandu jagħmel?

¹⁶ Li kieku xi ħadd minna kellu jagħmel xi dnub bil-​moħbi, forsi jirnexxilu jaħbih għal xi żmien minn bnedmin oħrajn. Iżda l-​ħażen li nagħmlu bil-​moħbi se jkun quddiem Jehovah, u l-​azzjonijiet tagħna se jkissru r-​relazzjoni li għandna miegħu. Sabiex nerġgħu nitħabbu m’Alla nkunu rridu nitolbuh jaħfrilna, induru lura mill-​ħażen tagħna, u naċċettaw bi gratitudni l-​għajnuna spiritwali taʼ l-​anzjani Kristjani. (Proverbji 28:13; Ġakbu 5:​14, 15) Kemm ikun aħjar dan milli ‘ntemmu s-​snin taʼ ħajjitna bħal tnehida,’ u nirriskjaw it-​tama tagħna għall-​ħajja taʼ dejjem!

17. Ġeneralment kemm hi twila l-​ħajja tal-​bniedem, u s-​snin taʼ ħajjitna biex inhuma mimlijin?

¹⁷ Dwar l-​għomor tal-​bnedmin imperfetti, is-​salmista jgħid: “Żmien ħajjitna hu b’kollox sebgħin sena; l-​iżjed tmenin, jekk inkunu f’saħħitna; u l-​biċċa l-​kbira taħbit u niket; malajr jgħaddu, u aħna mmorru magħhom.” (Salm 90:10) Ġeneralment, il-​biċċa l-​kbira tan-​nies jgħixu 70 sena. Taʼ 85 sena, Kaleb tkellem dwar is-​saħħa straordinarja tiegħu. Kien hemm xi eċċezzjonijiet, bħal Aron (123), Mosè (120), u Ġożwè (110). (Numri 33:39; Dewteronomju 34:7; Ġożwè 14:​6, 10, 11; 24:29) Imma mill-​ġenerazzjoni bla fidi li ħarġet mill-​Eġittu, dawk li kienu reġistrati li kellhom 20 sena u fuqhom mietu fi żmien 40 sena. (Numri 14:​29-34) Illum, l-​għomor taʼ bniedem f’ħafna pajjiżi għadu bejn wieħed u ieħor l-​istess bħalma qal is-​salmista. Is-​snin taʼ ħajjitna huma mimlijin “taħbit u niket.” Jgħaddu malajr, “u aħna mmorru magħhom.”—Ġob 14:​1, 2.

18, 19. (a) Xi jfisser li ‘ngħoddu jiem ħajjitna sabiex nimxu bil-​għaqal’? (b) Meta nużaw l-​għerf x’se nitqanqlu biex nagħmlu?

¹⁸ Imbagħad is-​salmista jkanta: “Min jistaʼ jifhem il-​qawwa taʼ qilltek? Min jistaʼ jqis il-​biżaʼ taʼ għadbek? Għalhekk għallimna ngħoddu jiem ħajjitna, sabiex aħna nimxu bil-​għaqal.” (Salm 90:​11, 12) Ħadd minna ma jaf eżatt kemm hi qawwija l-​korla t’Alla jew sa fejn jasal l-​għadab tiegħu. Dan għandu jsaħħilna l-​biżaʼ riverenzjali li għandna lejn Jehovah. Fil-​fatt, għandu jimmotivana biex nistaqsuh kif nistgħu “ngħoddu jiem ħajjitna, sabiex aħna nimxu bil-​għaqal.”

¹⁹ Dan il-​kliem tas-​salmista huwa talba lil Jehovah sabiex jgħin lin-​nies tiegħu jitgħallmu kif juru l-​għerf biex jagħrfu l-​valur tal-​jiem li baqgħalhom u jużawhom b’mod aċċettabbli għal Alla. Sebgħin sena jagħtuna t-​tama li ngħixu madwar 25,500 ġurnata. Iżda hi x’inhi l-​età tagħna, ‘ma nafux x’għad isir għada, għax aħna bħal fwar li jidher għal ftit u mbagħad jgħib.’ (Ġakbu 4:​13-15) Ladarba “ż-​żmien u ċ-​ċirkustanzi” jiġu fuqna lkoll ma nistgħux ngħidu kemm nistgħu ngħixu iktar. Għalhekk, ejja nitolbu għall-​għerf biex niffaċċjaw il-​provi, nittrattaw lil oħrajn b’mod xieraq, u biex nagħmlu l-​aħjar tagħna fis-​servizz taʼ Jehovah issa stess—illum! (Koħèlet 9:11; Ġakbu 1:​5-8) Jehovah jiggwidana permezz tal-​Kelma tiegħu, l-​ispirtu tiegħu, u l-​organizzazzjoni tiegħu. (Mattew 24:​45-​47; 1 Korintin 2:​10; 2 Timotju 3:​16, 17) Meta nużaw l-​għerf nitqanqlu biex ‘infittxu l-​ewwel is-​Saltna t’Alla’ u nużaw il-​jiem taʼ ħajjitna b’mod li nġibu glorja lil Jehovah u nferrħulu qalbu. (Mattew 6:​25-​33; Proverbji 27:11) M’għandniex xi ngħidu, billi nqimuh b’qalb sħiħa mhux se neħilsu mill-​problemi kollha tagħna, imma żgur li se jġibilna ferħ kbir.

Il-​Barka taʼ Jehovah Tagħmilna Ferħanin

20. (a) F’liema sens “iħenn” Alla? (b) Jehovah kif jittrattana jekk nagħmlu xi żball serju imma nuru ndiema ġenwina?

²⁰ Kemm ikun tajjeb li kieku nistgħu nkunu ferħanin matul il-​bqija taʼ ħajjitna! Dwar dan, Mosè jitlob: “Dur lejna, Mulej! Kemm se ddum? Ħenn għall-​qaddejja tiegħek. Imliena kmieni bit-​tjieba [“qalb tajba bl-​imħabba,” “NW”] tiegħek, biex nifirħu u nithennew ħajjitna kollha.” (Salm 90:​13, 14) Alla ma jagħmilx żbalji. Minkejja dan, hu ‘jħenn,’ jew jiddispjaċih, u ‘jdur lura’ mill-​għadab tiegħu. Hu jżomm lura milli jagħti xi kastig meta jara li t-​twissija tiegħu dwar dak li jkun se jagħmel tkun qanqlet bidla fl-​attitudni u l-​kondotta taʼ min ikun għamel il-​ħażin u ġġagħlu jindem. (Dewteronomju 13:18 [13:​17, NW]) Għalhekk, anki meta nagħmlu xi żball serju, jekk nuru ndiema ġenwina Jehovah jimliena bil-​qalb tajba bl-​imħabba tiegħu u jkollna għalfejn “nifirħu.” (Salm 32:​2-5 [32:​1-5, NW]) U jekk nistinkaw biex nimxu fit-​tjieba, se nħossu l-​imħabba leali li Alla għandu għalina u se nkunu nistgħu “nithennew ħajjitna kollha”—iva, għall-​bqija taʼ ħajjitna.

21. Mosè x’setaʼ kien qed jitlob bil-​kliem li hemm imniżżel f’Salm 90:​15, 16?

²¹ Is-​salmista jitlob kollu ħeġġa: “Ferraħna daqs kemm għakkistna, għas-​snin li fihom rajna l-​ħsara. Ħa jidher għemilek quddiem il-​qaddejja tiegħek, u l-​kobor tiegħek quddiem uliedhom.” (Salm 90:​15, 16) Mosè setaʼ kien qed jitlob lil Alla biex ibierek lil Iżrael b’ferħ għall-​istess tul taʼ żmien daqskemm damu fin-​niket u s-​snin li matulhom ġarrbu hemm kbir. Hu talab biex ‘l-​għemil t’Alla,’ il-​barka tiegħu fuq l-​Iżraelin, jidher ċar quddiem il-​qaddejja Tiegħu u li l-​kobor Tiegħu jintwera quddiem uliedhom, jew nisilhom. B’mod xieraq, aħna nistgħu nitolbu biex fid-​dinja l-​ġdida mwiegħda t’Alla, il-​bnedmin ubbidjenti jkollhom xita taʼ barkiet.—2 Pietru 3:13.

22. Skond Salm 90:​17, għalxiex hu xieraq li nitolbu?

²² Salm 90 jikkonkludi b’din it-​talba: “Ħa tkun fuqna l-​grazzja taʼ Alla Sidna! Wettqilna inti x-​xogħol taʼ jdejna, wettaq, iva, xogħol idejna.” (Salm 90:17) Dan il-​kliem jurina kemm hu xieraq li nitolbu lil Alla biex ibierek l-​isforzi li nagħmlu fis-​servizz tiegħu. Sew jekk aħna Kristjani midlukin jew sħabhom, in-​“nagħaġ oħra,” aħna nifirħu li “l-​grazzja taʼ Alla” hija fuqna. (Ġwann 10:16) Kemm aħna ferħanin li Alla ‘wettqilna x-​xogħol taʼ idejna’ bħala proklamaturi tas-​Saltna u f’modi oħra!

Ejja Nkomplu Ngħoddu Jiem Ħajjitna

23, 24. Kif nistgħu nibbenefikaw jekk nimmeditaw fuq Salm 90?

²³ Jekk nimmeditaw fuq Salm 90, dan għandu jgħinna niddependu iżjed minn Jehovah, il-​“kenn” tagħna. Billi nirriflettu fuq dak li jgħid dwar kemm hi qasira l-​ħajja, għandna nsiru iżjed konxji li għandna bżonn il-​gwida divina biex ngħoddu jiem ħajjitna. U jekk nipperseveraw fit-​tfittxija tagħna għall-​għerf divin u napplikawh, nistgħu nkunu ċerti li Jehovah se juri magħna qalb tajba bl-​imħabba u se jberikna.

²⁴ Jehovah se jkompli jurina kif ngħoddu jiem ħajjitna. Jekk aħna naċċettaw l-​istruzzjoni tiegħu se nkunu nistgħu nkomplu ngħoddu jiem ħajjitna għall-​eternità. (Ġwann 17:3) Madankollu, jekk irridu nżommu l-​ħajja taʼ dejjem quddiem għajnejna, Jehovah irid ikun il-​kenn tagħna. (Ġuda 20, 21) Bħalma se naraw fl-​artiklu li jmiss, dan il-​punt joħroġ ċar fil-​kliem inkuraġġanti li nsibu f’Salm 91.

Int Kif Twieġeb?

• Jehovah kif inhu tassew “kenn” għalina?

• Għala nistgħu ngħidu li Jehovah hu dejjem lest li jgħinna?

• Jehovah kif jgħinna “ngħoddu jiem ħajjitna”?

• X’jagħmilna “nithennew ħajjitna kollha”?

[Stampa f’paġna 11]

Jehovah kien Alla “qabel ma twieldu l-​muntanji”

[Stampa f’paġna 12]

Mill-​ħarsa taʼ Jehovah, Matusala, li kellu 969 sena, għex inqas minn ġurnata

[Stampi f’paġna 14]

Jehovah ‘wettqilna x-​xogħol taʼ idejna’