Il-​Qarrejja Tagħna Jistaqsu . . .

Kellu Bidu Alla?

▪ Il-​Bibbja twieġeb li Alla ma kellux bidu. Alla minn dejjem eżista. Hu kemm hu diffiċli biex nifhmu l-​idea tal-​eternità t’Alla, ma nistgħux niċħdu l-​idea sempliċement għax ma nistgħux nifhmuha bis-​sħiħ.

Huwa raġunevoli li nistennew li nifhmu l-​mogħdijiet kollha t’Alla? L-​appostlu Pawlu ddikjara: “O kemm huma profondi r-​rikkezzi u l-​għerf u l-​għarfien t’Alla! Kemm ma jistgħux jinkixfu l-​ġudizzji tiegħu, u kemm huma bla tarf triqatu!” (Rumani 11:33) L-​imħuħ tagħna ma jistgħux jifhmu bis-​sħiħ kemm huma kbar l-​għerf u l-​għarfien t’Alla, l-​istess bħalma tarbija ma tistax tifhem kollox dwar il-​ġenituri tagħha. Dan il-​kliem ispirat taʼ Pawlu, għalkemm primarjament hu dwar kemm Alla hu uniku fl-​għerf u l-​ħniena tiegħu, jagħti x’jifhem li hemm aspetti t’Alla Ġeħova u tal-​mod kif jaġixxi li huma profondi wisq biex moħħna jifhimhom. L-​idea li Alla m’għandux bidu milli jidher hi waħda minn dawn l-​aspetti. Madankollu, nistgħu nafdaw għalkollox f’dak li l-​Bibbja tgħallem dwar Alla. Ġesù Kristu qal rigward il-​kitbiet sagri: “Kelmtek hi l-​verità.”—Ġwanni 17:17.

Mosè qal f’talba lil Ġeħova: “Minn dejjem kont, u se tibqaʼ għal dejjem.” (Salm 90:2, The Holy Bible, New Century Version) Hawnhekk, Mosè jiddeskrivi l-​eżistenza t’Alla bħala li hi mifruxa f’żewġ direzzjonijiet. Waħda hi lejn il-​futur. Ġeħova hu “Dak li jgħix għal dejjem taʼ dejjem.” (Rivelazzjoni 4:10) Għalhekk, l-​eżistenza t’Alla tinfirex ’il quddiem lejn il-​futur dejjiemi. Id-​direzzjoni l-​oħra hi lejn il-​passat. Fi kliem ieħor, Alla la ġie maħluq u lanqas ma beda jeżisti. Minflok, l-​eżistenza t’Alla tmur lura fil-​passat dejjiemi.

L-​ideat astratti huma diffiċli għal ħafna minna biex nifhmuhom. Madankollu, kultant ikollna naċċettaw ideat diffiċli, bħan-​numri pożittivi u negattivi. Tistaʼ ma tieqaf qatt tgħodd in-​numri. Ma nistgħux aħna napplikaw dan l-​eżempju għas-​snin tal-​ħajja tal-​Ħallieq?

Għalhekk, huwa xieraq li Alla biss iġorr it-​titlu uniku “Sultan taʼ l-​eternità.” (1 Timotju 1:17) Aħseb ftit: Ġesù Kristu, il-​mirjadi tal-​anġli fis-​sema, u l-​umanità fuq l-​art, ilkoll għandhom bidu għax ġew maħluqin. (Kolossin 1:15, 16) Imma Alla le. Jekk toqgħod tinsisti li Alla bilfors ġie maħluq tintroduċi rraġunar bla skop u li ma jwassal imkien dwar min ħalaq lill-​Ħallieq. Le, Ġeħova biss jeżisti “mill-​eternità għall-​eternità.” (Salm 90:2, The New American Bible) Fi kliem ieħor, Ġeħova eżista “għall-​eternità kollha li għaddiet.”—Ġuda 25.

Imma, tinsiex li l-​idea tal-​eżistenza eterna t’Alla mhijiex sempliċement fatt li ma jeffettwaniex. Ħarsa iktar mill-​qrib lejn it-​talba taʼ Mosè turina li l-​eternità t’Alla tiggarantixxi wegħda kollha mħabba taʼ ħajja taʼ dejjem għalina. B’kuntrast mal-​ħajja qasira tagħna t’issa, Alla hu deskritt bħala “post fejn ngħammru minn ġenerazzjoni għal ġenerazzjoni.” Bħala Missier li jħobb, Ġeħova kien, qiegħed, u dejjem se jibqaʼ hemm għall-​poplu tiegħu. Jalla ssib faraġ f’din il-​verità mill-​isbaħ!—Salm 90:1.