Kif Tirreaġixxi Int għall-​Ipokrisija?

FIL-​ĠNIEN tal-​Ġetsemani, Ġuda l-​Iskarjota resaq lejn Ġesù u “biesu [“b’mod teneru ferm,” NW].” Hekk kienu mdorrijin jagħmlu biex juru l-​imħabba tenera tagħhom. Imma għal Ġuda din kienet biss reċta. Hu għamel hekk biex dawk li ġew miegħu dak il-​lejl setgħu jagħrfu lil Ġesù u jarrestawh. (Mattew 26:​48, 49) Ġuda kien ipokrita—bniedem li juri wiċċ b’ieħor, xi ħadd li jaħbi l-​motivi ħżiena tiegħu wara maskra taʼ sinċerità. Il-​kelma Griega għal “ipokrita” tfisser “wieħed li jwieġeb” u tistaʼ tfisser ukoll attur tal-​palk. Maż-​żmien, il-​kelma bdiet tintuża biex tirreferi għal xi ħadd li kien jaġixxi b’tali mod sabiex iqarraq b’ħaddieħor.

Kif tirreaġixxi int għall-​ipokrisija? Per eżempju, tħossok irrabjat x’ħin tara kull reklam daqsiex tas-​sigaretti minkejja l-​evidenza ċara li dawn tant jagħmlu ħsara lis-​saħħa? Tħossok mgħaddab minħabba l-​ipokrisija taʼ dawk li jkollhom it-​tfal fdati f’idejhom biex jieħdu ħsiebhom imma minflok jabbużaw minnhom? Tħossok imweġġaʼ meta ssir taf li ħabib li kont taħlef bih ittradiek? L-​ipokrisija reliġjuża kif teffettwak?

“Ħażin Għalikom . . . Uċuħ b’Oħra!”

Ikkunsidra l-​atmosfera reliġjuża meta Ġesù kien fuq l-​art. L-​iskribi u l-​Fariżej kienu jippretendu li huma għalliema leali tal-​Liġi t’Alla, imma fir-​realtà kienu jimlew l-​imħuħ b’tagħlim uman li kien idawwar l-​attenzjoni tan-​nies ’il bogħod minn Alla. L-​iskribi u l-​Fariżej bi skruplu kbir ħadu l-​liġi kelma b’kelma, imma għalqu għajnejhom għall-​prinċipji essenzjali li jirriflettu l-​imħabba u l-​mogħdrija. Quddiem in-​nies kienu jippretenduha taʼ qaddisin, imma fil-​moħbi kienu jagħmlu kull xorta taʼ ħażen. L-​għemejjel tagħhom qatt ma kienu jaqblu maʼ kliemhom. Dak li kienu jagħmlu kienu jagħmluh “għal għajnejn in-​nies.” Kienu jixbhu l-​‘oqbra mbajda li minn barra jidhru sbieħ, u minn ġewwa mimlija għadam tal-​mejtin u kull xorta taʼ ħmieġ.’ Bil-​qlubija kollha, Ġesù kien jikxef l-​ipokrisija tagħhom u kemm-il darba qalilhom: “Ħażin għalikom intom il-​kittieba u l-​Fariżej, uċuħ b’oħra!”—Mattew 23:​5, 13-31.

Kieku kont tgħix f’dak iż-​żmien, x’aktarx li, bħal kwalunkwe bniedem ieħor taʼ qalb onesta, kont tistmerrha dik l-​ipokrisija reliġjuża li kien hemm. (Rumani 2:​21-24; 2 Pietru 2:​1-3) Imma kont int tħalli l-​ipokrisija taʼ l-​iskribi u l-​Fariżej twebbislek qalbek li tasal biex tiċħad kwalunkwe reliġjon, inkluż dik li kienu jgħallmu u jipprattikaw Ġesù Kristu u d-​dixxipli tiegħu? Ma kienx dan jiswielek taʼ deni?

Il-kondotta ipokrita taʼ nies reliġjużi għandha mnejn iġġagħalna nistmerru r-​reliġjon. Madankollu, jekk naġixxu b’dan il-​mod inkunu qed inħallu dan jagħmina u jżommna milli naraw is-​sinċerità taʼ dawk li jipprattikaw il-​qima vera. Dak l-​istess ħajt li nkunu bnejna għall-​protezzjoni jistaʼ fil-​fatt iżommna lura milli jkollna ħbieb ġenwini. Għalhekk, ir-​reazzjoni tagħna lejn l-​ipokrisija għandha tkun raġunevoli u bilanċjata.

“Iftħu Għajnejkom”

L-​ewwel, irridu nsiru nafu kif nagħrfu min hu ipokrita u min m’huwiex. Dan mhux dejjem ikun faċli. Ċerta familja kellha tħallas prezz għoli ferm għal dan. L-​omm kienet waqgħet f’koma. Il-​familja tagħha fetħet kawża kontra l-​isptar minħabba li dak li ġara sar bi traskuraġni kbira, u qabbdet avukat li kien ukoll qassis taʼ knisja lokali. Għalkemm inqatgħet li l-​isptar kellu jħallas madwar Lm1,478,260, it-​traġedja tal-​familja kompliet tikber. L-​omm mietet fqira, u lanqas biss kellhom flus biex iħallsulha l-​funeral. Dan kif? Għaliex kważi s-​somma kollha marret fil-​but taʼ l-​avukat. Ġurnal dwar il-​liġi stqarr hekk dwar dan l-​avukat: “Li kieku aġixxa bħalma ppriedka . . . , il-​messaġġ tiegħu kien ikun ‘ejja nisolħu’ u mhux ‘ejja nitolbu.’” Kif nistgħu nipproteġu lilna nfusna minn nies taʼ din il-​kwalità?

“Iftħu għajnejkom.” Dan hu l-​parir li Ġesù ta lin-​nies li kienu qed iħabbtu wiċċhom maʼ l-​ipokrisija reliġjuża fi żmienu. (Mattew 16:6; Luqa 12:1) Iva, irridu noqogħdu b’sebaʼ għajnejn. Xi nies jistgħu jgħidu li għandhom l-​aqwa intenzjonijiet u forsi wkoll jidhru li huma verament sinċieri, imma jeħtieġ li noqogħdu attenti kemm jistaʼ jkun u ma nemmnuhomx sempliċement għax jidhru li huma tajbin. Jekk inkunu nafu li hawn ħafna flus foloz fl-​idejn, ma niċċekkjawhomx bir-​reqqa l-​flus tagħna?

Anki fil-​kongregazzjoni Kristjana vera dehru xi ipokriti. Id-​dixxiplu Ġuda wissiena dwarhom, u qal: “Dawn huma l-​blat moħbi taħt l-​ilma fil-​festi taʼ mħabba tagħkom filwaqt li jiffesteġġaw magħkom, rgħajja li jżoqqu lilhom infushom bla biżaʼ; sħab bla ilma li jinġarr ’l hawn u ’l hinn mill-​irjieħ; siġar fl-​aħħar tal-​ħarifa, imma bla frott.”—Ġuda 12, NW.

Meta ‘nżommu għajnejna miftuħin’ inkunu qed nevitaw li niġu mqarrqin minn xi ħadd li minn barra jidher li jħobbna imma fil-​fatt ikun egoist u jħobb ixerred opinjonijiet li ma jkunux ibbażati fuq il-​Kelma t’Alla. Bħal blata ppontata moħbija taħt wiċċ l-​ilma kalm, bniedem bħal dan jistaʼ jikkaġuna nawfraġju spiritwali għal dawk li ma jkunux attenti. (1 Timotju 1:19) Wieħed ipokrita jistaʼ jagħmel ħafna wegħdi t’għajnuna spiritwali imma fil-​fatt ikun qisu ‘sħaba bla ilma’—ma jipproduċix qatra waħda li hi waħda. Bħal siġra li ma tagħmilx frott, wieħed li jqarraq ma jipproduċi ebda frott Kristjan ġenwin. (Mattew 7:​15-20; Galatin 5:​19-21) Iva, jeħtieġ li noqogħdu għassa kontra nies qarrieqa bħal dawn. Iżda dan irridu nagħmluh mingħajr ma naħsbu ħażin f’kulħadd.

“Tiġġudikawx”

Kemm hu faċli, taʼ bnedmin imperfetti li aħna, li naraw in-​nuqqasijiet taʼ ħaddieħor waqt li ninjoraw tagħna! Għalhekk, din it-​tendenza tistaʼ faċilment twassalna għall-​ipokrisija. Ġesù qal: “Ja wiċċ b’ieħor, neħħi l-​ewwel it-​travu li għandek f’għajnek int, ħalli mbagħad tara sewwa tneħħi t-​tibna minn għajn ħuk!” Nagħmlu tajjeb li nieħdu l-​parir tiegħu: “Tiġġudikawx, biex ma tkunux iġġudikati; għax bl-​istess ġudizzju li tagħmlu intom, tkunu ġġudikati . . . Xi trid tħares lejn it-​tibna li hemm f’għajn ħuk? Għax ma tarax it-​travu li għandek f’għajnek int?”—Mattew 7:​1-5.

Meta xi drabi naraw oħrajn jaġixxu b’mod li għalina jidher ipokrita, irridu noqogħdu attenti biex ma naqbdux u nittimbrawhom bħala ipokriti. Per eżempju, l-​appostlu Pietru biex jogħġob lil dawk il-​Lhud minn Ġerusalemm li kienu qed iżuru Antjokja ‘beda jaħrab u jitwarrab minn’ adoraturi sħabu li kienu Ġentili. Barnaba ‘wkoll ħalla ruħu jitħajjar minn Pietru u oħrajn f’dan il-​wiri taʼ ħaġa b’oħra.’ Pietru għamel dan minkejja l-​fatt li kellu l-​privileġġ uniku li jiftaħ it-​triq biex il-​Ġentili jkunu jistgħu jiġu milqugħin fil-​kongregazzjoni Kristjana. (Galatin 2:​11-14; Atti 10:​24-28, 34, 35) Imma l-​iżball li għamlu Barnaba u Pietru żgur li ma poġġiehomx fl-​istess kategorija taʼ l-​iskribi u l-​Fariżej jew taʼ Ġuda l-​Iskarjota.

“Qisu li l-​Imħabba Tagħkom Ma Tkunx Wiċċ b’Ieħor”

“Meta tagħmel il-​ġid lil ħaddieħor,” wissa Ġesù, “tikrix xi trumbettier biex jgħaddi quddiemek—bħalma jagħmlu dawk l-​atturi fis-​sinagogi u fit-​toroq biex ikunu ċerti li kulħadd jammirahom.” (Mattew 6:​2, Phillips) “Qisu li l-​imħabba tagħkom ma tkunx wiċċ b’ieħor,” kiteb l-​appostlu Pawlu. (Rumani 12:9) Hu inkuraġġixxa liż-​żagħżugħ Timotju biex juri “mħabba li toħroġ minn qalb safja . . . u minn fidi sinċiera [“mingħajr ipokrisija,” NW].” (1 Timotju 1:5) Jekk l-​imħabba u l-​fidi tagħna huma ġenwini—bla ebda sinjal taʼ egoiżmu u qerq—kulħadd se jafdana. Inkunu nistgħu verament insaħħu u ninkuraġġixxu lil dawk taʼ madwarna. (Filippin 2:4; 1 Ġwann 3:​17, 18; 4:​20, 21) U fuq kollox, se jkollna l-​approvazzjoni taʼ Jehovah.

Mill-banda l-​oħra, l-​ipokrisija eventwalment se tkun tfisser id-​daqqa tal-​mewt għal dawk li jipprattikawha. Fl-​aħħar, l-​ipokrisija se toħroġ kompletament fil-​beraħ. “Xejn ma hu mgħotti li ma jinkixifx,” qal Ġesù Kristu, “u xejn ma hu moħbi li ma jsirx magħruf.” (Mattew 10:26; Luqa 12:2) L-​għaref Sultan Salamun iddikjara: “Għax Alla [veru] jġib għall-​ħaqq tiegħu l-​għemejjel kollha, sa l-​inqas ħaġa moħbija, sew tajba u sew ħażina.”—Koħèlet 12:14.

Sadanittant, għala għandna nħallu l-​ipokrisija t’oħrajn teffettwana tant li ċċaħħadna mill-​imħabba ġenwina taʼ ħbieb sinċieri? Nistgħu noqogħdu attenti mingħajr ma nkunu suspettużi żżejjed. U ejja nagħmlu ħilitna kollha biex inżommu l-​imħabba u l-​fidi tagħna ħelsin mill-​ipokrisija.—Ġakbu 3:17; 1 Pietru 1:22.

[Stampi f’paġna 22]

Kont int tħalli l-​ipokrisija taʼ l-​iskribi u l-​Fariżej tbiegħdek minn Ġesù Kristu u mid-​dixxipli tiegħu?