Il-​Kristjani Veri Kollha Huma Evanġelizzaturi

“Għannu lill-​Mulej, bierku ismu! Ħabbru minn jum għal ieħor is-​salvazzjoni tiegħu.”—SALM 96:2.

1. In-​nies liema aħbar tajba għandhom bżonn jisimgħu, u x-​Xhieda taʼ Jehovah kif inhuma eżemplari f’li jxerrdu din l-​aħbar?

F’DINJA fejn kuljum iseħħ xi diżastru, huwa verament taʼ faraġ li tkun taf li bħalma tgħid il-​Bibbja, il-​gwerer, il-​kriminalità, il-​ġuħ, u l-​moħqrija se jispiċċaw dalwaqt. (Salm 46:10 [46:​9, NW]; 72:​3, 7, 8, 12, 16) Tabilħaqq, m’hijiex din aħbar tajba li kulħadd jeħtieġ li jismaʼ? Hekk jaħsbu x-​Xhieda taʼ Jehovah. Huma magħrufin kullimkien bħala wħud li jippridkaw “aħbar tajba taʼ xi ħaġa aħjar.” (Isaija 52:​7, NW) Huwa minnu li ħafna Xhieda sofrew il-​persekuzzjoni għax kienu determinati li jxandru l-​aħbar tajba. Imma huma jħobbuhom lin-​nies u jixtiqulhom il-​ġid. U x’isem tajjeb għamlu għalihom infushom ix-​Xhieda bħala nies taʼ żelu u perseveranza!

2. X’inhi raġuni waħda għala x-​Xhieda taʼ Jehovah huma żelużi?

² Iż-​żelu tax-​Xhieda taʼ Jehovah illum jixbah lil dak tal-​Kristjani taʼ l-​ewwel seklu. Dwar dawn taʼ l-​aħħar, il-​ġurnal Kattoliku Ruman L’Osservatore Romano qal b’mod korrett: “Malli kienu jitgħammdu, l-​ewwel Kristjani kienu jħossuh bħala d-​dmir tagħhom li jxerrdu l-​Evanġelju. Minn fomm għal fomm, l-​ilsiera xandru l-​Evanġelju.” Ix-​Xhieda taʼ Jehovah għala huma daqshekk żelużi, bħalma kienu l-​Kristjani tal-​bidu? L-​ewwelnett, għaliex l-​aħbar tajba li jxandru ġejja mingħand Alla Jehovah innifsu. Jistaʼ jkun hemm raġuni aħjar minn din għaż-​żelu tagħhom? L-​ippridkar tagħhom huwa bi tweġiba għall-​kliem tas-​salmista: “Għannu lill-​Mulej, bierku ismu! Ħabbru minn jum għal ieħor is-​salvazzjoni tiegħu.”—Salm 96:2.

3. (a) Liema hi t-​tieni raġuni għala x-​Xhieda taʼ Jehovah huma żelużi? (b) X’inhu involut fis-​“salvazzjoni” minn Alla?

³ Kliem is-​salmista jfakkarna fit-​tieni raġuni għala x-​Xhieda taʼ Jehovah huma żelużi. Il-​messaġġ tagħhom huwa messaġġ taʼ salvazzjoni. Xi individwi jaħdmu fil-​qasam mediku, jew dak soċjali, jew ekonomiku, jew f’oqsma oħrajn biex itejbu l-​kwalità tal-​ħajja taʼ sħabhom il-​bnedmin, u dawn l-​isforzi huma taʼ min ifaħħarhom. Imma kulma jistaʼ jagħmel il-​bniedem għal bniedem ieħor huwa limitat ferm meta tqabblu mas-​“salvazzjoni” minn Alla. Permezz taʼ Ġesù Kristu, Jehovah se jsalva lill-​ġwejdin mid-dnub, mill-mard, u mill-mewt. Dawk li jibbenefikaw se jgħixu għal dejjem! (Ġwann 3:​16, 36; Apokalissi 21:​3, 4) Illum, is-​salvazzjoni hija waħda mill-​“għeġubijiet” li jitkellmu dwarha l-​Kristjani bi tweġiba għall-​kliem li ġej: “Xandru fost il-​ġnus is-​sebħ tiegħu, fost il-​popli kollha l-​għeġubijiet tiegħu. Għax kbir il-​Mulej, taʼ min ifaħħru ħafna, tal-​biżaʼ aktar mill-​allat kollha.”—Salm 96:​3, 4.

L-​Eżempju tas-​Sid

4-6. (a) Liema hi t-​tielet raġuni għala x-​Xhieda taʼ Jehovah huma żelużi? (b) Ġesù kif wera żelu għax-​xogħol taʼ l-​ippridkar taʼ l-​aħbar tajba?

⁴ Hemm it-​tielet raġuni għala x-​Xhieda taʼ Jehovah huma żelużi. Huma jsegwu l-​eżempju taʼ Ġesù Kristu. (1 Pietru 2:21) Dan il-​bniedem perfett aċċetta b’qalbu kollha l-​inkarigu li jwassal il-​bxara t-​tajba lill-​ġwejdin. (Isaija 61:1; Luqa 4:​17-21) B’hekk, hu sar evanġelizzatur, xandâr taʼ l-​aħbar tajba. Hu vvjaġġa mal-​Galilija u l-​Lhudija kollha, “ixandar l-​Evanġelju tas-​Saltna.” (Mattew 4:23) U peress li kien jaf li ħafna kienu se jaċċettaw din l-​aħbar tajba, hu qal lid-​dixxipli tiegħu: “Il-​ħsad huwa kbir, iżda l-​ħaddiema ftit. Itolbu mela lil Sid il-​ħsad biex jibgħat ħaddiema għall-​ħsad tiegħu.”—Mattew 9:​37, 38.

⁵ Fi qbil mat-​talba tiegħu stess, Ġesù ħarreġ lil oħrajn biex ikunu evanġelizzaturi. Wara ftit taż-​żmien, hu bagħat lill-​appostli tiegħu waħedhom u qalilhom: “Intom u sejrin, xandru u għidu li s-​Saltna tas-​Smewwiet waslet.” Kien se jkun iktar prattiku għalihom li joħolqu xi sistemi biex itaffu l-​problemi soċjali taʼ żmienhom? Jew iktar kien imisshom involvew ruħhom fil-​politika biex jiġġieldu kontra l-​korruzzjoni tant mifruxa f’dak iż-​żmien? Le. Minflok, Ġesù stabbilixxa l-​livell għall-​evanġelizzaturi Kristjani kollha meta qal lis-​segwaċi tiegħu: “Intom u sejrin, xandru.”—Mattew 10:​5-7.

⁶ Iktar tard, Ġesù bagħat lil grupp ieħor taʼ dixxipli biex iħabbru: ‘Is-​Saltna taʼ Alla waslet.’ Meta ġew lura biex jirrapportaw is-​suċċess tal-​vjaġġ tagħhom bħala evanġelizzaturi, Ġesù ried itir bil-​ferħ. Hu talab: “Nfaħħrek, Missier, Sid is-​sema u l-​art, għax int dawn il-​ħwejjeġ ħbejthom lil min għandu l-​għerf u d-​dehen u wrejthom liċ-​ċkejknin.” (Luqa 10:​1, 8, 9, 21) Id-​dixxipli taʼ Ġesù, li qabel kienu jaħdmu iebes bħala sajjieda, bdiewa, u f’xogħlijiet oħra bħal dawn, kienu bħal tfal ċkejknin meta tqabbilhom mal-​mexxejja reliġjużi taʼ dak il-​ġens, li kellhom edukazzjoni għolja. Imma d-​dixxipli ġew imħarrġin biex ixandru l-​aqwa aħbar tajba li teżisti.

7. Wara li Ġesù telaʼ s-​sema, is-​segwaċi tiegħu lil min ippridkawha l-​ewwel l-​aħbar tajba?

⁷ Wara li Ġesù telaʼ s-​sema, is-​segwaċi tiegħu komplew ixerrdu l-​aħbar tajba taʼ salvazzjoni. (Atti 2:​21, 38-40) Lil min ippridkaw l-​ewwel? Marru huma għand il-​ġnus li ma kinux jafu lil Alla? Le, l-​ewwel qasam għall-​attività tagħhom kien Iżrael, poplu li kien ilu midħla taʼ Jehovah għal iktar minn 1,500 sena. Kellhom huma d-​dritt li jippridkaw f’pajjiż fejn Jehovah kien diġà qed jiġi meqjum? Iva. Ġesù kien qalilhom: “Tkunu xhieda tiegħi f’Ġerusalemm, fil-​Lhudija kollha u s-​Samarija u sa truf l-​art.” (Atti 1:8) Iżrael kellu bżonn jismaʼ l-​aħbar tajba daqskemm kellu bżonn jismagħha kwalunkwe ġens ieħor.

8. Illum ix-​Xhieda taʼ Jehovah kif jimitaw lis-​segwaċi taʼ Ġesù li għexu fl-​ewwel seklu?

⁸ B’mod simili, illum ix-​Xhieda taʼ Jehovah jippridkaw fid-​dinja kollha. Huma jaħdmu id f’id maʼ l-​anġlu li ra Ġwanni u li kellu “l-​Evanġelju taʼ dejjem ħalli jxandru lil min jgħammar fuq l-​art, lil kull ġens, tribù, lsien u poplu.” (Apokalissi 14:6) Fis-​sena 2001, huma kienu attivi f’235 pajjiż u territorju, inkluż postijiet li normalment jitqiesu bħala Kristjani. Jagħmlu ħażin ix-​Xhieda taʼ Jehovah li jippridkaw f’postijiet fejn il-​Kristjaneżmu diġà stabbilixxa l-​knejjes tiegħu? Xi wħud hekk jgħidu, u għandhom mnejn saħansitra jqisu dan l-​evanġelizzar bħala li huwa “serq tan-​nagħaġ.” Madankollu, ix-​Xhieda taʼ Jehovah jiftakru f’dak li kien iħoss Ġesù għal-​Lhud umlin taʼ żmienu. Għalkemm diġà kellhom saċerdozju, Ġesù ma ħasibhiex darbtejn biex jgħidilhom l-​aħbar tajba. Hu “tħassarhom, għax kienu mdejjqa u mitluqa bħal nagħaġ bla ragħaj.” (Mattew 9:36) Meta x-​Xhieda taʼ Jehovah isibu nies umlin li m’għandhomx għarfien dwar Jehovah u s-​Saltna tiegħu, għandhom huma jżommu lura l-​aħbar tajba minn individwi bħal dawn għaliex xi reliġjon issostni li għandha l-​awtorità fuqhom? Waqt li nsegwu l-​eżempju taʼ l-​appostli taʼ Ġesù, aħna nwieġbu le. L-​aħbar tajba trid tiġi pridkata “lill-​ġnus kollha,” mingħajr eċċezzjoni.—Mark 13:10.

Il-​Kristjani tal-​Bidu Kollha Kienu Evanġelizzaturi

9. Fl-​ewwel seklu, fil-​kongregazzjoni Kristjana min ħa sehem fix-​xogħol taʼ l-​ippridkar?

⁹ Fl-​ewwel seklu, min ħa sehem fix-​xogħol taʼ l-​ippridkar? Il-​fatti juru li l-​Kristjani kollha kienu evanġelizzaturi. L-​awtur W. S. Williams jinnota: “L-​evidenza ġenerali hi li l-​Kristjani kollha fil-​Knisja tal-​bidu . . . ppridkaw l-​evanġelju.” Rigward il-​ġrajjiet li seħħew nhar jum il-​Pentekoste tas-​sena 33 E.K., il-​Bibbja tgħid: “Mtlew ilkoll [irġiel u nisa] bl-​Ispirtu s-​Santu u bdew jitkellmu b’ilsna oħra, skond ma l-​Ispirtu kien jagħtihom li jitkellmu.” L-​evanġelizzaturi saru jinkludu rġiel u nisa, żgħar u kbar, ilsiera u nies ħielsa. (Atti 1:14; 2:​1, 4, 17, 18; Ġoel 3:​1, 2 [2:​28, 29, NW]; Galatin 3:28) Meta ħafna Kristjani kellhom jaħarbu minn Ġerusalemm minħabba l-​persekuzzjoni, “dawk li xterdu bdew ixandru l-​kelma kull fejn marru.” (Atti 8:4) “Dawk li xterdu” kollha evanġelizzaw, mhux biss ftit uħud maħturin.

10. Liema inkarigu doppju twettaq qabel il-​qerda tas-​sistema Lhudija?

¹⁰ Hekk kienu jsiru l-​affarijiet matul dawk is-​snin tal-​bidu. Ġesù pprofetizza: “Dan l-​Evanġelju tas-​Saltna jixxandar fid-​dinja kollha, biex il-​ġnus kollha jkollhom xhieda. Mbagħad jiġi t-​tmiem.” (Mattew 24:14) Fit-​twettiq taʼ dan il-​kliem fl-​ewwel seklu, l-​evanġelju kien ġie mxandar maʼ kullimkien qabel ma l-​eżerċti Rumani qerdu s-​sistema reliġjuża u politika Lhudija. (Kolossin 1:23) Iżjed minn hekk, is-​segwaċi kollha taʼ Ġesù obdew il-​kmand tiegħu: “Morru, mela, agħmlu dixxipli mill-​ġnus kollha, u għammduhom fl-​isem tal-​Missier u taʼ l-​Iben u taʼ l-​Ispirtu s-​Santu, u għallmuhom iħarsu dak kollu li ordnajtilkom jien.” (Mattew 28:​19, 20) Il-​Kristjani tal-​bidu ma ħeġġewx lill-​ġwejdin biex jemmnu b’Ġesù u mbagħad telquhom għal rajhom mingħajr ma pprovdewlhom gwida, bħalma jagħmlu xi predikaturi moderni. Pjuttost, għallmuhom biex isiru dixxipli taʼ Ġesù, organizzawhom f’kongregazzjonijiet, u ħarrġuhom sabiex dawn imbagħad setgħu jippridkaw l-​aħbar tajba u jagħmlu dixxipli. (Atti 14:​21-23) Illum, ix-​Xhieda taʼ Jehovah jagħmlu l-​istess ħaġa.

11. Illum min jieħu sehem f’li jħabbar l-​aqwa aħbar tajba lill-​bnedmin?

¹¹ Għadd taʼ Xhieda taʼ Jehovah, li mxew fuq l-​eżempji taʼ Pawlu, Barnaba, u oħrajn fl-​ewwel seklu, marru bħala missjunarji f’pajjiżi barranin. Xogħolhom verament għamel il-​ġid, ladarba dawn ma involvewx ruħhom fil-​politika jew b’xi mod ieħor tbiegħdu mill-​inkarigu li jippridkaw l-​aħbar tajba. Huma sempliċement obdew il-​kmand taʼ Ġesù: “Intom u sejrin, xandru.” Madankollu, il-​biċċa l-​kbira mix-​Xhieda taʼ Jehovah m’humiex missjunarji f’pajjiżi barranin. Ħafna minnhom jaqilgħu l-​għajxien tagħhom billi jagħmlu xogħol sekulari, u oħrajn għadhom l-​iskola. Xi wħud qegħdin irabbu t-​tfal. Imma x-​Xhieda kollha jaqsmu m’oħrajn l-​aħbar tajba li tgħallmu huma. Żgħar u kbar, irġiel u nisa, huma jwieġbu bil-​ferħ għat-​twissija tal-​Bibbja: “Ippriedka l-​kelma, kun qiegħed tagħmel dan b’urġenza fi staġun favorevoli, fi staġun taʼ inkwiet.” (2 Timotju 4:​2, NW) Bħall-​Kristjani taʼ qabilhom fl-​ewwel seklu, huma jkomplu “jgħallmu u jxandru bla waqfien li Ġesù hu l-​Messija.” (Atti 5:42) Huma qegħdin iħabbru l-​aqwa aħbar tajba għall-​umanità.

Proselitiżmu jew Evanġelizzar?

12. X’inhu l-​proselitiżmu, u kif qegħdin iħarsu lejh illum?

¹² Fil-​lingwa Griega hemm il-​kelma pro·se’ly·tos, li tfisser “konvertit.” Minn din ġiet il-​kelma “proselitiżmu,” li bażikament tfisser li tikkonverti lin-​nies. Illum, xi wħud jgħidu li l-​proselitiżmu jagħmel il-​ħsara. Dokument pubblikat mill-​Kunsill Dinji tal-​Knejjes saħansitra jitkellem dwar “id-​dnub tal-​proselitiżmu.” Għala? Il-​Catholic World Report jgħid: “Bis-​sħiq kontinwu taʼ l-​ilmenti Ortodossi, il-​‘proselitiżmu’ assuma t-​tifsira negattiva taʼ konverżjoni sforzata.”

13. X’inhuma xi eżempji taʼ proselitiżmu li ġab il-​ħsara?

¹³ Jagħmel ħsara l-​proselitiżmu? Jistaʼ jkun. Ġesù qal li l-​proselitiżmu taʼ l-​iskribi u l-​Fariżej kien taʼ ħsara għal dawk li kkonvertew għar-​reliġjon tagħhom. (Mattew 23:15) Ċertament, il-​“konverżjoni sforzata” hija ħażina. Per eżempju, skond il-​kittieb taʼ l-​istorja Ġużeppi Flavju, meta l-​Makkabi Ġwanni Irkanu rażżan lill-​Idumin, hu “ppermettielhom jibqgħu f’pajjiżhom bil-​patt li jagħmlu ċ-​ċirkonċiżjoni u jkunu lesti li josservaw il-​liġijiet tal-​Lhud.” Jekk riedu jgħixu taħt il-​ħakma tal-​Lhud, l-​Idumin kellhom jipprattikaw ir-​reliġjon Lhudija. Il-​kittieba taʼ l-​istorja jgħidulna li fit-​tmien seklu E.K., Karlumanju rebaħ lis-​Sassoni pagani taʼ l-​Ewropa taʼ Fuq u sforzahom b’mod brutali biex jikkonvertu.a Iżda, kemm kienu sinċieri l-​konverżjonijiet tas-​Sassoni jew taʼ l-​Idumin? Per eżempju, kemm kienet ġenwina r-​rabta li kellu s-​Sultan Idumi Erodi mal-​Liġi taʼ Mosè li kienet imnebbħa minn Alla, speċjalment meta pprova joqtol lil Ġesù tarbija?—Mattew 2:​1-18.

14. Xi wħud mill-​missjunarji tal-​Kristjaneżmu kif jagħmlu pressjoni fuq in-​nies biex jikkonvertuhom?

¹⁴ Jiġu n-​nies sforzati biex jikkonvertu llum? F’ċertu sens, hemm min jiġi. Huwa rapportat li ċerti missjunarji tal-​Kristjaneżmu joffru boroż taʼ studju barra ’l pajjiż lil uħud li jkunu lesti jikkonvertu għar-​reliġjon tagħhom. Jew forsi lil xi refuġjat imġewwaħ l-​ewwel iġagħluh jattendi għal servizz reliġjuż sabiex ikun jistaʼ jikseb razzjon taʼ ikel. Skond stqarrija li ħarġet fl-​1992 minn konvenzjoni taʼ Isqfijiet Ortodossi, “il-​proselitiżmu kultant iseħħ permezz taʼ lixka materjali u kultant b’diversi forom taʼ vjolenza.”

15. Ix-​Xhieda taʼ Jehovah jagħmlu proselitiżmu fit-​tifsira moderna tal-​kelma? Spjega.

¹⁵ Li tisforza lin-​nies biex ibiddlu r-​reliġjon tagħhom huwa ħażin. Ċertament, ix-​Xhieda taʼ Jehovah ma jaġixxux hekk.b Għalhekk, huma ma jagħmlux proselitiżmu fit-​tifsira moderna tal-​kelma. Minflok, bħall-​Kristjani taʼ l-​ewwel seklu, huma jippridkaw l-​aħbar tajba lil kulħadd. Kulmin jaċċetta minn rajh jiġi mistieden biex jieħu iktar għarfien permezz taʼ studju tal-​Bibbja. Dawk li juru interess jitgħallmu jpoġġu l-​fidi tagħhom f’Alla u fl-​iskopijiet tiegħu. Din il-​fidi hija bbażata b’mod sod fuq għarfien eżatt mill-​Bibbja. B’riżultat taʼ dan, huma jsejħu isem Alla, Jehovah, biex isalvaw. (Rumani 10:​13, 14, 17) Jekk jaċċettawx l-​aħbar tajba jew le hija kwistjoni taʼ għażla persunali. Xejn ma jsir bilfors. Kieku jsir hekk, il-​konverżjoni tkun bla sinifikat. Biex tkun aċċettata minn Alla, il-​qima trid tiġi mill-​qalb.—Dewteronomju 6:​4, 5; 10:12.

L-​Evanġelizzar fi Żmienna

16. Ix-​xogħol taʼ l-​evanġelizzar tax-​Xhieda taʼ Jehovah kif żdied fi żmienna?

¹⁶ Fi żmienna, ix-​Xhieda taʼ Jehovah ippridkaw l-​aħbar tajba tas-​Saltna bi twettiq akbar taʼ Mattew 24:14. Mezz prominenti fix-​xogħol tagħhom taʼ l-​evanġelizzar kien ir-​rivista It-​Torri taʼ l-​Għassa.c Fl-​1879, meta ġew pubblikati l-​ewwel ħarġiet taʼ It-​Torri taʼ l-​Għassa, ir-​rivista kellha ċirkulazzjoni taʼ madwar 6,000 kopja b’lingwa waħda. Fis-​sena 2001, iktar minn 122 sena wara, iċ-​ċirkulazzjoni laħqet 23,042,000 kopja b’141 lingwa. Maʼ din iż-​żjieda kien hemm it-​tkabbir fl-​attività taʼ evanġelizzar tax-​Xhieda taʼ Jehovah. Qabbel il-​ftit eluf taʼ sigħat kull sena li tqattgħu fix-​xogħol taʼ l-​evanġelizzar fis-​seklu 19 mal-​1,169,082,225 siegħa dedikati għax-​xogħol taʼ l-​ippridkar fis-​sena 2001. Qis l-​4,921,702 studji tal-​Bibbja bla ħlas li ġew kondotti bejn wieħed u ieħor kull xahar. X’ammont enormi taʼ xogħol mill-​aħjar twettaq! U dan sar minn 6,117,666 predikatur attiv tas-​Saltna.

17. (a) Liema tip t’allat foloz jiġu meqjumin illum? (b) X’jeħtieġ li jkun jaf kulħadd, minkejja l-​lingwa, in-​nazzjonalità, jew l-​istat soċjali tiegħu?

¹⁷ Is-​salmista jgħid: “Kollha frugħa l-​allat tal-​popli; Jaħweh hu li għamel is-​smewwiet!” (Salm 96:5) Fid-​dinja sekularizzata taʼ llum, in-​nazzjonaliżmu, l-​emblemi nazzjonali, l-​individwi prominenti, l-​affarijiet materjali, u saħansitra l-​għana nnifsu saru oġġetti taʼ qima. (Mattew 6:24; Efesin 5:5; Kolossin 3:5) Mohandas K. Gandhi darba qal: “Hija l-​opinjoni soda tiegħi li . . . l-​Ewropa llum hija Kristjana fl-​isem biss. Qed tqim tassew lil Mammona [il-flus].” Il-​fatt hu li l-​aħbar tajba jeħtieġ li tinstemaʼ kullimkien. Kulħadd, hi x’inhi l-​lingwa, in-​nazzjonalità, jew l-​istat soċjali tiegħu, jeħtieġ li jkun jaf dwar Jehovah u dwar l-​iskopijiet tiegħu. Aħna nixtiequ li kulħadd jaġixxi fuq il-​kliem tas-​salmista: “Agħtu lill-​Mulej sebħ u qawwa; agħtu lill-​Mulej is-​sebħ taʼ ismu!” (Salm 96:​7, 8) Ix-​Xhieda taʼ Jehovah jgħinu lil oħrajn jitgħallmu dwar Jehovah sabiex dawn ikunu jistgħu jagħtuh glorja b’mod xieraq. U dawk li jaċċettaw jibbenefikaw bil-​kbir. Liema benefiċċji jgawdu? Dawn se jiġu diskussi fl-​artiklu li jmiss.

[Noti taʼ taħt]

Tistaʼ Tispjega?

• Ix-Xhieda taʼ Jehovah għala huma evanġelizzaturi żelużi?

• Ix-Xhieda taʼ Jehovah għala jippridkaw saħansitra fejn il-​Kristjaneżmu stabbilixxa l-​knejjes tiegħu?

• Ix-Xhieda taʼ Jehovah għala ma jagħmlux proselitiżmu fit-​tifsira moderna tal-​kelma?

• Ix-xogħol taʼ l-​evanġelizzar tax-​Xhieda taʼ Jehovah kif kiber fi żmienna?

[Stampa f’paġna 9]

Ġesù kien evanġelizzatur żeluż u ħarreġ lil oħrajn biex jagħmlu l-​istess xogħol

[Stampa f’paġna 10]

Fil-​kongregazzjoni taʼ l-​ewwel seklu kulħadd ħa sehem fl-​evanġelizzar

[Stampa f’paġna 11]

Li tisforza lin-​nies biex ibiddlu r-​reliġjon tagħhom huwa ħażin