Mistoqsijiet mill-​Qarrejja

Kellha effett ħażin l-​imperfezzjoni tat-​tfajla verġni Marija fuq it-​tnissil taʼ Ġesù?

Rigward “it-​tnissil taʼ Ġesù,” il-​kliem ispirat jgħid: “Ommu Marija, wara li tgħarrset maʼ Ġużeppi, qabel ma marru joqogħdu flimkien, saret omm bil-​ħidma taʼ l-​Ispirtu s-​Santu.” (Mattew 1:18) Tabilħaqq, l-​ispirtu qaddis t’Alla kellu rwol importanti fit-​tqala taʼ Marija.

Iżda, xi ngħidu dwar Marija? Kienet involuta l-​bajda, jew l-​ovum, tagħha biex hi tkun tistaʼ tinqabad tqila? Skond il-​wegħdi li Alla għamel maʼ Abraham, Iżakk, Ġakobb, Ġuda, u s-​Sultan David—l-​antenati taʼ Marija—it-​tifel imwieled kellu jkun id-​dixxendent tagħhom fil-​veru sens tal-​kelma. (Ġenesi 22:18; 26:24; 28:​10-14; 49:10; 2 Samwel 7:16) Inkella, kif setaʼ t-​tifel li twieled lil Marija jkun werriet bi dritt taʼ dawn il-​wegħdi divini? Hu kellu jkun l-​iben tagħha fil-​veru sens tal-​kelma.—Luqa 3:​23-34.

L-​anġlu taʼ Jehovah kien deher lit-​tfajla verġni Marija u qalilha: “Tibżax, Marija, għax inti sibt grazzja quddiem Alla. Ara, inti se tnissel fil-​ġuf u jkollok iben u ssemmih Ġesù.” (Luqa 1:​30, 31) It-​tnissil jeħtieġ li bajda ssir fertili. Mid-​dehra, Alla Jehovah ġiegħel bajda fil-​ġuf taʼ Marija ssir fertili, u dan għamlu billi ttrasferixxa l-​ħajja taʼ l-​Iben uniġenitu tiegħu mill-​qasam taʼ l-​ispirti għal fuq l-​art.—Galatin 4:4.

Jistaʼ jkun li tifel imnissel b’dan il-​mod minn mara imperfetta jkun perfett u meħlus mid-​dnub fl-​organiżmu fiżiku tiegħu? Kif jaħdmu l-​liġijiet taʼ l-​eredità meta tingħaqad il-​perfezzjoni maʼ l-​imperfezzjoni? Ftakar li ġie użat l-​ispirtu qaddis biex jittrasferixxi l-​forza tal-​ħajja perfetta taʼ l-​Iben t’Alla u biex jikkaġuna t-​tnissil. Dan ikkanċella kwalunkwe imperfezzjoni li kien hemm fil-​bajda taʼ Marija, u b’hekk seħħ mudell ġenetiku li kien perfett mill-​bidunett.

Minkejja dan, nistgħu nkunu ċerti li l-​ħidma taʼ l-​ispirtu qaddis t’Alla f’dak iż-​żmien iggarantiet is-​suċċess taʼ l-​iskop t’Alla. L-​anġlu Gabrijel spjega lil Marija: “L-​Ispirtu s-​Santu jiġi fuqek, u l-​qawwa taʼ l-​Għoli tixħet id-​dell tagħha fuqek. U għalhekk dak li jitwieled minnek ikun qaddis, u jissejjaħ Bin Alla.” (Luqa 1:35) Iva, l-​ispirtu qaddis t’Alla fforma bħal ħajt taʼ protezzjoni sabiex l-​ebda imperfezzjoni jew effett taʼ ħsara ma jħassar l-​iżvilupp taʼ l-​embriju sa minn mindu ġie mnissel.

B’mod ċar, il-​ħajja umana perfetta tiegħu, Ġesù kien jafha lil Missieru tas-​sema, u mhux lil xi bniedem. Jehovah ‘ħejja ġisem’ għalih, u Ġesù—mit-​tnissil tiegħu ’il quddiem—kien tassew “safi, maqtugħ mill-​midinbin.”—Lhud 7:26; 10:5.

[Stampa f’paġna 19]

“Inti se tnissel fil-​ġuf u jkollok iben”