Proklamaturi tas-​Saltna Jirrapportaw

“Ridt Naqdi lil Alla”

“OĦORĠU minnha, poplu tiegħi.” Din kienet għajta anġelika li semaʼ l-​appostlu Ġwanni fl-​ewwel seklu E.K. Fi żmienna, miljuni taʼ nies b’qalb onesta ħadu azzjoni u ħarbu minn “Babilonja l-​Kbira,” l-​imperu dinji taʼ reliġjon falza. (Apokalissi 18:​1-4) Fosthom hemm Wilner, mill-​Ħaiti, li jirrakkonta l-​esperjenza tiegħu.

“Twelidt fl-​1956 ġewwa familja Kattolika devota f’belt żgħira jisimha St. Marc, fil-​Ħaiti. Tistaʼ timmaġina kemm ferħu tal-​familja meta, flimkien maʼ tnejn oħra mill-​belt tagħna, intgħażilt biex nattendi s-​seminarju f’St. Michel de l’Atalaye, fil-​Ħaiti. Iktar tard, fl-​1980, bagħtuna Stavelot, il-​Belġju, għal iktar taħriġ. Hemmhekk attendejna wkoll università Kattolika.

“Għall-​ewwel kelli entużjażmu kbir biex insir saċerdot. Ġurnata minnhom, fil-​kamra taʼ l-​ikel, il-​qassis li kien jieħu ħsieb il-​grupp tagħna qalli biex nistenna għal ftit minuti għax ried ikellimni. Immaġina kif ħasadni meta qalli bla tlaqliq li kien miġbud lejja sesswalment! Jien irrifjutajt l-​avvanzi tiegħu imma dan kollu veru ddiżappuntani. Ktibt lill-​familja tiegħi dwar l-​inċident u ftit xhur wara tlaqt mis-​seminarju, avolja huma ma ridunix nitlaq. Mort noqgħod fir-​raħal u qbadt nistudja professjoni differenti.

“Meta erġajt lura f’St. Marc, kont tlift il-​fiduċja kollha li kelli fil-​Knisja Kattolika. Xorta waħda, ridt naqdi lil Alla, imma ma kontx naf x’kelli nagħmel. Ipprovajt il-​knisja Avventista, il-​knisja taʼ Ebenezer, u l-​knisja tal-​Mormoni. Spiritwalment kont mingħajr gwida.

“Imbagħad ftakart li meta kont għadni s-​seminarju fil-​Belġju, kont naqra l-​Bibbja taʼ Crampon. Fiha kont skoprejt li Alla għandu isem. Għalhekk, bdejt nuża l-​isem t’Alla u nitlob bil-​ħeġġa biex jgħinni nsib ir-​reliġjon vera.

“Ftit wara, tnejn mix-​Xhieda taʼ Jehovah ġew joqogħdu fil-​qrib. Huma kienu nies kwieti, rispettabbli, u dinjitużi. Bqajt impressjonat bil-​mod taʼ ħajja tagħhom. Ġurnata fost l-​oħrajn, waħda minnhom stidnitni biex nattendi l-​Mafkar tal-​mewt taʼ Kristu li jsir kull sena. Il-​laqgħa kollha tant għoġbitni li rranġajt biex ikolli studju tal-​Bibbja regulari max-​Xhieda. Fi żmien sitt xhur, ikkonvinċejt ruħi li kont sibt it-​triq it-​tajba biex naqdi lil Alla. Iddedikajt ħajti lil Jehovah u tgħammidt fl-​20 taʼ Novembru, 1988.”

Maż-żmien, Wilner qabad is-​servizz full-time. Illum, hu jaqdi bħala anzjan fil-​kongregazzjoni. Hu u martu, flimkien maż-​żewġ uliedu, jaqdu ferħanin fil-​kongregazzjoni.

[Stampa f’paġna 9]

Billi kien jaqra l-​Bibbja, Wilner skopra li l-​isem t’Alla hu Jehovah