Kif Iben Għen lil Missieru

JAMES, ġuvni taʼ 32 sena mill-​Ingilterra, għandu diżabilità mentali kbira u jbati minn awtiżmu ħafif. Minkejja dan, għal ħafna snin hu attenda l-​laqgħat tax-​Xhieda taʼ Jehovah flimkien m’ommu u oħtu. Però, missieru qatt ma wera interess partikulari fit-​twemmin tagħhom. Lejla waħda, f’laqgħa minnhom intweriet turija dwar kif tistieden lil xi ħadd li taf għall-​Mafkar tal-​mewt taʼ Kristu. Wara l-​laqgħa, James mar jiġri f’kamartu. Ommu, imħassba, marret warajh u sabitu jqalleb kemm jiflaħ fir-​rivisti l-​qodma tat-​Torri taʼ l-​Għassa u Stenbaħ! Hu għażel rivista minnhom li kellha stampa taʼ l-​invit għall-​Mafkar fuq il-​paġna taʼ wara u mar jiġri biha ħdejn missieru. Biex jispjegalu, beda jipponta l-​ewwel lejn l-​istampa u mbagħad lejn missieru u qallu “Int!” Mistagħġbin, ommu u missieru ħarsu lejn xulxin hekk kif indunaw li James kien qed jistieden lil missieru għall-​Mafkar. Missieru qallu li kellu mnejn jattendi.

Fil-lejla tal-​Mafkar, James fetaħ il-​gwardarobba taʼ missieru, għażillu qalziet, ħadulu ħdejh, u bil-​mossi beda jgħidlu biex jilbsu. Missieru qallu li ma kienx se jmur għal-​laqgħa. B’hekk, James u ommu telqu għas-​Sala tas-​Saltna waħedhom.

Madankollu, xi żmien wara, James beda dejjem jonqos milli jikkoopera m’ommu meta din kienet tipprova tlestih għal-​laqgħat tal-​kongregazzjoni, u minflok kien ikun irid joqgħod id-​dar maʼ missieru. Darba minnhom, il-​Ħadd fil-​għodu, James reġaʼ ma kkooperax meta ommu pprovat tlestih għal-​laqgħa. B’sorpriża kbira għaliha, missier James dar fuqu u qallu, “James, jekk niġi l-​laqgħa llum, int tiġi wkoll?” Wiċċ James xegħel. Hu qabad jgħannaq lil missieru u qal “Iva!” u t-​tlieta li huma marru s-​Sala tas-​Saltna.

Minn dik il-​ġurnata, missier James kompla jattendi l-​laqgħat kollha tal-​Ħadd u malajr ikkonkluda li jekk ried jagħmel progress, kellu jattendi l-​laqgħat l-​oħra wkoll. (Lhud 10:​24, 25) Fil-​fatt hekk għamel, u xahrejn wara beda jistudja l-​Bibbja regolarment. Hu għamel progress b’mod mgħaġġel, billi malajr għamel il-​bidliet neċessarji f’ħajtu, u ma damx ma beda jieħu sehem fix-​xogħol taʼ l-​ippridkar tas-​Saltna. Sena wara beda jistudja l-​Bibbja, iddedika ħajtu lil Jehovah u ssimbolizza dan permezz tal-​magħmudija. Bħalissa hu qed jaqdi bħala qaddej ministerjali fil-​kongregazzjoni tiegħu. Issa lkoll bħala familja qegħdin jaqdu lil Jehovah magħqudin.