Il-​Problemi tal-​Bniedem Qatt Se Jispiċċaw?

“KWART mill-​popolazzjoni tad-​dinja jgħixu fil-​faqar, 1,300,000,000 jaqilgħu inqas minn dollaru (45ċ) kuljum, biljun la jafu jaqraw u lanqas jiktbu, 1,300,000,000 m’għandhomx aċċess għall-​ilma tajjeb għax-​xorb, u biljun jorqdu bil-​ġuħ kuljum.” Hekk jistqarr rapport mill-​Irlanda dwar l-​istat li tinsab fih id-​dinja.

X’riżultat tal-​biki taʼ kemm il-​bniedem m’huwiex kapaċi jsolvi l-​problemi li hawn fid-​dinja darba għal dejjem! Dawn il-​problemi jidhru saħansitra iktar traġiċi meta tirrealizza li l-​maġġorparti tan-​nies deskritti f’dan ir-​rapport huma nisa u tfal li ma jistgħux jiddefendu ruħhom. Ma tħossokx titkexkex meta tqis li saħansitra issa, f’dan is-​seklu 21, id-​drittijiet tagħhom ikomplu “jinkisru kuljum għal tant drabi li taqtaʼ qalbek tgħoddhom”?​—The State of the World’s Children 2000.

“Dinja Ġdida f’Ġenerazzjoni Waħda”

Il-​Fond tal-​Ġnus Magħquda għat-​Tfal (UNICEF) esprima l-​fiduċja li ‘l-​atmosfera taʼ biżaʼ u niket li dawn l-​abbużi tefgħu fuq il-​ħajjiet tan-​nies madwar il-​globu tistaʼ titneħħa.’ Din l-​organizzazzjoni tgħid li l-​kundizzjonijiet terribbli li dawn il-​biljuni taʼ żventurati għaddejjin minnhom bħalissa ‘jistgħu jiġu evitati u jistgħu jinbidlu.’ Fil-​fatt, din ħarġet is-​sejħa biex “in-​nies kollha joħolqu dinja ġdida f’ġenerazzjoni waħda.” Il-​UNICEF tittama li din tkun dinja li fiha l-​bnedmin kollha “jinħelsu mill-​faqar u d-​diskriminazzjoni, jinħelsu mill-​vjolenza u l-​mard.”

Dawk li esprimew dawn is-​sentimenti jħossuhom ferm inkuraġġiti mill-​fatt li anki issa hawn nies li jimpurtahom u li qed jagħmlu xogħol tremend biex itaffu l-​konsegwenzi tal-​biki li jiġu minħabba “serje, li tidher li ma tispiċċa qatt, taʼ konflitti u kriżijiet.” Per eżempju, matul dawn l-​aħħar 15-il sena, il-​Proġett għat-​Tfal taʼ Chernobyl “għen biex titnaqqas it-​tbatija taʼ mijiet taʼ tfal li kienu effettwati mill-​mard tal-​kanċer kaġunat minn sħaba nukleari.” (The Irish Examiner taʼ l-​4 t’April, 2000) Organizzazzjonijiet umanitarji, kbar u żgħar, ċertament li għandhom effett kbir fuq il-​ħajjiet taʼ numru bla għadd taʼ vittmi taʼ gwerer u diżastri.

Minkejja dan, dawk li huma involuti f’dawn l-​isforzi umanitarji huma nies realistiċi. Jafu li l-​problemi li qed jiffaċċjaw “huma iktar mifruxin u stabbiliti fis-​sod milli kienu saħansitra għaxar snin ilu.” David Begg, kap ewlieni taʼ Concern, għaqda Irlandiża tal-​karità, jgħid li “l-​membri taʼ l-​istaff, in-​nies li appoġġawhom, u d-​donaturi wieġbu b’mod taʼ l-​għaġeb” meta l-​Możambik intlaqat minn għargħar katastrofiku. “Imma,” hu jżid, “ma nistgħux illaħħqu waħedna maʼ dawn id-​diżastri kollha li qed iseħħu.” Dwar l-​isforzi li qed isiru biex jgħinu fl-​Afrika, hu bl-​onestà kollha jammetti: ‘In-​naqra tama li għad baqaʼ hija bħal xemgħa li qed tnemnem bil-​mod il-​mod qabel tintefa.’ Ħafna jħossu li l-​kumment tiegħu jiġbor fil-​qosor is-​sitwazzjoni tad-​dinja wkoll.

Nistgħu aħna b’mod realistiku nistennew li naraw dak li qed jittamaw għalih, jiġifieri, “dinja ġdida f’ġenerazzjoni waħda”? Waqt li l-​isforzi umanitarji li qed isiru bħalissa huma verament taʼ min ifaħħarhom, żgur li jagħmel sens li nikkunsidraw prospett ieħor għal dinja ġdida li hi ġusta u paċifika. Il-​Bibbja tirreferi għal dan il-​prospett, u dan se niddiskutuh fl-​artiklu li jmiss.

[Sors tal-​Istampa f’paġna 2]

Paġna 3, tfal: UN/DPI Ritratt minn James Bu