Lejn Min Għandek Tkun Leali?

“Pajjiżna: . . . Jalla dejjem ikun fit-​tajjeb; iżda dejjem pajjiżna, fit-​tajjeb jew fil-​ħażin.”—Stephen Decatur, uffiċjal navali taʼ l-​Istati Uniti, 1779-1820.

GĦAL ħafna nies, lealtà assoluta lejn pajjiżhom hija l-​iktar obbligazzjoni importanti. Oħrajn għandhom mnejn jgħidu l-​kliem taʼ Stephen Decatur b’mod ieħor, ‘Ir-​reliġjon tiegħi, jalla dejjem tkun fit-​tajjeb; iżda dejjem ir-​reliġjon tiegħi, fit-​tajjeb jew fil-​ħażin.’

Fir-realtà, ir-​reliġjon jew il-​pajjiż li jesiġi l-​lealtà tagħna huwa spiss determinat mill-​post fejn nitwieldu, iżda d-​deċiżjoni lejn min għandna nkunu leali hija importanti wisq biex inħalluha tkun każ taʼ kumbinazzjoni. Madankollu, biex dak li jkun jiddubita l-​lealtajiet li trabba fihom irid ikun kuraġġuż, u dan joħloqlu sfida.

Prova tal-​Lealtajiet

Waħda mara li trabbiet fiz-​Zambja tgħid: “Sa minn ċkuniti kont reliġjuża. It-​talb kuljum fil-​post fejn il-​familja kienet tinġabar għall-​qima, l-​osservanza taʼ jiem reliġjużi, u l-​attendenza regulari fit-​tempju kienu jagħmlu parti mit-​trobbija tiegħi. Ir-​reliġjon u l-​qima tiegħi kienu minsuġa mal-​kultura, il-​komunità, u l-​familja tiegħi.”

Madankollu, meta kellha qrib l-​għoxrin sena, bdiet tistudja l-​Bibbja max-​Xhieda taʼ Jehovah u ftit wara ddeċidiet li tibdel ir-​reliġjon tagħha. Kienet hi qed turi nuqqas taʼ lealtà b’dan l-​għemil?

Zlatko trabba fil-​Bosnia, u għal xi żmien ħa sehem fil-​ġlied li ħakem l-​art twelidu. Hu wkoll beda jistudja l-​Bibbja max-​Xhieda taʼ Jehovah. Issa hu jirrifjuta li jiġġieled kontra xi ħadd. Qiegħed hu juri nuqqas taʼ lealtà?

Il-​mod kif twieġeb għal dawn il-​mistoqsijiet jiddependi mill-​ħarsa tiegħek. Il-​mara li semmejna iktar kmieni tgħid: “Fil-​komunità tiegħi, il-​konsegwenza taʼ li wieħed jibdel ir-​reliġjon kienet li dak li jkun jibqaʼ b’marka taʼ diżunur; kien jitqies bħala li qed jonqos milli juri lealtà, jiġifieri li qed jittradixxi l-​familja u l-​komunità tiegħu.” Bl-​istess mod, il-​ħbieb li Zlatko kellu qabel fil-​militar, kienu jħarsu lejn dawk kollha li jirrifjutaw li jiġġieldu man-​naħa tagħhom bħala tradituri. Iżda kemm dik il-​mara kif ukoll Zlatko jħossu li l-​azzjonijiet tagħhom huma mqanqlin minn forma ogħla taʼ lealtà—lealtà lejn Alla. Iktar importanti minn hekk, Alla kif iħares lejn dawk li jridu jkunu leali lejh?

Il-​Lealtà Vera —Espressjoni taʼ Mħabba

Is-​Sultan David qal lil Alla Jehovah: “Maʼ min hu tajjeb [“leali,” NW], int timxi bit-​tajjeb [“bil-​lealtà,” NW].” (2 Samwel 22:26) Hawnhekk il-​kelma Ebrajka tradotta “lealtà” ġġorr il-​ħsieb taʼ qalb tajba li b’imħabba tintrabat maʼ oġġett sakemm jitwettaq l-​iskop tagħha fi qbil maʼ dan l-​oġġett. B’attitudni bħal dik taʼ omm li treddaʼ lit-​tarbija tagħha, Jehovah b’imħabba jorbot lilu nnifsu maʼ dawk li huma leali lejh. Jehovah qal lill-​qaddejja leali tiegħu f’Iżrael tal-​qedem: “Tistaʼ mara tinsa t-​tarbija tagħha, u ma tħennx għal bin ġufha? Mqar jekk din tinsa, jien ma ninsiek qatt!” (Isaija 49:15) Dawk li huma lesti jpoġġu l-​lealtà lejn Alla l-​ewwel u qabel kollox f’ħajjithom, huma żgurati li hu se jieħu ħsiebhom b’imħabba.

Il-​lealtà lejn Jehovah hija bbażata fuq l-​imħabba. Din tqanqal lill-​individwu biex iħobb dak li Jehovah iħobb u jobgħod l-​affarijiet ħżiena li Jehovah jobgħod. (Salm 97:10) Peress li l-​iktar kwalità li tispikka taʼ Jehovah hija l-​imħabba, il-​lealtà lejn Alla tgħin lill-​individwu jżomm lura milli jaġixxi b’nuqqas taʼ mħabba maʼ oħrajn. (1 Ġwann 4:8) Mela jekk biex juri l-​lealtà lejn Alla individwu jibdel it-​twemmin reliġjuż tiegħu, dan ma jfissirx li m’għadux iħobb lill-​familja tiegħu.

Il-​Lealtà Lejn Alla —Qawwa Pożittiva

Il-​mara li ssemmiet iktar kmieni tispjega l-​azzjonijiet tagħha b’dan il-​mod: “Matul l-​istudju tiegħi tal-​Bibbja, sirt naf lil Jehovah bħala dak Alla veru, u żviluppajt relazzjoni persunali miegħu. Jehovah m’huwiex bħall-​allat li kont inqim qabel; huwa bilanċjat b’mod perfett fl-​imħabba, il-​ġustizzja, l-​għerf, u l-​qawwa. Ladarba Jehovah jeħtieġ devozzjoni esklużiva, kelli nitlaq lill-​allat l-​oħra.

“Il-​ġenituri qaluli kemm-il darba li ma kinux qed jieħdu gost bija u li kont qed niddiżappuntahom. Dan sibtu diffiċli, peress li l-​approvazzjoni tal-​ġenituri kienet tfisser ħafna għalija. Iżda hekk kif bdejt nikber fl-​għarfien tal-​verità, l-​għażla saret waħda ovvja għalija. Ma stajtx nagħti dahri lil Jehovah.

“Il-​fatt li għażilt li nkun leali lejn Jehovah minflok lejn it-​tradizzjonijiet reliġjużi ma jfissirx li qed nonqos milli nuri lealtà lejn il-​membri tal-​familja tiegħi. Nagħmel ħilti kollha biex nurihom bil-​kliem u bil-​fatti li nifhem kif iħossuhom. Iżda jekk ma nkunx leali lejn Jehovah, ma nkunx qed inħalli lil taʼ dari jsiru jafuh, u b’hekk inkun verament qed nonqos milli nkun leali lejhom.”

Bl-istess mod, individwu ma jkunx traditur meta l-​lealtà lejn Alla teħtieġ minnu li jibqaʼ politikament newtrali u jżomm lura milli jiġġieled bl-​armi. Dan hu l-​mod kif Zlatko jispjega l-​azzjonijiet tiegħu: “Għalkemm trabbejt bħala Kristjan taʼ l-​isem, iżżewwiġt mara li ma kellhiex l-​istess twemmin tiegħi. Meta faqqgħet il-​gwerra, iż-​żewġ naħat riedu l-​lealtà tiegħi. Ġejt sforzat biex nagħżel maʼ liema naħa se niġġieled. Iġġilidt fil-​gwerra għal tliet snin u nofs. Imbagħad jien u marti ħrabna lejn il-​Kroazja, fejn iltqajna max-​Xhieda taʼ Jehovah.

“Mill-​istudju tagħna tal-​Bibbja, bdejna nifhmu li primarjament għandna nkunu leali lejn Jehovah u li hu jridna nħobbu lill-​proxxmu tagħna tkun xi tkun ir-​reliġjon jew ir-​razza tiegħu. Issa jien u marti ninsabu magħqudin fil-​qima taʼ Jehovah, u tgħallimt li ma nistax inkun leali lejn Alla u fl-​istess ħin niġġieled kontra l-​proxxmu tiegħi.”

Il-​Lealtà Msawra fuq Għarfien Eżatt

Peress li Jehovah huwa l-​Ħallieq tagħna, il-​lealtà tagħna lejh għandha bi dritt tiġi qabel l-​affarijiet l-​oħra kollha li ħaqqhom il-​lealtà tagħna. (Apokalissi 4:11) Madankollu, biex nevitaw li l-​lealtà lejn Alla tinbidel f’qawwa fanatika u distruttiva, din trid tiġi msawra fuq għarfien eżatt. Il-​Bibbja tħeġġiġna: “Għandkom tiġġeddu b’tibdila spiritwali tal-​fehma tagħkom u tilbsu l-​bniedem il-​ġdid, maħluq skond Alla, fil-​. . . qdusija [“lealtà,” “NW”] tassew.” (Efesin 4:​23, 24, korsiv tagħna.) Ir-​raġel magħruf li kiteb dan il-​kliem ispirat kellu l-​kuraġġ jiddubita l-​lealtajiet li trabba fihom. L-​eżami tiegħu wasslu biex jagħmel bidla li swietlu taʼ ġid.

Iva, il-​lealtajiet taʼ Sawl għaddew minn prova, l-​istess bħal dawk taʼ ħafna wħud fi żmienna. Sawl trabba fit-​tradizzjonijiet stretti tal-​familja tiegħu, u sar leali b’mod li jispikka lejn ir-​reliġjon li twieled fiha. Il-​lealtà lejn il-​miri reliġjużi tiegħu saħansitra qanqlitu jwettaq atti vjolenti kontra dawk li ma kinux jaqblu mal-​ħarsa tiegħu. Sawl kien magħruf bħala wieħed li jinvadi d-​djar tal-​Kristjani u jkaxkarhom ’il barra biex jiġu kastigati u saħansitra maqtulin.—Atti 22:​3-5; Filippin 3:​4-6.

Madankollu, minn meta Sawl kiseb l-​għarfien eżatt tal-​Bibbja, hu għamel dak li ħafna minn sħabu lanqas biss kienu jimmaġinawh. Bidel ir-​reliġjon tiegħu. Sawl, li iktar tard sar magħruf bħala l-​appostlu Pawlu, għażel li jkun leali lejn Alla minflok lejn it-​tradizzjoni. Il-​lealtà lejn Alla bbażata fuq għarfien eżatt qanqlet lil Sawl biex ikun tolleranti, inkuraġġanti, u juri mħabba b’kuntrast maʼ kif kien iġib ruħu qabel bħala bniedem li jagħmel il-​ħsara u fanatiku.

Għala Għandek Tkun Leali?

Meta nħallu l-​lealtajiet tagħna jiġu msawrin mil-​livelli t’Alla jkollna benefiċċji li jidhru b’mod ċar. Per eżempju, fl-​1999, rapport mill-​Istitut Awstraljan taʼ l-​Istudji tal-​Familja stqarr li fost l-​iktar affarijiet importanti għal żwiġijiet dejjiema u sodisfaċenti hemm “il-​fiduċja u l-​fedeltà . . . [u] sens taʼ spiritwalità.” L-​istess studju sab li “żwiġijiet stabbli u sodisfaċenti” jgħinu lill-​irġiel u n-​nisa jkunu iktar kuntenti, f’saħħithom, u jgħixu iktar. L-​istudju sab ukoll li t-​tfal fi żwiġijiet stabbli għandhom l-​opportunità li jkollhom ħajja ferħana.

Fid-dinja mimlija inċertezzi taʼ llum, il-​lealtà hija bħal ħabel li għawwiem f’diffikultà jaqbad miegħu biex iżomm mad-​dgħajsa taʼ salvataġġ. Jekk l-​“għawwiem” m’għandux lealtajiet, se jsib ruħu mitfugħ ’l hemm u ’l hawn bħallikieku bil-​mewġ u r-​riħ. Iżda jekk il-​lealtà tiegħu tkun żbaljata, ikun bħallikieku l-​ħabel jinsab imqabbad maʼ dgħajsa li qed tegħreq. Bħal Sawl, jistaʼ jsib ruħu mkaxkar f’mod taʼ ħajja qerriedi. Madankollu, il-​lealtà lejn Jehovah, ibbażata fuq għarfien eżatt, hija ħabel li jżommna fis-​sigurtà u jwassalna għas-​salvazzjoni.—Efesin 4:​13-15.

Jehovah jagħmel din il-​wegħda lil dawk li huma leali lejh: “Għax il-​Mulej iħobb is-​sewwa, u ma jitlaqx it-​twajbin [“lill-​uħud leali,” NW] tiegħu, hu jħarishom għal dejjem.” (Salm 37:28) Dalwaqt, dawk kollha li huma leali lejn Jehovah se jitħallew jidħlu f’ġenna taʼ l-​art, fejn se jgawdu l-​libertà min-​niket u l-​uġigħ u se jitpaxxew b’relazzjonijiet dejjiema, ħielsa mid-​diviżjonijiet reliġjużi u politiċi.—Apokalissi 7:​9, 14; 21:​3, 4.

Anki issa stess, miljuni madwar il-​globu skoprew li l-​ferħ veru jiġi biss meta jkunu leali lejn Jehovah. Għax ma tħallix lix-​Xhieda taʼ Jehovah jgħinuk teżamina l-​ħarsa tiegħek dwar il-​lealtà fid-​dawl tal-​verità tal-​Bibbja? Il-​Bibbja tgħidilna: “Għarblu lilkom infuskom jekk intomx fil-​fidi; ġarrbu lilkom infuskom.”—2 Korintin 13:5.

Neħtieġu l-​kuraġġ biex neżaminaw il-​fidi tagħna u naraw għala aħna leali lejha, iżda l-​premjijiet se jkun jixirqilhom l-​isforz kollu li nagħmlu meta r-​riżultat iġibna eqreb taʼ Alla Jehovah. Il-​mara li ġiet kwotata qabel tesprimi s-​sentimenti taʼ ħafna nies meta tgħid: “Tgħallimt li l-​fatt li nkunu leali lejn Jehovah u l-​livelli tiegħu jgħinna nkunu bilanċjati fil-​mod kif nimxu mal-​familji tagħna u nsiru membri aħjar tal-​komunità. Ikunu kemm ikunu diffiċli l-​provi, jekk aħna leali lejn Jehovah, hu dejjem se jkun leali lejna.”

[Stampi f’paġna 6]

Għarfien eżatt qanqal lil Sawl biex jibdel il-​mira tal-​lealtà tiegħu

[Stampa f’paġna 7]

Għax ma teżaminax il-​lealtajiet tiegħek fid-​dawl tal-​verità tal-​Bibbja?

[Sors tal-​Istampas f’paġna 4]

Churchill, stampa tax-​xellug fuq: U.S. National Archives photo; Joseph Göbbels, fit-​tarf fuq il-​lemin: Library of Congress