“Ejjew Għandi, . . . U Jiena Nserraħkom”
“Irgħu l-Merħla taʼ Alla”
“Intom dejjem lesti li tisimgħuna u taqsmu magħna kliem mill-Bibbja li jinkuraġġina.”—Pamela.
“Grazzi għal kulma tagħmlu għan-nom tagħna lkoll. Tassew jagħmel differenza għalina.”—Robert.
PAMELA u Robert tqanqlu jiktbu dan il-kliem t’apprezzament lil-anzjani Kristjani fil-kongregazzjonijiet rispettivi tagħhom. Oħrajn fost il-qaddejja t’Alla mad-dinja kollha wkoll huma grati għall-fatt li dawk li ‘jirgħu l-merħla taʼ Alla’ kontinwament jagħtuhom appoġġ u jieħdu ħsiebhom. (1 Pietru 5:2) Tabilħaqq, in-nies taʼ Jehovah huma grati għall-ħafna affarijiet li l-anzjani jagħmlu għan-nom tagħhom u għall-mod kif jagħmluhom.
“Ħabirku”
L-anzjani Kristjani ġew fdati b’għadd taʼ responsabbiltajiet. (Luqa 12:48) Dawn jippreparaw taħditiet għal-laqgħat tal-kongregazzjoni u jieħdu sehem fl-ippridkar pubbliku taʼ l-aħbar tajba tas-Saltna t’Alla. Id-dmirijiet tagħhom jinkludu li jagħmlu żjajjar pastorali lil sħabhom il-kredenti. L-anzjani jiddedikaw ħin għal dawk li għandhom bżonn attenzjoni speċjali—uħud avanzati u oħrajn—u dan kollu mingħajr ma jittraskuraw il-benesseri spiritwali u materjali tal-familji tagħhom stess. (Ġob 29:12-15; 1 Timotju 3:4, 5; 5:8) Xi anzjani jgħinu fil-bini tas-Swali tas-Saltna. Oħrajn jaqdu fil-Kumitati taʼ Koordinazzjoni maʼ l-Isptarijiet jew huma membri tal-Gruppi li Jżuru lill-Pazjenti. U ħafna jwettqu xogħol taʼ volontieri fl-assembleat u l-konvenzjonijiet. Iva, l-anzjani ‘jħabirku dejjem fil-ħidma tal-Mulej.’ (1 Korintin 15:58) Mhux taʼ b’xejn li dawn l-anzjani jiġu apprezzati ferm minn dawk li huma fdati f’idejhom biex jieħdu ħsiebhom!—1 Tessalonikin 5:12, 13.
L-anzjani li regolarment iżuru lil sħabhom Kristjani f’darhom jew xi mkien ieħor sabiex isaħħuhom spiritwalment huma sors taʼ inkuraġġiment. “Li kieku ma kienx għall-appoġġ u l-inkuraġġiment bi mħabba mill-anzjani,” qal Thomas, li trabba mingħajr missier fid-dar, “ma naħsibx li kont inkun qed naqdi lil Jehovah bħala ministru full-time illum.” Ħafna żgħażagħ li trabbew f’familji b’ġenitur wieħed jammettu li l-attenzjoni li rċivew mill-anzjani għenithom jiżviluppaw relazzjoni persunali m’Alla.
Iż-żjajjar pastorali wkoll jiġu apprezzati ferm minn dawk l-uħud fil-kongregazzjoni li huma avanzati fl-età. Żewġ missjunarji miżżewġin li għandhom fuq it-80 sena kellhom żjara minn żewġ anzjani, u kitbu: “Nixtiequ nesprimu l-apprezzament tagħna għaż-żjara tagħkom li tant ħadna gost biha. Wara li tlaqtu, aħna rġajna qrajna l-iskritturi li kkunsidrajtu magħna. Qatt m’aħna se ninsew il-kliem tagħkom taʼ inkuraġġiment.” Waħda armla taʼ 70 sena kitbet lill-anzjani: “Kont ili nitlob lil Jehovah għall-għajnuna, u hu bagħat lilkom it-tnejn id-dar tiegħi. Iż-żjara tagħkom kienet barka minn Jehovah!” Ibbenefikajt int dan l-aħħar minn żjara mill-anzjani tal-kongregazzjoni tiegħek? Żgur li lkoll kemm aħna napprezzaw l-isforzi tagħhom meta jirgħu l-merħla li hija fdata lilhom!
Rgħajja li Jimitaw lil Alla u lil Kristu
Jehovah huwa Ragħaj kollu mħabba. (Salm 23:1-4; Ġeremija 31:10; 1 Pietru 2:25) Ġesù Kristu wkoll huwa Ragħaj spiritwali taʼ l-għaġeb. Fil-fatt, hu jissejjaħ “ir-ragħaj it-tajjeb” u “r-Ragħaj il-kbir.” (Ġwann 10:11; Lhud 13:20; 1 Pietru 5:4) Ġesù kif ittrattahom lil dawk li xtaqu jsiru dixxipli tiegħu? B’affezzjoni, hu tahom din l-istedina: “Ejjew għandi, intom ilkoll li tinsabu mħabbtin u mtaqqlin, u jiena nserraħkom.”—Mattew 11:28.
Bl-istess mod, l-anzjani llum jistinkaw biex ikunu sors taʼ serħan u protezzjoni għall-merħla. Irġiel bħal dawn huma “bħal ilqugħ għar-riħ, u kenn fit-tempesta, bħal swieqi taʼ l-ilma f’art niexfa, bħal dell taʼ blata kbira fuq art imħeddla.” (Isaija 32:2) Dawn il-protetturi taʼ qalb tajba jagħtu serħan lill-merħla, jaqilgħu r-rispett tagħha, u jiksbu l-approvazzjoni t’Alla.—Filippin 2:29; 1 Timotju 5:17.
Appoġġ Prezzjuż min-Nisa Tagħhom
In-nies t’Alla huma grati għall-anzjani Kristjani u għall-appoġġ bi mħabba li jirċievu min-nisa tagħhom. Biex jappoġġawhom, taʼ spiss dawn in-nisa jkollhom jagħmlu ħafna sagrifiċċji. Kultant, huma jkunu d-dar waqt li żwieġhom ikunu qed jieħdu ħsieb affarijiet tal-kongregazzjoni jew ikunu qed jagħmlu xi żjajjar pastorali. Xi drabi ċerti pjanijiet persunali li jkunu saru bir-reqqa jkollhom jitwarrbu fil-ġenb minħabba xi problema urġenti li tinqalaʼ fil-kongregazzjoni. “Xorta waħda,” qalet Michelle, “meta nara kemm żewġi jkollu x’jagħmel biex jipprepara għal-laqgħat jew jagħmel żjajjar pastorali, jien inżomm f’moħħi li qed jagħmel ix-xogħol taʼ Jehovah, u nipprova nappoġġah kemm jistaʼ jkun.”
Cheryl, li wkoll miżżewġa anzjan, qalet: “Naf li l-aħwa fil-kongregazzjoni għandhom bżonn l-anzjani biex jitkellmu magħhom, u rrid inġagħalhom iħossuhom li jistgħu jitkellmu mar-raġel tiegħi kulmeta jkollhom bżonnu.” Nisa li jappoġġaw lil żwieġhom, bħal Michelle u Cheryl, minn qalbhom jagħmlu sagrifiċċji sabiex żwieġhom ikunu jistgħu jieħdu ħsieb in-nagħaġ t’Alla. In-nisa taʼ l-anzjani huma apprezzati għall-attitudni t’appoġġ li juru.
Minkejja dan, anzjan li għandu ħafna x’jagħmel m’għandux jittraskura l-bżonnijiet spiritwali u bżonnijiet oħrajn taʼ martu u wliedu. Anzjan miżżewweġ “ma għandu jkollu xejn x’wieħed jgħid fih; ikun raġel taʼ mara waħda, u jkollu wliedu jemmnu, bla ma ħadd jistaʼ jixlihom bi mġiba żienja jew bla rażan.” (Titu 1:6) Għandu jieħu ħsieb il-familja tiegħu bil-mod li jogħġob lil Alla kif inhu meħtieġ mill-Iskrittura għall-indokraturi Kristjani.—1 Timotju 3:1-7.
Għal anzjan li għandu ħafna x’jagħmel, mara li tappoġġah m’hemmx prezzha! Hekk iħossuhom l-anzjani miżżewġin li juru konsiderazzjoni. Dan huwa preċiż bħalma tgħid il-Bibbja: “Min isib mara [“tajba,” NW] isib il-ġid.” (Proverbji 18:22) Bil-kliem u bl-għemil, anzjani bħal dawn juru lin-nisa tagħhom apprezzament mill-qalb. Minbarra li jitolbu bil-ħrara u jagħmlu studju pjaċevoli flimkien, dawn il-koppji miżżewġin Kristjani jwarrbu ħin biex igawdu affarijiet bħalma huma xi mixja ħdejn xatt il-baħar, xi ħarġa fil-kampanja, jew xi passiġġata f’xi ġnien. Iva, l-anzjani jitgħaxxqu jieħdu ħsieb bi mħabba lin-nisa tagħhom.—1 Pietru 3:7.
L-anzjani li jirgħu l-merħla t’Alla bla egoiżmu huma sors taʼ serħan spiritwali għan-nies taʼ Jehovah. Tassew li huma għotjiet fi rġiel, barka għall-kongregazzjoni!—Efesin 4:8, 11-13.