Tagħlimiet mir-​Rakkont tat-​Twelid taʼ Ġesù

MILJUNI taʼ nies jibqgħu affaxxinati bil-​ġrajjiet marbutin mat-​twelid taʼ Ġesù. Dan jidher fl-​ammont kbir taʼ xeni dwar it-​twelid taʼ Ġesù li jintwerew u r-​reċti dwar l-​istess twelid li jiġu reċtati madwar id-​dinja fi żmien il-​Milied. Għalkemm huma affaxxinanti, il-​ġrajjiet marbutin mat-​twelid taʼ Ġesù ma ġewx imniżżlin fil-​Bibbja sabiex in-​nies jiddevertu bihom. Minflok, dawn jifformaw parti mill-​Iskrittura kollha li ġiet ispirata minn Alla għat-​tagħlim u t-​twiddib.—2 Timotju 3:16.

Li kieku Alla ried lill-​Kristjani jiċċelebraw it-​twelid taʼ Ġesù, kieku l-​Bibbja kienet tipprovdi d-​data eżatta taʼ dak il-​jum. Hekk tagħmel? Wara li jsemmi li Ġesù twieled fi żmien meta r-​rgħajja kienu barra bil-​lejl jgħassu l-​merħliet tagħhom, Albert Barnes, studjuż tal-​Bibbja tas-​seklu 19, ikkonkluda: “Minn dan jidher ċar li s-​Salvatur tagħna twieled qabel il-​25 taʼ Diċembru . . . F’dan iż-​żmien ikun hemm il-​bard, speċjalment fir-​reġjuni għoljin u muntanjużi taʼ Betlehem. Alla ħeba ż-​żmien tat-​twelid [taʼ Ġesù]. . . . Lanqas ma kien importanti li nkunu nafu ż-​żmien; kieku kien hekk, Alla kien jara li dan jitniżżel bil-​miktub.”

B’kuntrast maʼ dan, l-​erbaʼ kittieba taʼ l-​Evanġelji jgħidulna eżatt il-​jum meta miet Ġesù. Dan seħħ fil-​jum tal-​Qbiż, li kien jiġi ċelebrat fl-​14 taʼ Nisan skond il-​kalendarju Lhudi, fir-​rebbiegħa. Iktar minn hekk, Ġesù kkmanda lis-​segwaċi tiegħu b’mod speċifiku biex jiftakru dan il-​jum bħala tifkira tiegħu. (Luqa 22:19) Il-​Bibbja mkien ma tikkmandana niċċelebraw it-​twelid taʼ Ġesù, u f’dak il-​każ, lanqas ma tgħidilna biex niċċelebraw it-​twelid taʼ xi persuna oħra. B’dispjaċir, il-​kontroversji dwar id-​data tat-​twelid taʼ Ġesù jistgħu jnaqqsu l-​importanza tal-​ġrajjiet ferm iktar notevoli li seħħew madwar dak iż-​żmien.

Ġenituri Magħżulin minn Alla

Mill-​eluf taʼ familji li kien hemm f’Iżrael, liema tip taʼ ġenituri għażel Alla biex irabbu lil Ibnu? Kienu l-​prominenza u l-​għana fatturi importanti għal Alla? Le. Minflok, Jehovah innota l-​kwalitajiet spiritwali tal-​ġenituri. Eżamina l-​għanja taʼ tifħir taʼ Marija, kif imniżżla f’Luqa 1:​46-55, li Marija kantat wara li ntqalilha bil-​privileġġ li kienet se ssir omm il-​Messija. Fost affarijiet oħra, hi qalet: “Ruħi tfaħħar il-​kobor tal-​Mulej . . . għax hu xeħet għajnejh fuq iċ-​ċokon tal-​qaddejja tiegħu.” Hi bl-​umiltà kollha ħarset lejha nfisha bħala waħda ‘ċkejkna,’ jew taʼ pożizzjoni baxxa, il-​qaddejja taʼ Jehovah. Iktar importanti minn hekk, l-​espressjonijiet mill-​isbaħ fl-​għanja taʼ Marija juru li hi kienet persuna spiritwali li kellha għarfien tajjeb taʼ l-​Iskrittura. Għalkemm kienet dixxendenta midinba taʼ Adam, hi kienet l-​għażla ideali biex tkun omm l-​Iben t’Alla fuq l-​art.

Xi ngħidu għar-​raġel taʼ Marija, li sar il-​missier adottiv taʼ Ġesù? Ġużeppi kien mastrudaxxa kapaċi. Minħabba li kien lest jaħdem iebes b’idejh stess, hu setaʼ jmantni familja li maż-​żmien kienet tikkonsisti f’ħames ulied subien u mill-​inqas żewġt ibniet. (Mattew 13:​55, 56) Ġużeppi ma kienx sinjur. Meta kien wasal iż-​żmien għal Marija biex tippreżenta fit-​tempju t’Alla lill-​ewwel imwieled tagħha, Ġużeppi żgur li ddispjaċieh li ma setax joffri ħaruf bħala sagrifiċċju. Minflok, kellhom jużaw dak li kien eċċezzjoni għall-​foqra. Rigward l-​omm li tkun għadha kif wildet iben, il-​liġi t’Alla kienet tistqarr: “Jekk hi ma tlaħħaqx biex tagħti ħaruf, tieħu żewġ gamimiet jew żewġt ibċieċen tal-​ħamiem, wieħed għall-​ħruq u l-​ieħor għas-​sagrifiċċju tal-​purifikazzjoni, u hekk il-​qassis jagħmel l-​espjazzjoni għaliha u tissaffa.”—Levitiku 12:8; Luqa 2:​22-24.

Il-​Bibbja tgħid li Ġużeppi kien “raġel ġust.” (Mattew 1:19) Per eżempju, hu ma kellux x’jaqsam sesswalment maʼ martu li kienet verġni sakemm twieled Ġesù. Dan evita li jkun hemm xi nuqqas taʼ qbil dwar min setaʼ kien il-​Missier veru taʼ Ġesù. Għal koppja li għadhom jiżżewġu, il-​fatt li jiċċaħħdu minn relazzjoni intima waqt li jgħixu taħt l-​istess saqaf żgur li ma kinitx xi ħaġa faċli, iżda dan wera li t-​tnejn li huma kienu jgħożżu l-​privileġġ taʼ li jiġu magħżulin biex irabbu l-​Iben t’Alla.—Mattew 1:​24, 25.

Bħal Marija, Ġużeppi kien persuna spiritwali. Hu kien jieqaf jaħdem kull sena u jieħu lill-​familja tiegħu fuq vjaġġ taʼ tlett ijiem minn Nazaret għal Ġerusalemm ħalli jattendu għall-​festa annwali tal-​Qbiż. (Luqa 2:41) Barra minn hekk, Ġużeppi żgur li ħarreġ liċ-​ċkejken Ġesù fid-​drawwa taʼ kull ġimgħa li jieħu sehem fil-​qima fis-​sinagoga lokali, fejn il-​Kelma t’Alla kienet tinqara u tiġi spjegata. (Luqa 2:51; 4:16) B’hekk, m’għandu għalfejn ikollna l-​ebda dubju li Alla għażel omm u missier adottiv li kienu tajbin għal Ibnu fuq l-​art.

Barka Kbira għal Rgħajja Umlin

Minkejja d-​diffikultajiet li kellha tgħaddi minnhom martu, li issa kellha disaʼ xhur tqala, Ġużeppi vvjaġġa lejn belt missirijietu biex jirreġistra, fi qbil mad-​digriet taʼ Ċesari. Meta l-​koppja waslet Betlehem, ma setgħetx issib post fejn toqgħod f’belt iffollata bin-​nies. Għalhekk, iċ-​ċirkustanzi ġagħluhom jużaw stalla, fejn Ġesù twieled u tqiegħed f’maxtura. Sabiex isaħħaħ il-​fidi taʼ dawn il-​ġenituri umlin, Jehovah ipprovda l-​konferma li t-​twelid li seħħ kien verament skond ir-​rieda t’Alla. Bagħat hu xi delegazzjoni taʼ rġiel ixjeħ u prominenti minn Betlehem sabiex jassigura lill-​koppja? Le. Minflok, Alla Jehovah irrivela dak li kien ġara lil rgħajja beżlin waqt li kienu qed iqattgħu l-​lejl barra, jgħassu fuq il-​merħliet tagħhom.

L-anġlu t’Alla dehrilhom u qalilhom imorru Betlehem, fejn kienu se jsibu lill-​Messija li kien għadu kif twieled ‘mimdud f’maxtura.’ Inħasdu dawn l-​irġiel umlin jew stħaw meta semgħu li l-​Messija kien għadu kif twieled fi stalla? Lanqas xejn! Mingħajr dewmien, ħallew lill-​merħliet warajhom u rħewlha lejn Betlehem. Meta sabu lil Ġesù, huma rrakkontaw lil Ġużeppi u ’l Marija dak li qalilhom l-​anġlu t’Alla. Mingħajr ebda dubju, dan saħħaħ il-​fidi tal-​koppja dwar li kollox kien miexi skond l-​iskop t’Alla. “Ir-​rgħajja,” min-​naħa tagħhom, “reġgħu lura, isebbħu u jfaħħru lil Alla għal kull ma kienu raw u semgħu.” (Luqa 2:​8-20) Iva, meta rrivela l-​affarijiet lir-​rgħajja li kienu jibżgħu minn Alla, Jehovah għamel l-​għażla t-​tajba.

Minn dak li għadna kif rajna nitgħallmu x’tip taʼ nies irridu nkunu sabiex ingawdu l-​favur taʼ Jehovah. M’għandniex għalfejn infittxu l-​prominenza jew l-​għana. Minflok, bħal Ġużeppi, Marija, u r-​rgħajja, irridu nobdu ’l Alla u nuruh kemm inħobbuh billi npoġġu l-​interessi spiritwali qabel l-​affarijiet materjali. Tassew, għandna tagħlimiet mill-​aqwa meta nimmeditaw fuq dak li hemm imniżżel dwar il-​ġrajjiet li seħħew madwar iż-​żmien tat-​twelid taʼ Ġesù.

[Stampa f’paġna 7]

X’tindika l-​offerta taʼ Marija taʼ żewġ bċieċen?

[Stampa f’paġna 7]

Alla għażel li jirrivela t-​twelid taʼ Ġesù lil ftit rgħajja umlin