Nitgħallmu mill-​Familja Umana taʼ Ġesù

X’TAF int dwar il-​membri tal-​familja taʼ Ġesù, dawk li għex magħhom għall-​ewwel 30 sena taʼ ħajtu fuq l-​art mit-​twelid sal-​magħmudija tiegħu? X’jgħidulna r-​rakkonti taʼ l-​Evanġelji? X’nistgħu nitgħallmu billi nsiru nafu iktar dwar il-​familja tiegħu? Int tistaʼ tibbenefika mit-​tweġibiet.

Twieled Ġesù f’xi familja sinjura, bil-​kumditajiet kollha tal-​ħajja? Ġużeppi, missieru adottiv, kien jaħdem bħala mastrudaxxa. Dan kien jirrikjedi xogħol fiżiku taʼ tbatija, li spiss kien jinvolvi li jrid jaqtaʼ s-​siġar għall-​injam. Meta l-​ġenituri umani taʼ Ġesù marru Ġerusalemm xi 40 jum wara li twieled, huma ppreżentaw offerta għas-​sagrifiċċju kif ordnat mil-​liġi. Offrew huma xi muntun flimkien maʼ gamiema jew beċċun, kif ordnat mil-​liġi? Le. Jidher li ma setgħux jaffordjaw dawn l-​offerti. Madankollu, il-​Liġi kellha provvediment għall-​foqra. Fi qbil maʼ dan, Ġużeppi u Marija offrew “par gamiem jew żewġ bċieċen.” Il-​fatt li għażlu annimali li jqumu inqas flus juri li l-​familja tagħhom kienet fqira.​—Luqa 2:​22-​24; Levitiku 12:​6, 8.

Int tistaʼ tara li Ġesù Kristu, il-​Ħakkiem futur taʼ l-​umanità kollha, twieled fost l-​umlin, fost dawk li kellhom jaqtgħu bi snienhom biex jaqilgħu l-​ħobża taʼ kuljum. Meta kiber sar mastrudaxxa, bħal missieru adottiv. (Mattew 13:55; Mark 6:3) “Għad li [Ġesù] kien għani” bħala esseri spirtu setgħan fis-​sema, il-​Bibbja tgħid li hu “ftaqar” għalina. Hu ħa pożizzjoni iktar baxxa bħala bniedem u trabba ġo familja taʼ nies komuni. (2 Korintin 8:9; Filippin 2:​5-9; Lhud 2:9) Ġesù ma twilidx ġo familja sinjura, u dan forsi għen lil xi wħud iħossuhom komdi miegħu. Ma kinux imfixklin mill-​qagħda soċjali jew mill-​pożizzjoni tiegħu. Huma setgħu japprezzawh għal dak li għallem, għall-​kwalitajiet sbieħ tiegħu, u għall-​għemejjel taʼ l-​għaġeb tiegħu. (Mattew 7:​28, 29; 9:​19-​33; 11:​28, 29) Nistgħu naraw l-​għerf t’Alla Jehovah mill-​fatt li ħalla lil Ġesù jitwieled ġo familja komuni.

Issa ejja nikkunsidraw xi membri tal-​familja taʼ Ġesù u naraw x’nistgħu nitgħallmu minnhom.

Ġużeppi—Raġel Sewwa

Meta Ġużeppi sar jaf li l-​għarusa tiegħu kienet tqila “qabel ma [“ngħaqdu,” NW ] flimkien,” hu żgur kien bejn ħalltejn minħabba l-​imħabba li kellu għal Marija u l-​istmerrija li kellu għal dik li setgħet kienet tidher li hi immoralità. Dan kollu kien qisu qed ifixkel id-​dritt li kellu fuqha bħala r-​raġel futur tagħha. Fi żmienu, mara li kienet għarusa kienet titqies daqslikieku diġà kienet martu. Wara li dam jaħseb ħafna, Ġużeppi ddeċieda li jiddivorzja lil Marija bil-​moħbi sabiex hi ma tiġix imħaġġra bħala adultera.​—Mattew 1:​18; Dewteronomju 22:​23, 24.

Imbagħad lil Ġużeppi deherlu anġlu f’ħolma u qallu: “Xejn la tibżaʼ tieħu għandek lil martek Marija, għax dak li tnissel fiha ġej mill-​Ispirtu s-​Santu. Hi se jkollha iben, u inti semmih Ġesù, għax hu jsalva l-​poplu tiegħu minn dnubiethom.” X’ħin irċieva dik id-​direzzjoni divina, Ġużeppi aġixxa fi qbil magħha u ħa lil Marija d-​dar.​—Mattew 1:​20-​24.

B’dik id-​deċiżjoni, dan ir-​raġel sewwa u leali sar involut fit-​twettiq taʼ dak li Jehovah kien qal permezz tal-​profeta Isaija: “Araw, ix-​xebba titqal u tiled iben, u ssemmih Għimmanu-el.” (Isaija 7:​14) Ġużeppi żgur li kien raġel spiritwali li apprezza l-​privileġġ li jsir il-​missier adottiv tal-​Messija, minkejja l-​fatt li l-​ewwel iben imwieled taʼ Marija ma kienx tiegħu.

Ġużeppi żamm lura milli jkollu x’jaqsam sesswalment maʼ Marija sakemm wildet lil binha. (Mattew 1:​25) Għall-​koppja miżżewġa friska setaʼ kien taʼ sfida li ma jkollhomx x’jaqsmu sesswalment, imma mid-​dehra huma ma ridux li jkun hemm xi dubju dwar min kien missier it-​tarbija. X’eżempju mill-​aqwa taʼ rażna! Ġużeppi poġġa l-​valuri spiritwali qabel ix-​xewqat naturali tiegħu.

F’erbaʼ okkażjonijiet, Ġużeppi rċieva direzzjoni anġelika dwar kif irabbi lil ibnu adottiv. Tlieta minnhom kienu dwar fejn għandu jitrabba t-​tifel. Ubbidjenza fil-​pront kienet vitali sabiex it-​tifel isalva. F’kull każ, Ġużeppi ħa azzjoni mill-​ewwel, u ħa lit-​tifel iż-​żgħir l-​ewwel lejn l-​Eġittu u mbagħad lura lejn Iżrael. Dan ipproteġa lil Ġesù mill-​massakru tat-​trabi li wettaq Erodi. Barra minn hekk, l-​ubbidjenza taʼ Ġużeppi rriżultat fit-​twettiq tal-​profeziji dwar il-​Messija.​—Mattew 2:​13-​23.

Ġużeppi għallem lil Ġesù sengħa sabiex ikun jistaʼ jmantni lilu nnifsu. B’hekk, Ġesù kien magħruf mhux biss bħala “bin il-​mastrudaxxa” imma wkoll bħala “l-​mastrudaxxa.” (Mattew 13:55; Mark 6:3) L-​appostlu Pawlu kiteb li Ġesù ġie “mġarrab bħalna f’kollox.” Dan naturalment kien jinkludi xogħol iebes biex jgħin lill-​familja.​—Lhud 4:​15.

Finalment, naraw evidenza tad-​devozzjoni taʼ Ġużeppi lejn il-​qima vera fl-​aħħar rakkont li hu jissemma fih fl-​Iskrittura Griega Kristjana. Ġużeppi ħa lill-​familja tiegħu lejn Ġerusalemm għall-​Qbiż. L-​irġiel biss kienu taħt obbligu li jattendu, imma Ġużeppi għamilha drawwa li “taʼ kull sena” jieħu lill-​familja kollha Ġerusalemm. Hu għamel sagrifiċċji kbar, għax kellhom jimxu xi 100 kilometru minn Nazaret sa Ġerusalemm. Fl-​okkażjoni msemmija fl-​Iskrittura, però, Ġesù nqataʼ minn mal-​grupp. Sabuh fit-​tempju, jismaʼ u jistaqsi lill-​għalliema tal-​liġi. Għalkemm Ġesù kellu biss 12-il sena, hu kellu għerf u għarfien kbir tal-​Kelma t’Alla. Minn din il-​ġrajja naraw kemm il-​ġenituri taʼ Ġesù għallmuh tajjeb, billi rabbewh biex ikun tifel li kien moħħu f’affarijiet spiritwali. (Luqa 2:​41-​50) Ġużeppi mid-​dehra miet ftit taż-​żmien wara dan, ladarba ma jissemmiex iktar f’rakkonti oħra Skritturali li nkitbu wara.

Iva, Ġużeppi kien raġel sewwa li ħa ħsieb sew il-​familja tiegħu, kemm spiritwalment u kemm fiżikament. Qiegħed int bħal Ġużeppi, tpoġġi l-​interessi spiritwali l-​ewwel f’ħajtek meta tifhem x’inhi r-​rieda t’Alla għalina llum? (1 Timotju 2:​4, 5) Tobdi mill-​qalb dak li jgħid Alla fil-​Kelma tiegħu, u b’hekk turi sottomissjoni bħal dik taʼ Ġużeppi? Tgħallimhom int lil uliedek sabiex ikunu jistgħu jkollhom konversazzjonijiet fuq affarijiet spiritwali m’oħrajn?

Marija​—Qaddejja t’Alla Mhux Egoista

Marija, omm Ġesù, kienet qaddejja eċċellenti t’Alla. Meta l-​anġlu Gabrijel qalilha li kienet se tiled tifel, hi stagħġbet. Minħabba li kienet verġni, hi kienet għadha ma kellhiex relazzjonijiet sesswali maʼ raġel. Meta saret taf li t-​twelid kien permezz taʼ l-​ispirtu qaddis, hi bl-​umiltà aċċettat il-​messaġġ, u qalet: “Ara, jiena l-​qaddejja tal-​Mulej: ħa jsir minni skond kelmtek!” (Luqa 1:​30-​38) Tant apprezzat il-​privileġġ spiritwali li kienet lesta tissaporti kwalunkwe tbatija li d-​deċiżjoni tagħha setgħet iġġib magħha.

Tabilħaqq, billi aċċettat dan l-​inkarigu, ħajjitha kollha bħala mara nbidlet kompletament. Meta marret Ġerusalemm għall-​purifikazzjoni tagħha, raġel anzjan mimli rispett li kien jismu Xmun qalilha: “Sejf jinfidlek ruħek!” (Luqa 2:​25-​35) B’mod evidenti, hu kien qed jirreferi għal kif Marija kienet se tħossha meta tara lil Ġesù jiġi miċħud minn ħafna u finalment imsammar maʼ zokk tat-​tortura.

Waqt li Ġesù kien qed jitrabba, Marija żammet f’moħħha dak li ġara f’ħajtu, u “baqgħet tgħożż f’qalbha dawn il-​ħwejjeġ.” (Luqa 2:​19, 51) Bħal Ġużeppi, hi kienet mara spiritwali u kienet tgħożż il-​ġrajjiet u l-​kliem li wettqu l-​profeziji. Dak li qalilha l-​anġlu Gabrijel żgur li baqaʼ f’moħħha: “Hu jkun kbir, u jkun jissejjaħ Bin l-​Għoli. Il-​Mulej Alla jagħtih it-​tron taʼ David missieru u jsaltan għal dejjem fuq dar Ġakobb, u ma jkunx hemm tmiem għas-​saltna tiegħu.” (Luqa 1:​32, 33) Iva, il-​privileġġ li tkun l-​omm umana tal-​Messija ħaditu bis-​serjetà.

L-​ispiritwalità taʼ Marija saret evidenti wkoll meta ltaqgħet maʼ Eliżabetta, il-​qariba tagħha li wkoll kienet tqila b’mod mirakoluż. X’ħin ratha, Marija faħħret lil Jehovah u rrivelat l-​imħabba tagħha għall-​Kelma t’Alla. Hi semmiet it-​talba t’Anna mniżżla fl-​1 Samwel kapitlu 2 u inkludiet ħsibijiet minn kotba oħra taʼ l-​Iskrittura Ebrajka. Dan l-​għarfien li kellha taʼ l-​Iskrittura wera li hi kienet kwalifikata biex issir omm devota li tibżaʼ minn Alla. Hi kienet se tikkoopera maʼ Ġużeppi biex jgħinu lit-​tifel jikber spiritwalment.​—Ġenesi 30:13; 1 Samwel 2:​1-​10; Malakija 3:​12; Luqa 1:​46-​55.

Marija kellha fidi qawwija fit-​tifel tagħha bħala l-​Messija, u din ma naqsitx anki wara l-​mewt taʼ Ġesù. Ftit wara l-​irxoxt tiegħu, hi kienet fost id-​dixxipli leali li ltaqgħu biex jitolbu flimkien maʼ l-​appostli. (Atti 1:​13, 14) Hi żammet il-​lealtà tagħha, minkejja li għaddiet mill-​agunija li tara lil binha l-​maħbub imut fuq zokk tat-​tortura.

Kif tistaʼ tibbenefika milli titgħallem dwar il-​ħajja taʼ Marija? Taċċetta int il-​privileġġ li taqdi lil Alla minkejja s-​sagrifiċċji involuti? Konċernat int dwar is-​serjetà taʼ dan il-​privileġġ illum? Iżżomm f’moħħok dak li Ġesù bassar u tqabblu int maʼ dak li qed jiġri llum, billi ‘tgħożż f’qalbek dawn il-​ħwejjeġ’? (Mattew, kapitli 24 u 25; Mark, kapitlu 13; Luqa,  kapitlu 21) Timitaha int lil Marija billi ssir midħla sew tal-​Kelma t’Alla, billi tużaha spiss fil-​konversazzjoni tiegħek? Iżżomm il-​fidi tiegħek f’Ġesù minkejja t-​tbatija mentali li forsi jkollok tgħaddi minnha minħabba li int wieħed mis-​segwaċi tiegħu?

Ħut Ġesù—Bidla Hija Possibbli

Milli jidher, ħut Ġesù ma kellhomx fidi fih ħlief wara l-​mewt tiegħu. X’aktarx li din kienet ir-​raġuni għala ma kinux preżenti meta miet fuq iz-​zokk tat-​tortura u għala hu kellu jgħid lill-​appostlu Ġwanni biex jieħu ħsieb ommu. Il-​qraba taʼ Ġesù wrew li m’apprezzawhx, u saħansitra qalu f’okkażjoni waħda li Ġesù kien “tilef moħħu.” (Mark 3:​21) Ladarba Ġesù kellu membri tal-​familja li ma kinux jemmnu fih, dawk li llum għandhom uħud li ma jemmnux bħalhom fil-​familja tagħhom jistgħu jkunu ċerti li Ġesù jistaʼ jifhem kif iħossuhom meta l-​qraba jwaqqgħuhom għaċ-​ċajt minħabba l-​fidi tagħhom.

Madankollu, jidher li wara l-​irxoxt taʼ Ġesù ħutu bdew jeżerċitaw fidi fih. Huma kienu fil-​grupp maʼ dawk li ltaqgħu f’Ġerusalemm qabel Pentekoste tas-​sena 33 E.K. u talbu bil-​ħerqa flimkien maʼ l-​appostli. (Atti 1:​14) M’għandniex xi ngħidu, l-​irxoxt taʼ Ġesù qanqalhom biex ibiddlu l-​opinjoni tagħhom, sal-​punt li jsiru dixxipli tiegħu. Qatt m’għandna naqtgħu qalbna mill-​qraba tagħna li m’għandhomx l-​istess twemmin tagħna.

Ġakbu, ħu Ġesù mill-​omm li Ġesù deherlu personalment, hu preżentat fl-​Iskrittura bħala wieħed li kellu rwol li jispikka fil-​kongregazzjoni Kristjana. Hu kiteb ittra ispirata minn Alla lil sħabu Kristjani, li fiha ħeġġiġhom biex iżommu l-​fidi tagħhom soda. (Atti 15:​6-​29; 1 Korintin 15:7; Galatin 1:​18, 19; 2:9; Ġakbu 1:1) Ġuda, ħu ieħor mill-​omm, kiteb ittra ispirata biex jinkuraġġixxi lil sħabu fit-​twemmin sabiex jagħmlu ġlieda iebsa għall-​fidi. (Ġuda 1) Taʼ min jinnota li la Ġakbu u lanqas Ġuda ma qagħdu jsemmu fl-​ittri tagħhom li kienu ħut Ġesù sabiex jimpressjonaw lill-​Kristjani sħabhom. X’lezzjoni taʼ l-​għaġeb taʼ modestja nistgħu nitgħallmu minnhom!

Għalhekk, x’inhuma xi affarijiet li nistgħu nitgħallmu mill-​familja taʼ Ġesù? Żgur li lezzjonijiet taʼ devozzjoni li jistgħu jintwerew b’dawn il-​modi: (1) Issottometti ruħek fedelment għar-​rieda t’Alla u ffaċċja l-​provi li jiġu b’riżultat taʼ dan. (2) Poġġi valuri spiritwali l-​ewwel, anki meta dan ifisser li trid tagħmel sagrifiċċji. (3) Ħarreġ lit-​tfal tiegħek fi qbil maʼ l-​Iskrittura. (4) Taqtax qalbek minn membri tal-​familja li m’għandhomx l-​istess twemmin. (5) Tiftaħarx dwar xi konnessjoni li forsi għandek maʼ wħud prominenti fil-​kongregazzjoni Kristjana. Iva, billi nitgħallmu dwar il-​familja umana taʼ Ġesù se nkunu nistgħu nersqu eqreb tiegħu u nkabbru l-​apprezzament tagħna għall-​fatt li Jehovah għażel familja komuni biex Ġesù jitrabba fiha.

[Stampi f’paġna 4]

Ġużeppi ħa lil Marija b’martu u ġie involut fit-​twettiq tal-​profeziji Messjaniċi

[Stampi f’paġna 6]

Ġużeppi u Marija għallmu lil uliedhom il-​valuri spiritwali u l-​importanza tax-​xogħol

[Stampi f’paġna 7]

Għalkemm imrobbijinf’dar spiritwali, ħut Ġesù ma poġġewx fidi fih ħlief wara mewtu

[Stampi f’paġna 8]

Ħut Ġesù mill-​omm Ġakbu u Ġuda inkuraġġew lil sħabhom Kristjani