Ishar Issa Iktar Minn Qatt Qabel!

“Ma għandniex norqdu bħall-​oħrajn, iżda nishru u ngħixu bil-​qjies [“noqogħdu b’għajnejna miftuħa,” “Saydon”].”—1 TESSALONIKIN 5:6.

1, 2. (a) X’tip taʼ bliet kienu Pompej u Erkolanu? (b) Ħafna mill-​abitanti taʼ Pompej u Erkolanu liema twissija injoraw, u b’liema riżultat?

FL-​EWWEL seklu taʼ l-​Era Komuni tagħna, Pompej u Erkolanu kienu żewġt ibliet Rumani u sinjuri ħdejn il-​Vessuvju. Għar-​Rumani għonja, dawn kienu postijiet magħrufa għall-​vaganzi. It-​teatri tagħhom kienu jifilħu jesgħu udjenzi taʼ iktar minn elf ruħ, u f’Pompej kien hemm anfiteatru kbir li fih setaʼ joqgħod kważi r-​raħal kollu. Dawk li għamlu xi tħaffir f’Pompej sabu 118-il ħanut tax-​xorb u taverna, li xi wħud minnhom kienu jservu bħala postijiet fejn isir il-​logħob taʼ l-​ażżard jew il-​prostituzzjoni. L-​immoralità u l-​materjaliżmu kont tarahom maʼ kullimkien, kif jixhdu xi pitturi taʼ fuq il-​ħajt u fdalijiet oħra.

² Fl-​24 t’Awissu tas-​sena 79 E.K., il-​Vessuvju beda jiżbroffa. Ix-​xjenzati li jistudjaw il-​vulkani jemmnu li l-​ewwel splużjoni, li tefgħet biċċiet tal-​lava u rmied fuq iż-​żewġt ibliet, probabbilment ma kinitx se twaqqaf lill-​abitanti milli jaħarbu. Fil-​fatt, ħafna milli jidher hekk għamlu. Iżda oħrajn li ma tawx importanza biżżejjed għall-​periklu jew sempliċement injoraw is-​sinjali taʼ twissija għażlu li jibqgħu hemm. Imbagħad madwar nofs il-​lejl, valanga taʼ gassijiet jikwu, lava, u ġebel niżlet b’ħoss qawwi għal fuq Erkolanu, u fgat lir-​residenti kollha li baqgħu fil-​belt. Kmieni l-​għada fil-​għodu, valanga simili qatlet lil kulħadd f’Pompej. X’riżultat traġiku minħabba li ma tawx kas is-​sinjali taʼ twissija!

It-​Tmiem tas-​Sistema t’Affarijiet Lhudija

3. Liema xebh hemm bejn il-​qerda taʼ Ġerusalemm u dik taʼ Pompej u Erkolanu?

³ It-​tmiem taʼ Pompej u Erkolanu ma kienx ikrah daqs il-​qerda katastrofika taʼ Ġerusalemm disaʼ snin qabel, għalkemm din il-​katastrofi ġabha l-​bniedem. Deskritta bħala “wieħed mill-​agħar assedji fl-​istorja kollha,” huwa rapportat li kkaġunat il-​mewt taʼ iktar minn miljun Lhudi. Madankollu, bħad-​diżastru f’Pompej u Erkolanu, il-​qerda taʼ Ġerusalemm ma seħħitx mingħajr twissija.

4. Liema sinjal profetiku ta Ġesù biex iwissi lis-​segwaċi tiegħu li t-​tmiem taʼ ċerta sistema t’affarijiet kien fil-​qrib, u kif kellu l-​ewwel twettiq fl-​ewwel seklu?

⁴ Ġesù Kristu kien bassar il-​qerda tal-​belt, u pprofetizza x’kien se jiġri qabilha—affarijiet koroh bħal gwerer, ġuħ, terremoti, u ksur tal-​liġi. Il-​profeti foloz kellhom ikunu attivi, imma l-​aħbar tajba tas-​Saltna t’Alla kienet se tiġi pridkata mad-​dinja kollha. (Mattew 24:​4-7, 11-14) Waqt li l-​kliem taʼ Ġesù għandu t-​twettiq ewlieni tiegħu llum, dan twettaq fuq skala iżgħar lura f’dak iż-​żmien. L-​istorja turi li kien hemm ġuħ kbir fil-​Lhudija. (Atti 11:28) L-​istorjografu Lhudi Ġużeppi Flavju jirrapporta dwar terremot fl-​inħawi taʼ Ġerusalemm ftit qabel ma nqerdet il-​belt. Hekk kif qorob it-​tmiem taʼ Ġerusalemm, taʼ spiss kienu jsiru rewwixti, gwerer interni fil-​partiti politiċi Lhud, u massakri f’bosta bliet b’popolazzjoni mħallta taʼ Lhud u Ġentili. Madankollu, l-​aħbar tajba tas-​Saltna kienet qed tiġi pridkata “lill-​ħlejjaq kollha taħt is-​smewwiet.”—Kolossin 1:23.

5, 6. (a) Liema kliem profetiku taʼ Ġesù twettaq fis-​sena 66 E.K.? (b) Għala mietu daqshekk nies meta Ġerusalemm finalment waqgħet fis-​sena 70 E.K.?

⁵ Fl-​aħħar, fis-​sena 66 E.K., il-​Lhud irribellaw kontra Ruma. Meta Ċestju Gallu mexxa armata biex tassedja lil Ġerusalemm, is-​segwaċi taʼ Ġesù ftakru fil-​kliem taʼ Ġesù: “Meta mbagħad taraw lil Ġerusalemm magħluqa minn kullimkien bl-​eżerċti, tkunu tafu li l-​qerda tagħha tkun waslet. Ħa jaħarbu mbagħad lejn il-​muntanji dawk li jkunu fil-​Lhudija u jitbiegħdu minnha dawk li jkunu ġo nofsha, u ma jerġgħux lura fiha dawk li jkunu fir-​rabaʼ.” (Luqa 21:​20, 21) Kien wasal iż-​żmien biex jitilqu minn Ġerusalemm—imma kif? Ħabta u sabta, Gallu rtira t-​truppi tiegħu, u b’hekk ta l-​opportunità lill-​Kristjani f’Ġerusalemm u fil-​Lhudija biex jobdu l-​kliem taʼ Ġesù u jaħarbu lejn il-​muntanji.—Mattew 24:​15, 16.

⁶ Erbaʼ snin wara, madwar iż-​żmien tal-​Qbiż, it-​truppi Rumani ġew lura taħt il-​Ġeneral Titu, li kien determinat li jtemm l-​irvell Lhudi darba għal dejjem. L-​armata tiegħu dawret lil Ġerusalemm u bniet “rampa,” u b’hekk kien impossibbli li xi ħadd jaħrab. (Luqa 19:​43, 44) Minkejja t-​theddida taʼ gwerra, il-​Lhud minn madwar l-​imperu Ruman kollu nġabru f’Ġerusalemm għall-​Qbiż. Issa kienu maqbudin ġewwa. Skond Ġużeppi Flavju, dawn il-​viżitaturi sfortunati fformaw il-​maġġuranza tal-​vittmi taʼ l-​assedju Ruman.a Meta finalment waqgħet Ġerusalemm, wieħed minn kull sebaʼ Lhud inqered mill-​Imperu Ruman. Il-​qerda taʼ Ġerusalemm u t-​tempju tagħha kienet tfisser it-​tmiem taʼ l-​istat Lhudi u tas-​sistema reliġjuża tiegħu bbażata fuq il-​Liġi Mosajka.b—Mark 13:​1, 2.

7. Il-​Kristjani leali għala baqgħu ħajjin meta nqerdet Ġerusalemm?

⁷ Fis-​sena 70 E.K., il-​Kristjani Lhud setgħu nqatlu jew ittieħdu lsiera man-​nies kollha li kien fadal f’Ġerusalemm. Madankollu, skond l-​evidenza storika, huma taw kas it-​twissija taʼ Ġesù li ngħatat 37 sena qabel. Huma kienu abbandunaw il-​belt u ma reġgħux lura.

Twissijiet f’Waqthom mill-​Appostli

8. Pietru liema bżonn għaraf li kien hemm, u liema kliem taʼ Ġesù x’aktarx li kellu f’moħħu?

⁸ Illum, qerda li se teffettwa iktar nies tinsab fil-​qrib. Din hija qerda li se ttemm din is-​sistema sħiħa t’affarijiet. Sitt snin qabel il-​qerda taʼ Ġerusalemm, l-​appostlu Pietru ta parir urġenti u f’waqtu li japplika speċjalment għall-​Kristjani taʼ żmienna: Ibqgħu għassa! Pietru ra l-​bżonn li l-​Kristjani jitqanqlu biex jużaw “id-​dehen tajjeb” tagħhom (Saydon) ħalli ma jinjorawx “il-​kmandament tal-​Mulej,” Ġesù Kristu. (2 Pietru 3:​1, 2) Hu u jħeġġeġ lill-​Kristjani biex jibqgħu għassa, Pietru x’aktarx kellu f’moħħu dak li kien semaʼ lil Ġesù jgħid lill-​appostli Tiegħu ftit jiem qabel Mewtu: “Kunu għajnejkom miftuħa, ishru, għax ma tafux meta se jasal il-​waqt.”—Mark 13:33.

9. (a) Liema attitudni perikoluża jistgħu jiżviluppaw xi wħud? (b) Għala attitudni xettika hija perikoluża b’mod partikulari?

⁹ Xi wħud illum, biex jirridikolaw, jistaqsu: “Fejn hi l-​wegħda tal-​miġja tiegħu?” (2 Pietru 3:​3, 4) B’mod evidenti, dawn l-​individwi jħossu li l-​affarijiet qatt ma nbidlu tassew iżda għadhom l-​istess bħalma dejjem kienu sa mill-​ħolqien tad-​dinja. Dan it-​tip taʼ xettiċiżmu huwa perikoluż. Id-​dubji jistgħu jdgħajfu s-​sens t’urġenza tagħna, u jqanqluna biex bil-​mod il-​mod nibdew infittxu li nissodisfaw iżżejjed il-​ġibdiet u x-​xewqat tagħna. (Luqa 21:34) Minbarra dan, bħalma jinnota Pietru, dawn l-​uħud li jwaqqgħu għaċ-​ċajt jinsew id-​Dilluvju taʼ żmien Noè, li qered sistema t’affarijiet mad-​dinja kollha. Dakinhar tassew inbidlet id-​dinja!—Ġenesi 6:​13, 17; 2 Pietru 3:​5, 6.

10. Pietru b’liema kliem jinkuraġġixxi lil dawk li forsi qed jitilfu l-​paċenzja?

¹⁰ Pietru jgħin lill-​qarrejja tiegħu jikkultivaw il-​paċenzja billi jfakkarhom għala Alla spiss ma jaġixxix mill-​ewwel. L-​ewwelnett, Pietru jgħid: “Quddiem il-​Mulej jum wieħed hu bħal elf sena, u elf sena bħal jum wieħed.” (2 Pietru 3:8) Peress li Jehovah jgħix għal dejjem, hu jistaʼ jikkunsidra l-​fatturi kollha u jagħżel l-​iktar ħin f’waqtu biex jaġixxi. Imbagħad, Pietru jiġbed l-​attenzjoni lejn il-​fatt li Jehovah jixtieq li n-​nies taʼ kullimkien jindmu. Il-​paċenzja t’Alla tfisser salvazzjoni għal ħafna li jistgħu jinqerdu kieku Alla kellu jaġixxi malajr. (1 Timotju 2:​3, 4; 2 Pietru 3:9) Madankollu, il-​paċenzja taʼ Jehovah ma tfissirx li hu qatt m’hu se jaġixxi. “Jasal, tabilħaqq, jum il-​Mulej bħal ħalliel,” jgħid Pietru.—Korsiv tagħna; 2 Pietru 3:10.

11. X’se jgħinna nibqgħu mqajmin spiritwalment, u dan kif se jgħinna bħallikieku ‘nħaffu’ l-​jum taʼ Jehovah?

¹¹ Ix-​xebh li jagħmel Pietru hu taʼ min jinnotah. M’huwiex faċli taqbad lill-​ħallelin, imma għassies li jibqaʼ mqajjem il-​lejl kollu għandu iktar ċans li jinduna b’ħalliel minn wieħed li kultant tmur għajnu bih. Għassies kif jistaʼ jibqaʼ mqajjem? Jekk joqgħod jippassiġġa ’l hemm u ’l hawn jibqaʼ iktar attent milli jekk joqgħod bil-​qiegħda l-​lejl kollu. B’mod simili, il-​fatt li nibqgħu attivi spiritwalment se jgħinna biex bħala Kristjani nibqgħu mqajmin. B’hekk, Pietru jħeġġiġna biex nibqgħu beżlin ‘b’ħajja qaddisa u tajba.’ (2 Pietru 3:11) Din ix-​xorta t’attività se tgħinna nibqgħu ‘nħabirku għall-​miġja taʼ Jum il-​Mulej.’ Il-​kelma Griega mogħtija bħala ‘nħabirku’ tistaʼ tiġi tradotta b’mod letterali bħala ‘li nħaffu’ dan il-​jum. (2 Pietru 3:​12) Huwa minnu li ma nistgħux nibdlu l-​iskeda taʼ Jehovah. Il-​jum tiegħu se jasal fil-​waqt li ħejja hu. Iżda ż-​żmien minn issa sa dakinhar se jidher li jkun għaddej iktar malajr jekk ikollna ħafna x’nagħmlu fis-​servizz tiegħu.—1 Korintin 15:58.

12. Kif nistgħu aħna bħala individwi nibbenefikaw mill-​paċenzja taʼ Jehovah?

¹² Għalhekk, dawk kollha li jħossu li l-​jum taʼ Jehovah qed jiddawwar huma mħeġġin jagħtu kas il-​parir taʼ Pietru biex jistennew bil-​paċenzja ż-​żmien li ħejja Jehovah. Tabilħaqq, nistgħu nużaw il-​ħin li fadal bil-​għaqal skond ma tippermetti l-​paċenzja t’Alla. Per eżempju, nistgħu nkomplu nikkultivaw kwalitajiet Kristjani vitali kif ukoll naqsmu l-​aħbar tajba maʼ ħafna iżjed nies li ma kinux jintlaħqu kieku kien mod ieħor. Jekk nishru, Jehovah se jsibna “fis-​sliem, bla tebgħa u bla dnub” fit-​tmiem taʼ din is-​sistema t’affarijiet. (2 Pietru 3:​14, 15) X’barka se tkun din!

13. Liema kliem taʼ Pawlu lill-​Kristjani Tessalonikin huwa xieraq b’mod partikulari llum?

¹³ Pawlu, fl-​ewwel ittra tiegħu lill-​Kristjani Tessalonikin, ukoll jitkellem dwar il-​bżonn li nishru. Hu jagħti l-​parir: “Ma għandniex norqdu bħall-​oħrajn, iżda nishru u ngħixu bil-​qjies [“noqogħdu b’għajnejna miftuħa,” Saydon].” (1 Tessalonikin 5:​2, 6) Ladarba l-​qerda tas-​sistema dinjija t’affarijiet kollha hija fil-​qrib, kemm huwa bżonnjuż dan illum! L-​aduraturi taʼ Jehovah jgħixu f’dinja mimlija apatija spiritwali, u dan jistaʼ jeffettwahom. Għaldaqstant, Pawlu jagħti l-​parir: “Ejjew ngħixu bil-​qjies [“nkunu għajnejna miftuħa,” Saydon], nilbsu l-​kurazza tal-​fidi u l-​imħabba, u l-​elmu tat-​tama tas-​salvazzjoni.” (1 Tessalonikin 5:8) Studju regulari tal-​Kelma t’Alla u sħubija regulari maʼ ħutna fil-​laqgħat se jgħinuna nsegwu l-​parir taʼ Pawlu u nżommu s-​sens t’urġenza tagħna.—Mattew 16:​1-3.

Miljuni Jibqgħu Għassa

14. Liema statistiċi jindikaw li ħafna llum qed isegwu l-​parir taʼ Pietru biex jibqgħu mqajmin?

¹⁴ Hemm ħafna llum li qed jagħtu kas l-​inkuraġġiment ispirat biex jibqgħu mqajmin? Iva. Matul is-​sena taʼ servizz 2002, quċċata taʼ 6,304,645 pubblikatur—3.1 fil-​mija iktar mill-​2001—taw evidenza li huma mqajmin spiritwalment billi qattgħu 1,202,381,302 sigħat jitkellmu m’oħrajn dwar is-​Saltna t’Alla. Għal dawn l-​uħud, din l-​attività ma kinitx xi ħaġa li jiħduha ħafif ħafif. Kienet il-​parti ċentrali taʼ ħajjithom. L-​attitudni taʼ ħafna minnhom tidher fl-​eżempju taʼ Eduardo u Noemi f’El Salvador.

15. Liema esperjenza minn El Salvador turi li ħafna qed jibqgħu mqajmin spiritwalment?

¹⁵ Xi ftit tas-​snin ilu, Eduardo u Noemi taw kas il-​kliem taʼ Pawlu: “Is-​sura taʼ din id-​dinja għad tgħaddi!” (1 Korintin 7:31) Huma ssimplifikaw ħajjithom u daħlu fil-​ministeru full-time bħala pijunieri. Hekk kif għadda ż-​żmien, ġew imberkin b’ħafna modi u saħansitra ħadu sehem fix-​xogħol tas-​circuit u tad-​distrett. Minkejja li ffaċċjaw ħafna problemi serji, Eduardo u Noemi huma konvinti li ħadu d-​deċiżjoni t-​tajba meta ssagrifikaw il-​kumdità materjali għas-​servizz full-time. Ħafna mid-​29,269 pubblikatur—inkluż 2,454 pijunier—f’El Salvador urew spirtu simili taʼ sagrifiċċju, u din hi raġuni waħda għala dak il-​pajjiż kellu żjieda taʼ 2 fil-​mija fin-​numru taʼ pubblikaturi s-​sena l-​oħra.

16. Liema attitudni wera ħu żagħżugħ mill-​Kosta taʼ l-​Avorju?

¹⁶ Fil-​Kosta taʼ l-​Avorju, l-​istess attitudni ntweriet minn Kristjan żagħżugħ li kiteb lill-​uffiċċju tal-​fergħa: “Qed naqdi bħala qaddej ministerjali. Imma ma nistax ngħid lill-​aħwa biex jaqdu bħala pijunieri waqt li jien stess miniex qed nagħtihom eżempju tajjeb. Allura ħallejt impjieg li jħalli qligħ tajjeb u issa qed naħdem għal rasi, u b’hekk għandi iktar ħin għall-​ministeru.” Dan iż-​żagħżugħ sar wieħed mid-​983 pijunier li qed jaqdu fil-​Kosta taʼ l-​Avorju, pajjiż li rrapporta 6,701 pubblikatur is-​sena l-​oħra, żjieda taʼ 5 fil-​mija.

17. Xhud żagħżugħa fil-​Belġju kif uriet li l-​preġudizzju ma beżżagħhiex?

¹⁷ L-​intolleranza, il-​preġudizzju, u d-​diskriminazzjoni qed ikomplu jikkaġunaw il-​problemi għall-​24,961 pubblikatur tas-​Saltna fil-​Belġju. Xorta waħda, huma żelużi u m’humiex imbeżżgħin. Meta xhud taʼ 16-il sena semgħet li x-​Xhieda taʼ Jehovah ġew deskritti bħala setta waqt lezzjoni dwar it-​twemmin fl-​iskola, hi talbet il-​permess biex titkellem dwar il-​ħarsa tax-​Xhieda taʼ Jehovah. Billi użat il-​vidjo Jehovah’s Witnesses​—The Organization Behind the Name (Ix-Xhieda taʼ Jehovah—L-​Organizzazzjoni wara l-​Isem) u l-​browxer Ix-​Xhieda taʼ Jehovah—Min Huma?, setgħet tispjega min huma verament ix-​Xhieda. L-​informazzjoni ġiet milqugħa tajjeb ħafna, u l-​ġimgħa taʼ wara l-​istudenti ngħataw test li l-​mistoqsijiet kollha tiegħu kienu dwar ir-​reliġjon Kristjana tax-​Xhieda taʼ Jehovah.

18. X’evidenza hemm li l-​problemi ekonomiċi m’aljenawx lill-​pubblikaturi fl-​Arġentina u l-​Możambik milli jaqdu lil Jehovah?

¹⁸ Il-​biċċa l-​kbira mill-​Kristjani jkollhom jiffaċċjaw problemi serji matul dawn l-​aħħar jiem. Xorta waħda, huma jipprovaw ma jaljenawx rashom. Minkejja l-​problemi ekonomiċi magħrufa li hemm fl-​Arġentina, dan il-​pajjiż irrapporta quċċata ġdida taʼ 126,709 Xhieda s-​sena l-​oħra. Fil-​Możambik il-​faqar għadu mifrux maʼ kullimkien. Madankollu, 37,563 irrapportaw li ħadu sehem fix-​xogħol taʼ l-​għoti taʼ xiehda, żjieda taʼ 4 fil-​mija. Il-​ħajja hija diffiċli għal ħafna fl-​Albanija, u madankollu dan il-​pajjiż irrapporta żjieda mill-​aħjar taʼ 12 fil-​mija, u laħaq il-​quċċata taʼ 2,708 pubblikaturi. B’mod ċar, l-​ispirtu taʼ Jehovah ma jiġix imfixkel minn kundizzjonijiet diffiċli meta l-​qaddejja tiegħu jpoġġu l-​interessi tas-​Saltna l-​ewwel.—Mattew 6:33.

19. (a) X’juri li għad hemm ħafna nies bħal nagħaġ li huma bil-​ġuħ għall-​verità tal-​Bibbja? (b) Liema huma xi dettalji oħra mir-​rapport annwali li juru li l-​qaddejja taʼ Jehovah qed jibqgħu mqajmin spiritwalment? (Ara t-​tabella f’paġni 12-15.)

¹⁹ Il-​medja taʼ kull xahar taʼ 5,309,289 studju tal-​Bibbja li ġew rapportati s-​sena l-​oħra mad-​dinja kollha turi li għad hemm ħafna nies bħal nagħaġ li għandhom il-​ġuħ għall-​verità tal-​Bibbja. Mill-​quċċata l-​ġdida taʼ 15,597,746 li attendew għall-​Mafkar, il-​maġġuranza għadhom mhux qed jaqdu lil Jehovah b’mod attiv. Jalla jkomplu jikbru fl-​għarfien u fl-​imħabba, kemm għal Jehovah u kemm għall-​aħwa kollha. Huwa eċċitanti li tara l-​“kotra l-​kbira” taʼ “nagħaġ oħra” jkomplu jkunu produttivi hekk kif jaqdu lill-​Ħallieq “lejl u nhar . . . fit-​tempju tiegħu” fi sħubija maʼ ħuthom il-​midlukin bl-​ispirtu.—Apokalissi 7:​9, 15; Ġwann 10:16.

Tagħlima minn Lot

20. X’nitgħallmu mill-​eżempju taʼ Lot u martu?

²⁰ M’għandniex xi ngħidu, anki l-​qaddejja leali t’Alla jistgħu għal mument jitilfu s-​sens t’urġenza tagħhom. Aħseb dwar Lot, in-​neputi t’Abraham. Hu sar jaf minn żewġ anġli li ġew iżuruh li Alla kien wasal biex jeqred lil Sodoma u Gomorra. Din l-​aħbar ma kinitx taʼ sorpriża għal Lot, “mifni kif kien ħtija taʼ l-​imġiba bla rażan tal-​ħżiena.” (2 Pietru 2:7) Xorta waħda, meta ż-​żewġ anġli ġew biex joħorġuh ’il barra minn Sodoma, hu “beda jitnikker.” L-​anġli kważi kellhom ikaxkruh flimkien mal-​familja tiegħu ’l barra mill-​belt. Imbagħad, il-​mara taʼ Lot injorat it-​twissija taʼ l-​anġli biex ma tħarisx lura. Kellha tħallas qares għall-​attitudni tagħha taʼ x’jimpurtani u li kollox jgħaddi. (Ġenesi 19:​14-17, 26) “Ftakru fil-​mara taʼ Lot!” wissa Ġesù.—Luqa 17:32.

21. Għala huwa vitali li nishru issa iktar minn qatt qabel?

²¹ Il-​katastrofi taʼ Pompej u Erkolanu u l-​ġrajjiet li seħħew fil-​qerda taʼ Ġerusalemm, kif ukoll l-​eżempju tad-​Dilluvju taʼ żmien Noè u l-​eżempju taʼ Lot, kollha juru l-​importanza li nieħdu t-​twissijiet bis-​serjetà. Bħala l-​qaddejja taʼ Jehovah aħna nagħrfuh is-​sinjal taż-​żmien tat-​tmiem. (Mattew 24:3) Aħna nfridna mir-​reliġjon falza. (Apokalissi 18:4) Bħall-​Kristjani taʼ l-​ewwel seklu għandna bżonn ‘nistennew b’ħerqa kbira l-​miġja tal-​Jum taʼ Alla.’ (2 Pietru 3:12) Iva, issa iktar minn qatt qabel irridu nishru! Liema passi nistgħu nieħdu, u xi kwalitajiet nistgħu niżviluppaw sabiex nishru? L-​artiklu li jmiss se jikkunsidra dawn l-​affarijiet.

[Noti taʼ taħt]

Kif Twieġeb?

• Liema żvilupp ippermetta li l-​Kristjani Lhud jiskansaw il-​qerda taʼ Ġerusalemm?

• Il-pariri fil-​kitbiet taʼ l-​appostli Pietru u Pawlu kif jgħinuna nibqgħu mqajmin?

• Illum min huma dawk li juru li jinsabu mqajmin kompletament?

• Liema tagħlima nieħdu mir-​rakkont taʼ Lot u martu?

[Tabella f’paġna 12-15]

RAPPORT TAS-​SENA TAʼ SERVIZZ GĦAL 2002 TAX-​XHIEDA TAʼ JEHOVAH MADWAR ID-​DINJA

Ara bound volume

[Stampa f’paġna 9]

Fis-​sena 66 E.K., il-​komunità Kristjana f’Ġerusalemm tat kas it-​twissija taʼ Ġesù

[Stampi f’paġna 10]

Jekk il-​Kristjani jibqgħu attivi, iktar ikunu jistgħu jibqgħu mqajmin