Proklamaturi tas-​Saltna Jirrapportaw

Fil-​Brażil Qed “Jisimgħu” l-​Messaġġ tas-​Saltna

SABIEX l-​aħbar tajba tas-​Saltna tiġi mxandra fil-​komunità taʼ Dawk Neqsin mis-​Smigħ, ħafna mix-​Xhieda taʼ Jehovah fil-​Brażil laqgħu l-​isfida li jitgħallmu l-​Lingwa tas-​Sinjali Brażiljana. L-​isforzi tagħhom qed jipproduċu riżultati eċċellenti, bħalma juru l-​esperjenzi li ġejjin.

Eva,a mara truxa minn São Paulo, bdiet titgħallem il-​lingwa tas-​sinjali wara li hi u t-​tlett itfal tagħha marru joqogħdu maʼ raġel trux. Ġo ċentru tal-​ħwienet, Eva u l-​għarus tagħha ltaqgħu maʼ grupp taʼ Xhieda taʼ Jehovah neqsin mis-​smigħ u ġew mistidnin biex jattendu laqgħa fis-​Sala tas-​Saltna. Huma aċċettaw għax ħasbu li se tkun xi okkażjoni soċjali.

Minħabba li ma tantx kienet taf il-​lingwa tas-​sinjali sew, Eva fehmet ftit biss minn dak li ntqal fil-​laqgħa. Wara, xi aħwa stidnuha biex tmur id-​dar tagħhom biex tiekol xi ħaġa magħhom. Billi użaw l-​istampi fil-​browxer Gawdi l-​Ħajja fuq l-​Art Għal Dejjem!, huma spjegawlha l-​wegħda t’Alla għal ġenna fil-​futur hawn fuq l-​art. Eva ħadet pjaċir b’dak li tgħallmet u bdiet tattendi l-​laqgħat regolarment.

Ftit wara dan, Eva telqet lill-​għarus tagħha ħalli b’hekk tgħix skond il-​livelli tal-​Bibbja. Minkejja oppożizzjoni ħarxa minn tal-​familja tagħha, hi kompliet tagħmel progress spiritwali u tgħammdet fl-​1995. Sitt xhur wara, Eva saret pijuniera, jew proklamatriċi tas-​Saltna full-time. Minn dak iż-​żmien ’l hawn għenet erbaʼ persuni neqsin mis-​smigħ sakemm waslu għad-​dedikazzjoni u l-​magħmudija.

Carlos twieled trux. Sa minn tfulitu involva ruħu fid-​drogi, l-​immoralità, u s-​serq. Peress li kien mhedded minn membri taʼ klikka taʼ kontrih, hu ħarab lejn São Paulo fejn qagħad maʼ João għal xi żmien. João, bħal Carlos, kien trux u kien jgħix ħajja mħarbta.

Xi snin wara, Carlos ħa għarfien dwar il-​messaġġ tas-​Saltna u dan qanqlu biex jirranġa ħajtu u jillegalizza ż-​żwieġ tiegħu. Wara li laħaq il-​ħtiġijiet skritturali, Carlos tgħammed b’simbolu tad-​dedikazzjoni tiegħu lil Jehovah. Sadanittant, mingħajr ma Carlos kien jaf, João wkoll sar jaf bl-​aħbar tajba tas-​Saltna, u hu wkoll għamel bidliet kbar f’ħajtu. Meta tgħallem li Jehovah ma jaċċettax l-​użu tax-​xbihat, João rema l-​kollezzjoni taʼ “qaddisin” li kellu. Wara li ħalla warajh l-​istil taʼ ħajja li kellu, João tgħammed ukoll.

Kemm ferħu Carlos u João meta ltaqgħu ġo Sala tas-​Saltna u raw il-​bidliet taʼ xulxin! It-​tnejn li huma issa saru kapijiet responsabbli tal-​familja u jaqdu bħala proklamaturi żelużi tas-​Saltna.

Fil-​Brażil, bħalissa hemm 30 kongregazzjoni u 154 grupp bil-​lingwa tas-​sinjali, b’iktar minn 2,500 pubblikatur, li madwar 1,500 minnhom huma neqsin mis-​smigħ. Fil-​Konvenzjonijiet Distrettwali “Għalliema tal-​Kelma t’Alla” li nżammu fil-​Brażil matul is-​sena 2001 għal dawk neqsin mis-​smigħ attendew iktar minn 3,000 ruħ u tgħammdu 36 ruħ. Bil-​barka taʼ Jehovah, nittamaw li ħafna iktar neqsin mis-​smigħ jaċċettaw il-​messaġġ tas-​Saltna.

[Nota taʼ taħt]