L-​Aħħar Ċena—X’Inhi?

X’JIĠI f’moħħok meta tismaʼ l-​espressjoni “l-​aħħar ċena”? Ħafna nies jiġi f’moħħhom l-​affresk popolari f’Milan, l-​Italja, tal-​pittur Leonardo da Vinci (1452-1519). Il-​fatt hu li għal ħafna sekli l-​Aħħar Ċena ilha suġġett popolari għal artisti, kittieba, u mużiċisti.

Għalhekk, x’inhi l-​Aħħar Ċena, u x’tifsir għandha għan-​nies li qed jgħixu f’dan is-​seklu 21? Fl-​enċiklopediji u d-​dizzjunarji se ssib li l-​Aħħar Ċena, li tissejjaħ ukoll l-​Ikla taʼ fil-​Għaxija tal-​Mulej, hija l-​ikla li Ġesù Kristu kellu maʼ l-​appostli tiegħu fil-​lejla qabel il-​mewt tiegħu bħala sagrifiċċju. Ladarba kienet l-​aħħar ikla li Ġesù kellu mas-​segwaċi leali tiegħu, ħafna jafuha bħala l-​Aħħar Ċena. U minħabba li kienet stabbilita mill-​Mulej Ġesù Kristu nnifsu, huwa xieraq li tissejjaħ l-​Ikla taʼ fil-​Għaxija tal-​Mulej.

Matul is-​sekli, ħafna nies issagrifikaw ħajjithom għal dak li għalihom kien xi ħaġa taʼ importanza kbira. Il-​mewt taʼ xi wħud minnhom kienet taʼ benefiċċju għal xi nies għal perijodu taʼ żmien. Għalkemm il-​mewt taʼ dawk li taw ħajjithom bħala sagrifiċċju kienet taʼ min ifaħħarha, xejn ma hi sinifikanti meta tqabbilha mal-​mewt taʼ Ġesù Kristu. Iktar minn hekk, l-​ebda mewt fl-​istorja mqallba kollha tal-​bniedem ma tistaʼ qatt ikollha effett tant kbir fuq kulħadd. Għala?

Biex inwieġbu din il-​mistoqsija u ngħinuk issib xi tfisser għalik l-​Ikla taʼ fil-​Għaxija tal-​Mulej, nistidnuk taqra l-​artiklu li jmiss.