L-​Ikla taʼ fil-​Għaxija tal-​Mulej Għandha Tifsir Kbir Għalik

GĦANDHA l-​Ikla taʼ fil-​Għaxija tal-​Mulej xi tifsir sinifikanti u dejjiemi għalik? Biex insiru nafu dan, ejja l-​ewwel naraw Ġesù Kristu nnifsu x’tifsira ta lil din il-​ġrajja speċjali.

Fil-lejla taʼ l-​14 taʼ Nisan tas-​sena 33 E.K., Ġesù laqqaʼ lit-​12-il appostlu f’kamra taʼ fuq f’Ġerusalemm biex jiċċelebraw il-​festa tal-​Qbiż li ssir kull sena. Wara li kienu kielu l-​ikla tal-​Qbiż, Ġuda t-​traditur ħareġ mill-​kamra biex imur jittradixxi lil Ġesù. (Ġwann 13:​21, 26-30) Lil dawk il-​11-il appostlu li baqgħu miegħu, Ġesù introduċielhom “l-​ikla tal-​Mulej.” (1 Korintin 11:20) Din tissejjaħ ukoll it-​Tifkira tal-​mewt taʼ Ġesù, ladarba Hu kkmanda lis-​segwaċi tiegħu: “Agħmlu dan b’tifkira tiegħi.” Din hija l-​unika ġrajja li l-​Kristjani huma kmandati biex ifakkruha.—1 Korintin 11:24.

F’ħafna pajjiżi n-​nies jagħmlu monument jew jiddedikaw ġurnata taʼ festa speċjali biex ifakkru, jew jikkommemoraw, lil xi ħadd jew xi ħaġa sinifikanti. F’dan il-​każ, Ġesù stabbilixxa ikla kommemorattiva—ikla bħala għajnuna għall-​memorja, li kellha tgħin lid-​dixxipli tiegħu biex jibqgħu jfakkru l-​ġrajjiet ferm sinifikanti taʼ dik il-​ġurnata tant importanti. Għal ġenerazzjonijiet tal-​futur, din l-​ikla tat-​Tifkira tal-​mewt taʼ Ġesù kellha tfakkar lil dawk li jikkommemorawha fit-​tifsira profonda taʼ dak li hu għamel dak il-​lejl, partikolarment fis-​simboli li uża. Ġesù liema simboli, jew emblemi, uża, u dawn xi jfissru? Ejja neżaminaw ir-​rakkont tal-​Bibbja dwar dak li seħħ dak il-​lejl fis-​sena 33 E.K.

Tifsiriet Simboliċi Sagri

“Ħa l-​ħobż, radd il-​ħajr, qasmu, newwilhulhom u qal: ‘Dan hu [“ifisser,” “NW”] ġismi li jingħata għalikom; agħmlu dan b’tifkira tiegħi.’”​—Luqa 22:19.

Meta Ġesù ħa l-​ħobż u qal “dan ifisser ġismi,” hu kien qed jindika li l-​ħobż bla ħmira kien simbolu tal-​ġisem fiżiku tiegħu bla dnub, li hu ta “għall-​ħajja tad-​dinja.” (Ġwann 6:51) Għalkemm xi traduzzjonijiet tal-​Bibbja jgħidu “dan hu [Grieg, es·tinʹ] ġismi,” il-​Greek-English Lexicon of the New Testament taʼ Thayer jgħid li dan il-​verb taʼ spiss jingħata bħala “jfisser, jissinifika, jimplika.” Iġorr il-​ħsieb taʼ li jirrappreżenta, jew li jissimbolizza.—Mattew 26:26.

L-​istess japplika għall-​inbid. Ġesù qal: “Dan il-​kalċi huwa [“ifisser,” “NW”] il-​Patt il-​Ġdid b’demmi, id-​demm li jixxerred għalikom.”—Luqa 22:20.

Fir-​rakkont taʼ Mattew, Ġesù qal dan dwar il-​kalċi: “Dan hu [“ifisser,” NW] demmi, id-​demm tal-​Patt, li jixxerred għall-​kotra għall-​maħfra tad-​dnubiet.” (Mattew 26:​28, korsiv tagħna.) Ġesù kien qed juża l-​inbid taʼ ġol-​kalċi bħala rappreżentazzjoni, jew simbolu, taʼ demmu stess. Id-​demm li hu xerred kellu jkun il-​bażi taʼ “patt ġdid” għad-​dixxipli midlukin bl-​ispirtu, li kienu se jaħkmu bħala slaten u qassisin miegħu fis-​sema.—Ġeremija 31:​31-33; Ġwann 14:​2, 3; 2 Korintin 5:5; Apokalissi 1:​5, 6; 5:​9, 10; 20:​4, 6.

L-inbid fil-​kalċi jservi wkoll bħala tfakkira li d-​demm imxerred taʼ Ġesù kellu jkun il-​bażi għall-​“maħfra tad-​dnubiet,” u dan jagħmilha possibbli għal dawk li jieħdu minnu biex ikollhom is-​sejħa għall-​ħajja fis-​sema bħala werrieta sħab maʼ Kristu. Wieħed jistaʼ jifhem li dawk li għandhom is-​sejħa għas-​sema—numru limitat—huma l-​uniċi nies li jieħdu mill-​ħobż u mill-​inbid f’din l-​okkażjoni.—Luqa 12:32; Efesin 1:​13, 14; Lhud 9:22; 1 Pietru 1:​3, 4.

Iżda, xi ngħidu għal dawk is-​segwaċi taʼ Ġesù li m’humiex fil-​patt il-​ġdid? Dawn huma n-​“nagħaġ oħra” tal-​Mulej, li qed iħarsu ’l quddiem, mhux biex isaltnu maʼ Kristu fis-​sema, imma biex igawdu l-​ħajja taʼ dejjem fuq art magħmula ġenna. (Ġwann 10:16; Luqa 23:43; Apokalissi 21:​3, 4) Bħala “kotra kbira” taʼ Kristjani leali li qegħdin “lejl u nhar jaqduh [lil Alla] fit-​tempju tiegħu,” huma ferħanin li jkunu osservaturi grati f’din l-​Ikla taʼ fil-​Għaxija tal-​Mulej. Il-​kliem u l-​għemejjel tagħhom fil-​fatt jiddikjaraw: “Is-​salvazzjoni nafuha lil Alla tagħna li qiegħed fuq it-​tron, u lill-​Ħaruf.”—Apokalissi 7:​9, 10, 14, 15.

Kulmeta?

“Agħmlu dan b’tifkira tiegħi.”—Luqa 22:19.

Din l-​okkażjoni kulmeta għandha tiġi ċelebrata sabiex tiġi preservata t-​tifkira tal-​mewt taʼ Kristu? Ġesù ma speċifikax. Madankollu, ladarba hu stabbilixxa l-​Ikla taʼ fil-​Għaxija tal-​Mulej fl-​14 taʼ Nisan, fil-​lejla tal-​Qbiż li l-​Iżraelin kienu jiċċelebraw kull sena, jidher ċar li Ġesù ried li t-​Tifkira taʼ mewtu kellha tiġi mfakkra bl-​istess mod. Fil-​waqt li l-​Iżraelin kienu kull sena jiċċelebraw il-​ħelsien tagħhom mill-​jasar taʼ l-​Eġittu, il-​Kristjani kull sena jfakkru l-​ħelsien tagħhom mill-​jasar tad-​dnub u l-​mewt.—Eżodu 12:​11, 17; Rumani 5:​20, 21.

Ċertament li l-​idea li kull sena tiġi ċelebrata kommemorazzjoni taʼ ġrajja sinifikanti hija xi ħaġa komuni. Per eżempju, ikkunsidra meta koppja jiċċelebraw l-​anniversarju tat-​tieġ tagħhom, jew meta pajjiż ifakkar xi ġrajja importanti fl-​istorja tiegħu. Il-​kommemorazzjoni ġeneralment issir darba fis-​sena fl-​anniversarju taʼ dik il-​ġrajja. Interessanti li għal ħafna sekli wara Kristu, lil ħafna mill-​hekk imsejħa Kristjani kienu jsibuhom bħala Kwartodeċimani, li tfisser “l-​Uħud taʼ l-​Erbatax,” għaliex kienu jfakkru l-​mewt taʼ Ġesù darba fis-​sena, fl-​14 taʼ Nisan.

Sempliċi imma Sinifikanti Ferm

L-​appostlu Pawlu spjega li kulmeta d-​dixxipli taʼ Ġesù jiċċelebraw l-​Ikla taʼ fil-​Għaxija tal-​Mulej, huma jkunu qed ikomplu ‘jxandru l-​mewt tal-​Mulej.’ (1 Korintin 11:26) Għalhekk, din il-​kommemorazzjoni kellha tiffoka fuq l-​irwol kruċjali li Ġesù, bil-​mewt tiegħu, kellu fit-​twettiq taʼ l-​iskop t’Alla.

Il-fedeltà taʼ Ġesù Kristu sal-​mewt ivvindikat lil Alla Jehovah bħala l-​Ħallieq kollu għerf u mħabba u bħala s-​Sovran ġust. Kuntrarju għal dak li sostna Satana u kontra taʼ Adam, Ġesù wera li huwa possibbli li bniedem jibqaʼ leali lejn Alla, saħansitra taħt l-​eħrex pressjonijiet.—Ġob 2:​4, 5.

L-Ikla taʼ fil-​Għaxija tal-​Mulej tgħinna wkoll nippreservaw bil-​gratitudni t-​tifkira taʼ l-​imħabba li tissagrifika lilha nfisha li wera Ġesù. Minkejja l-​provi ħorox, Ġesù baqaʼ ubbidjenti b’mod perfett lejn Missieru. B’hekk, hu setaʼ joffri l-​ħajja umana u perfetta tiegħu biex tpatti għall-​prezz enormi tad-​dnub taʼ Adam. Bħalma spjega Ġesù nnifsu, hu ġie “biex jaqdi u biex jagħti ħajtu b’fidwa għall-​kotra.” (Mattew 20:28) Għalhekk, dawk kollha li jkollhom fidi f’Ġesù jistaʼ jkollhom dnubiethom maħfurin u jirċievu ħajja taʼ dejjem fi qbil maʼ l-​iskop oriġinali taʼ Jehovah għall-​umanità.—Rumani 5:​6, 8, 12, 18, 19; 6:23; 1 Timotju 2:​5, 6.a

Dan jenfasizza wkoll kemm Jehovah wera tjubija abbundanti u qalb tajba mhix mistħoqqa meta hu pprovda s-​salvazzjoni taʼ l-​umanità. Il-​Bibbja tistqarr: “B’dan dehret l-​imħabba taʼ Alla fina, għax Alla bagħat lil Ibnu l-​waħdieni fid-​dinja, biex ngħixu bih. U hawn qiegħda l-​imħabba; mhux għax aħna ħabbejna ’l Alla, imma għax ħabbna Hu u bagħat lil Ibnu biex ikun taʼ tpattija għal dnubietna.”—1 Ġwann 4:​9, 10.

Iva, kemm hi ċelebrazzjoni meraviljuża din it-​Tifkira! Sempliċi u prattiku biżżejjed biex jiġi mfakkar mad-​dinja kollha f’diversi ċirkustanzi differenti, imma fl-​istess ħin simboliku biżżejjed li jkompli jkun tfakkira sinifikanti għal perijodu twil taʼ żmien.

It-​Tifsira Tiegħu Għalik

Il-​mewt li Sidna Ġesù Kristu offra bħala sagrifiċċju swiet prezz enormi kemm lilu u kemm lil Missieru, Jehovah. Bħala bniedem perfett, Ġesù ma kienx taħt il-​kundanna tal-​mewt li writna lkoll kemm aħna. (Rumani 5:12; Lhud 7:26) Setaʼ baqaʼ jgħix għal dejjem. Ħadd ma setaʼ jiħodlu ħajtu, lanqas bil-​forza, jekk hu stess ma kienx jippermettilu. Hu qal: “Ħadd ma jeħodhieli [ħajti], iżda jien nagħtiha minn rajja.”—Ġwann 10:18.

Madankollu, Ġesù minn rajh offra l-​ħajja umana perfetta tiegħu bħala sagrifiċċju sabiex “b’mewtu jeqred is-​setgħa taʼ dak li kellu l-​mewt f’idejh, jiġifieri x-​Xitan, u jeħles ’il dawk kollha li, minħabba fil-​biżaʼ tal-​mewt, kienu mjassrin għal għomorhom kollu.” (Lhud 2:​14, 15) L-​imħabba li tissagrifika lilha nfisha taʼ Kristu tidher ukoll fit-​tip taʼ mewt li Ġesù ssottometta lilu nnifsu għaliha. Kien konxju sew tal-​mod kif hu kien se jsofri u jmut.—Mattew 17:22; 20:​17-19.

Din it-​Tifkira tfakkarna wkoll fl-​akbar espressjoni taʼ mħabba li qatt saret minn Missierna tas-​sema, Jehovah. Kemm kien taʼ niket meta hu, li tant “jaf jagħder, u hu ħanin bil-​bosta” semaʼ u ra s-​“suppliki b’leħen għoli u bid-​dmugħ” li Ġesù għamel fil-​ġnien tal-​Ġetsemani, il-​mod kif ġie flaġellat bla ħniena, il-​mod krudil kif ġie mdendel maʼ l-​għuda, u l-​mewta agonizzanti tiegħu li tant ħadet fit-​tul. (Ġakbu 5:11; Lhud 5:7; Ġwann 3:16; 1 Ġwann 4:​7, 8) Meta nirriflettu ftit fuq il-​mewt taʼ Ġesù, anki issa wara dawn is-​sekli kollha, nibdew inħossuna ferm imnikktin.

Meta toqgħod tqis, ara xi prezz għoli kellhom iħallsu Alla Jehovah u Ġesù Kristu għalina l-​midinbin! (Rumani 3:23) Kull ġurnata li tgħaddi nħabbtu wiċċna mar-​realtà kiefra tan-​natura midinba tagħna u taʼ l-​imperfezzjonijiet tagħna. Madankollu, fuq il-​bażi tal-​fidi fis-​sagrifiċċju li Ġesù ħallas bħala fidwa, aħna nistgħu nitolbu maħfra lil Alla. (1 Ġwann 2:​1, 2) Dan jagħmilha possibbli għalina li nersqu lejn Alla u jkollna kuxjenza safja. (Lhud 4:​14-16; 9:​13, 14) Barra minn hekk, aħna jistaʼ jkollna l-​prospett li ngħixu fuq art magħmula ġenna għall-​eternità kollha. (Ġwann 17:3; Apokalissi 21:​3, 4) Dawn il-​barkiet u ħafna oħrajn huma kollha riżultat taʼ l-​aqwa att taʼ sagrifiċċju li Ġesù wettaq meta ssagrifika lilu nnifsu.

Nuru Apprezzament għall-​Ikla taʼ fil-​Għaxija tal-​Mulej

L-​Ikla taʼ fil-​Għaxija tal-​Mulej hija bla dubju turija li ma bħalha tal-​“grazzja bla qjies taʼ Alla.” U l-​provvediment tas-​sagrifiċċju taʼ fidwa li għamel għalina Alla Jehovah—li sar possibbli permezz taʼ l-​imħabba li tissagrifika lilha nfisha taʼ Ġesù—huwa tabilħaqq ‘don li ma jitfissirx bil-​kliem.’ (2 Korintin 9:​14, 15) Ma tħossx li l-​mod kif Alla jesprimi t-​tjubija tiegħu permezz taʼ Ġesù Kristu jqanqal fik sens profond u dejjiemi taʼ gratitudni u apprezzament?

Aħna fiduċjużi li hekk tħossok. Għalhekk, nixtiequ minn qalbna nistidnuk biex tiltaqaʼ max-​Xhieda taʼ Jehovah li se jikkommemoraw it-​Tifkira tal-​mewt taʼ Ġesù. Din is-​sena din se taħbat l-​Erbgħa, 16 t’April, wara nżul ix-​xemx. Ix-​Xhieda taʼ Jehovah fil-​lokalità fejn toqgħod jieħdu gost li jgħidulek il-​ħin u l-​post eżatt taʼ din il-​ġrajja hekk importanti.

[Nota taʼ taħt]

[Kaxxa/Stampi f’paġna 6]

“DAN HU ĠISMI” JEW “DAN IFISSER ĠISMI” LIEMA?

Meta Ġesù qal, “il-​bieb tan-​nagħaġ huwa jien” u, “Jiena d-​dielja vera,” ħadd minn dawk li semgħuh ma ħaseb li kien xi bieb jew xi dielja. (Ġwann 10:7; 15:​1, korsiv tagħna.) Bl-​istess mod, meta l-​Bibbja tgħid: “Dan il-​kalċi huwa l-​Patt il-​Ġdid,” ma nikkonkludux li l-​kalċi huwa letteralment il-​patt il-​ġdid. Mela anki meta qal li l-​ħobż ‘kien’ ġismu, ma jistaʼ jkun hemm l-​ebda dubju li l-​ħobż kien ifisser, jew jissimbolizza, ġismu. B’hekk kif tgħid it-​traduzzjoni taʼ Charles B. Williams: “Dan jirrappreżenta ġismi.”—Korsiv tagħna; Luqa 22:​19, 20.

[Stampa f’paġna 5]

Il-​ħobż bla ħmira u l-​inbid huma simboli xierqa tal-​ġisem bla dnub taʼ Ġesù u tad-​demm li hu xerred

[Stampa f’paġna 7]

It-​Tifkira tal-​mewt taʼ Ġesù hija tfakkira taʼ l-​imħabba kbira li wrew Alla Jehovah u Ġesù Kristu