Bijografija

Jehovah Dejjem Jieħu Ħsiebna

KIF RAKKONTATA MINN ENELESI MZANGA

Kienet is-​sena 1972. Għaxart irġiel żgħażagħ, membri tal-​Malawi Youth League, daħlu fid-​dar tagħna, qabduni, u kaxkruni ġo għalqa tal-​kannamiela li kienet viċin. Hemmhekk, sawtuni u ħallewni għax ħasbuni mejta.

Numru kbir taʼ Xhieda taʼ Jehovah fil-​Malawi sofrew attakki vjolenti bħal dan. Għala ġew persegwitati? X’għenhom jissaportu? Jekk jogħġbok ħallini ngħidlek l-​istorja tal-​familja tiegħi.

JIEN twilidt fil-​31 taʼ Diċembru, fl-​1921, ġo familja reliġjuża. Missieri kien kappillan tal-​Knisja Presbiterjana taʼ l-​Afrika Ċentrali. Jien trabbejt ġewwa Nkhoma, belt żgħira ħdejn Lilongwe, il-​kapitali tal-​Malawi. Meta kelli 15-il sena, iżżewwiġt lil Emmas Mzanga.

Darba minnhom ġie jżurna ħabib taʼ missieri li kien ukoll kappillan. Hu kien innota li ħdejn id-​dar tagħna kienu jgħixu xi Xhieda taʼ Jehovah u avżana biex ma jkollniex kuntatti magħhom. Hu qalilna li x-​Xhieda taʼ Jehovah kienu maħkumin mid-​demonji u jekk ma noqogħdux attenti, aħna wkoll stajna niġu maħkumin mid-​demonji. Din it-​twissija tant ħasditna li morna noqogħdu f’raħal ieħor, fejn Emmas sab impjieg jaħdem f’ħanut. Imma malajr sirna nafu li d-​dar il-​ġdida tagħna kienet qiegħda viċin ix-​Xhieda taʼ Jehovah ukoll!

Madankollu, wara ftit taż-​żmien, l-​imħabba li Emmas kellu għall-​Bibbja qanqlitu jitkellem maʼ wieħed mix-​Xhieda. Wara li tawh tweġibiet konvinċenti għal ħafna mill-​mistoqsijiet li kellu, Emmas aċċetta l-​offerta tax-​Xhieda biex jistudjaw il-​Bibbja miegħu. Għall-​ewwel, l-​istudju tal-​Bibbja kien isir fil-​ħanut fejn kien jaħdem, imma iktar tard l-​istudju taʼ kull ġimgħa nżamm id-​dar tagħna. Kull darba li kienu jiġu x-​Xhieda taʼ Jehovah, jien kont noħroġ mid-​dar għax kont nibżaʼ minnhom. Minkejja dan, Emmas kompla jistudja l-​Bibbja. Hu tgħammed madwar sitt xhur wara li beda, f’April taʼ l-​1951. Madankollu, ma qallix x’għamel, għax beżaʼ li l-​aħbar kienet se tkisser iż-​żwieġ tagħna.

Ġimgħat Diffiċli

Però, darba minnhom ħabiba tiegħi, Ellen Kadzalero, qaltli li r-​raġel tiegħi kien mgħammed bħala wieħed mix-​Xhieda taʼ Jehovah. Demmi beda jbaqbaq bir-​rabja! Minn dakinhar ’il quddiem, ma kellimtux u ma lestejtlux l-​ikel. Barra minn hekk, ma bqajtx immur inġib u nsaħħan l-​ilma biex jieħu banju​—biċċa xogħol li skond id-​drawwiet tagħna hija kunsidrata bħala dmir tal-​mara.

Wara li ssaporta din l-​imġiba għal tliet ġimgħat, Emmas bil-​ħlewwa staqsini biex noqogħdu bil-​qiegħda flimkien, u mbagħad qalli għala hu kien ħa d-​deċiżjoni li jsir Xhud. Hu qara u spjega diversi skritturi, bħalma hi l-​1 Korintin 9:16. Jien ġejt imqanqla ħafna u ħassejt li jien ukoll kelli nieħu sehem fl-​ippridkar taʼ l-​aħbar tajba. Għalhekk, iddeċidejt li nibda nistudja l-​Bibbja max-​Xhieda taʼ Jehovah. Dak il-​lejl stess ippreparajt ikla tajba għar-​raġel tiegħi li verament jaf iħobb, u tgħidx kemm feraħ.

Naqsmu l-​Verità mal-​Familja u l-​Ħbieb

Meta l-​ġenituri tagħna semgħu li aħna konna qed nassoċjaw max-​Xhieda taʼ Jehovah, huma opponew bl-​aħrax. Il-​familja tiegħi kitbitilna ittra li fiha qalulna biex ma nibqgħux inżuruhom iktar. Ir-​reazzjoni tagħhom sewditilna qalbna, imma aħna fdajna fil-​wegħda taʼ Ġesù li kien se jkollna ħafna aħwa rġiel u nisa u missirijiet u ommijiet spiritwali.—Mattew 19:29.

Jien malajr għamilt progress fl-​istudju tal-​Bibbja tiegħi u tgħammidt f’Awissu taʼ l-​1951, tliet xhur u nofs biss wara r-​raġel tiegħi. Ħassejtni obbligata naqsam il-​verità mal-​ħabiba tiegħi Ellen. Bil-​ferħ, hi aċċettat l-​offerta tiegħi għal studju tal-​Bibbja. F’Mejju taʼ l-​1952, Ellen tgħammdet u saret oħti spiritwali, u dan kompla jsaħħaħ il-​ħbiberija tagħna. Illum il-​ġurnata, għadna l-​aqwa ħbieb.

Fl-1954, Emmas ġie maħtur biex iżur il-​kongregazzjonijiet bħala indokratur tas-​circuit. Dak iż-​żmien diġà kellna sitt itfal, u indokratur li jivvjaġġa li kellu familja kien iqattaʼ ġimgħa waħda jżur kongregazzjoni u mbagħad il-​ġimgħa taʼ wara jqattagħha d-​dar mal-​mara u t-​tfal. Madankollu, meta Emmas kien ikun qiegħed jivvjaġġa, hu dejjem kien jieħu ħsieb li jien nikkonduċi l-​istudju tal-​Bibbja tal-​familja tagħna. Aħna pprovajna nagħmlu l-​istudju mat-​tfal tagħna pjaċevoli. Konna nitkellmu wkoll b’konvinzjoni mill-​qalb dwar l-​imħabba tagħna għal Jehovah u għall-​verità mill-​Kelma tiegħu, u konna nieħdu sehem fix-​xogħol taʼ l-​ippridkar bħala familja. Dan il-​programm taʼ taħriġ spiritwali saħħaħ il-​fidi tat-​tfal tagħna u serva biex jippreparahom għall-​persekuzzjoni li konna se niffaċċjaw.

Tibda l-​Persekuzzjoni Reliġjuża

Fl-​1964, il-​Malawi sar nazzjon indipendenti. Meta uffiċjali tal-​partit li kien qed imexxi saru jafu bil-​waqfa newtrali tagħna fejn tidħol il-​politika, huma pprovaw jisforzawna nixtru l-​biljetti taʼ sħubija mal-​partit.a Minħabba li jien u Emmas irrifjutajna li nixtruhom, xi membri tal-​Youth League qerdulna l-​għalqa tal-​qamħirrum li kellna​—l-​ikel prinċipali tagħna għas-​sena taʼ wara. Waqt li xi membri tal-​Youth League kienu qed jaqtgħu l-​qamħirrum, kienu qed ikantaw: “Għal dawk kollha li jirrifjutaw li jixtru l-​biljett taʼ Kamuzu [il-President Banda], l-​insetti se jieklu l-​qamħirrum aħdar tagħhom u dawn in-​nies se jibku għalih.” Madankollu, minkejja dan it-​telf taʼ ikel, ma qtajniex qalbna. Ħassejna l-​għajnuna taʼ Jehovah. Bl-​imħabba kollha, hu tana s-​saħħa li kellna bżonn.—Filippin 4:​12, 13.

Darba minnhom, f’Awissu taʼ l-​1964, kien tard bil-​lejl u jien kont id-​dar waħdi bit-​tfal. Konna reqdin, imma l-​ħoss taʼ kant fil-​bogħod qajjimni. Kienet il-​Gulewamkulu, soċjetà sigrieta tal-​biżaʼ li kienu żeffiena tribwali li jattakkaw lin-​nies u jagħmluha taʼ bir-​ruħhom li huma l-​ispirti t’antenati mejtin. Il-​Youth League kienet bagħtet lill-​Gulewamkulu biex jattakkawna. Malajr malajr qajjimt lit-​tfal, u qabel ma waslu d-​dar tagħna, ġrejna għal ġol-​foresta.

Minn fejn konna qed nistaħbew, rajna dawl jixgħel. Il-​Gulewamkulu kienu taw in-​nar lid-​dar tagħna li kellha s-​saqaf magħmul mit-​tiben. Inħarqet kompletament, flimkien maʼ dak kollu li kellna. X’ħin telqu mid-​dar tagħna li issa ma kienet xejn ħlief terrapien jaqbad, smajniehom jgħidu, “Għamilna nar tajjeb sabiex dak ix-​Xhud ikun jistaʼ jisħon.” Kemm irringrazzjajna lil Jehovah li kien irnexxielna naħarbu għall-​kenn! Veru, qerdu dak kollu li kellna, imma ma qerdux id-​determinazzjoni tagħna li nafdaw f’Jehovah minflok fil-​bnedmin.—Salm 118:8.

Sirna nafu li l-​Gulewamkulu kienu għamlu l-​istess ħaġa tant terribbli lil ħames familji oħra tax-​Xhieda taʼ Jehovah fil-​lokalità tagħna. Kemm fraħna u konna grati meta l-​aħwa minn kongregazzjonijiet fil-​viċin ġew biex jgħinuna! Huma reġgħu bnew id-​djar tagħna u tawna biżżejjed ikel għal diversi ġimgħat.

Il-​Persekuzzjoni Tiħrax

F’Settembru taʼ l-​1967 kien hemm kampanja madwar il-​pajjiż kollu biex jiġbru lix-​Xhieda taʼ Jehovah. Sabiex isibuna, irġiel żgħażagħ verament ħorox u bla ħniena​—membri tal-​Youth League u tal-​Malawi Young Pioneers, armati bi skieken tal-​ħsad​—fittxew lix-​Xhieda minn bieb għal bieb. Meta sabuhom, iż-​żgħażagħ offrewlhom biljetti taʼ partit politiku sabiex jixtruhom.

Meta waslu d-​dar tagħna, huma staqsewna jekk kellniex biljett. Jien għedtilhom: “Le, ma xtrajtx wieħed. M’iniex se nixtri wieħed issa, u lanqas se nixtri wieħed fil-​futur.” Għalhekk, huma qabdu lili u lir-​raġel tiegħi u ħaduna l-​istazzjon tal-​pulizija lokali, mingħajr ma tawna ebda ħin biex nieħdu xi ħaġa magħna. Meta t-​tfal iż-​żgħar tagħna ġew mill-​iskola, ma sabu lil ħadd id-​dar, u tgħidx kemm inkwetaw. Fortunatament, it-​tifel il-​kbir tagħna, Daniel, wasal id-​dar ftit tal-​ħin wara u sar jaf b’dak li kien ġara mingħand wieħed mill-​ġirien. Mill-​ewwel, qabad lil ħutu ż-​żgħar u mar l-​istazzjon tal-​pulizija. Waslu eżatt x’ħin il-​pulizija kienu qed jitfgħuna ġo trakkijiet biex jiħduna Lilongwe. It-​tfal ġew magħna.

F’Lilongwe, inżamm qorti finta fil-​kwartieri ġenerali tal-​pulizija. L-​uffiċjali staqsewna, “Se tibqgħu Xhieda taʼ Jehovah?” Aħna weġibna, “Iva!” għalkemm din it-​tweġiba kienet tfisser awtomatikament sentenza taʼ sebaʼ snin ħabs. Għal dawk li kienu “jmexxu” l-​organizzazzjoni, is-​sentenza kienet taʼ 14-il sena.

Wara li qattajna lejl mingħajr ikel u mistrieħ, il-​pulizija ħaduna l-​Ħabs taʼ Maula. Hemmhekk, iċ-​ċelel tant kienu ppakkjati li lanqas biss stajna nsibu post maʼ l-​art fejn norqdu! Il-​faċilità tat-​tojlit kienet barmil wieħed f’kull ċella ppakkjata. Il-​proviżjonijiet taʼ l-​ikel kienu żgħar ħafna u ħżiena. Wara ħmistax, l-​uffiċjali tal-​ħabs raw li konna nies paċifiċi u ħallewna nużaw il-​bitħa taʼ barra fejn kienu jagħmlu l-​eżerċizzji. Minħabba li konna ħafna nies miġburin flimkien, kuljum kellna opportunitajiet biex ninkuraġġixxu lil xulxin u biex nagħtu xiehda mill-​aqwa lill-​ħabsin l-​oħra. Mingħajr ma konna qed nistennew, tliet xhur biss wara s-​sentenza tagħna, ġejna meħlusin minħabba pressjoni internazzjonali li kien hemm fuq il-​gvern tal-​Malawi.

L-​uffiċjali tal-​pulizija ħeġġewna biex immorru lura d-​dar tagħna, imma qalulna wkoll li x-​Xhieda taʼ Jehovah kienu ġew projbiti fil-​Malawi. Din il-​projbizzjoni damet mill-​20 t’Ottubru taʼ l-​1967, sat-​12 t’Awissu taʼ l-​1993​—kważi 26 sena. Dawn kienu snin diffiċli, u madankollu bl-​għajnuna taʼ Jehovah stajna nżommu n-​newtralità stretta tagħna.

Ikkaċċjati bħall-​Annimali

F’Ottubru taʼ l-​1972, digriet mill-​gvern ta bidu għal perijodu ieħor taʼ persekuzzjoni vjolenti. Id-​digriet stqarr li x-​Xhieda taʼ Jehovah kollha kellhom jitkeċċew minn fuq ix-​xogħol u li x-​Xhieda kollha li jgħixu fl-​irħula kellhom jitkeċċew minn djarhom. Ix-​Xhieda ġew ikkaċċjati bħall-​annimali.

Dak il-​ħin, ħu Kristjan żagħżugħ ġie d-​dar tagħna b’messaġġ urġenti għal Emmas, ‘Il-​Youth League qed jippjanaw biex jaqtgħulek rasek, idendluha fuq zokk, u jiħduha għand il-​kapijiet lokali.’ Emmas malajr ħarab mid-​dar, imma mhux qabel m’għamel arranġamenti għalina biex immorru warajh malajr kemm jistaʼ jkun. Bl-​għaġla, jien bgħatt lit-​tfal ’il bogħod. Imbagħad, eżatt x’ħin kont se nitlaq, ġew għaxar membri tal-​Youth League jfittxu lil Emmas. Daħlu fid-​dar tagħna imma sabu li Emmas kien telaq. Bir-​rabja, l-​irġiel kaxkruni f’għalqa tal-​kannamiela fil-​viċin, hemmhekk bdew jagħtuni bis-​sieq u jsawtuni biz-​zkuk tal-​kannamiela. Ħallewni hemm għax ħasbuni mejta. Wara li erġajt ġejt f’tiegħi, tkaxkart lura sad-​dar.

Dak il-​lejl, fis-​satra tal-​lejl, Emmas irriskja ħajtu billi ġie lura d-​dar ifittixni. Meta sabni msawta bl-​ikrah, Emmas u wieħed ħabib tagħna li kellu karozza daħħluni ġo fiha bil-​galbu. Imbagħad soqna lejn id-​dar taʼ wieħed ħu f’Lilongwe, fejn bil-​mod il-​mod irkuprajt mill-​attakk u Emmas beda jippjana biex naħarbu mill-​pajjiż.

Refuġjati bla Ebda Post taʼ Kenn

It-​tifla tagħna Dinesi u r-​raġel tagħha kellhom trakk taʼ ħames tunnellati. Magħhom ħaddmu lil wieħed li darba kien membru tal-​Malawi Young Pioneers, imma li maż-​żmien tħassarna minħabba s-​sitwazzjoni tagħna. Hu offra li jgħin lilna u lil Xhieda oħra. Għal diversi ljieli dan is-​sewwieq mar għax-​Xhieda minn postijiet taʼ kenn li konna nkunu ftehemna minn qabel. Imbagħad kien jilbes l-​uniformi tiegħu tal-​Malawi Young Pioneers u jsuq it-​trakk mimli minn ġo diversi barrikati. Hu tgħidx kemm kien jirriskja biex jgħin mijiet taʼ Xhieda jaqsmu l-​fruntiera għaz-​Zambja.

Wara ftit tax-​xhur, l-​awtoritajiet taz-​Zambja reġgħu bagħtuna l-​Malawi; madankollu, ma stajniex immorru lura fir-​raħal fejn konna ngħixu. L-​affarijiet kollha li ħallejna warajna kienu nsterqu. Anki l-​pjanċi tal-​ħadid tas-​saqaf ittieħdu mid-​dar tagħna. Mingħajr ebda post fejn nistkennu, ħrabna lejn il-​Możambik u qgħadna fil-​kamp tar-​refuġjati taʼ Mlangeni għal sentejn u nofs. Madankollu, f’Ġunju taʼ l-​1975, gvern ġdid fil-​Możambik għalaq il-​kamp u ġagħalna nerġgħu lura lejn il-​Malawi, fejn il-​kundizzjonijiet ma kinux inbidlu għan-​nies taʼ Jehovah. Ma kellna l-​ebda għażla ħlief li nerġgħu naħarbu lejn iz-​Zambja għat-​tieni darba. Hemmhekk wasalna fil-​kamp tar-​refuġjati taʼ Chigumukire.

Xahrejn wara, filliera taʼ karozzi tal-​linja u trakkijiet militari waqfu mat-​triq, u mijiet taʼ suldati miz-​Zambja armati sa snienhom invadew il-​kamp. Qalulna li kienu nbnew djar sbieħ għalina u li huma kienu se jipprovdu t-​trasport biex jgħinuna naslu hemmhekk. Konna nafu li dan ma kienx veru. Is-​suldati bdew jimbottaw lin-​nies fuq it-​trakkijiet u l-​karozzi tal-​linja, u nqalaʼ ħafna paniku. Is-​suldati bdew jisparaw fl-​arja bl-​ixkubetti awtomatiċi tagħhom, u eluf minn ħutna telqu jiġru bil-​biżaʼ u tferrxu.

Fil-konfużjoni, lil Emmas waqqgħuh bi żball u rifsuh, imma wieħed mill-​aħwa għenu jerġaʼ jqum. Aħna ħsibna li dan kien il-​bidu tat-​tribulazzjoni l-​kbira. Ir-​refuġjati kollha telqu jiġru lura lejn il-​Malawi. Waqt li konna għadna z-​Zambja, wasalna ħdejn xmara, u l-​aħwa fformaw diversi katini billi qabdu idejn xulxin sabiex jgħinu lil kulħadd jaqsam mingħajr periklu. Imma, fin-​naħa l-​oħra tax-​xmara dawruna s-​suldati taz-​Zambja u ġagħluna nerġgħu mmorru lura l-​Malawi.

Meta għal darba oħra erġajna lura l-​Malawi, ma konniex nafu fejn se naqbdu mmorru. Qalulna li f’xi laqgħat politiċi u fil-​gazzetti, in-​nies kienu ġew avżati biex joqogħdu għassa għal “uċuħ ġodda,” li jirreferu għax-​Xhieda taʼ Jehovah, li forsi jaslu fl-​irħula tagħhom. Għalhekk, iddeċidejna li mmorru fil-​belt kapitali, fejn ma konniex se nispikkaw daqskemm kieku morna ġo raħal. Hemmhekk, irnexxielna nikru dar żgħira, u Emmas reġaʼ beda ż-​żjajjar tiegħu fil-​kongregazzjonijiet bħala indokratur li jivvjaġġa.

Nattendu l-​Laqgħat tal-​Kongregazzjoni

X’għenna nibqgħu leali? Il-​laqgħat tal-​kongregazzjoni! Fil-​kampijiet tar-​refuġjati kemm tal-​Możambik kif ukoll taz-​Zambja, aħna bil-​libertà konna nattendu l-​laqgħat li kienu jinżammu fi Swali tas-​Saltna sempliċi, b’soqfa magħmulin mit-​tiben. Kien perikoluż u diffiċli biex ninġabru għal-​laqgħat fil-​Malawi​—madankollu qatt ma ddispjaċiena. Sabiex ħadd ma jinduna bina, is-​soltu konna nżommu l-​laqgħat tard bil-​lejl u f’postijiet imwarrbin. Sabiex ma niġbdux attenzjoni lejn il-​laqgħat tagħna, ma konniex inċapċpu biex nesprimu l-​apprezzament tagħna għall-​kelliemi imma konna sempliċement nogħrku idejna flimkien.

Il-magħmudija kienet issir tard bil-​lejl. It-​tifel tagħna Abiyudi tgħammed f’okkażjoni bħal din. Wara t-​taħdita tal-​magħmudija, flimkien maʼ kandidati oħra, hu ttieħed fid-​dlam f’post kollu tajn fejn kienet tħaffret ħofra żgħira fejn tgħammdu.

Id-​Dar Żgħira Tagħna Post ’il Bogħod mill-​Periklu

Matul l-​aħħar snin tal-​projbizzjoni tal-​gvern, id-​dar tagħna f’Lilongwe ntużat bħala dar ’il bogħod mill-​periklu. Il-​posta u l-​letteratura mill-​uffiċċju tal-​fergħa taz-​Zambja kienu jaslu d-​dar tagħna bis-​sigriet. Xi aħwa li kienu jaqdu bħala messaġġiera permezz tar-​roti kienu jiġu d-​dar tagħna biex jieħdu dak li jkun wasal miz-​Zambja u jqassmu l-​posta u l-​letteratura f’kull parti tal-​Malawi. Ir-​rivisti tat-​Torri taʼ l-​Għassa li kienu jitqassmu kienu rqaq għax kienu stampati fuq karti li kienu jużaw għall-​Bibbja. Dan ħalla lill-​messaġġiera jġorru d-​doppju tar-​rivisti li kieku jkun possibbli kieku kienu stampati fuq karti regulari. Il-​messaġġiera kienu jqassmu t-​Torri taʼ l-​Għassa bħala rivisti żgħar ħafna li kien ikun fihom l-​artikli taʼ studji biss. Ir-​rivista kienet żgħira biżżejjed biex idaħħluha fil-​but tal-​qmis għax kien ikun fiha karta waħda biss.

Dawn il-​messaġġiera rriskjaw il-​libertà u l-​ħajja tagħhom meta kienu jgħaddu mill-​foresta fuq ir-​rota, kultant fid-​dlam tal-​lejl, b’kaxxi taʼ letteratura projbita ppakkjati fuq ir-​roti tagħhom. Minkejja l-​barrikati tal-​pulizija u perikli oħra, huma vvjaġġaw mijiet taʼ kilometri f’kull tip taʼ temp biex iwasslu ikel spiritwali lil ħuthom. Kemm kienu kuraġġużi dawk il-​messaġġiera!

Jehovah Jieħu Ħsieb ir-​Romol

F’Diċembru taʼ l-​1992, waqt li kien qed jagħti taħdita fiż-​żjara tas-​circuit, Emmas tatu puplesija. Wara, ma setax jitkellem iżjed. Ftit taż-​żmien wara, tagħtu puplesija oħra, li ħallietlu nofs ġismu paralizzat. Għalkemm kien diffiċli għalih li jkampa man-​nuqqas taʼ saħħa tiegħu, l-​għajnuna kollha mħabba li rċivejna mill-​kongregazzjoni taffietli mis-​sitwazzjoni kerha li kont ninsab fiha. Jien bqajt nieħu ħsieb ir-​raġel tiegħi d-​dar sakemm miet f’Novembru taʼ l-​1994, fl-​età taʼ 76 sena. Konna ilna miżżewġin 57 sena, u Emmas ra tmiem il-​projbizzjoni qabel ma miet. Imma għadni mnikkta s’issa bil-​mewt tar-​raġel leali tiegħi.

Wara li sfajt armla, ir-​raġel tat-​tifla tiegħi ħa r-​responsabbiltà f’idu biex jipprovdi mhux biss għal martu u l-​ħamest itfal tagħhom imma għalija wkoll. B’dispjaċir, wara marda li ma ħaditx fit-​tul, hu miet f’Awissu tas-​sena 2000. It-​tifla tiegħi kif kienet se ġġibilna l-​ikel u post fejn noqogħdu? Għal darba oħra, sibt li Jehovah jieħu ħsiebna u verament huwa “missier l-​iltiema u difensur tar-​romol.” (Salm 68:6 [68:​5, NW]) Jehovah, permezz tal-​qaddejja tiegħu fuq l-​art, ipprovdielna dar ġdida mill-​isbaħ. Dan kif? Meta l-​aħwa fil-​kongregazzjoni tagħna raw is-​sitwazzjoni diffiċli tagħna, huma bnewlna dar f’ħames ġimgħat biss! Aħwa minn kongregazzjonijiet oħra li kienu bennejja tal-​brikks ġew biex jgħinu. L-​imħabba u l-​qalb tajba li wrew dawn ix-​Xhieda ħallewna mistagħġbin għaliex id-​dar li bnewlna hija aħjar mid-​djar fejn jgħixu ħafna minnhom. Din it-​turija taʼ mħabba mill-​kongregazzjoni tat xiehda mill-​aħjar lil dawk li jgħixu fl-​inħawi tagħna. X’ħin immur norqod bil-​lejl, inħossni qisni fil-​Ġenna taʼ l-​art! Iva, id-​dar sabiħa ġdida tagħna hija magħmula mill-​brikks u taħlita taʼ ramel u ilma, imma bħalma osservaw ħafna, hija dar li verament inbniet bl-​imħabba.​—Galatin 6:10.

Jehovah Jieħu Ħsiebna Kontinwament

Għalkemm xi drabi kont għoddni se niddispra totalment, Jehovah kien ħanin miegħi. Sebgħa mid-​disat itfal tiegħi għadhom ħajjin, u l-​familja tiegħi issa għandha 123 membru. Kemm jien grata li l-​maġġuranza minnhom jaqdu lil Jehovah lealment!

Illum, fl-​età taʼ 82 sena, nimtela bil-​ferħ meta nara dak li wettaq l-​ispirtu t’Alla fil-​Malawi. Fl-​aħħar erbaʼ snin biss, jien rajt in-​numru taʼ Swali tas-​Saltna jitilgħu minn wieħed sa iktar minn 600. Issa għandna wkoll uffiċċju tal-​fergħa ġdid f’Lilongwe, u ngawdu abbundanza taʼ ikel spiritwali mingħajr projbizzjonijiet. Verament inħoss li esperjenzajt it-​twettiq tal-​wegħda t’Alla li nsibu f’Isaija 54:​17, fejn niġu assigurati: “Ebda arma magħmula kontrik ma tiswa.” Wara li ili naqdi lil Jehovah għal iktar minn 50 sena, jien konvinta li jkunu xi jkunu l-​provi li niffaċċjaw, Jehovah dejjem jieħu ħsiebna.

[Nota taʼ taħt]

[Stampa f’paġna 24]

Ir-​raġel tiegħi, Emmas, tgħammed f’April taʼ l-​1951

[Stampa f’paġna 26]

Grupp taʼ messaġġiera kuraġġużi

[Stampa f’paġna 28]

Dar mibnija bl-​imħabba