Kommemorazzjoni li Teffettwa Lilek

META kien fuq l-​art, Ġesù Kristu stabbilixxa kommemorazzjoni li tonora lil Alla. Din hija l-​unika ċerimonja reliġjuża li hu kkmanda direttament lis-​segwaċi tiegħu biex jikkommemoraw. Kienet l-​Ikla taʼ fil-​Għaxija tal-​Mulej, magħrufa wkoll bħala l-​Aħħar Ċena.

Immaġina li int qiegħed hemm tosserva bil-​moħbi l-​ġrajjiet li jwasslu għal din l-​okkażjoni. Ġesù u l-​appostli tiegħu nġabru flimkien fil-​kamra taʼ fuq ġo dar f’Ġerusalemm biex jiċċelebraw il-​Qbiż Lhudi. Għadhom kemm spiċċaw jieklu l-​ikla tal-​Qbiż skond id-​drawwa tagħhom, u din kienet tikkonsisti f’ħaruf mixwi, ħaxix morr, ħobż bla ħmira, u nbid aħmar. Ġuda l-​Iskarjota, l-​appostlu li ma baqax leali, intalab jitlaq u dalwaqt se jittradixxi lil Sidu. (Mattew 26:17-25; Ġwanni 13:21, 26-30) Ġesù jinsab waħdu mal-​11-il appostlu leali tiegħu. Mattew hu wieħed minnhom.

Skond ir-​rakkont taʼ Mattew, li kien xhud taʼ dak li ġara, dan hu kif Ġesù stabbilixxa l-​Ikla taʼ fil-​Għaxija tal-​Mulej: “Ġesù ħa l-​ħobż [bla ħmira] f’idejh, qal il-​barka, qasmu, newwlu lid-​dixxipli u qal: ‘Ħudu, kulu, dan hu ġismi.’ Mbagħad ħa l-​kalċi [bl-inbid] f’idejh, radd il-​ħajr, newwlilhom il-​kalċi u qal: ‘Ixorbu lkoll minnu, għax dan hu demmi, id-​demm tal-​Patt, li jixxerred għall-​kotra għall-​maħfra tad-​dnubiet.’”—Mattew 26:26-28.

Ġesù għala stabbilixxa l-​Ikla taʼ fil-​Għaxija tal-​Mulej? Meta għamel dan, hu għala uża ħobż bla ħmira u nbid aħmar? Kellhom id-​dixxipli kollha taʼ Ġesù jieħdu mill-​emblemi? Din l-​ikla kemm-il darba kellha tiġi kommemorata? U għandha verament tifsira għalik?