It-Tfittxija Għal Gvern Tajjeb
“Il-pajjiżi tad-dinja qed isiru jiddependu iktar minn xulxin u dan il-fatt wassal għal serje taʼ problemi globali li pajjiżi individwali ma jistgħux ikomplu jsolvuhom waħedhom. L-uniku mod kif nistgħu nkampaw maż-żjieda fil-perikli u l-isfidi li l-umanità qed tiffaċċja huwa permezz taʼ kooperazzjoni dinjija.”—Ghulam Umar, analista politiku Pakistan.
ID-DINJA taʼ llum hija mimlija paradossi. Għalkemm ħafna nies imdawrin b’abbundanza materjali, huma bilkemm jirnexxilhom jaqilgħu x’jieklu. F’din l-era elettronika wieħed jistaʼ jgħid li n-nies huma fost l-iktar uħud mgħallmin u intelliġenti li qatt kien hawn, u madankollu iktar u iktar nies qed isibuha diffiċli biex ikollhom impjieg fiss. Għalkemm il-bnedmin jidhru li għandhom iktar libertà minn qatt qabel, miljuni taʼ nies jgħixu f’atmosfera taʼ biżaʼ, nuqqas taʼ sigurtà, u inċertezza. Għalkemm aħna nistgħu nkunu mdawrin b’opportunitajiet attraenti, ħafna huma dawk li tilfu kull tama minħabba l-korruzzjoni u l-ksur tal-liġi f’kull livell tas-soċjetà.
L-umanità tant qed tiffaċċja problemi fuq skala kbira li pajjiż waħdu, jew saħansitra grupp taʼ pajjiżi, m’għandu l-ebda tama li jsolvihom. Għaldaqstant, ħafna osservaturi waslu għall-konklużjoni li biex il-paċi u s-sigurtà fid-dinja jsiru realtà, il-pajjiżi kollha jridu jingħaqdu taħt gvern wieħed. Per eżempju, Albert Einstein kien ilu ħafna jappoġġa din l-idea. Fl-1946, hu ddikjara: “Jien ċert li l-maġġuranza tan-nies fid-dinja jippreferu jgħixu fil-paċi u s-sigurtà . . . Ix-xewqa taʼ l-umanità għall-paċi tistaʼ titwettaq biss billi jinħoloq gvern dinji.”
Iktar minn ħamsin sena wara, dan il-bżonn vitali għadu ma ġiex sodisfat. F’artiklu dwar l-isfidi tas-seklu 21, il-gazzetta Le Monde f’Pariġi, Franza, qalet: “Hemm bżonn li nibnu l-pedamenti ġudizzjarji, amministrattivi, u kostituzzjonali taʼ gvern internazzjonali li jkun kapaċi jaġixxi minnufih, fi kwalunkwe naħa tad-dinja, f’każijiet taʼ massakri etniċi. Irridu naċċettaw l-idea li minn issa ’l quddiem l-Art hija pajjiż wieħed.” Min jew liema ħaġa għandha l-poter u l-ħila li twettaq dan sabiex inkunu ċerti li l-umanità jkollha futur mimli paċi?
Hija l-Ġnus Magħquda s-Soluzzjoni?
Ħafna wħud jittamaw li l-organizzazzjoni tal-Ġnus Magħquda se ġġib paċi dinjija. Hija l-Ġnus Magħquda gvern li jistaʼ jġib paċi u sigurtà veri fid-dinja? M’hemmx dubju li jingħad ħafna kliem politiku sabiħ li jqanqal lin-nies u jimliehom bit-tama. Per eżempju, fid-“Dikjarazzjoni tal-Millennju” għas-sena 2000, l-Assemblea Ġenerali tal-Ġnus Magħquda għamlet din ir-riżoluzzjoni solenni: “Se nagħmlu ħilitna kollha biex neħilsu lil niesna mill-pjaga tal-gwerra, fil-pajjiż [membru] stess jew bejn pajjiż [membru] u ieħor, pjaga li qatlet iktar minn 5 miljun ruħ f’dawn l-aħħar għaxar snin.” Minħabba proklamazzjonijiet bħal dawn, il-Ġnus Magħquda qalgħet ħafna tifħir u ammirazzjoni minn bosta oqsma, kif ukoll irċiviet il-Premju Nobel għall-Paċi fl-2001. Il-Kumitat Norveġiż tan-Nobel faħħar b’dan il-mod lill-Ġnus Magħquda u qal li “l-unika triq taʼ suċċess għal paċi u kooperazzjoni globali hija dik tal-Ġnus Magħquda.”
Minkejja dan kollu, uriet l-organizzazzjoni tal-Ġnus Magħquda, imwaqqfa fl-1945, li hija gvern li hu kapaċi jġib paċi dinjija ġenwina u dejjiema? Le, għax ħafna mill-isforzi tagħha ġew fix-xejn minħabba l-ambizzjonijiet egoistiċi u nazzjonalistiċi tal-ġnus membri tagħha. Skond editur taʼ gazzetta, l-impressjoni tan-nies in ġenerali hija li l-Ġnus Magħquda m’hi xejn ħlief “tip taʼ barometru li jindika x’inhi l-opinjoni globali” u li “l-aġenda tagħha hija mimlija problemi li ilhom jiġu diskussi għal snin sħaħ mingħajr ma sar kważi ebda pass ’il quddiem biex jiġu solvuti.” Tibqaʼ l-mistoqsija: Veru li xi darba l-pajjiżi tad-dinja se jingħaqdu?
Il-Bibbja tirrivela li dalwaqt se jkun hawn għaqda bħal din. Din kif se sseħħ? U liema gvern se jġibha? Għat-tweġibiet, jekk jogħġbok, aqra l-artiklu li jmiss.
[Stampa f’paġna 3]
Einstein kien jappoġġa l-idea li hemm bżonn gvern dinji
[Sors]
Einstein: U.S. National Archives photo