Il-​Missierna—Dak li Tfisser Għalik

IL-​MISSIERNA, kif mogħtija minn Ġesù Kristu fil-​Priedka taʼ fuq il-​Muntanja, tinsab fil-​Bibbja f’Mattew kapitlu 6, versi 9 sa 13. Eżatt qabel din it-​talba, Ġesù qal: “Intom u titolbu toqogħdux tlabalbu bħall-​pagani; dawn mingħalihom li, iktar ma jgħidu, iktar jinstemgħu.”—Mattew 6:7.

Mela, jidher ċar li Ġesù ma qalx il-​Missierna bl-​intenzjoni li tiġi ripetuta kelma b’kelma. Huwa minnu li iktar tard hu rripeta din it-​talba għall-​benefiċċju taʼ udjenza differenti. (Luqa 11:2-4) Imma l-​mod kif inhu mpoġġi l-​kliem fit-​talba fl-​Evanġelju taʼ Mattew hu kemxejn differenti minn dak taʼ Luqa. Iktar minn hekk, it-​talb li qalu iktar tard Ġesù u d-​dixxipli tiegħu ma kienx jaqbel eżatt mal-​kliem speċifiku tat-​talba mudell tiegħu.

Il-Missierna għala hija mniżżla fil-​Bibbja? Permezz taʼ dan il-​mudell, Ġesù jgħallimna kif it-​talb tagħna jistaʼ jkun aċċettat minn Alla. F’din it-​talba nsibu wkoll it-​tweġibiet għal xi mistoqsijiet bażiċi dwar ħajjitna. Mela ejja nikkunsidraw kull parti tat-​Talba tal-​Missierna.

X’Inhu l-​Isem t’Alla?

“Missierna, li inti fis-​smewwiet, jitqaddes ismek.” (Mattew 6:9) Dan il-​kliem fil-​bidu tat-​talba mudell jgħinna nersqu eqreb lejn Alla billi nsejħulu “Missierna.” Bħalma tfajjel jinġibed b’mod naturali lejn ġenitur li jħobbu u jifhmu, hekk ukoll aħna nistgħu nersqu lejn Missierna tas-​sema b’fiduċja li hu jrid jismagħna. “Int, li tismaʼ talbna,” kanta s-​Sultan David, “quddiemek jersaq kull bniedem.”—Salm 65:3, 4a (65:2, NW).

Ġesù jgħallimna nitolbu biex isem Alla jiġi mqaddes. Imma x’inhu l-​isem t’Alla? Il-​Bibbja twieġeb hekk: “Jaħweh hu ismek, li int waħdek l-​Għoli fuq l-​art kollha.” (Salm 83:19 [83:18, NW]) Qatt qrajtu l-​isem Jehovah, jew Jaħweh, fil-​Bibbja?

Fil-fatt, l-​isem t’Alla, Jehovah, jidher madwar 7,000 darba fil-​manuskritti antiki tal-​Bibbja. Madankollu, xi tradutturi saħansitra waslu biex neħħew dan l-​isem mill-​verżjonijiet tagħhom tal-​Bibbja. Għalhekk, bix-​xieraq li nitolbu lill-​Ħallieq tagħna biex iqaddes ismu. (Eżekjel 36:23) Mod wieħed kif naġixxu fi qbil maʼ din it-​talba hu billi nużaw l-​isem Jehovah meta nitolbu lil Alla.

Mara li jisimha Patricia trabbiet bħala Kattolika u kienet tafha sew it-​Talba tal-​Missierna. Kif irreaġixxiet meta waħda mix-​Xhieda taʼ Jehovah urietha l-​isem t’Alla fil-​Bibbja? “Ma ridtx nemmen!” qalet hi bi stagħġib. “Allura, fittixtu fil-​Bibbja tiegħi, u sibtu fiha wkoll. Imbagħad, ix-​Xhud urietni Mattew 6:9, 10 u spjegatli li t-​Talba tal-​Missierna tirreferi għall-​isem t’Alla. Tgħidx kemm ħassejtni ferħana u tlabtha tistudja l-​Bibbja miegħi.”

Ir-​Rieda t’Alla Se Sseħħ fuq l-​Art

“Tiġi saltnatek, ikun li trid int, kif fis-​sema, hekkda fl-​art.” (Mattew 6:10) Kif se sseħħ din il-​parti tat-​talba mudell taʼ Ġesù? Ħafna nies jimmaġinaw is-​sema bħala post taʼ paċi u serħan. L-​Iskrittura tirreferi għas-​sema bħala “l-​għamara mqaddsa u glorjuża” taʼ Jehovah. (Isaija 63:15) Mhux taʼ b’xejn li aħna nitolbu biex ir-​rieda t’Alla sseħħ “kif fis-​sema” hekkda fl-​art! Imma dan jistaʼ qatt iseħħ?

Danjel, il-​profeta taʼ Jehovah, bassar: “Alla tas-​sema jqajjem saltna li ma tinqered qatt, u li l-​ħakma tagħha ma tgħaddix għal poplu ieħor. Hija tfarrak u ttemm is-​saltniet l-​oħra kollha [taʼ l-​art], waqt li hi tibqaʼ wieqfa għal dejjem.” (Danjel 2:44) Din is-​Saltna, jew gvern, tas-​sema dalwaqt se taġixxi sabiex iġġib paċi globali permezz taʼ ħakma ġusta u sewwa.—2 Pietru 3:13.

Meta individwu jitlob biex tiġi s-​Saltna t’Alla u sseħħ ir-​rieda tiegħu fuq l-​art ikun qed jesprimi l-​fidi tiegħu u mhux se jkun diżappuntat. L-​appostlu Kristjan Ġwanni kiteb: “Smajt leħen qawwi ġej mit-​tron jgħid: ‘Din hi l-​għamara taʼ Alla mal-​bnedmin; u hu jgħammar magħhom, u huma jkunu l-​poplu tiegħu, u Alla nnifsu jkun magħhom, Alla tagħhom. Hu jixxuttalhom kull demgħa minn għajnejhom: ma jkunx hemm iżjed mewt, anqas biki jew għajat jew tbatija ma jkun hemm iżjed, għax għabu l-​ħwejjeġ taʼ qabel.’” Wara dan, Ġwanni żied: “Mbagħad dak li hu bilqiegħda fuq it-​tron qal: . . . ‘Ikteb, għax dawn il-​kelmiet huma minnhom u taʼ min joqgħod fuqhom.’”—Apokalissi 21:3-5.

It-​Talb u l-​Bżonnijiet Fiżiċi Tagħna

Minn dak li qal fit-​talba mudell, Ġesù wera li fit-​talb tagħna għandna nagħtu prijorità lil dak li hu marbut maʼ l-​isem u r-​rieda t’Alla. Però, it-​talba mudell tkompli b’talbiet persunali li kif jixraq huma preżentati lil Jehovah.

L-​ewwel waħda minn dawn hi: “Ħobżna taʼ kuljum agħtina llum.” (Mattew 6:11) Din m’hijiex talba għall-​għana materjali. Ġesù ħeġġiġna nitolbu: “Ħobżna taʼ kuljum agħtina kuljum,” jiġifieri skond ma neħtieġu f’dan il-​jum. (Luqa 11:3) Fi qbil mat-​Talba tal-​Missierna, nistgħu nitolbu b’fiduċja sħiħa li Alla se jipprovdi l-​bżonnijiet tagħna taʼ kuljum jekk inħobbuh u nobduh.

L-inkwiet żejjed dwar problemi ekonomiċi jistaʼ jġagħalna nittraskuraw il-​bżonn spiritwali tagħna, u għalhekk nonqsu milli nagħmlu dak li Alla jistenna minna. Imma jekk inpoġġu l-​qima t’Alla l-​ewwel f’ħajjitna, nistgħu nkunu ċerti li meta nitolbu għall-​bżonnijiet materjali, bħall-​ilbies u l-​ikel, hu se jismagħna. Ġesù qal: “[“Ibqgħu,” NW] fittxu l-​ewwel is-​Saltna u l-​ġustizzja taʼ Alla, u dan kollu jingħatalkom ukoll.” (Mattew 6:26-33) Hija sfida għalina biex infittxu l-​ġustizzja t’Alla, ladarba aħna lkoll imperfetti u għandna bżonn il-​maħfra. (Rumani 5:12) Il-​Missierna titkellem dwar dan ukoll.

It-​Talb Tagħna u l-​Maħfra

“Aħfrilna dnubietna, bħalma naħfru lil min hu ħati għalina.” (Mattew 6:12; Luqa 11:4) Tassew li Alla Jehovah lest li jaħfrilna dnubietna?

Għalkemm is-​Sultan David taʼ Iżrael tal-​qedem għamel dnubiet gravi, hu nidem u talab b’mod fiduċjuż: “Int, Sidi, twajjeb u taħfer, kollok tjieba għal kull min isejjaħlek.” (Salm 86:5) Kemm hu taʼ faraġ dan il-​ħsieb! Missierna tas-​sema hu lest li ‘jaħfer’ id-​dnubiet taʼ dawk li jsejħulu bi ndiema. Alla Jehovah jistaʼ jaħfrilna dnubietna għalkollox.

Madankollu, Ġesù semma kundizzjoni waħda: Biex Alla jaħfrilna, irridu naħfru lill-​oħrajn. (Mattew 6:14, 15) Għalkemm ir-​raġel ġust Ġob ġie trattat ħażin minn tlett iħbieb, hu ħafrilhom u saħansitra talab għalihom. (Ġob 42:10) Jekk naħfru lil dawk li jonqsuna, se nogħġbu lil Alla u se nkunu nistgħu nibbenefikaw mill-​ħniena tiegħu.

Minħabba li Alla hu lest jismaʼ t-​talb tagħna, aħna għandna nitqanqlu biex infittxu l-​approvazzjoni tiegħu. U dan nistgħu nagħmluh avolja aħna imperfetti. (Mattew 26:41) Anki f’dan il-​każ, Jehovah jistaʼ jgħinna, bħalma wera Ġesù billi kkonkluda t-​talba mudell b’rikjesta vitali.

Għajnuna biex Nimxu fit-​Triq it-​Tajba

“U la ddaħħalniex fit-​tiġrib, iżda eħlisna mid-​deni.” (Mattew 6:13) Jehovah ma jabbandunaniex fit-​tiġrib u lanqas ma jġagħalna naqgħu fid-​dnub. Il-​Kelma tiegħu tistqarr: “Alla ma jistax jiġġarrab għall-​ħażin, u anqas m’hu se jġarrab lil ħadd.” (Ġakbu 1:13) Alla jħallina niġu mġarrbin, imma hu jistaʼ jeħlisna mit-​Tentatur il-​Kbir—dak li jagħmlilna ‘d-​deni’ magħruf bħala Satana x-​Xitan.

L-appostlu Pietru ħeġġeġ lil sħabu l-​Kristjani: “Kunu meqjusa u għassu. L-​għadu tagħkom ix-​Xitan qisu ljun jgħajjat, idur u jfittex ’il min sa jiblaʼ.” (1 Pietru 5:8) Satana ġarrab anki lir-​raġel perfett Ġesù Kristu! X’kienet il-​mira tax-​Xitan? Hu ried ibiegħed lil Ġesù mill-​qima pura t’Alla Jehovah. (Mattew 4:1-11) Jekk qed tipprova taqdi lil Alla, il-​mira taʼ Satana hi li jiblaʼ lilek ukoll!

Permezz tad-​dinja li tinsab taħt idejh, ix-​Xitan jistaʼ jipprova jġarrabna biex nieħdu sehem fi prattiċi li Alla ma japprovahomx. (1 Ġwanni 5:19) Allura, hu vitali li regolarment nersqu lejn Alla biex nitolbuh l-​għajnuna, speċjalment meta niffaċċjaw xi tentazzjoni persistenti. U jekk inqimu lil Jehovah skond il-​Kelma ispirata tiegħu, il-​Bibbja, hu se jeħlisna billi jgħinna nieqfu lix-​Xitan. Il-​Bibbja tgħidilna li ‘Alla hu [“leali,” NW] u ma jħalliniex niġġarrbu iktar milli nifilħu.’—1 Korintin 10:13.

Il-​Fidi f’Alla Essenzjali

Kemm iqawwilna qalbna l-​fatt li nafu kemm Missierna tas-​sema jinteressah minn kull wieħed u waħda minna! Hu saħansitra ried li Ibnu, Ġesù Kristu, jgħallimna nitolbu. Żgur li dan iqanqalna biex inkunu rridu nogħġbu lil Alla Jehovah. Dan kif nistgħu nagħmluh?

Il-Bibbja tistqarr: “Mingħajr il-​fidi ma jistax ikun li wieħed jogħġob lil Alla. Għax kull min jersaq lejn Alla jeħtieġlu jemmen li Alla jeżisti u li hu jagħti l-​ħlas xieraq lil dawk li jfittxuh [“bil-​ħeġġa,” NW].” (Lhud 11:6) Kif nistgħu niksbu fidi bħal din? Il-​Bibbja tgħid: “Il-​fidi . . . tiġi mis-​smigħ.” (Rumani 10:17) Ix-​Xhieda taʼ Jehovah jieħdu pjaċir jitkellmu dwar affarijiet Skritturali maʼ kulmin jixxennaq biex jaqdi lil Alla b’fidi vera.

Nittamaw li din id-​diskussjoni dwar it-​Talba tal-​Missierna għenitek tapprezza iktar it-​tifsira tagħha. Jekk tieħu iktar għarfien dwar Jehovah u l-​barkiet li jagħti lil “dawk li jfittxuh bil-​ħeġġa,” int se tkun tistaʼ ssaħħaħ il-​fidi tiegħek f’Alla. Jalla titgħallem iktar dwaru u dwar l-​iskopijiet tiegħu sabiex tgawdi relazzjoni intima maʼ Missierek tas-​sema għal dejjem.—Ġwanni 17:3.

[Kumment f’paġna 5]

“Missierna, li inti fis-​smewwiet, jitqaddes ismek, tiġi saltnatek, ikun li trid int, kif fis-​sema, hekkda fl-​art. Ħobżna taʼ kuljum agħtina llum. Aħfrilna dnubietna, bħalma naħfru lil min hu ħati għalina. U la ddaħħalniex fit-​tiġrib, iżda eħlisna mid-​deni.”—Mattew 6:9-13

[Stampa f’paġna 7]

Jehovah jipprovdi l-​bżonnijiet taʼ dawk li jħobbuh

[Stampa f’paġna 7]

Alla jgħinna wkoll biex nieqfu lix-​Xitan

[Stampa f’paġna 7]

Jekk bħal Ġob aħna naħfru lil min jonqosna, nistgħu nibbenefikaw mill-​ħniena t’Alla